ZSS Lesson 2: PENTECOST

SINNA 2	July 7 - 13
PENTECOST
SABBATH NITAK

Tukal sung sim dingte: Acts 2:1-4, John 14:16, Acts 2:5-13, Joel 2:28-32, Acts 2:22-39, Ps 110:1-3.

LAI SIANGTHO BULPHUH: “Pasian in hih Jesu thosakin nungta sak a, hih thu a taktak ahina kote khempeuh teci ka hi uh hi. Amah Pasian taklam ah kitawisang a, Pa kiang pana kamciamsa Kha Siangtho ngah in ama hong buakkhiat tu-a na muh na zakte uh ahi hi” (Sawltak 2:32,33, ZIV).

Pentecost cih pen pentekoste cih kammal pan hi a, Jew te Nipikalte Pawi (Ex. 34:22) cihna Greek kam hi a Gah masa Pawi zong kici hi (Num.. 28:26). A sawm-le-ngana cih khiatna nei a, a hangin Paisan Pawi khit a ni sawm le nga ni in kibawl pawi ahi hi. Lungnopna leh lungdamkohna pawi hi a, Israel mite in Pasian mai ah anlaak khempeuh sung pan gah masa te paipih in biakpiakna in pia uh hi (Ex. 34:22).

Christian pawlpi ah zong ni dang a om ngeilo Kha Siangtho kibuakna hangin thu-um mi tul thum kituiphumna tawh kha gah masa lakna pawi cih limla hi pah hi (Acts. 2:41). Vantung ah Jesu kha a pahtawina a ngah khit, hih Kha Siangtho kibuakna in Galilee mi mawkmawk te a upna hang un leitung bup a khel khauhtak a ding ngam, a hangsan sawltak te hong suak uh hi.

Mi pawlkhat in Pentecost pen pawlpi suahni, pianni zong ci uh hi. Tua-ni in Christ nungzui Jews leh Gentiles te kipawl in leitung ah Pasian mite kipawlna taktak hong piang hi.

SUNDAY                                                                                                                July 8

KHA SIANGTHO HONG PAI NA

Jesu sawlna mangin thu-um te in Jerusalem ah lungsim takpi tawh thungen, mawhna kisik, leh phatna tawh Kha Siangtho ngak in om uh hi. A ni hong tun ciangin, “amau tem un khat ah kikaikhawm uh hi” (Acts 2:1). A kimuh ngeina uh inndei tungnung zong hi kha mai thei hi. Ahi zongin, a sawtlo in mipi omna mun ah hong kikhin uh hi (Acts. 2:6-13).

Acts 2:1-3 sim in. A kibuak Kha Siangtho bang lim in amau te tungah hong tung hiam?

___________________________________________________________________

Tha khat in vantung lam huihpi nung tawh kibang a ging hong om a amau te omna mun ah hong dim hi. Mei lei tawh ki bang amau tung ciat ah hong tung hi.

Lai Siangtho sungah, huih leh mei in Pasian ompihna limlak in kilang zel zel hi (Ex. 3:2, 19:18, Deut. 4:15). Tua ban ah, huih leh mei te Pasian Kha limla in kizang thei hi (John 3:8, Matt. 3:11). Pentecost ni in a piang thu in hotkhiatna tangthu sungah a lamdang thupiang khat hi a, kamciam Kha Siangtho kibuakna ahi hi.

Kha Siangtho in a tawntung in nasem den hi. Thukhun Lui lai Pasian mite lak ah Kha Siangtho in nasem den aa, ahi zongin a deihzah in sem ngei nailo hi. “Tuan pupate hun lai in Kha Siangtho huzaap om den a, ahi zongin picing tak in om ngeilo hi. Tu in ahih leh Honpa kammal thumanna tawh nungzuite in Kha Siangtho ngen in kiko uh a, tua kikona aw Christ in vantung ah thumbeh sak lai hi. Amite tungah Kha Siangtho a kipiak theihna dingin Christ in ngetsak hi.” – Ellen G. White, Acts of the Apostles, laimai, 37.

Messiah hong pai lai in tuiphum John in Kha Siangtho tawh kituiphum ding hong genkhol khin zo a (Luke 3:16 leh Acts 11:16 etkaak in), Jesu mahmah in tamvei pi tua thu gen ngei zo hi (Luke 24:49, Acts 1:8). Kha Siangtho kibuahna in ngetna pen Pa kiangah a nget masak pen thumna ahi hi (John 14:16, 26; 15:26). Pentecost ah, tua kamciam hong tangtung hi.

Pentecost a Kha Siangtho tawh kituiphumna in Jesu singlamteh tungah gualzawhna leh vantung ah kipahtawina tawh kizom a lamdang thu khat ahih hangin, Kha Siangtho tawh kidim nuntakna in thu-um mi khempeuh nuntakna ah a om tawntung ding thu ahi hi (Acts 4:8, 31; 11:24; 13:9, 52; Eph. 5:18).

Na nuntakna ah Kha Siangtho in na hong sem cih koibang in tel thei ding na hiam?

MONDAY                                                                                             July 9

KAMPAU (KAMTUAM) SILPIAK

Acts 2:4 ah, Kha Siangtho silpiak in kampau tungtawn in kilang hi. Ahi zongin hih silpiak in Kha silpiak tampi lak ah khat bek hi pan hi (Acts 10:45, 46; 19:6). Adang te lak ah, mailam thupiang genkholna (Acts 11:28), mangmuhna (Acts 7:55) , humop thugenna (Acts 2:8, 28:25), natna damsakna (Acts 3:6, 12; 5:12, 16), leh nasepna ding cingtaakna (Acts 6:3,5).

Pentecost ni a kampau silpiak in silpiak dangte sang thupi zaw ahihna hang tawh kipia/kizang hilo hi. Pawlpi nasepna picin kipatna ding a kilang ahi hi. Tua hi a Acts 1:8 a sapna sepna dingin kampau silpiak kisam ahi hi. Sawltak te in ngeina leh pau kibanglo mite kiangah lungdamna thupuak ding ahih leh, tua thu a za ding mite teltheih kam a pau theih uh kisam ding ahi hi.

Acts 2:5-12 sim in. Hih lai ah sawltak te in a om khinsa gamdang pau zang ahihna bang in hong lak hiam?

Kum zalom masa lai (nungzuite hun) in leitung ah Jews mi 8,000,000 pan 10,000,000 kiim om dingin kingaihsun a, tua lak ah za ah sawmguk (60%) kimbang Judea gam pua ah om uh ci hi. Tua hi a, Jerusalem a kibawl tua pawipi ah hong pai mi tampi takte gamdang pan hi a, tua hun lai a Judea gam a om Jews te zat ahi Aramaic pau a theilo tampi om uh hi.

Pentecost ni a piangthak a Christian a suak te lak ah mundang pan hong pai amau kampau tek tawh a za Jews mite tampi kihel kha ding hi. Tua hi a sawltak te in a ki theilo kamtuam pau zang hilo in a om khinsa midang, gamdang te teltheih pau zang ahihna dialektos cih kammal a khiatna in gam khat ahih kei leh mun khat ah kizang pau zang ahihna uh teltak in kimu thei hi. A lamdang thu in, hih Galilee mite in a theih ngeiloh uh mi namdang te pau tawh thu a gentheihna uh ahi hi. Tua mun a teng hih pau tello Jews mite a dingin sawltak te in khiatna a neilo kammal tampi pau ahih manun zukham tawh kibang a sa uh ahi hi. “Mi pawlkhatte in amaute nuihsan in, ‘Lenggahzu tam dawn lua ta uh hi’ a ci uh hi” (Acts 2:13).

A vanglian Pasian nasepna amau te mitmuh ah kilang hi mah ta leh mite in zukham iin ngaihsun uh hi. Eite zong ei le ei khamit taw i suah lohna ding koi bangin kikem ding i hiam? 

TUESDAY                                                                                         July 10

PETER THUHILHNA (SERMON)

Zukham a kisakna thu hangin Peter in a piang thu hilhcian na ding hunpha ngah zawsop hi. A thugenna ah, sawltak te in Lai Siangtho bulphuh masa uh a (Acts 2:16- Kha Siangtho kibuakna in genkholhna tangtunna ahihna lak uh hi.

Acts 2:17 leh Joel 2:28 enkaak in. Koi bangin Peter in Joel genkholhna a tangtun hun tel hiam?

________________________________________________________________

Joel genkholhna in mailam a piang ding hotkhiatna thu a gen hi a, pianngei leitung lim te leh dimtak a Kha Siangtho kibuakna ding thu ahi hi (Joel 2:32; 2:28-31). Tua bang genkholhna zui in Pentecost thupiang a et ciangin Peter in tua hun thupiang te tawh kituak sa pen hi. Ahi zongin Joel kammal a bulphuhna ah a thupi khat om hi. Hih mun ah Joel in “tua nung ciangin” (Joel 2:28) cih mailam hun a kawk kammal pen Peter in “ni nunungte ah” (Acts 2:17, ZIV) na ci a, a kipan khin lian ahi a lian tatkhiat nasepna nunung pen a kawk a hi hi. Ni nunung hunpiang a telgenna hi pah lo a, pawlpi masa te kinak sap na thu a genna ahi hi. Beina hun bang hun hong piang ding cih a theihloh uh hangin sawt nawnlo ding cih um in muang uh hi.

Acts 2:22-32 sim in. Lungdamna thu pulaakna ah Peter gen bulpi bang thu hiam?

________________________________________________________________

Pentecost thu genkholhna ah a om zia pulaak khit ciangin Peter in tua hun nai a piang ahi Jesu nuntakna, sihna, leh thawhkikna thu te gen hi. Lungdamna thu ah a poimawh bel thu zong ahi thawhkikna thu limgen bel hi.

Peter a dingin thawhkikna in Jesu dikna Messiah takpi ahihna alak bel leh Lai Siangtho in thawhkikna thu bangci gen cih bulphuh kik hi (Acts 2:22, 27).

Jesu pen Messiah ahih manin sihna in Amah len zolo hi. Tua hi a, Peter leh Thukhun Thak at sawltak te a dingin Jesu thawhkikna in a vanglian teci khat hi a, Jesu in Messiah cih thu bek hilo in hotkhiatna thu ah Christian te thupuak bulpi zong ahi hi.

Sihna in eimau nuntakna leh i itte tawh khen ding hong lausak den kawmkal ah, bang hangin Jesu thawhkikna in a thupi thumaan hi thei hiam?

WEDNESDAY                                                                                                    July 11

JESU KITAWISANG

“Amah Pasian taklam ah kitawisang a, Pa kiang pana kamciamsa Kha Siangtho ngah in ama hong buakkhiat tu-a na muh na zakte uh ahi hi” (Acts 2:33).

A thugenna khenthumna ah, Peter in a masa a mite in a lunglut uh ahi kampau tawh kisai genkik hi. Zingsang nai kua kiim ah zukham uh hi samlo a, vantung pan amaute tungah Kha Siangtho kibua ahih manin paunam tuam tawh apau uh hi zaw hi (Acts 2:15).

Acts 2:33-36 sim in. Pasian taklam ah Jesu a kitawisang na leh Kha Siangtho kibuak na in bang kizopna nei hiam?

___________________________________________________________________

Pasian taklam in ukna za neihna lak hi (Ps. 110:1-3). Pasian taklam ah tutna ukna za nei ahih manin Jesu in a nungzuite tungah Kha Siangtho a buasuk hi ci in Lai Siangtho siksan in Peter in gen hi. Jesu in tua ukna za a neih ngei mah ahi hi (John 1:1-3, 17:5). Tua tawisangna in Jesu pen Topa leh Honpa ahihna Pa Pasian kipsakna lim ahi hi (Acts 2:36).

Hih thu in Lai Siangtho sunga a thupi mahmah khat ahi sia le pha kikal kidona hong telsak hi. Jesu kitawisang lo hi leh Kha Siangtho hong kibua theilo ding a (John 7:39), singlamteh tungah gualzo lo hileh Jesu kitawisang theilo ding hi (John 17:4, 5). Tua hi a, Kha Siangtho kibuahna dingin Jesu a kitawisang phot kul hi, ahangin, kitawisangna in singlamteh tungah leitung a ukpa tungah Jesu gualzawhna Pasian in sansak ahihna ki langsak ahih man hi (John 12:31).

Leitung ah mawhna hong lut na in Pasian mai mialsak hi. Jesu sihna in mihing khempeuh tatna ding bek hilo in Pasian dikna langsak in Satan zuauna kilatsak na dingin a kisam ahi hi. Jesu nasepna tawh hotkhiatna nasep khanghun hong kipan zo ahi hi (Luke 4:18-21). Dawi hawlkhia in dawivei te mawhna amaisakna tawh Satan hencipna pan suahtakna a pia ahi hi. Ahi zongin, tua bang gualzawhna taktak singlamteh ah zawhna in thuneihna bukim pia thei bek hi. Christ kipumpiak thoihdamna vantungah sanna a om khit ciangin Satan guallehna kiciamteh aa, Christ hong paikikna dinga mite a kigingsak Pasian mite a ding Kha Siangtho kibua thei pan hi.

THURSDAY                                                                                     July 12

GAH MASATE

Peter kammal in a za te lungtang sukha hi. Amau te lak ah Jesu khailup ding aa a ngen pawl zong kihel kha ding hi (Luke 23:13-25). Ahi zongin, tu in Nazareth khua mi Jesu in Pasian teel Messiah cih a san uh ciangin, dahna tawh, “kote in bang hih ding ka hi uh hiam?” ci in kiko uh hi (Acts. 2:37).

Acts 2:38 sim in. Mawhmaina ngahna dingin a kisam thunih te bang hiam?

________________________________________________________________

Kisikkikna in dahna leh thumna bek hilo in nuntakna kalsuanzia laih a mawhna pan kihei cihna ahi hi (Acts 3:19, 26:20). Upna tawh kisikkikna dik in Pasian letsong hi a, letsong dangte mah bangin ki nial thei hi (Acts. 5:31-33, 26:19-21, Rom. 2:4). Tuiphum John hun pan kipan in kisikkikna in tuiphumna tawh kizom den hi (Mark 1:4). Tua hi a, tuiphumna in kisikkikna lahna hi a, mawhna sawpsiangna leh Kha Siangtho tawh nuntakna lim ahi hi (Acts. 2:38, 22:16 leh Titus 3:5-7 etkaak in).

Acts 2:38, 39 sim in. Mawhna pan kisik a tui kiphum te tungah bang kamciam kipia hiam?

_________________________________________________________________

Pentecost a mite mawhmaisakna bek kipia lo in pawlpi mainawt nasepna ding leh mimal picin na dingin Kha Siangtho zong kipia hi. Hih in thupha khempeuh lak ah a lian pen hi kha thei ding hi. Pawlpi dinna a hangin lungdamna thu tangko ding ahi hi (1 Pet. 2:9). Tua hi a, tua hun pan kipan in hotkhiatna khamuanna leh sepding a kipia lungdam thu tangkona ding tha pia Kha Siangtho vang-liatna nei uh hi.

Banghangin lungdamna thu tangko ding khat peuh a dingin mawhmaina ngah ding thupi hiam?

FRIDAY                                                                                                               July 13

NGAIHSUT BEH DING: Pentecost a Kha Siangtho kibuakna in vantungah bang thupi piang a, koi bangin Pasian in leitung mawhna dinga Jesu thoihdamna kipumpiakna sanghiam cih hong lak hi. Kha Siangtho kibuakna in Jesu in vangtung ah eite tang dingin bang hong sepsak cih zong hong lak lai hi. Hih thu te in eite telzawhloh zah in hotkhiatna ding a vantung leh leitung kizop nasepna te om ahihna hong phawksak hi.

“Christ vankahna in nungzuite in aki kamciam thupha te ngah ding cih lahna ahi hi… Christ in vantung kongkhakte ah lut in vansawltakte biakpiakna laizang a kumpi tokhom tungah tu hi. Tua pawipi a man khit phet in, nungzuite tungah Kha Siangtho kibua suk a, Christ kipahtawi in minthanna kipia hi. Penticost ni a Kha Siangtho kibuakna in Honpa kimuakna gualzawhna hong lak hi. Ama kamciam a omsa bangin Siampi leh Kumpi hihna tawh vantung leh leitungah a ngah thuneihna khempeuh zangin Ama mite sathau nilh ding Kha Siangtho a nungzuite tungah vantung pan paisak hi.” – Ellen G. White, The Acts of the Apostles, laimai, 38, 39.

KIKUP DING DOTNATE:

1.            Tu lai pawlpi sungah Pentecost bang i lamen thei ding hiam? Bangdan hi thei ding a bangte hi theilo ding hiam?

2.            Pentecost ni-a a thugenna ah Peter in Jesu thawhkikna a bulphuh deuh thu ngaihsun in. Jews te in Messiah lametna a neih tei uh hangin, tua Messiah in sihna pan in thokik ding cih lamen kha hetlo ding uh hi. Hih thu in tu lai a kideih deuh thuhilhna te hilo in Lai Siangtho hong hilhna in bang hiam cih i kan ding bangzah tak in a thupi na hong musak hiam?

3.         Acts 2:38 in tuiphumna thu gen hi. Hih lai ah Jesu um napi a kituiphum ma-a a si mite mangthang (hotkhiat ngahlo ding) cihna hiam? Na dawnna telgen in.