Kumkikna Lamen Innkuan - Khen 17 (Azom3)

GUALNOPNA’ ZOLNA

Pianpih Lungtangin Gualnop Zong.—Pianpih lungtangin gualnopna leh duhgawl lungkimsaknaah hoi hi. Hihbangte tampipi apiansak nain Satan ngimna ahi hi. Amahin mite lungsim leitung gualnopna tawh dimsakin, amau leh amau zong, ka kha bangci ta hiam? ciin kidong manlo uh hi. Gualnop na in kilawhbaih hi. Gualnopna anial hangin lungsim omkhawng theilo a, adang gualnopna zong kik veve hi.1

Leitung gualnopna in ngaihhuai-a, hun tomno sung tua gualnopna in Vantung’ lawmtatna in apiak kilemna, itna, kipaaknate nusia zaw hi. Hih ateel uh gualnopnate in lungkimna piazo tuanlo hi.2

Mi Awn tampite in Gualnopna Munah.—Hih hun in gualnopna akizon hun ahi hi. Mun khempeuhah kizat beina leh uangtatna om hi. Mihonte in gualnuam nuam uh hi. Lungsim zong peklen hi. Lungngaihna leh laisimna ah kitu zolo hi. Zawlgau vei bangin linglawng uh hi. Mihing khempeuhin asiangtho, dinmun sang, amipi cingdingin akilamto dingin Pasianin hong ngen hi. Hih bang gualzawhna kimangngilh theizel-a, puatham gualnopna leh kizepna tawh hun beizel hi.3

Lawpna apia gualnopna in numei pasalte’ lungsim lenin, adiakdiakin khangnote konlawh phadiaka, lawpna lungsimin alaisim leh anasep uhte sangin athaneihte sukkangsaka, khuak leh kha nuntakna ciingsak hi.4

Khangnote in popular thupiangte tawh tui bangin kitaai in, gualnop ding asinna tawh ze-etna kong ahong uh hi. Mihon lakah etlawm nading leh ngaihsutna aomlo gualnopna ah kipia uh hi. Siatna khat panin siatna khatah kimakaih uha, kimanna anei nuntakna leh siamna zong deihzo nawnlo uh hi. Biakna ngimnate bei-in, kha kizopnate zong kitat ta hi.5

Gualnopna angaite Lakah Pawlpi Mi Tampi.— Pasian in akhaam leitung gualnopna sungah mi tampi kihel uh hi. Pasian tawh akizopna uh kitatsak uha, leitung gualnopna angaite suak uh hi. Noe’ khangmite leh khuapite asusia mawhna in aleitang bek sitlai hi. Tu in lawki gam suak uha, a popular Christian biakna zong omzolo hi. Ahizongin mihing’ Tapa ahong paiding a lamen pawl khat omsam hi. Pasian mai-ah amawhna uh akidawk banglianin Pasian in hong musak hileh nang zong zumna leh launa tawh nakidim ding hi.6

Lawpna leh nuamna apia gualnopna in ze-etna hia, Pasian’ mite adingin, adiakdiakin, khangnote ading thaang khat ahi hi. Mailam nasepna panin mite’ lungsim azol khia dingin Satan in nasem tawntung hi. Leitung mite zangin apilvanglote leitung gualnopna sungah alut dingin zolden hi. Mite’ lungsim lak nadingin lahna, thuhilhna, leh beihun aneilo pawi atuamtuam tawh leitung lam hong zuatpih nuam hi. Leitung tawh kipawlna in upna tha zawngkhal sak hi.7

Satanin Mizol Siam.—Khangnote in hehpihna hun aom laitakin leitung pen zumkhakni saupi khat aom bangin gualnuam nuam uh hi. Leitung gualnopna tawh lungnopna angahsak dingin Satan in amaute makaih hi. Gualnopnate in lauhuailo, mawhbaanglo, leh cidam nadingin ahoih bangin genpih hi.8

Sianthona lianpi haksa hi, leitung’ gualnopna lampi in pak akipaai lampi hi, ci in Satanin lak hi. Amaanlo leitung lim leh meelte leh gualnopna tawh khangnote maiah kilangsak hi. Ahizongin leitung gualnopna in hong bei pahdinga, avawh bangin a atding uh hi.9

Amahin mikhempa hilim lima, zolsiam hi. Amahin phataka akiphan ngen nei hi. Mawhna kimu lo hi. Apilvanglo khangnote a awk nadingin bawl hi.10

Gualnopna Zonna tawh Pilna Khancinglo.—Nu leh pate in ata neute mihon lakah paikhiatpih baihlua uh hi. Mi tawh kithuah theilo, lawm neitheilo ding, cih patauhna tawh gualnopna zonpih uh hi. Sang akah laitak un zong party, leh mi tawh kihel zau sak uh hi. Hih in khialhna ahi hi. Nu leh pa sangin tate in siatna sinbaih sa zaw lai uh hi. Akhuak sungah kimanna aneilo nate tawh kidimin, pilna azon uh sangin gualnopna zong zaw uh hi. Amaute kinna in pilna leh gualnopna zonnaah lamhiang nih neia, gualnopna in zo zaw hi. Khuak pilna zekai zaw pah hi.11

Tanglai Israelte bangmahin gualnopna azongte-in ne in, dawnin kimawlding uh hi. Nopsakna leh gamlumna oma, nuihna leh otna ging hi. Sim ding a akipia laibute ie limlahnate etteh in gamtang uh hi. Hihte siatna in amaute’ gamtana tungah ahuzaapna omden ahi hi.12

Akhakbel Pasian’ Thupuak Awlmawhlo.— Hehpihna kong akikhak kuan ciangin amaute-in tanglai Noe huna mite’ gualnopna leh lawpna ah kipia in pawi bawl uh hi. Thu leh huzaapna  aneite in huntawp nadinga Pasian’ thupuak azaktheihloh nadingin mihingte lungsim gualnopna tawh khim sak hi. Tuni in zong tuabangmah kisem hilo hiam? Leitung beikuanin Pasian’ nasemte in thuhilh uha, leitung ahihleh gualnopna ah hoi uh hi. Tatsatlo-in gualnopna kizonga, Pasian leh siatna panin lammaan alak thumaan’ huzaapna dal uh hi.13

Sabbath tangte Kisittelding.—Leitung gualnopna sungah alut khangno Sabbathtangtein sittelna thuak ding uh hi. Hunbei kuana gimnate eite tungah hongtung kuanta a, khangnote zong kisittel ding hita hi. Amaute buaina hun sungah kilutpih dinga, amaute upna amaanna kisit ding hi. Amaute in mihing’ Tapa angak kineih uha, pawlkhatte in thu-umlote maiah etteh thamcing lo uh hi. Amaute in leitung paaikhia nuamlo uha, leitung tawh kipawlin gualnop kikaihkhopna tawh kiphat uh hi. Mawhna abaanglo gualnopna ah akihel kisa uh hi. Tuabang gualnopna mahin amau leh Pasian akhenkhia hizaw a, leitung’ tate suaksak hi.

Gualnopna azongte Pasianin atate dingin nei nuamlo hi. Keinialin siangtakin nungta a, akiniamkhiatte in Jesu nungzuite ahi hi. Tuabang mite in leitung angai mite’ gualnopna ah kihel zolo uh hi.14

Athupipen Ngaihsutna.—Gualnopna kisam hi, ci in kuamahin ngaihsun kei hen. Angsung gualnopna tawh Khasiangtho nungngat ding baih ngaihsut kei hen. Pasian kiciamnuih theilo hi. Numei leh pasal khangnote in “Kanuntakna abeidingin tuni kakiging hiam? Pasianin sepdinga ahongpiak nasepte asemdingin kalungtang akiging nai hiam” ci in kidong uh hen.15