SINNA 5
PAUL KIKHEELNA
July 28 – August 3
SABBATH NITAK
Tukal sung sim dingte: Sawl. 26:9-11; Thuhilhkikna 21:23; Sawl. 9:1-20; 1 Cor. 9:1; Gal. 1:1; Sawl. 9:20-30.
LAI SIANGTHO BULPHUH: “Vapai in! Gentile -te le a kumpite uh le Israel mite mai ah ka min a pua ding aka vanzat dingin amah ka teelsa ahi hi.” (Sawltak 9:15, ZIV).
Tarsus mi Saul (a nung ciang Paul) kikheelna in sawltakte hun pawlpi tangthu ah a kithei pen thu khat ahi hi. A thupi in pawlpi a galbawl pa khat Christian hong suahna ahi Paul kikheelna bek hilo hi. Lungdamna thu a ding a sepna te thupi zaw lai hi. Paul in pawlpi masa te nakpi tak in langdo in a kipancil pawlpi tungah a bawlna te lian mahmah hi. Pawlpi suksiatna dingin ngimna kip leh thunei te pahpihna ngah hi. Himah leh, Damascus lampi ah Pasian sapna angah ciangin citak tak in dawng pah a, sawltakte lak ah a lianpen hong suak hi. “Christ pawlpi a bawlsia pen te sug panin lungdamna thu ahuu zo pen leh a tangko khia pen khat hong khangkhia hi.” – Ellen G. White, Sketches from the Life of Paul, laimai, 9.
Paul in ama tungah Pasian hehpihna kicing mahmah ahih manin lungdamna tawh kidim hi mah ta leh pawlpi masa te a bawlsiatna in amahmah kilawmlo manneilo ahihna phawksak zel hi. Paul kikheelna tawh Christian biakna a tawntungin kilamdangna hong nei hi.
SUNDAY July 29
PAWLPI A BAWLSIA-PA
Paul pen Greek-Rome gam a piang Jew mi ahi hi. Cilicia gam Tarsus kua ah suak hi (Acts 21:39). Ahi zongin, tua hun a Jerusalem ah huzaap nei pharisee sia minthang mahmah Gamaliel khut nuai ah pilna sin ahih manin gampua Jew te tawh a omzia le ngaihsutzia kibang lo hi (Acts 22:3). Pharisee khat ahihna tawh, biakna citak mi khat hi a ama hanciamna in ngeina/biakna langgup na dong tun phial hi (Gal. 1:14). Tua hangin Stephen thahna dong makaih a, bawlsiatna ah a makai khat hong suak hi.
Sawltak 26:9-11 sim in. Pawlpi a langdona thu Paul in bangci gen hiam?
__________________________________________________________________
Lungdamna thu in Jew te a ding kisuihkhakna suang ci-in Paul in gen hi (1 Cor. 1:23). Singtung a kikhai mi in Pasian samsiatna thuak hi (Deut. 21:23) ci ahih manin Messiah dingin Jew te lametna tawh Jesu kituak hetlo singlamteh tungah a si Jesu pen Messiah in sang zolo uh hi. Tua ahih manin, Jews te a dingin pawlpi te thuhilhna maanlo lahna teci in Jesu sing tungah kikhaina ahi hi.
Acts 9:1, 2 ah Tarsus khuami Saul in thu-umte a bawlsiatna thu kimu hi. Jerusalem pan tai 135 kiim a kigamla Jew mite tampi a tenna Damascus khua in a thupi khua khat ahi hi. Judea gam pua a om Jew te kizopna nei uh hi. A synagogue (biakna inn) te un amau omna ciat ah panpihna munte hi pah aa, a phualpi uh Jerusalem ah om hi (Sanhedrin te). Sanhedrin leh tua muntuam a kipawlna te in shaliah kici “a kisawl pa” laipuak khat tungtawn in laikhak tawh kizopna nei den uh hi. Sanhedrin in biakna vai sepna te makaih in asem dingin shaliah khat seh uh hi.
Damascus a om synagogue ah Jesu nungzuite mat theihna ding le Jerusalem ah paipih theihna ding laikhak tulpi pa tungah Paul in a nget ciangin amah shaliah hi pah hi (Acts 26:12 tawh etkaak in). Shaliah pen Greek kamin apostles (sawltakte) cih hong paina apostolos ahi hi. Tua hi a, Jesu Christ sawltak ahih ma in, Paul pen Sanhedrin sawltak na hi zo hi.
A nung ciangin na lungsim a kikhelkik sep ding (langpan ding) na lawp mahmah nunung pen in bang hiam? Tua na tuahkhak thu pan in bang hilhlak ngah na hiam?
MONDAY July 30
DAMASCUS LAMPI TUNGAH
Acts 9:3-9 sim in. Damascus lam zuan in a pai laitak Paul tungah bangthu piang hiam? Acts 9:5 sunga Jesu kammal ah bang phawkhuai thupi om hiam? (Acts 26:14 zong en in).
__________________________________________________________________
Paul leh a tonpih te Damascus a tun kuan uh ciangin lamet loh thu khat hong piang hi. Sun kim laitak in vantung panin a tangpha mahmah khuavak hong taang a awging khat za uh hi. Mangmuhna mawk hilo in Paul ngiat a ding ngimna tawh Pasian kilahna ahi hi. A tonpih mte in khuavak mu uh a, ahi zongin Paul bek a mittaw hi. A tonpih te in awging za uh a, ahi zongin Paul in bek tua awging tel hi. Tua khuavak in tua laitak ah Paul tungah a kilang sihna pan a tho Jesu minthanna ahi hi(Acts. 22:14).Tua hi a, Paul in Jesu ka mu khin a, tua in Sawm-le-Nih te tawh kibangin Ama thawhkikna teci leh sawltak za akikim in a ngah ka hi hi ci hi (1 Cor. 9:1, 15:8).
Jesu in Paul a kaptukna thu in khuavak bek a lak hilo hi. Nazareth mi Jesu nungzuite do-na tawh Judah biakna sungah alauhuai thuhilhna leh lampialna te siansuah in Pasian nasem in Paul kingaihsun hi. Himah leh, Jesu nungta hi cih bek hilo in thu-um mite gimpiak thuaksiat sakna in Jesu mahmah do ahihna kithei in lungmang mahmah hi.
Saul tungah Jesu in a genna ah, “Na khe tawh tulzum (ciangzum) na suih ding nang adingin haksa hi” ci hi (Acts 26:14). Tua in bawngtal in a hawlte ciangzum peek le na sakzawk na a gen ahi hi. Tua bang ciangin, bawngtal in na sa zaw hi.
Hih thu in Kha Siangtho nasepna hangin (John 16:8- 11) Paul lungsim sungah Stephen thu tawh kisai in lungsim buaina om ahihna honglak hi. “Saul in Stephen mawhmatna leh thusitna ah a pangpi khat hi a, a upna hangun thatna a thuak te (martyrs) tawh Pasian omkhawm cih teltak kimu ahih manin Saul in Jesu nungzuite a bawlsiatna thu dikmah hiam ci in lunghimawhna hong nei hi. A lungsim nakpi tak in hong kitoknawi hi. Lungbuai lua ahih manin pilna leh thukhensatna ah akimuang mite kiang hong dong ta hi. Siampite leh thunei te in Stephen pen Pasian gendaipa, Jesu in Messiah kineihpa, leh a siangtho nasep a semte in diktak in sepkul hi cih thu tawh muanmawhna beisak in gen uh hi.” – Ellen G. White, The Acts of the Apostles, laimai, 112, 113.
Lungsim sunga sia le pha theihna bang zuih ding banghang in thupi hiam?
TUESDAY July 31
ANANIAS VEHNA
Jesu mahmah tawh kiho cih a tel ciangin, Saul in Jesu in a deih hunpha a pia ding, “Topa aw, bang hih ding ka hi hiam?” (Acts. 22:10) cih dotna hong dong hi.Hih dotna in a sepsa nate hangin dahna lak hi. Tua sang a thupi zaw khat in, tu aa kipan in a nuntakna Jesu in amakaih ding kiphal tak a ki-apna hong lak hi. Damascus ah kipaihpih khit ciangin, hilhna ngak a om ding kisawl hi.
Acts 9:10-19 sungah, Tarsus khua mi Saul pen sawltak Paul a hi dingin Pasian puahphat nasepna kimu thei hi. A tungah khut nga in a mit in khua a muh kik theihna dingin Saul kiang a paina ding thu Jesu in mangmuhna tawh Ananias sawl hi. Ananias in Saul kua cih thei khin a, ama hangin thu-um tampi te bawlsiatna thuak in sihna athuak na thu zong thei khin zo hi. Damascus ah Saul bang hang hong pai cih thu zong ama tungah kigen khin ahih manin Saul bawlsiat na thuak dingin vapai nuamlo hi. A lunghiang na hang zong ahi thei ding mah ahi hi.
Saul nuntakna a tawntung a kikhelsak Jesu tawh a mimal kimuhna thu Ananias in thei khalo hi. Sanhedrin te a ding nasem hi nawnlo in Jew leh Gentile te tungah lungdam thu puak dinga Jesu in a sap ahihna thu thei kha lo hi.
Galati 1:1, 11, 12 sim in. Ama sawltak nasepna tawh kisai Paul in bang gen hiam?
________________________________________________________________
Galati sungah, Paul in ama sawltak nasepna mihing te tung pan hilo in Jesu Christ tung ngiat pan ngah ahihna gen hi. Ananias gen Saul sep ding te zong hih thu mah ahi hi. Ananias in Saul a veh laitak in, Damascus lampi tungah Saul in Jesu kiang pan a ngah sawlna thu te kipsak hi.
A taktak in, Saul kikhelna thu in tangthu tawh kibangin lamdang lua ahih manin uphuai lo phial hi. Koi bangin Jesu a langdo mahmah mi khat in thakhat iin a upna, min le za, leh nasep khempeuh nusia in Jesu Topa leh Honpa in sanga nakpi tak a kipia sawltak lianpen hat a suahna thu Pasian huhna bek tawh kitelzo ding hi.
Saul kikhelna in a lamdang Pasian hehpihna i nasepzia koi bangin hong lak hiam? Na nuntakna ah na upmawh hetloh mite upna maan hong pomtheih zia ding hih tangthu in koi bangin hong hilh hiam?
WEDNESDAY August 1
PAUL NASEP KIPATNA
Acts 9:19-25 ah a kikhel khit ciangin Jerusalem ah a ciahkikma Damascus ah tawlkhat Paul om ahihna kimu thei hi. Ahi zongin, Galati 1:17 sungah Jerusalem ah a ciahkik ma in Arabia gam ah tawlkhat sung om phot ahihna thu Paul in gen hi. “Tua hi a, sehnel gam gamdaihna sungah Pasian thu sin theihna ding leh thukpi tak aa ngaihsutna dingin Paul in hunpha ngah hi.” – Ellen G. White, The Acts of the Apostles, laimai, 125.
Acts 9:20-25 sim in. Damascus ah Paul nasepna Luke in koi bangin hong gen hiam? A nasepna a lawhcing hiam?
Jerusalem pan Damascus ah a pai lai in a laikhak puak ngimna ahih leh Damascus khua a om synagogue (kikhopna inn) ah lah ding ahi hi(Acts 9:2). Ahangin, thu-um te in kikhopna inn bukna in nei ding um ahih man hi.
Tu in ahih leh, Arabia pan hong ciah khit ciangin synagogue ah va pai hi. Thu-um te man ding hilo in a khangsak zaw ding ahi hi. Jesu pen a kineihkhempa ci in mindai sakna ding hi nawnlo in Israel te a ding Messiah hi ci in tangko ding ahi hi. Amaute a bawlsia-pa ci aa thei te in tu-in Jesu thu teci a panna a zak uh ciangin a lungsim ah a bangci ngaihsut ding hiam? Tarsus khuami Saul tungah bang piang a pawlpi a ding bangsem cih lamdang sak ding simloh thudang omlo hi. (Hih akikhel thak pa in bangzah huzaap nei ding cih amaute in theikhol hetlo uh hi).
Paul thugen nial theilo uh ahih manin, amah a langdo pawlkhat kikum sim in a thah theihna ding uh a geel uh hi. Amau geelna a tangtut theihna dingun a langdo mite in thunei te kiang Paul a mawhsakna thu Paul laigelhna te ah kimu thei hi (2 Cor. 11:32, 33).Ahi zongin, thu-um mite panpihna tawh khulh tawhlet panin bawmin kikhaisuk in Paul suakta hi.
Haksakna tampi thuak ding cih a kipat pan Paul in thei pah hi (Acts 9:16). A munmun panin langdona, bawlsiatna, leh siattutna thuak dinga, Christ sungah nuntak thak tawh akalsuanna ah haksatna leh thuaksiatna tampi a thuak hangin ama upna leh nasepna te lok-ling zolo hi(2 Cor. 4:8, 9).
Haksatna leh langdona a thuak hangin Paul in tawpsan lo hi. Eite zong langdona leh lungkiatna i tuah ciangin tua bang upna i neih ding koibang in sin thei ding i hiam?
THURSDAY August 2
JERUSALEM AH CIAHKIK
Damascus pan a suahtak khit ciangin, bawlsia-pa hihna tawh Jerusalem a nusiat khit amasa pen a ciahkikna ahi hi. Hih a ciahkik hun pen a kikhel zawh kum thum khit ciang ahi hi (Gal. 1:18). Pawlpi sung ahi a, a pualam pan hi ta leh buaina tampi in na dawntuah ahih manin a ciahkikna baihsa hetlo hi.
Acts 9:26-30 sim in. Jerusalem ah Paul a tun ciangin bang piang hiam?
___________________________________________________________________
Jerusalem ah Paul in sawltak te tawh kipawl ding sawm hi. A kikhel zawh kum thum bang pha khin hi mah ta leh, akikhelna thu in lamdang lua ahih manin Ananias mah bangin sawltak te in um ngamlo uh hi.Nungzui taktak hi ding um zolo uh a geelna tawh hong lut hi ding ummawh uh ahih manun lau uh hi. Cyprus pan hong pai Levi mi Barnabas in sawltak te tungah Paul thu genpih hi. Nungzuite in Paul tungah Pasian nasepna hangin a kikhelna leh thu-um taktak ahihna theih uh ciangin lamdang sa mahmah kha ding uh hi.
Nidang a pawlpi te a bawlsiatna hang ahih kei leh zong a tangko lungdamna thu hangin tua bang nanna, sanlohna te beisiang tuanlo hi. Stephen gen mah bangin, sawltak te kihel Judea gam a thu-um te in Christian upna pen mi khempeuh tawh kisai ahihna, Thukhun Lui ngeina te tungah kingalo upna ahihna, leh a diak in tua kithoihna ngeina te in Jesu singlamteh tungah sihna tawh picing khin ahihna telhak mahmah uh hi. Judea gam a pawlpi mite sungah Paul kithuahpih zaw deuh te in Greek-gam piang thu-um te ahi: Barnabas, Sagih te lak ah khat ahi Philip (Acts 21:8) leh Cyprus mi Manson dante hi den zaw hi. Kum pawlkhat khit ciang nangawn in zong, Jerusalem pawlpi makai te in nidang a Stephen thuhilh lian mah a gen Paul thugenna mawhsak uh hi (Acts 21:21).
Jerusalem ah ni sawm-le-nga a om sungin (Gal. 1:18), tua-ma lai a Stephen amawhsak thu -umlo Jew te tungah lungdamna thu hilh ding khensat hi. Stephen mah bangin, a nuntakna alauhuai zah dongin langdona tuak hi. Ama kidalna dingin Jerusalem pan a paikhiat ding Jesu in mangmu sak hi(Acts 22:17- 21).Thu -um te panpihna tawh, tua pan in tembaw khawl khuapi ahi Caesarea ah, tua lai pan in a khua ahi Cilicia ah tungin tua lai ah Pasian nasep khualzin a kipat ma in kum pawlkhat sung om hi.
FRIDAY August 3
NGAIHSUT BEH DING: “Galkap-ukpa sihna in a galkap te gallehna tun a, ahi zongin ama sihna in galte thahatna behlap tuanlo hi. Ahi zongin mi thupi khat in a langlam a koppih ciangin, a nusiat te supna lianpi piangsak bek hilo in, a kipawl-thakpih te in gualzawhna ding phattuamna lianpi ngah beh uh hi. Damascus lam zuan a pai Tarsus mi Saul, Topa in khuavak tawh olno tak in kaplupna tawh bawlsiatna thanemsak thei hi. Ahi zongin, Pasian geelna leh lamlahna tawh Saul nuntakna khoi lai bek hilo in, a nuntakna khelna tawh galte lam pan in Christ a ding a hatpen (champion) suaksak hi.” – Ellen G. White, The Acts of the Apostles, laimai, 124.
“Gam khempeuh ah pai in lungdamna thu hilh dingin Christ in a nungzuite sawl hi. Ahi zongin, Jew te tungah a luahsuk uh thuhilhna te hangina Mangpa uh kammal te telcian ding haksa sa uh ahih manun zui pahlo uh hi. Amau le amau Abraham tate kici uh a, Pasian kamciam te a ngah ding gouluah te kici uh hi. Topa vankah khit kum pawlkhat khit ciang bek in Christ gen thute a deihna ahi Jew leh Gentile te kikhel sak ding thu zaitak leh kicingtak in telsiam pan uh hi.” – Ellen G. White, Sketches from the Life of Paul, laimai, 38.
KIKUP DING DOTNATE:
2. Jesu a ding teci panna ah Jesu a ding thuakna zong kihel hi. Jesu a ding thuakna in i cih bangte hiam? Bang khiatna nei hiam?
3. “Credo ut intelligam” cih Latin kammal khat om a, a khiatna in “Ka tel theihna dingin ka um hi.” Hih kammal in Tarsus khuami Saul tunga piang thu tel na ding hong bangci huh hiam? Paul ahih ma a kikhelma in aman zong hih thu tello hi. A kikhel khit ciangin tel pan hi. Eite a ding siang mahmah i sak thutak te midang te in tel thei mahmah lo in a om ciangin i beidonna cih ding thei nawnlo in i om hun ciang hih thu panin bang hilhlak la thei ding i hiam?
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.