MS 8: A Nihveina Hunphaa Khat

Sim peuhmah ke’n!!, Geen in!!

Nipi 8na: A Nihveina Hunphaa KhatFebruary 24: Mexico Gam

Agen: Ezequiel Perez Gongora, 34

(Hih tecipanna a gen dingin papi (or) sia khat sawl in) Kum 20 ka phaak ciangin zi ka neiaa, tua khit ciangin zu dawn leh zateep ka kipan hi. Tomcik sungin zu leh zatep sila ka suak hi. Laam na pawite ah kihel nuam kasa hi.

Mexican gam Tabasco pyine (State) aa ka inn naai uhaa om ahi, Seventh-day Adventist biakinn ah Pr. Richard Perez in Gospel taangkona bawl hi. Tua laai ah ka zi in thugenna a ngaih khitciangin tui kiphum hi. Ahizongin, tui kiphum ding nihvei tak ka nial khin hi.

Zu leh za ka naakzat zawh kum 13 ciangin ka nungzaang hong na lua mahmah hi. Ka naai uhaa kihong zatui tawh natna kibawlna ah ka kilakaa, ka natna a dam tuamkei hi. A zingciangin, Southeast Adventist Zatopi (Hospital) ah ka kilak hi. Siavuante’n daatmaan hong zaih in, sisan hong sitsakaa, a dangte zong hong sitsak hi, ahizongin, natna bang mah mu lo uh hi.

Ka nungzaang natna suuk seemseemaa, ka ci a satna zong khang hi.

A ni (4) na ni ciangin ka lupna ah Zatopi Pastorpa hong pai hi. Amah pen Pr. Richard Perez ahi hi. Amah in hong thei pahlian in ka min tawh hong hopih hi.

“Hih hun pen Pasian na ki taangsap hun ahi hi,” hong ci hi. Aman guitar tum in la dawng nih sa hi. Tua khitciangin Lai Siangtho hong simpih hi. Tua hunsung mahin, Pasian in kei hong it takpi ahihna ka telcian hi.

A paikhiat ma-in, Sabbath ni ciangin Pasian a biakna vuah kei zong hong sap nadingun zato siamate vaaikhak hi. 

Ka gim lua hi. A na lah kiam thei mahmah loin, ka cisa zong saang mahmah hi.

A ni sagihni tak ciangin, siavuanpa ka lupna inndei sungah lung himawhna maisuah tawh hong pai hi. Siavuanpa in a tuam in amah tawh kiho ding a kisapna hong gen ciangin, ka zi inndei sungpan ka pusuak sak hi.

Siavuanpa in, “AIDS natna na nei hi. Tua kipsak nadingin sitna khat ka bawl ding hi,” hong ci hi. 

Hong sit khitciangin, siavuanpa pusuakaa, ka zi hong lutkik hi. 

Ka zi in ka natna bangci om cih hong dong hi. Ka dawn daan ding ka theikei hi. Kei leh kei zong ka kitel zo nawnkei hi. Suuksia takin gamta ka hihmanin ka natna pen tua hang mah hi kha ding hi. 

Tua khitciangin, Pastorpa hong gen kammal: “Hih hun pen Pasian na kitaangsap hun ahi hi” hong cih ka phawk saan hi. 

Thu ngen nuam ka hihmanin ka zi inndei sungpan ka pusuak sak hi. Ka thunget kawm in ka  kap hi. Pasian tungah a dang hunphaa khat ka ngeen laaiaa, AIDS natna neih loh nadingin hong huh ding zong ka ngeen hi. 

Tawmveisung khit ciangin, Siavuanpa hong paikik hi. “Gen ding thu hoih leh thu hoihlo ka nei hi. Thu hoih in AIDS natna na neikei hi. Thu hoihlo in na natna baanghiam cih ka theikei hi,” hong ci hi. 

Pasian in ka thungetna hong dawng hi cih ka thei hi, ahang in, ka nat na pen a hoihlo lam ahi hi. 

A dang natna sitna pen ka awm sung bawk hi, ahang in, ka awm leh ka tuam kikal aa sihui sungah tui om hi. Siavuanpa in ka awm ah tuite lakkhiat na dingin paih thun hi. Tu zawh ni nga ni ciang ka ciah theih ding thu siavuanpa in hong gen hi.

Hong kisitna pan in natna tuamdang khat hong muhsak ciangin ka lung neu seemseem hi. Siavuanpa in, “Kong vauhilh kul hi. Na lamdang bek in na natna panin hong damsak thei ding hi,” hong ci ngiaumawk hi. 

A zingciangin thukin takin ki-at dingin geelna om hi. Thu ka ngeen leuleu hi. Pasian tungah kimanna neilo ka nuntakna pan hong hot khiat nadingin ka thuum hi.

Ki-at ni ciangin, ki-atna inndei sungah khuapawk lohna zatui kisun dingin ka ngak hi. “Topa aw, nong nuntak sakleh, tui ka kiphum dingaa, na khut sungah ka nuntakna kong pia ding hi,” ci-in thu ka ngeen hi.

Hong ki-atna nai guk sung sawt hi. Ka khanlawh ciangin ka inndei sung ka lupna tungah ka lum hi. Ka zi leh ka tanute in hong hopih dingin na ngak uh hi. Pasian a dang hunphaa khat hong pia laai hi cih pen ka tel mahmah hi. Ni 21 khitciangin, zatopi pan inn ka ciah thei peet-mah ta hi. Zato pan ka tuah zawh kal 3 ciangin pawlpi in Pasian thu taangkona na bawl uhaa, tui ka kiphum taktak ta hi. Tu-in pawlpi ah biakinn kep tavuan ka nei aa, upa makai khat zong kahi hi.

Hunphaa nihna hangin Pasian ka phat hi. Ka nuntak laiteng, Ama’ na ka sem ding hi. Tu kuata Sabbath (13)na sumpi pawlkhat tawh Mexico gam Villahermosa khua ah a om, Southeast Adventist Hospital kilambeh dinga, tua in kiim leh paamte cidamna lam huh ding hi. 

Sabbath School sumpi nong piak uh lungdam maahmah hi. 

############@@@@@@@@@#############