Christ Kiang Zuatna - Chapter 2: MIMAWHTE IN CHRIST KITANGSAM

A cilin mihing pen hihzawhna thupite le a kikhai kim lungsim kipia hi. A mihing hihna kicinga, Pasian tawh zong kilem hi. A ngaihsutnate siangtho-a, a ngimnate kician hi. Ahi zongin a thuman lohna hangin a hihzawhnate kiam a, huaihamna in ki-itna mun hong luah ta hi. Thu palsatna hangin a pianzia hong thazawm mahmah a, ama hatna kia tawh gilo pa hong do zo nawn lo hi. Satan in amah man cip ta-a, Pasian hong kikham lo hileh a awkcip ding ahi hi. Mihing a pian-sakna a Pasian’ ngimna lumlet a, leitung teng lungkhamna le gentheihna tawh akidim ding pen mi-khempa’ deihna ahi hi. Tua bang siatna khempeuh pen mihing a pian sak lai-a Pasian’ nasep hi ci-in ama’n ngawh nuam hi.

Mawhna a neih ma-in, “ciimna le theihna sumgil khempeuh a kiselna-pa” tawh nuam takin mihing kikhawl thei hi (Colosse 2:3). Ahi zongin mawhna aneih khit ciangin, sianthona ah nop sakna hong nei nawn lo a, Pasian’ kiang pan buk mang hong sawm hi. Tu-in zong lungsim thak a nei lo mite tua bang mah hi lai hi. Pasian tawh kilem nawn lo ahih manin, Amah tawh kikholhna ah nuam hong sa nawn lo hi. Mimawhte in Pasian’ kiang nuam sa thei lo hi; mi siangthote tawh kikholh ding zong a mai uh zum ding hi. Vantung kilut sak mah taleh zong amau’ a dingin a nopna om lo ding hi. Tua lai mun a Itna a dim Pasian’ lungsim bang lungsim ngentang nei-a ang sung a khuat lo lungsimte pen, amau’ lungsim tawh kileh bulh ding hi.

Amau’ ngaihsutnate, lawpnate le gamtatnate pen tua lai-a mawh nei lote’ a tawh kilamdang ding hi. Vantung-a lasakna ah amau’ aw tanglen ding hi. Vantung pen amau’ a dingin gawt mun hi ding hi; vantung khuavak le nopsakna ahi pa’ kiang panin bu mang nuam ding uh hi. Mi gilote vantung a kilut sak lohna pen Pasian’ lang khentatna hi lo hi: vantung ah a om dinga amaute a kilawm lohna uh hang hizaw hi. Pasian’ thupina pen amau’ a dingin meilipi suak ding hi. Amaute tan khia dinga a si pa’ mai pan a buk mang theihna dingun amaute in siatcipna lunggulh ding uh hi.

Eite ih kiat sukna mawhna dum sung panin ei-le-ei in ih suakta zo kei hi. Ih lungsimte sia-a, e’n lah ih kheel thei kei hi. “Kua in anin lak panin asiang la khia thei ding hiam? Kuamah in la khia thei lo hi.” “Ci-le-sa lungsim, Pasian tawh kido hi; banghang hiam cihleh Pasian’ thukham mang nuam lo tham loin, zong a mang thei kei hi” (Job 14:4; Rom 8:7). Pilna sinna, ngeina puahna, lungsim kisek sakna, mihing’ hanciamna, cihte khempeuh a hoihna a om tei hangin hih thu ah tuate in bang mah hih zo lo hi. Pua tham gamtatna apuah phat theih tei uh hangin, lungsim khel thei lo uh hi; nuntakna tuinak sil siang thei lo uh hi. Mawhna pan sianthona lamah mite a kikhel theih ma-in, sung lam pana na sem a, tung lam pana nuntakna thak aguan khat a om masak kul hi. Tua in Christ ahi hi. Ama hehpihna bek in kha si sa hing kik sak thei-a, Pasian’ lam le sianthona lam ah zol zo hi.

Jesu in, “Mihing in tung lam panin asuah thak kei leh,” a nuntakna athak sak ding lungsim thak, lunggulhna thak, deihna thak leh ngaihsutna thak a ngah kei leh, “Pasian’ gam lut thei lo ding hi,” ci hi (John 3:3). Mihing’ pianpih hoihna teng khantoh sak ding kisam bek hi, ci-a ngaihsutna in kikhemna ahi hi. “Ci-le-sa tawh apiang mihing in Pasian’ Kha tawh ki-sai nate a sang kei hi; ama a dingin tuate haina ahi hi; amah in tuate a thei kei hi; banghang hiam cihleh tua nate Kha tawh kitel zo bek hi.” “Na suah kik ding kisam hi, Ka cih lamdang sa kei in” (1 Corin 2:14; John 3:7). Christ’ thu hih bangin kigelh hi: “Eite in hotkhiatna ih ngahna dingin van khup sin nuai-a om mite’ lakah Ama min’ bek hi-a, “Ama sungah nuntakna om a, tua nuntakna in mite’ khuavak ahi hi,” ci hi (Sawltak 4:12; John 1:4).

Pasian’ hong itna phawkna, Ama hong hehpihna le Pa banga hong khualnate theihna bek a kicing hi lo hi. Ama thukham a hoihna le a kicinnate telna le, tuate itna thugui kip tung ah kinga a hihnate theihna bek a kicing hi nai lo hi. Sawltak Paul in zong tuate khempeuh na mu-a, “Thukham hoih hi cih ka thukim hi.” “Thukham siangtho-a, thupiak zong siangtho-in, thutangin hoih hi,” ci hi. Ahi zongin lunggimna le lungkiatna tawh kidimin amah in, “Si-le-sa tawh apiang mawhna sunga kizuak mi ka hi hi,” ci hi (Rom 7:16, 12, 14). Sianthona le diknate ama’n zong a lunggulh hangin, ama thu tawh ngah zo lo ahih manin, “Lunggim mi ka hihi! Hih a si ding pumpi panin kua in kei hong hon khia ding hiam?” ci hi (Rom 7:24). Gam khempeuh panin, a khang a khangin, lungsim van gik mite hih bangin kiho uh hi. Amaute’ a dingin, “Leitung mite’ mawhna a pua khia Pasian’ Tuuno en un,” cih dawn kikna bek om hi (John 1:29).

Mawhna van-gik pan a suakta nuam mite’ kiangah hih thuman ahilh telna dingin Pasian’ Kha in gentehna tampi tak zang hi. Esau a khem khit ciangin a pa’ inn panin Jakob tai manga, mawhna tawh kisuangtakin om hi. Nuntakna a nuam sak khempeuh tawh kikhen a, Vantung in amah nusia ta ahih ding a launa in, na dang khempeuh sangin alung gimsak zaw hi. Dahna tawh lei lakah kual sukin, a kim a pam ah mual bekbek om a, a tungah lah aksite te-zaizai hi. A ihmut ciangin khuavak lamdang khat hong mu hi; ama lupna lei lak panin, vantung kongvang dong-in kahlei-pi khat kikhung to-a, atung ah Pasian’ vantung-mite a kumsuk tawh a kahto tawh om uh hi; a tunga vanglian pi sung panin hehnepna le lametna thu agen Pasian’ awging hong za hi. Tua bangin Jakob tungah ama lunggulh mahmah – Honpa – hong kihil hi. Lungdamna lianpi tawh amah mawh nei khat, Pasian tawh a kikholh kik theihna ding lampi a kilak hong mu hi. Jakob’ mang sunga kahlei-pi pen Jesu hi-a, Jesu bek mah Pasian le mihing kikala kizopna khau ahi hi.

“Vantung kihong a mihing’ Tapa tungah Pasian’ vantung mite akum suk le akah to na mu ding hi,” ci-a Nathanael kianga Christ in agen zong hih thu mah ahi hi (John 1:51). Up khialh manin mihing, Pasian tawh kikhen hi; leitung zong vantung tawh hong kikak hi. Kikal guampi gal kahin kikholhna om thei lo hi. Ahi zongin Christ hangin leitung pen vantung tawh kizom kik thei hi. Mihing tawh vantung mite a kikholh theihna dingin, mawhna in a pian sak guampi tungah, Ama thusiamna tawh Christ in lei hong dawh hi. Mawhna tawh puka a thanem a cimawh mihing pen vangliatna Phungpi tawh Christ in hong zom hi.

A puuk sa mite’ a dinga huhna le lametna Phualpi khat bek a om pen amaute in a thudon kei uh leh, mihing’ khantohna dinga amaute’ ngimna le hanciamna khempeuh a mawkna suak ding hi. “A hoih a kicing silpiak khempeuh” Pasian’ kiang pan ahi hi (James 1:17). Amah lo-in zia-le-tong a hoih taktak om lo hi. Pasian’ kiang tunna ding lampi in Christ bek mah ahi hi. Jesu in “Keimah in lampi Ka hi-a, thutak le nuntakna zong ka hi hi; Kei lo-in Pa’ kiang kuamah a tung kei ding hi,” ci hi (John 14:6).

Sihna sanga a khauh zaw itna tawh Pasian in, leitung-a om A tate hong lunggulh hi. A Tapa hong piakna ah Pasian in, vantung buppi piak khat a hong pia ahi hi. Honpa’ nuntakna, A sihna le hong thumsakna, vantung mite’ nasepna, Kha Siangtho’ hong zolna, tuate khempeuh tungtawn a Pasian in na a sepna, vantung-a a om khempeuhte in a hong kin nilohna, cihte khempeuh in mihing tat khiatna ding ngentang ahi hi.

Ei’ a dinga kibawl a lamdang kipiakna lungngai dih in! A gam mang mite zonga, Pa’ inn a tut kikna dinga vantung in azat thagui thatangte pahtak ding hanciam dih ni. Ngaihsutna ahat zaw, thatang a nasia zaw kizang khia ngei lo hi; dikna thaman lianpite, vantung a nopsaknate, vantung mite tawh kipawlnate, Pasian le A Tapa’ hong itna le hong kikholh pihnate, ih hihzawhnate a tawntunga hong khan sakna le hong santoh saknate, - hihte in hong Piangsakpa le hong Tanpa’ a dinga lawpna tawh na ih sep theihna dingin, hanthotna hoih belte hi lo ahi hiam?

Lam khat panin’ Pasian in mawhna thu a khennate, a kipelh thei lo thuak kiknate, ih zia ih tong a siat semsemna leh, a nunung bel suksiatna, cihte in Satan’ nasepna ih theihna dinga Pasian’ hong hilhna ahi hi.

Pasian’ hong hehpihna don lo-in om ding ih hi hiam? Tua kan bang cih thei nawn ding hiam? A lamdang itna tawh ahong it Pa tawh a man kizopna nei ni. Ama lim asun dingin kikhel a, vantung mite tawh kipawl khawm kik thei-a, Pa le Tapa tawh kilema ih kikholh kik theihna dingin, ei’a dinga hong kivai hawm saknate zang siam ciat ni.