SINNA 4
PAWLPI MAKAI MASATE
July 21-27
SABBATH NITAK
Tukal sung simdingte: Sawltak 6, Sawltak 7:48, Heb. 5:11-14, Micah 6:1-16, Sawltak 7, Sawltak 8:4-25.
LAI SIANGTHO BULPHUH: “Tua bangin Pasian thu a kizel hi. Jerusalem ah nungzuite khang semsem a, siampite tampi in tua upna a zui uh hi.” (Sawltak 6:7, ZIV).
Pentecost ni a piangthak tampi te in Greek gam pan hong pai Jew te a hi hi. Jew mi ahih uh hangin Judea gam a om Hebrew Jew te tawh ki banglo uh hi (Acts 6:1). A kibatlohna pi khat in Judea gam a Jew te zat Aramaic pau Greek-Jew te in tello uh hi.
Ngeina le biakna lam ah kilamdanna dang tampi om lai hi. Gamdang ah suak/khangkhia ahih manun Judea Jew te zah in Jew ngeina thuk bulkip neilo uh hi. Israel gam bek ah a kizang ahi Moses thukham te leh biakinn pawi tuamtuam te tawh kinahvawh lua khollo tawh kibang hi.
Greek huam gam te ah teng in Gentile te lak ah khangkhia uh ahih manun, Christian upna tel ding leh san ding pen baih zaw uh hi. A taktak in, Pasian in leitung bup lungdamna thu tangko nasep na ah teci dingin Greek-Jew te tampi zang hi.
SUNDAY July 22
SAGIHTE SEHNA (TEELNA)
_________________________________________________________________
“Phunsanna ahangin nisim an hawmna tawh kisai Greek mi meigong te kithu donlo hi cih muanmawhna a hi hi. Kideidanna in Kha nasepna tawh kilehbulh hi mah ta se leh, Satan in muanmawhna om sak hi. Lungkimlohna a piangsak thei thu te manlang takin siansak kul hi, tua hi kei leh thu-um te kikhenkap ding a hanciamna ah galpa gualzo lua kha ding hi.” – Ellen G. White, The Acts of the Apostles, laimai, 88.
Hih buaina a sian theihna dingin annek tuidawn ah tuanvai(serve [diakoneo] table) ding Jew te lak ah mi sagih Sawltak te in teelsak uh hi (Acts 6:2). Tua hi leh amau te in thungetna le thuhilhna (ministry [diakonia] of the word) hahkat in sem thei ding uh hi (Acts 6:4). Hih diakoneo leh diakonia te kammal khat pan hong paikhawm hi a, a kilamdang khat in Acts 6:2 sunga annek tuidawn ah tuanvai cih leh Acts 6:4 sunga thungetna le thuhilhna ahi hi. Acts 6:1 sunga nisim cih kammal in pawlpi masa te hun lai in thuhilhna leh kithuahkhopna (annek tuidawn) nei khawm den uh a, tua te lak ah annek khopna, anlum balkhopna (nekkhawm), leh thungetna te a hi hi (Acts 2:42, 46; 5:42).
Sawltak te in upna guipi tawh kisai thuhilhna te leh thungetna te ah thu-um te a makaih laitak un, Sagih te in amau innte ah kithuahkhopna, annek tuidawn khopna te makaih uh hi. Amau vaipuak in tulai deacon te vaipuak dan bek hi lo hi. A taktak in amaute pawlpi makai pi masa te ahi uh hi.
Acts 6:2-6 sim in. Koi bangin Sagih te kiteel a, bang sem dingin kisawl hiam?
Teelna a ngah dingte in gamtatzia, kha nuntakna, leh a nunzia uh tawh en teel uh hi. Amau te in minpha nei iin pilna leh Kha Siangtho tawh kidim te hi ding uh hi. Pawlbup thukim na tawh hih Sagih te teel uh a, thungetna leh khutngakna tawh nasep sawlna nei uh hi. Tua bang hih na in mipi theihpihna lahna leh deacon dinga septheih thuneihna piakna lim a hi hi.
Dinmun tawh kisai ngaihdan kibat ding baihlo hi. Pasian hong piak thuneihna tawh koi bangin ei sung kilemna kemcingin nasepna mitsuan thei den zaw ding i hiam?
MONDAY July 23
STEPHEN NASEPNA
A kiteel Sagih te in pawlpi nasepna bek hilo teci pan nasepna ah zong lawhcing tak in mapang uh hi. Tua hangin lungdamna thu kizeel semsem aa, thu -um mi kibehlap ziahziah hi (Acts. 6:7). Tua khantohna hangin langdona hong kipan pah hi. Hih bawlsiatna in kha mi mahmah khat ahi Stephen tangthu ah ciantak in kimu thei hi.
Acts 6:8-16 sim in. Hih lai mun ah Stephen upna leh koibang mi cih bang hong lak hiam? Stephen in bang thu a gen ciangin a langdo mite heh mahmah uh hiam?
_________________________________________________________________
Greek-Jew ahih na tawh Jerusalem a Greek-Jew te kikhopna synagogue ah Stephen in lungdamna thu gen hi. Tua khua sungah synagogue pawlkhat om tuak hi. Tua te lak ah a kigen nihte in, khanglam gampan pemta-te (Cyrene leh Alexandria) leh saklam gam pan (Cilicia le Asia) pan te ahi uh hi.
Amaute Jesu thu mah kinial uh hi a, Kha ompihna tawh hih mite sangin pilzaw theizaw ahih manin amaute in a bawlsia nuam uh ahi hi. Thukham leh biakinnpi langpang in thugen a Moses leh Pasian gensia hi ci in amaute in Stephen mawhngawh uh hi. Sanhedrin te in biakinn a thupi ngaihsut luatna uh in milim biakna tawh kibang hi cih Stephen mawhsakna in Jesu sihna leh tua ama sihna hangin biakinn nasep leh ngeina pawi nasepte tawh kisai thu a thuktelna hong lak zaw ahi hi.
Judea gam Jews tampi te in biakinnpi le ngeina pawi tethupi sak lua mahmah uh ahih manun (Acts 3:1; 15:1, 5; 21:17-24) tua te nusiat ding haksa sa mahmah uh a (Gal. 5:2-4; Heb. 5:11-14) Stephen leh a dang Greekmi thu-um te in ahih leh Jesu sihna in hih biakinnpi tawh kisai ngeina nasep khempeuh bei siangta cih telsiang uh hi.
Khuavak thak hong pai ciangin a hong daltan thei ahi eite deihdeuh ngaihdan sandan te ah kikhihcip loh ding banghangin kidop huai hiam?
TUESDAY July 24
SANHEDRIN MAI AH
Acts 7:1-53 sim in. Amah a mawhsak te tun-gah Stephen in bang gen hiam?
_________________________________________________________________
Stephen mawhsakna in kimatna leh Sanhedrin mai ah thusitna tun hi. Jew ngeina bangin ci leng, thukham leh biakinnpi in leitung bup kingakna suutpi thum lak ah nihte ahi hi, a thumna in sepna hoih (gamtat hoihna) ahi hi. Moses biakna thukham te in khanglui vai ci a genna neucik neih bek nangawn in nakpi tak a dona bangin ngaihsun uh hi. Ahang in, Judaism biakna ah hih in a thukpen siangtho pen thukhat ahih man hi, tua hangin daisakna thugen cih mawhsakna ahi hi (Acts 6:11).
Stephen dawnna in Sawltak thubu sungah asau pen thugenna ahi hi. A patna lam in Israel te khangthu a sut mawkmawk tawh kiban napi, Thuciam Lui kamciam tawh kizom ahihna leh tanglai kamsangte in biakna puahphat ding Israel mite a hanthot tawh kibang hi. Tua bang ciangin Pasian tawh a kamciam uh pelh ahih manun Pasian in thu kineihna mawhsaknanei cih lahna ahi Hebrew kamin “rib” cih zang zel uh hi.
Micah 6:1, 2 ah rib cih kammal thumvei kizang hi. Sinai thuciam mah bangin (Ex. 20-23), Israel te tangin Pasian in a vangliat khut tawh a sepsaknate (Micah 6:3-5), thuciamna a ciangtanna uh le a palsatnate (Micah 6:6-12), leh a thu palsatna hangun samsiatna apiak dingte (Micah 6:13-16) Micah in phawkkiksak hi.
Stephen thugen bulpi in hih thu mah hi kha ding hi. Hih bang a sepna ahang a kidot ciangin, Stephen in a mawhsakna thu uh ah kiphelhna ahi a, a upna huutna ahi zongin neilo hi. Tua sangin, tanglai kamsangte bangin Israel te Pasian in a mawhsakna thu tangtak in gen hi. Pasian tawh Israel te a kizopna uh khangthu saupi tak a sut dihdihna in, amau lungdam theihlohna leh thumanlohna a lahtel na ding ahi hi.
Acts 7:51-53 ah Stephen in hih makaite mawhpaih a Pasian thuciam tawh kisai thu kineihna ah Pasian aa ding sitni asem ahi hi. Kamsangte thahna ah a pu a pate mawh uh ahih leh, amau mawh zaw kaanlai uh hi. “I pate” (Acts 7:11, 19, 38, 44, 45) cihna panin “na pate uh” (Acts 7:51) in a thupi khat hi a, Stephen in a mipih te tawh a kithukhatna sutat in Jesu lamah a panna teltak in lak hi. A thuak ding lian in haksa mahmah ding hi mah leh, a kammal ah launa leh kisikna omlo hi.
Jesu a ding kiptak a na din ding a kisap a nunung pen hun bang hun hiam? Kiptak a ding maw dinglo? Kiptak a na ding kei khak leh bang na khel ding kisam hiam?
WEDNESDAY July 25
VANTUNG BIAKBUUK SUNG AH JESU
Kamsang cih in Pasian ading thu a gensak mi cihna hi a, Stephen in Israel te tungah Pasian mawhsakna a gen lian in kamsang hi pah hi. A kamsang nasep bel tom peuhmah hi.
Acts 7:55, 56 sim in. Stephen mangmuhna in bang a deihna hiam?
________________________________________________________________
“Stephen in mang a muh laitak in mite lak ah buaina gamlum ziazua na om hi. Genkholhna te leh Jesu thu zom in biakinnpi tawh kisai thu a gen ciangin, a lau mahmah bangin siampite in a puan uh balkeek uh hi. Stephen in a sawtlo in a thugen hun bei ding cih tel hi. A kammal te nakpi tak kinial cih amuh ciangin a tawpna teci pang ahih lam kithei ta hi. A thugen kimlai mah thugen khupna nei hi.” – Ellen G. White, The Acts of the Apostles, laimai, 100.
Jew makaite mai ah Stephen a dingin Israel mite mawhsakna a gen laitak in vantung biakbuuk sung Pa kiangah Jesu ding hi. Tua in vantung ah thukhenna om takpi ahihna hong lak hi. Israel te lak ah makai maanlo leh sia maanlote Pasian in thukhen ding hi.
Tuma a sawltak thubu a thugen te gen det ahi kisikkikna ding sapna omlohna in hih thu hong telsak hi. Abraham tungah kamciam a om Israel tungtawn in leitung khempeuh thupha kipia ding cih thu a bei ding hong hi ta hi (Gen. 12:3, 18:18, 22:18). Ahi zongin, Jerusalem pan pusuak in lei mong dong a tangko ding Jesu nungzuite ahi Jew leh Gentile te tungtawn in thupha kipia ding hi.
Acts 7:57- 8:1, 2 sim in. Stephen sihna Luke in koi bangin hong gen hiam?
_______________________________________________________________
Stephen denlup dingmah a thukikhen himaw hilo cih a kitelloh hangin suang tawh kidenlupna in Pasian min gendaina hanga gawtna ahi hi (Lev. 24:14). Bangbang ahi zongin, Jesu a upna hangin thahna a thuak a kiciamteh masa pen thu-um mi ahi hi. Ama kithahna teci te in Saul khephung ah a puante uh koih cih thu in, Saul pen Stephen langdo te a makai ahihna kilang sak hi. Himah ta leh, Stephen in Saul a ding zong thungetsak hi. A sangzaw nunhoih le ahoi lo upna a neite bek in tua bangin hih thei hi. Tua in a upna leh Jesu a nuntakna ah om takpi ahihna kilangsak hi.
THURSDAY July 26
LUNGDAMNA THU KIZEEL
Stephen tungah gualzawhna in Jerusalem a thu-um mite bawlsiatna hong kuantawh pah hi. Pawlpi nakpi taka a susia Saul in tua bawlsiatna makaipi ahi hi (Acts 8:3, 26:10).Ahi zongin bawlsiatna in ahoih zaw lam in kihei hi. Bawlsiatna hangin thu -um te Judea leh Samaria ah kithehthang uh a, a tunna mun vuah lungdamna thu gen uh hi. Hih thu in Acts 1:8 tangtunna ahi hi.
Acts 8:4-25 sim in. Hih tangthu ah bang hilhlak ding om hiam?
__________________________________________________________________
Samaria mite pen biakna vai nangawn ah Israel sitlo te ahi hi. Moses lai at bu nga (Penteteuch) te uppih uh in Pasian khat bek a umte hi a, vun ki-at in Messiah a lamen te mah ahi uh hi. Ahi zongin, Jews te ading in Samaria te biakna in kihhuai iin Israel te thuciam hehpihna ah tanh pialo uh hi.
Upmawhloh a Samaria te kikhelna Jerusalem a pawlpi mite in lamdang sa uh a, a thute a kan dingin Peter leh John paisak uh hi. Peter leh John te a tun masiah Pasian in a Kha Siangtho a piak nailohna in thu-uppih kipawlna ah amaute a kisan taktak na a tel theihna dinguh ahi hi (Acts 8:14-17, 11:1-18).
Ahi zongin tua ciangah tawplo hi. Acts 8:26-39 ah Lai Siangtho a sin khit ciangin kituiphum ding a ngen Ethopia mangpa leh Philip thu om hi. “Tua ciangin sakolleng a khawl na ding thu a pia hi. Philip tawh a nih un tui phual ah pai in Philip in amah a tuiphum hi” (Acts 8:38).
Amasa in Samaria mite, tua khit ciangin Jerusalem ah biakna pia ding a pai tu in inn lam zuan aa ciah gamdangmi Ethopia mipa. Genkholhsa mah bangin lungdamna thu in Israel gamgi khengin leitung ah kizel ta hi. Hih in a kipatna hi pan a, mi khempeuh tungah mawhna pan a hong tatna ding a Jesu sihna lungdamna thu leh hotkhiatna ding lametna mi khempeuh tungah gen dingin Jew thu-umte leitung bup ah zin kawikawi uh hi.
Peter in Simon kiangah, “Khaatna tawh na kidim a, mawhna sila in na om” ci hi (Acts 8:23).Ama buaina siansakna ding bang kisam a, amah bang mi khat peuh a ding koi bangin buaina zo thei ding hiam?
FRIDAY July 27
NGAIHSUT BEHDING: “Jerusalem a pawlpi kibawlsiatna in lungdamna thu tangko nasepna a tawsawn pi khat hong suak hi. Tua mun ah buaina omlo hi leh nungzuite in tua lai ah sawtpi om in leitungbup ah lungdamna thu tangko ding Honpa’ sawlna phawk nawnlo kha ding uh hi.Bawlsiatna nanzawh na ding tha pen nakpi tak nasep na pan hong pai cih phawkkha lo uh ahih manun, ahih theih zah un Jerusalem a pawlpi huut ding hanciam uh a, tua sang a thupi zaw nasep omlo in ngaihsun kha uh hi. Thu-um thak te lungdamna thupuak ding pattah ding sangin a sepna sa te uh tawh lungkim ding a lauhuai ngaihsutna lam ah manawh pih kha uh hi. Gamdang ah thehthang in midangte a ding na asep theihna ding un Pasian in amaute tungah bawlsiatna a tun ding phal hi. Jerusalem pan paikhia in thu-um te in mun khempeuh ah lungdamna thu gen ta uh hi.” – Ellen G. White, The Acts of the Apostles, laimai, 105.
KIKUP DING DOTNATE:
1. A tung a pawlpi masa te sungah amau sepna leh hihna sa tawh lungkimna ah a lauhuai thu te tawh kisai Ellen G. White kammal ngaihsun in. Amasa in, mi tampi te gen bang hilo in Jews tampi te in Jesu pen Messiah in sang uh hi. Eite in koi bangin i neihsa leh ngahsa te tawh lungkim pah khalo a lungdamna thu tangko nasep zom thei ding i hiam?
2. Sawltakte hun in Jew leh Samaria mite kizopna ah kigal neihna a liat pen laitak hun ahi hi. Jew mi Philip in Samaria ah Jesu thu teci a panna tung pan in bang sin ding om hiam?Seventh-day Adventist te nangawn ngeina leh minam kideina tawh kipeng tuanlo hi. Pasian mai ah eite a kibang kim i hihna singlamteh in bang hong hilh hiam? Mi khempeuh a ding Christ hong sihna in mi khempeuh manpha mahmah i hihna bang hong hilh hiam?
3. Philip in koi bangin Ethopia-pa vaniah hiam (Acts 8:37-30)? Midang te tungah lungdamna thu gen theihna ding koi bangin hunpha la thei ding i hiam?
4. Sawltak 6-8 sung panin a picing zaw aa pawlpi nasepna gualzawhna dingin bang thu na theikhia hiam?
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.