MS 9: Pasian tawh A Lamdang Thute

Sim peuhmah ke’n!!, Geen in!!

Nipi 9na: Pasian tawh A Lamdang ThuteMarch 3 Mexico Gam

Agen: Laura del Carmen Flores Dias, 23

A teenna Mexico gam ah Laura’ nuntakna pen a lam-dang thute tawh kidim hi. Amah kum 10 a phaak ciangin, anneekna pawi siim dingin a lawmte khat inn ah va pai hi. Tua munah annek pawi nahi loin pawl khenneu (small-group) te Lai Siangtho Thu sinkhopna a bawl uh nahiaa, amah zong hong kihel pah hi.

Amah in tua Lai Siangtho sinkhopna hoih sa lua ahihmanin kum khat sung khat vei zong pelh ngeilo hi. Tua khitciangin Sabbath ni sim in Seventh-day Adventist pawlpi ah kikhawm hi. Pawlpi in Gupkhiatna thu a taangkona uh a man ciangin Laura in tui kiphum ding kun aa, ahizongin, pawlpi mite in saang zo naailo uh hi. 

Amau in, a nu leh a pate Adventist hilo ahihna, kum 11 phapan ahihna leh Lai Siangtho sinbeh laai ding a kisapna genpih uh hi. Ahizongin, amah tui kiphum nuam lua ahihmanin tui hong kiphum ta hi. Laura tan (10) saang pan a saangkahna hong zawh ciangin Adventist university ah pilna zom nuam hi, ahizongin saangsaap ding sum kisam hi. A Pastorpa in Adventist university te ah Lai Siangtho Thu a kihilhna thu a gen ciangin, tua mun ah pilna a sin nuam ahi hi. Lai Siangtho Thu a hilh siama khat suak dingin ngiimna hong nei ta hi.

Laura in Pasian tungah, “Adventist university khat ah pilna nong sinsak leh taan (10) saangpi ah Laai Siangtho hilh siama ka seem ding hi. Ahizongin, pilna nong sinsak kei leh bel, na ka sem dingaa, pasal neiin, tua khitciangin pilna ka sinbeh ding hi,” ci-in deihtakin thu ngeen hi. Pasian in a thungetna dawng in pilna sinbeh thei ta hi. A masa kum lang ( Semester Masa) aadingin saangsaap a langbek pia zo himah taleh pilna sinbeh dingin Adventist university in Laura saang hi. Amah in sum a ngah nadingin inn ngak nasep seem hi. Mai kum lang (semester), aadingin huhna a kicingtakin ngahaa, kum 4 pilna a sin khitciangin leiba neilo in innkuan tawh kisai lukhu neelkaai ngah ta hi.

Pasian in a thungetna a dawnna Laura in a tel ciangin, a kam ciamsa bangin, Tan (10) saang ah Lai Siangtho Thu hilh siama sep ding khensat pah hi. Ahizongin, MA lukhu neelkai ngah ding kisam laai ahih manin, pilna sin nadingin sum neilo hi. Saangsaap ding huhna a ngah nadingin Adventist universities nih ah Laura in ngetna laai khak hi. University nih in a saangsaap piak zawh nadingin laibu zuak thuhilhsia a sem nading lai thukkik tuak uh hi.

Laura in bel, nasep ding phamawh salo hi, ahizongin, koi zaw university ah kah ding cih Pasian’ kiang panin lamlahna thei nuam hi. A saangsaap piak zawh nadingin sum ngahna nasep muh ding ollo hi cih ama’n zong thei hi. Tua ahihmanin, amah in, “Nasep nong ngahsakna University ah pilna ka sin ding hi,” ci-in thu ngeen hi.

MA lukhu neelkaai a ngah zawh ni (4) ciangin Navojoa Adventist University panin, “Nang aadingin nasep khat ka nei uh hi. Na ut hunhun in nong seem thei hi,” cih sapna laai khat ngah hi. Laura in university ah a paina ding lamsaap nangawn nei lo ahih hangin, a sangkahpih teng kidongin a lamsaap ding pia uh hi.

Tu-in Laura pen Navojoa Adventist University ah tan (10) saangnau pangte Lai Siangtho thu hilh hi. Ama’ Lai Siangtho mun deih penpen in, James 1:12, “A hoih takpi mah hiam, ci-in sinna a thuak ciangin a nangzote a hampha mahmah ahi hi. Tua bang in a nagngzote in amah a itte tungah Pasian in a piak dingin a ciam nuntakna lukhu a ngah ding uh hi.” cih ahi hi.

“Khangno ihih mahbangin haksatna tampi kinei hi. Ahizongin, Pasian huhna tawh tuate ki gualzo hi. Amah a itte tungah haksatna tuah ciangin gualzawh nading hihtheina Pasian in pia ding hi,” Laura in ci hi. Laura’ nuntakna thu lamdang tampi tawh kidimaa, ama’n diksa hi.

Adventist pilna aadingin sum neilo te tungah Pasian muang ding in thu hilhna nei hi. “Pasian pen na khempeuh a Neipa hi. Amah na muan naakleh, na kisapna zah saangin zong a tamzaw hong pialaai ding hi,” ci-in han thawn hi. 

Tu kuata Sabbath 13na sumpi tawh Laura ii khua, Villahermosa ah a kiphuan Seventh-day Adventist zatopi (hospital) behlap nadingin kihuh ding aa, veng leh paam cidam nading zong huh ding hi. Sumpi tawh nong huh na hangun lungdam ung.

 ----000000----