ZSS SINNA 8:SAWM-A-KHAT II PHATTUAMNA

SINNA 8:SAWM-A-KHAT II PHATTUAMNA February 17 - 23

---

NIPI (SABBATH) NITAAK Feb 17

Tukal sinna ah simding: Mark 16:15; 1 Pet. 3:8,9; 1 Cor. 9:14; Rom. 3:19-24.

Lai Siangtho Bulphuh: “Biakinnpi sungaa nasemte in biakinnpi panin an ngah uhaa, biaknatauaa nasemte in biaknatau tungaa kiluite a ngah lam theilo nahi uh hiam? Tuamah tawh kibangin Topa in: lungdamna thu ahilhte in lungdamnathu panin kivakna a ngah ding uh hi ci-in thu a pia hi.” (1 Cor. 9:13-14, ZIV)

Sawm-a-khat piakna in upna lahna cih nungkaal in i sinzo hi. Tuain i gen bang septakpina sittelna leh lahna lam khat hi.”Upna sungah na om uh hiam, no le no kisittel ciat un; no le no kizia-et un. Na kizia-et uh ciangin cing zolo nahih keibuang uhleh Christ no sungah a ten lam theilo nahi uh hiam?” (2 Cor. 13:45, ZIV).

Lai Siangtho sungah sawm-a-khat piakna masapen Abraham in Melkhizedek a piakna (Gen. 14:18-20, Heb. 7:4) ah kimu hi. Levi te-in biakinn nasep nadingin sawma-khat la uh hi (2 Chro. 31:4-10). Tuhun in lungdam thupuak nasep panpih nading sawm-a-khat kizang hi. Diktak telsiam leng, hih in Pasian tawh i kizopna tehna hong suak hi.

Sawm-a-khat zatna, thupina, hawmkhiatzia leh phattuamnate in kha lam thahatna tawh Pasian nasep panpih nading leh sumtha tawh lungdamthu tangkona tawsawn nadingin a kigeel ahi hi.

Tukaal sung sawm-a-khat tawh kisai in: a kihawmkhiatna, midang aading bang khiatna nei, leh i khalam nuntakna ah bang phattuamna hong tun cihte i sin ding hi.

* Tukal sinna na simna tawh February 24 Nipi aading kigingkhol in.

NIKHATNI February 18NASEPNA SUM TAWH I PANPIH KHAWM HI

Jesu in “lungdamna thu tangko” ding (Mark 16:15) leh “nungzuimi suaksak ding”, “thupiak khempeuh zuih nading hilh ding” (Matt. 28:19, 20, ZIV) hong sawl hi. Tua hi aa, leitungah a thupipen nasep ahi, mite Jesu kiang tutding nasep ah a kihel dingin Pasian in hong deih hi. Pasian’ hong ap neihsate tawh hih nasep panpih ding neihsakemzeektu ii vaipuak hi. Midangte Christ lahna tua nasep ah kihelna in mimal ki-apna zungthuk khasak semsem hi. Nungzui, neihsakem-zeektu, leh nasem khatsim in sawma-khat khempeuh hih a siangtho nasep aadingin hong keng ding uh hi. A gualzo nasep in kipumkhat upna a khauhsak mahbangin nasep panpihna ah kipumkhat ding thu i nget kul hi.

Hih nasep zawh nading Pasian thukimpih sumgeelna in bang hiam? “Sawm-a-khat buppi” (Mal. 3:10, ZIV) acih bang a deihna hiam? “Ka inn sungah an a om theih nading” cih kammal in bang khiatna nei hiam? (Mal. 3:10, ZIV).

I theihsa bangin, Abraham leh Jacob hun a kipan, tuama zong omthei, mite in sawm-a-khat pia uh hi (Gen. 14:20; 28:22). Sawm-a-khat pen Pasian pawlpi panpihna khat hi. Tua in a lianpen sumtha panpihna leh Ama nasepna ah mikim kiheltheih penna khat hi. 

Tuhunin, Christian a tamzawte in Pasian nasep panpihna tawmcik bek pia uh hi. Christian khatsim in thumaan takin sawm-a-khat piatek hileng, “i tel zawhloh, lamet ngamloh, leh lamdangsak zah dongin a gah i mu ding hi” – Christian Smith and Michael O. Emerson, Passing the Plate (New York: Oxford University Press, 2008, p. 27).

Khang simin Pasian in Ama’ nasepna sumtha tawh panpih nuam mi neiden hi. Hih leitungbup nasep ah i vekin i sepkhop ding vaipuak i neihlam tel ding kisam hi. Hih nasep sumtha tawh panpihna ah utbang leh kipawlkhatlo in om ding hilo hi. Mite leh Levi te in Nehemiah kiangah, “Eite’ Pasian’ biakinn kinloin i om kei ding hi” (Neh. 10:39) cih sangin ei hong kitona lian zawlai hi. Tuhun pawlpi mite leh nasemte khalam ah kipumkhat in sumtha nasepna ah semkhawmaa, leitungbup nasep mungtup tunzawh nading sepkhop huai hi.

Leitungah a zai mahmah Adventist nasepna ngaihsun in (Rev. 14:6,7). Hih nasep sumtha tawh panpih theihna vaipuak i neihlam mikim in telhuai hiam?

NINIHNI February 19PASIAN’ THUPHATE

Malachi 3:10 ah, sawm-a-khat ah a citakte Pasian in thupha lianpi a kamciamna i mu hi. Ahizongin, Pasian thupha pen namkhat bek hilo hi. Tel-et leng, Pasian’ thupha taktak in neih le lamte sangin thuk-in zai zawtham hi. Malachi sungaa thupha in khalam banah, leitung thupha zong kihel hi. Tatkhiatna, lungdamna, lungsim tawldamna, leh ei aading a hoihpen Pasian in hong sepsak khempeuh in Pasian thuphate ahihna kilang hi. Pasian in eite thupha hong piak ciangin zong, i san thuphate eite sangin a neilo zawte hopsawn phamawh (kul) hi. Midangte thupha a pia dingin eite thupha hong kipia hi. Eite tungtawn in Pasian in Ama’ thupha mundang ah kizeelsak thei takpi hi.

1 Peter 3:8,9 sim in. Peter in thupha ngahna leh midangte aading thupha hihna thu bang hong gen hiam?

Sawm-a-khat piakna panin thupha zahnih hong pai hi. Thupha ngah beklo in midangte aadingin thupha ihi pah hi. Ei hong kipiate i piakhia thei hi. “Pia un, no zong hong kipia ding hi...note zat tehna tawh no aading hong kitehsak ding hi.” (Luke 6:38, ZIV).

Sawltak 20:35 sim in. Hih kammal in sawm-a-khat piakna tawh kibangci sai hiam? 

Sawm-a-khat piakna in a lianpen hong hilh thu in Pasian muanna hi (Jer. 17:7). “Pasian’ thukham kiphutna thugui a kip mahbangin sawm-a-khat piakna ngeina thugui zong kip hi.  Sawm-a-khat piakna ngeina in Jewste aading thupha hi keileh Pasian in pialo ding hi. Hunbei ciangdong hih ngeina azangte aadingin zong thupha hi ding hi. Vantung aa i Pa in Amahmah phattuam nadingin hih piakkhiatna ngeina a bawl hilo in, mite aading thupha ahi dingin a bawl hizaw hi. Hih piakkhiat huhna ngeina in mihingte kisap liantak ahihna Amah in mu hi.” – Ellen G. White, Testimonies for the Church, vol. 3, pp. 404, 405.

Midang khat ii nasepna tawh Pasian in thupha hong piakna ngaihsun in. Tua bangmahin midang khat tungah bangci bangin pai-in thupha hi thei ding na hiam? 

NITHUMNI February 20SAWM-A-KHAT II NGIMNA

Timothy tungah Paul in, “Bawngtal in buh a cil laitakin a muk hencip kei-in” leh “nasempa in a thaman a ngah ding kilawm hi” (1 Tim. 5:18, ZIV) ci-in laikhak hi. Deut 25:4 sung a bawngtal thu Moses lai at leh Luke 10:7 sung a nasem thu Jesu gen a gelhkik hi. Paunak bang a kingaihsun kammal khat hiaa, buhcil bawngtal in buh a nek ding adik thu ahi hi. Tua bangmahin, a citak lungdamna thupuaktu zong thaman tawh pahtawi huai hi.

Pasian in thukhun ngeina bawl in tua tawh nasem hi. Amah in ni innkuan (solar system), gilpi angawi innkuan (digestive system), thagui innkuan (nervous system) leh a dang tampi bawl hi. Levi te zat sawm-a-khat ngeina (Num. 18:26) in biakbuuk kepcing nading leh amau panpih nading hi. Tuhun hileh, amau nuntakna lungdamthu tangkona dingaa ki-apte tawh kibang hi. Pasian’ geel sawm-a-khat ngeina in nasep panpih nading Ama’ teel lampi hiaa, tatkhiatna khang tawntungah kimu thei hi. Pasian nasemte sawm-a-khat tawh panpihna in Pasian nasepna panpihna bulpi leh tawphah hi.

Paul in “lungdamnathu ahilhte in lungdamnathu panin kivakna a ngah ding” cih in bang deihna nei hiam? (1 Cor. 9:14, ZIV). Lungdamna thupuakte panpih a kisapna 2 Cor. 11:7-10 ah hong bangci hilh hiam?

Paul in, “Note na ka sep nadingin pawlpi dangte pan huhna ngahin amaute aa ka sut hi” (2 Cor. 11:8, ZIV) a cih ciangin, ahau Corinth pawlpite kiang nasep nadingin a zawng Mecedonia pawlpite kiangpan thaman a ngahna a gen nuam ahi hi. Corinth pawlpite kiang a gennop bulpi in lungdamnathu tangkote piakding kilawm cih thu hi.

Sawm-a-khat tua bang ngimna aading kizang hiaa, tuamah hi suak ding hi. “Sawm-a-khat pen a tuam vilvel a zat ding kisehkhia hi. Mizawng huhna bangaa ngaihsut ding hilo hi. Leitungah Pasian thutak tangkote panpih nadingin a tuam vilvel zat ding hiaa, tua ngimna lo a dangah zat ding hi peuhmah lo hi.” – Ellen G. White, Counsels on Stewardship, p. 103.

Lev. 27:30 sim in. Tuhun aadingin hih thugil bang ciang zattheih hi ding hiam?

NILINI February 21VANKHOLNA-INN

Pasian in huih(Jer. 10:13), tui(Psalm 33:7), leh vuk leh gial(Job 38:22)kholna cihte nei hi. Amanphapen in sawm-a-khat kholna hi. “Keimah in Levi te tungah Kikhopna Puanbukaa a nasepna uh thukna in Israelte sawm-a-khat khempeuh a luah dingun ka pia hi” (Num. 18:21, ZIV). Hih in “vankholna thugui” a kici sawm-a-khat kikholna a lak masapen mun hi. Sawm-a-khat Ama teelna munah a puak nading un Pasian in Israelte hilh hi (Deut. 12:5,6). Solomon hun lai-in, Jerusalem biakinn ah sawm-a-khat kipaipih hi. Kamsang Malakhi in “Sawm-a-khat a buppi in ansal sungah hong puak un” (Mal. 3:10, ZIV) cih a gen laitakin Israelte in koi ah puak ding cih tel uh hi. Vankholna in biakna nasep kisepna mun leh Levi te kipanpihna mun limla hi.

Vankholna cih i theih nadingin bang mindang Lai Siangtho ah kizang hiam? 1 Chro. 26:20, 2 Chro. 31:11- 13, Neh. 10:38.

A siangtho sawm-a-khat puak nading vankholna bek ahihna Lai Siangtho ah kimu hi. Sawm-a-khatte zeek na ding Pasian in vankholna phual nei hi. Seventh-day Adventist in hih vankholna thugui saang leh zang in leitungbup tuam pawlpi in ki om hi. Pawlpi mite in amau
innphual pawlpi tawn in conference/mission ah sawm-akhat puak ding hi.  Conference/mission sumkepna panin pastorte in khasum ngah uh hi.

“Pasian nasep a zai semsemna zui-in, sapna hong om mun zawdeuh ding hi. Tuate i huh theih nadingin, ‘Ka inn sungah an a om theih nadingin ansal sungah sawm-akhat a buppi in hong puak un’(Mal. 3:10) cih sawlna i thupi sim kul hi. Christian a kicite in thumaan takin sawm-akhat leh sumpite Pasian pia le uh, vankholna dim ding hi. Tua hileh lungdamnathu tangkona panpih nadingin sumdonna tuamtuamte kisam hetlo ding hi.” – Ellen G. White, The Acts of the Apostles, p. 338. 

Mite in a utna tek vuah sawm-a-khat puak leh bang a piang diam? Mi khatsim in tua cihleh Pasian’ nasep bangci ding hiam? Tua hiaa, i sawm-a-khatte i puakna ding mun a puakna banghangin thupi hiam? 

NINGANI February 22SAWM-A-KHAT LEH UPNA TAWH TATKHIATNA

Rom. 3:19-24 sim in. I upna thukhun aading thutak bang hong kihilh hiam? Hih hilhna eimau upna tawphah hihsak den ding banghang thupi hiam?

Lai Siangtho thupuak thupipen in eite khempeuh tatkhiatna ngah dingaa i kilawmlohna thu hi (Rom. 3:23). A kilawm hile hang, eimau sepna leh hoihna tawh a ngah ihi dingaa, Lai Siangtho hilhna tawh kilehbulh hi. 

Rom. 4:1-5 sim in. Hih kammal in hoihna hilo hehpihna thu bang hong gen hiam? 

Tuahiaa, hotkhiatna pen akilawmlote tungah piakkhong hi (Eph. 2:8, 9). A kicing Christ hoihna pen eima hoihna in kingaihsun ahihmanin hotkhiatna a om thei hi. Sawm-a-khat thu ah zong, Pasian i apkik manin hoihna a ngah hilo hi hang. Sawm-a-khat in Pasian a hikhin ahih leh i apkikna ah zong hoihna bang om thei tuan ding hiam?

Na hoih sepna dangte bangmahin sawm-a-khat piakna zong hotkhiatna ngahna hilo hi. “Ahang in, eite sep dinga Pasian geelkholh, nasep hoih sem dingaa Christ Jesu sunga kipiangsak Pasian khutsiam ihi hi” (Eph. 2:10, ZIV). 

Bangbanghileh, Sawm-a-khat apkikna in Pasian in eite hong ngetna ah kiniamkhiatna leh ki-aapna ahihkeileh kipimuhna leh kiliatsakna hong kilangsak hi. Pasian i it leh a thu i man  ding hi. Sawm-a-khat in eite neihsakem-zeektu hi-in, Pasian tungah na khempeuh baa ihihna kiphawkna lahkhiatna hi. Sabbath in Pasian pen Piangsakpa leh Tanpa ahihna hong phawksak bangin, sawm-a-khat piakna in zong i nuntakna leh i ngah hotkhiatna in Pasian piakkhong ahihna hong phawksak hi. Tua bangin, sawm-a-khat apkikna in upna nuntakna hong taksuak sakin, i upna muhtheih in lahkhiatna taktak ahihna hong theisak hi.

Luke 21:1-4 ah upna tawh nuntakna cih bang a deihna hiam?

KIGINNI February 23

NGAIHSUT BEH DING: Eite husante, lungtang sai sim, leh i hunte in Topa kiangbek pan hong pai cih ki mangngilh pahpah thei hi. Sawltak 17 ah Athen khua mite kiang a maan Pasian thu Paul in a genna ah, Piangsakpa bek hilo in hong Thahatsakpa zong hi ci hi. Athen khua mite in Pasian maan kua cih theilo uh hi. Ei Christiante in thei i hihmanin tua in i nuntakna laigil ahih ding kisam hi. Pasian in eite tungpan hong kalh tampi omaa, tuate tawh
kituakin i nuntak kul hi.

“Pasian in eite hong kalh om hi. Ama’ neihsate mihingte khut sungah piaaa, ahizongin Ama’ nasepna dingin sawm-a-khat ngen hi. Tuate Ama’ sumkholna ah koih dingin ngen hi. Ama’ aa bangin Amah piak ding ahi hi. Siangtho ahihmanin a siangthoaa zat ding ahi hi. Leitung mun khempeuh ah tatkhiatna thutak puak nasep panpih nading ahi hi. A nai a gamla aa omte tungah khuavak a kipuak theih nadingin hih sawm-a-khat Ama’ sumkholna inn ah a tawntungin luang den ding hi. Citaktaka Ama’ hong sawlbang manna tawh na khempeuh Pasian’ neihsa ahihna eite in i pulaak hi.” – Ellen G. White, Testimonies for the Church, vol. 6, p. 386.

KIKUPDING DOTNATE: 
1. “Hun nawhsa takin tawntung lam manawh hi. Pasian neihsate iksik kei ni. Lungsim bup hong ngen hi, Amah pia in, piansakna leh tatkhiatna tawh Ama’ aa ahi hi. Ama’ aa ahi na pilna, hong ngen hi, Amah pia in. Ama’ aa ahi na sum, hong ngen hi, pia in” – Ellen G. White, The Acts of the Apostel, p. 566. Ellen G. White in “Pasian aa ahite iksik kei ni” a cih bang a deihna hiam? Sawma-khat i piakloh ciang ei le ei bang i kigu hiam?

2. Vankholna ah hilo, amau utna ciatah pawlpi mite in sawm-a-khat pia leh cih dotna ngaihsun pha in. Banghang hibang ngaihsutna sia hiam? Pawlpi ah bangsiatna om theiaa, banghang siahuai hiam? 

3. Luke 21 ah, nekgukna tampi om mahleh meigongnu sumpi piak Jesu in phat hi. Hih in sawm-a-khat ki koici zat cih tawh buaina hangin a piakna munah alaih sawm mite bang hong hilh hiam? 

oo00oo