Khrist Kiang Zuatna - Chapter 1: PASIAN IN MIHING HONG ITNA

NATE leh Lai Siangtho in Pasian’ hong itna hong gen uh hi. Vana om ih Pa in nuntakna, pilna leh lungdamna nak ahi hi. A lamdang ahoih nate en dih in. Mihing bek hi lo, ganhing khempeuhte’ tangsapna leh nopsakna ding a hutna ngaihsun dih in. Lei a lungdam saka a thak suah sak nitang leh guahtuite, mualte, tuipite leh zangleite in Piangsakpa’ hong itna hong gen ciat uh hi. A pian sak khempeuhte’ kitangsapna nisima a hu pa in Pasian ahi hi. La phuak siam pa in zong:
“Mi khempeuhte’ mit in Nang hong en uha, ahun hun in amaute’ an ding na pia hi. Na khut na phalha, a nungta khempeuhte na lungkim sak hi,” ci hi. (Late 145:15, 16).

Pasian in mihing a siangtho sinsen leh nuam a sa dingin bawl a; leitung zong Piangsakpa’ khut pan a hong om khiat laitakin, melhemna leh siatna neu kha beek a nei kei hi. Lungkhamna leh sihna ahong tun pen ki-itna thukham ahi – Pasian’ thukham palsatna ahi hi. Hi napi, mawhna pan a hong piang gentheihna sung nangawn ah Pasian’ hong itna hong kilang lai hi. Mihing’ bawlin Pasian in leitung samsia hi (Piancilna 3:17). Ling leh kiak – mihing’ nuntak agim atawl sak haksatna leh sittelnate – mihing’ hoih zawkna dinga a kiseh hi-a, mawhna’ hanga piang siatna leh kiam sukna pana mihing a dom tohna dinga Pasian’ pattahna ahi hi. Hih leitung a kisia ahih hangin dahna leh lungmanna ngentang hi khin sam lo hi. Nate’ sung mahmah ah lametna leh hehnepna thute om hi. Kiak tungah paakte palha, lingkungte paak in tuam hi.

“Pasian in ki-itna ahi hi,” ci-in paak ngum khempeuh tung leh lono sel tung khempeuh ah kigelh hi. A langaihte uh huih laka a ging hiauhiau sak a it huai vasate, a gim namtui uh huih lak teng a kizel sak a deih huai paakte, a hiang zaam-a a nim dildial gamlak singkung sang pipite in, Pasian in pa banga limtaka a hong kepna leh A tate hong lungdam sak nuam a hihna hong lak uh hi.

Lai Siangtho in Pasian’ zia leh tong hong lak hi. Hong itna leh hong hehpihna te zong Amah mah in hong gen hi. Moses in, “Na thupina hong lak in,” a cih ciangin Topa in, “Ka hoihna khempeuh na mai-ah kong kilang sak ding hi,” ci hi (Paikhiatna 33:18, 19). Moses’ mai-ah Topa pai-in A thupina laka, “Topa, Topa in, khualna leh hehpihna, lungduaina, dikna leh cihtakna nei-a, mi tul tampite ita, khialhna, thu palsatna leh mawhna a maisak Pasian ahi hi,” ci hi (Paikhiatna 34:6, 7). Amah “heh hakin, migi mahmah hi,” “bang hang hiam cih leh Amah in mi-hehpih nuamsa hi,” (Jonah 4:2; Micah 7:18).

Pasian in van le lei-a a kisim zo lo nate tawh ih lungsimte Ama tungah khih hi. Na a tuamtuam te pan ahi-a, mihing’ lungsim in atheih theih ding leitung kikhihna aduai bel leh ato belte tawh ahi zongin, eite’ kiangah Amah mah hong kihil hi. Ahi zongin hihte in Ama hong itna a kicingin hong lak zo lo hi. Hih bangin a tuamtuam in hong kilah hangin, mite in kihtakna tawh Pasian a etna dingun, hoihna’ galpa in mihing’ lungsimte zing sak hi; mite in Pasian pen a genhak leh mawhna a maisak nuam lo bangin ngaihsun uh hi. Mite in Pasian pen a gi lo thukhenpa, a ngoltol, a phincil sumkhonpa banga a ngaihsutna dingun Satan in amaute khem hi. Mite’ tungah thu a khen theihna dingin mite’ khialhna leh mawhnate a en cik giugiau pa bangin Piangsakpa pen Satan in kilangsak hi. Tua ahih manin Pasian’ hong itna leitung mite’ kiangah hong lak ding leh Satan’ hong khemnate ahem khia dingin, Jesu hong pai-in mite lakah hong nungta hi.

Pa hong lak tel dingin van panin Pasian’ Tapa hong pai hi. “Kuamah in Pasian a mu ngei kei hi; Pa’ ang sunga a om Tapa khat tang bek mah in Pa a hong kilangsak hi” (John 1:18). “Tapa le Tapa in a kitheihsak nop mite simloh kuamah in Pa a thei kei hi” (Matthew 11:27). Nungzuite khat in, “Pa hong lak in,” a cih ciangin Jesu in, “Nang tawh sau veipi om khawm khin napi-in, Kei hong thei nai lo na hi hiam, Philip aw? Kei hong mu mi in Pa amu ahi hi; tua hi napi-in bang hangin, Pa hong lakin, hong ci na hi hiam?” ci hi (John 14:8, 9).

Leitung-a hong paina thu a genna ah Jesu in, “Topa in, mizawngte’ kiangah lungdamna thu agen dingin Kei sathau hong nilh zo hi; lungsim kitamzante adamsak ding, thongkiate suahtakna thu agen ding leh, mit-tawte khua amusak ding; bawlsiatna a thuakte akhah khia dingin kei hong sawl zo hi,” ci hi (Luke 4:18). Hih pen Ama nasep ahi hi. Pai kawikawi-in thupha bawla, Satan in abawl siat khempeuh adamsak hi. Amah pai-in a cinate khempeuh uh dam sak ahih manin, inn khat beek ah cina-a atau khat zong a om lohna khua tampi om hi. Amah Pasian’ sawl ahih lam a nasepna in kilangsak hi. Ama gamtatna khempeuh ah itna, hehpihna leh khualnate kilang hi; Ama lungsim in mihing’ tate hong khasiat hi. Mihing’ kitang sapnate ahuh theihna dingin Amah in mihing’ pianzia hong la hi. A zawng bel leh a niam belte in zong Amah nai ngam uh hi. Naupangnote nangawn in Amah ngai uh hi. A khuk tungah kahto-in, itna le migitna tawh a kidim Topa’ maitang enen nuam uh hi.

Jesu in, thumaan kam khat zong ngawh gen lo-in, itna tawh gen khia tawntung hi. Mite tawh a kithuahna ah thusiamna, thukhualna le thungaihnate zang tawntung hi. Phawk theihna a nei mihingte’ tungah Amah ngongtat thei lo hi, na a kisa ding kam khauh khat zong pau ngei lo hi. Mihing’ thanemna zong mawh sak lo hi. Thuman agen ciangin itna tawh gen khia tawntung hi. Kineih khemna, up lohna le khialhnate a selpho hangin, a taina kammalte khitui tawh ging khia hi. Lampi, thuman le hinna ahi Amah a sang nuam lo, a it khuapi Jerusalem, Jesu in kah hi. Amaute in Honpa ahi Amah nial uh ahih hangin, Amah in amaute hehpih veve hi. Ama nuntakna pen angsung niala midangte khualna ahi hi. Mi khempeuh Ama mit ah manpha hi. Amah in Pasian’ thupina apuak ngei hangin, Pasian’ innkuan pih khempeuh a khualna-in hong kiniam khiat hi. Mi khempeuh mawh nei hi-a, a hon khia dinga Amah hong pai ahi hi.

Hihte in Ama nuntakna pana hong kilang khia Christ’ zia-le-tong ahi hi. Pasian’ zia-le-tong zong hipah hi. Pa Pasian’ lungtang panin khasiat pihna luitui hong luang khia-a, Christ tung tawnin mihing’ tate’ kiang hong tung hi. A migi, a hehpih thei Honpa Jesu pen “mihing-a hong kilang” Pasian ahi hi (1 Timothy 3:16).

Eite hong tat khiatna dingin Jesu hong nungta-in, gimna hong thuakin, hong si hi. Tawntung lungdamna ih ngah theihna dingin Amah “dahna athuak Mi-pa” hong suak hi. Gen khit zawh loh a vanglian vantung panin, mawhna tawh apoi ahem, sihna le samsiatna tawh amial cip leitung ah ahong pai dingin, hehpihna le thutak tawh a kidim A Tapa, Pasian in phal hi. Maizumna, zahkona, simmawhna, muhdahna le sihna athuak ding, Ama itna ang-lum le vantung-mite’ pahtawina a nusia dingin phal hi. “Eite’ lungmuanna dingin taina Ama tungah tu hi; Amah a kivuakna tawh eite ih dam hi.” (Isaiah 53:5). Gamlak khawng, Gethsemane huan khawng le singlamteh tung khawng ah a om lai en un! Kawk baang lo Pasian’ Tapa, mawhna van-gik kisuan hi. Pasian tawh pum khat ahi ngei pa in, mawhna hanga Pasian le mihing a kikhenna alau huai dan hong sin hi. A muk panin, “Ka Pasian, Ka Pasian aw, bang dingin hong taisan na hiam?” ci-a lunggim a kikona aw ging khia hi (Matthew 27:46). Pasian Tapa’ lungtang a kitam kham sak pen – Pasian le mihing akhen, a kihtak huai mahmah mawhna van gikpi ahi hi.

Ahi zongin hih kipiak khiatna lianpi pen, Pasian in mihing a it nading, hot khiat nopna lungsim a neih na dinga a kibawl hi lo hi. Hi peuh mah lo hi! “Pasian in leitung mite it mahmah ahih manin A Tapa khat bek a neihsun a hong pia hi” (John 3:16). Hih kipum piakna hangin Pasian in eite a hong it hi lo hi. Amah in eite hong it ahih manin hih kipum piakna Ama’n hong bawl hizaw hi. A puksa leitung ah A itna a hong sun suk theihna dingin Christ pen alawng ahi hi. “Christ sungah Pasian om a, leitung mite Amah tawh kilemsak hi” (2 Corin 5:19). Pasian in A Tapa tawh thuak khawm hi. Gethsemane a khakham veina le Calvary-a sihna ah Ki-itna Pasian in eite hong tatna a man pia zo hi.

Jesu in, “Tua ahih manin Ka Pa in Kei hong it hi, banghang hiam cihleh Ka lak kik theih dingin Ka nuntakna Ka pia khia hi,” ci hi (John 10:17). Tua pen, “Ka Pa in note hong it mahmaha, note’ man dingin Ka nuntakna Ka piak manin Amah in Kei nangawn hong it zaw-kan hi. Note’ Ai-awh leh Ciamna-kip Ka suahna, Ka nuntakna Ka piak khiatna, na leibatte uh le na thu palsatnate uh Ka kisuatnate hangin Ka Pa in Kei hong it hi; Keima kipum-piakna tawh Pasian’ dikna kilanga, Jesu a um mite a Diksakpa zong suak lai hi,” cihna ahi hi.

Pasian’ Tapa sim loh kuamah in eite hong tan khia zo lo hi; banghang hiam cihleh Pa’ ang lum a om pa bek mah in Ama thu gen khia thei hi. Pasian’ hong itna a sanna le a thukna a thei pa bek mah in tua itna kilang khia sak thei hi. A puk sa mihing’ tanga Christ kipum-piakna simloh bangmah dang in a mangthang mite kiangah Pasian’ itna gen khia thei lo hi.

“Pasian in leitung mite it mahmah ahih manin A Tapa khat bek neihsun hong pia hi.” Mite’ laka hong nungta ding bek, mite’ mawhna apua ding bek le mite’ tanga a si ding bek a A hong piak hi lo hi. A puk sa mihingte tungah ahong pia ahi hi. Mihingte’ lawpnate le kitang sapnate Amah mah in ahong sin ding ahi hi. Pasian tawh pum khat ahi pa pen mihing’ tate tawh a kitat ngei lo khau panin Amah mah hong kizom hi. Mihingte pen Ka naute a hong cih ding Jesu maizum lo hi (Hebrews 2:11); Amah pen ih kithoihna, ih Palai le ih Sanggampa hi-a, Pa’ tokhom mai-ah ih mihing lim mah pua a A tatsa mite tawh pum khat ahong suak – mihing Tapa ahi hi. Hihte khempeuh in, mihing in Pasian’ itna kilang saka a siangtho nuamna a neih-na dingin, mawhna hanga siatna le kiam sukna pana mihing a domto ding ahi hi.

Eite hong kitatna ahi, eite’ tanga a si dinga vantung-a ih Pa in A Tapa hong piak khiatna in; Christ hangin eite bang suak thei cih ngaihsutna a sang zaw hong guan hi. Pa in a kisia mang ding minamte A hong itna – a sanna, a thukna le a zaina, John in amuh ciangin phatna le zahtakna lungsim adim in hong nei a, tua itna a liatna le a khona agen khiatna ding kammal kilawm amuh zawh loh ciangin, “En un, Pasian’ tate hong kicih theihna dingin Pa in eite’ tungah a bangci itna hong nei ahi hiam?” ci-in a en dingin leitung mite hong sawl hi (1 John 3:1). Hih thu in bang zah ta-in mihing hong manpha sak ahi hiam! Thu palsatna hangin mihing’ tate pen Satan’ mi kisuak hi. Christ hong kigawhna ih upna hangin Adam’ tate pen Pasian’ ta ih suak thei hi. Mihing’ pianzia ahong lakna tawh Christ in mihing’ dinmun hong laamto hi. Christ tawh a kizopna uh panin a puksa mite, “Pasian’ tate” cih min apua dinga kilawm asuah theih nading mun ah amaute kikoih hi.

Hih bang itna pen tehpih ding om lo hi. Vantung Kumpipa’ tate! A manpha Kamciam! Ngaihsut lian bel ahi den ding! Amah a it leitung mite Pasian in a itna! Hih bang ngaihsutna in ih lungsim hong zo-a, Pasian’ deihna lamah ih lungsim hong kai hi. Singlamteh khuavak panin Pasian’ zia le tong ih sutsut ciangin, hehpihna, migitna leh, thudik le thutang tawh a kihel khawm mawh maisakna ih mu semsem a, nu in a taimang a ta a ngaihsutna sanga a lian zaw itna le hehpihna a kisim zo lote ih tel muh zaw sem hi.