MS 6: A Zi’ Thungetna Pasian In Dawng

February 10: A Zi’ Thungetna Pasian In Dawng Belize Gam

Agen:Olga Chee, 39, leh Johnny Chee, 70

Olga Chee in Seventh-day Adventist biakinn ah a kikhop pih dingin a pasal Johnny Chee a khatveina zol hi. A pasal Johnny in, “Tua biakinn lobuang, a dang biakinnte ah hong kikhawm ning,” ci-in siang gen hi.

Johnny in Adventist pawlpi pen a kician loin ngaihsunaa, a zi Olga in kaal nih khit ciangin a nihveina a zol zong nial laailaai hi. Olga leh Johnny tegeel in Belize gam sung, mi 15,000 teenna khuapi neu khat ahi, Orange Walk ah kikhop nading pawlpi khat zong leuleu uh hi. Tua pawlpi zong a deihdaan uh hi naailo laai hi, ahizongin, Olga bel tua pawlpi ah kikhawm nuam hi.

Anupa un a lawmte uh tawh Sunday ni a kikhawm pawlpi ah tamveipi takmah hong kikhawm uh hinapi, a lung uh kimzo tuanlo hi. “Biakinn pan ka paikhit simun, ka kha lam nuntakna uh kibang veve hi. Ka lawmte uh tawh phee ka kaap uhaa, ka pasal in zuu dawn laailaai hi. Hawmsuah kisa lua in, banghang cih zong ka thei zokei hi,” ci-in maigum takin Olga in gen hi.

Amau inn nunglam ah Adventist nupa kopkhat teeng uh hi. A zi tha pia dingin hong hawhaa, Olga tawh thu ngeen khawm uh hi. Amah in Olga leh a taneu thum tawh Adventist biakinn ah kikhawm dingin zawnaa, Olga in zong a kikhoppih dingin a pasal Johnny zawn hi.

A tawpkhakna ah, Olga in Sunday a tang pawlpi khat ah kikhop ding khensataa, Johnny zong tua pawlpi mite tawh hong ki-it ta uh hi. 

Tua pawlpi ah kum (5) sung dektak hong kikhawm uh hi. Ahitazongin, Olga leh Johnny in a nuntakna vuah a kitaang sap khat om hi cih veina khat hong nei leuleu uh hi. Pasian tungah huhna ngen uh hi. Tawlkhat khitciangin, sumzon nasepna tampi a nei Johnny’ naaihuaite

khat in, amau gam tawh a kiveeng gam ah a hon piza moh zuakna sai ah a huh dinginsam hi. 

Johnny gamdang a pai khitciangin, Olga in, “Topa aw, hih mun panin mundang ah ka om dinguh Nang deihna ahihleh, lim khat hong lak in. Tua lim pen ka puak ding puansilhte leh ka tate lobuang, inn panin bangmah laak loh ding lim hi sak in,” ci-in Olga in thu ngen hi. Ama’ thungetna kuamah tungah gen lo hi. 

Kaal (4) hong sawt ciangin, Johnny in ama’ omna ah a zi Olga leh a tate a lal ding samta hi. “Patau ken!. Ih kisap ahi inn, tate saang kah nading saang leh van tuamtuamte, khuaphelep mei lobuang, i nei ding hi,” ci-in Johnny in a zi hopih hi.

Pasian in Olga’ thungetna a dawng tawh kibang liangh in, amah zong a tate tawh a pasal  kiangah hong lalta uh hi. Amah in a khua vuah a kikhopna tawh kibang pawlpi khat mu hi. Biakinn mai ah a kigelh, “Tuni in Ama’ aw na zak leh na lungtang khauhsak ken,” (Hebrews 3:15) cih kammal in a lungsim sukha hi.

Olga in tua Lai Siangtho mun kha guk sung Sunday ni sim-in sim hi. Tua zawh ciangin, Johnny zong a piza moh bawl zo ta-in, a innkuan un Orange Walk ah hong ciahkik uh hi.  Olga leh Johnny a kikhopna lui ah hong kikhawmkik uha, a hizongin, a lung uh kim zo tuanlo hi. Zingsang khat, Olga in radio a hon aaleh, Adventist thuhilhsia Doug Batchelor in Sabbath thu a genna ngaai thei hi. 

“Thu tuamtuam hangin, siapa gen Sabbath thu in ka lungsim hong sukha hi. Tua baanah, ‘na lungtang khauhsak ken’ a cihna Lai Siangtho mun zong ka phawk hi. A maan thu ka zuih kul ding hi,” Olga in ci hi.

Johnny in zandeuh aa a hon ansai ah a nasep laaitak Olga in va mu hi. “Johnny aw, Sabbath thu bangci ngaihsut na hia?” ci-in Olga in dong hi.

Johnny heh lua in, “Sabbath thu tawh kisai bangmah za nuam keng! Sabbath ni pen Nilini, Kiginni a hihkeh ni khat peuhpeuh hi thei lel!” ci-in a zi haan lualua hi. Olga in, “Hi bangaa kinial nading ahih mawkleh hih thu pen Pasian’ kiangpan hilo ding hi. Hici koih phot dih ni,” ci hi. 

Tua ni suun in, ansai ii anhuan buuk ah Olga khukdin in, “Topa aw, Sabbath ka tan dinguh nong deih leh Biakinn ah ka pasal tawh hong kikhawm sak in. Ka innkuan un Nangma’ nong gawm hiaa, ka innkuan  un nong kikhensak nuam kei hi,” ci-in thu ngeen hi.

Tua zaan in, nai (9) in Olga ihmu hi. Zun tha dingin zingsang lam nai (1) in a thawh leh, Computer mai ah tu-in, Lai Siangtho a leem a pasal mu hi. Johnny in a thupi kan khat a nei hiaa, bangmah geenlo hi. Olga zong ihmu kik hi.

A zingsang ciangin, Olga nasem dingin a kithawi ciangin, Johnny in, “Na thei kha hiam? Sabbath ni-in, Pasian i biak kul hi cih ka um tak takta hi,” ci-in khensat sa in gen hi.

Olga in lamdang savat hi! Hibangin a lungsim a kheelna ahang, Olga in a pasal dong hi. Olga a lup khitciangin amah in TV hong in, thuhilhsia Dr. Doug Batchelor thugenna a ngaihna thu a zi tungah gen hi.

“Doug Batchelor in Thukham (10) thu geen in, Thukham nambat (4)na thu a maanlo lam in a kihilhna thu gen hi. Tua thu in tu zaan in Laai Siangtho thu a thuukzaw in kan ding hong kipansak hi,” Johnny in ci hi.

Olga leh Johnny zong Sabbath ni hong tun ciangin Adventist pawlpi ah kikhawm uhaa, nunghei nawn kilkel lo uh hi. 

#########@@@@@@##########