Zo Phualva Vol 08, Issue 02: Upna Hanga Diktanna 2

Rom 2: Mi khempeuh Kibang

Lawmta thum Kawlpau siam kituh:  Khatnapa in alawmpa kiangah, “Mendoh zua gah sar-zaa laidaa” (မင်း တို ့ရွာ က ဆာ ယာ လိုက် တာ) acih leh alawmpa in, “He, phi le maphi beneh” ( ဟေ၊ ဖီ လဲ မ ဖီ ဘဲ နဲ ့) cihsan vial nong. Athumnapa in alawmtegel awllolua, khutzekeei , “Mendoh na-zauh kah a thuu-thuu ve, kwaa” ( မင်းတို ့ ၂ ယောက် က အ ထူ ထူ ဗဲ) cihsan pian lainong  hiven.

Pasian in mihingte tungah amah theihtheihna lungsim pia hi. Tua theihtheihna lungsim tawh Pasian azongkik dingin deih hi. Piansaknate le nuntakziate tungtawnin mite in piangsakpa  pasian om hi, cih theihin, asul azuih theih nadingin  Pasian in, akhutma le khekhap tampi nusiat hi. Tuate tung panin sia le pha khenteltheih nading  zong Pasian in mihingte pia hi.  Gentehna-in, mithahna pen hoihlo hi cih mikhempeuh in thei-in, deihlo uh hi. Tuapen Pasian piak sia-lepha theihna khuak pan atheih uh ahi hi. Tuaban-ah, mawhna lutkhitciangin, Pasian in ama deihna leh gupkhiat nading mite in atheih nadingin,  Israelte tung ah, torah pia-in azaizawa atheih nadingun hilhbeh hi.

Ahi hangin Israel-te in torah in ahilh Pasian deihna zuituanlo uh hi. Vun a at uhhangin  Pasian deihna bangin nungta tuanlo uh hi—pumpi citunga vun a at uh hangin a lungsim uh vun ki-atlo hi--milim biakei in cin midangte ahilh hangun, amau biakinn nate gu uh hi. Pualam Judah hihna bek nei uha, Pasian deih Israel hihna lungsim neilo uh hi—Adventist pawlpimi khatin a om uh hangin  khalam Adventist lungsim nei tuanlo uh hi ici ding hi.

Tuamanin, torah neite le aneilote akibang leluh ahi hi. Ahangpen Pasian in thu akhen ciangin, torah neilote pen aneilohna zui-in, atheihna uh bulphuh in khen ding hi. Torah neilote aneilo cin pengtuanlo ding uha, aneite zong aneihna uh zui-in peng tuanlo ding hi. Torah neihleh neihloin amau diktansakna hilo hi. Judah hihna pen Pasian mi hihna hipahlo hi.

Christian hihna zong diktanna ngahna hipah tuanlo hi. Torah neilote in Pasian tungah a upna uhtawh anungta hiam? Torah neite in zong Pasian tungah upna tawh anungta uh hiam, cih pen Pasian mai ah diktanna adinga thubulpi ahi hi. Thukham zuihna lel(letter of the law) le sabbath tanna lel pen dikna ngahna hiloa, thukham deihna le sabbath deihna banga (spirit of the law) nuntakna pen diktanna ngahkhit cianga khanuntakna ahi hi. Ettehding: Pasian in Abraham pen kamidik ci hi. Abraham in sawlna torah zuiin, vunata, Pasian tawh thuciamna bawl hi. Anungciangin upnapupi cih min ngah hi. Abraham pen midik hi cihna ngahpa hia, Pasian ciapteh ahihi.

Tua ahihleh, Pasian in tuabanga aciaptehna pen, avun-at le thuciamna Pasian tawh abawlman hiam? (Gen 17). Pasian thukhun, ngeina, le thukhamte azuih man hiam? (Gen 12:5) Khat bek hilo hi: Abraham in vunatna, thuciamna abawlma, thukhun le thupiakte azuihma pekin Pasian um ahihmanin, tua a upna hang bekin,  Pasian in amah diktanna pia hi. Diktanna angahsak khit ciangin Pasian in Abraham tawh thuciam abawl panbek ahi hi.

 

Tuamanin diktanna pen, Pasian in amah a um mite tungah, a upna uh hangbeka, apomna ahi hi. Judah-te zong teltuam hihna le Sabbath le thukhamte azuihmana Pasian in diktanna angahsak hizenzenlo hi. Diktanna angah khempeuh pen a upna uh hangbek ahi hi (Heb 11 limtak sim in). Adventists-te adingin zong sabbath le thukham zuih man, pawlpi man tawh kizopmana diktanna kingah ding hizenzenlo-a, mimal in Pasian tunga ih neih upna hang bektawh kingah ding hizaw hi.

Etteh ding: Singlamteh tunga Jesus tawh kikhai khawm nihte lakah akhatpa in, Jesus pen mawhneilo, Mesiah hi cih a upmanin, muangtakin “Na gam ah ong mangngilh kei in” cingam hi. Tua kammal apulak lungsim dinmun in amah midikin Pasian ciaptehna ngahsak hi.  Tua adingin ama sabbath tanna le thukhamzuihna amasuan theihding le alah ding khatbek omlo hi.

 Pasian in dik atansaknopte atangsak hizawa—kuamah  vakham theih, va kuppih theih, le vahazat theih a omthei nam hilo hi. Paul in Pasian vangliatna acih pen ahihi. (Zop lading)

A Gelh: Pr Kham Khen Pau

Cidamna:

Tansatai i cih pen bang hi ding hiam?

Pumpi sungah satak nam nihin kikhen hi.

1. Skeletal muscle a kici tansa, pheisa, bansa cihte le,

2. Smooth muscle a kici lungtang satak, zunkholna satak , gilpi satak cihte ahi hi.

Skeletal muscle- te pen lungsim sawlna bangin gamta hi. Gtn; Lungsim kalsuan nuam leh khe zong kalsuan pah hi.

Smooth muscle- te ahih leh lungsim sawlna nuai-ah omlo uh hi. Gtn; Lungsim in a sawlloh hangin lungtang pen sih madong kisaisai hi.

Pumpi a gamtat nadingin lungsim sawlna tawh Skeletal muscle-te kituak takin hong gamtat kul hi. Lam kal khat suan nadingin khe a mailam satakte hong ton kul aa, a nunglam satakte hong kizan kul hi. Tua bangin lungsim sawlna tawh satakte hong ton zel hong kizan zel ciangin mihingte kigamtang thei hi. Khat veivei a ton ding satak hong tonin a kizankik ding satak hong kizan thei pak kei leh a ton satakte khauh gawpin kitang theilo hi. Tua pen satai i cihcih pen ahi hi. Pheisa, bansa cihte saangin tansa tai nuam phadeuh zaw hi.

Tua bang sataina pen bang hangin hong piang hi lian ding hiam cih kitel zo nailo hi. Ahih hangin a nuai ate hangin hong piangin ki-ummawh hi.

1. Pumpi sungah Electrolytes (Potassium, Sodium ) le dat tuamtuam (Calcium, Magnesium) cihte a kisam zah a om lohna hang.

2. Gamtatna tamlua in satakte a tawlluatna hang.

3. Tat vatvat/kihei vatvatna hang.

4. Pumpi sungah a lum, a sa, a vot, a na cihte a thei sanengte (nerves) damlohna hang.

5. Pumpi bupah sisan tun zawhlohna hang. (gtn. Sawt tutluatna hang)

6. Pumpi sungah hormones tuamtuamte a kisam zah a omlohna hang.

7. Pumpi ading tui kisapna hang (Dehydration).

8. Khua-ul tam paikhiatluatna hang.

Satai natna (Muscle cramp) a nei thei deuhte:

1. Kum tam khin Uhamte

2. Naupaai nupite

3. Lungtang natna neite

4. Sin damlote

5. Thyroid hormones tawmte

6. Natna khat peuhpeuh hangin sisan khekte

7. Kimawl siamte

8. Nisa nuai-ah naham semte

9. Exercise a bawllualiangte

10. Khua-ul haudiakte

11. Natna tuamtuam dam nading zatui nete Gtn; Sikhang kiamna zatui - Nefidipine Zunsuaksak zatui - Lasix

Satai natna dam nading koicih ding:

A tam zaw pen bangmah hih kul lo-in ama thu-in damkik aa minutes (10) sung kiim sawt thei hi. Khat veivei a nai-in a sawt hun zong om thei hi.

- Lungsim patausak kei-in. A natna mun a lum nadingin meksak in.

- Tansa a tailohna mun lamah damdam in zansak (heisak (ahk) mek sak) in.

- Tui tampi dawn in.

- Khua vot leh satak ton nuamdeuh ahih manin a lum dingin kikem siam in.

- Khua-ul tam a paikhiatluat ciang datsa tui (Oral Rehydration Solution-ORS) dawn pah in.

- Potassium dat tam a kihel singgah tam nek in. [Gtn; Nahtang, Leenggah, Onggah tui (အုန်းရည်), Lengmaw (လိမ္မော်သီး) ]

- Naupaai laitak ( Nausuah kuan hun pawl) in satak tai nuam deuh ahih manin Calcium, Magnesium dat tam a kihel nektheihte tam nek in. [Gtn. Bawngnawi, Kelnawi, Nawithuk (ဒိန်ချဉ်) ]

- Exercise na bawl ciangin damdamin khantoto inla a val lualiangin bawl kei in.

- Tawlngak hun nei in.

- Zan na lup ciang na khelam sangsak in.

* Satai theite tuipek kidophuai hi.

*Lakna: Sm Hau Lun, Mikim Cidamna, p. 12-14

Zo Phualva Thupuak - Vol 08, Issue 02 by DavidLian on Scribd