MS 2: Vandummeel Jean Bombitual

Vandummeel Jean Bombitual

January 13 Puerto Rico Gam

(Agen: Kermyt Torres Castellano, 39)

Sim peuhmah ke’n!!, Geen in!!

(Hih thu a gen dingin pasal: siate ahihkeileh upate khat sawl in!)

Puerto Rico gam ah, ka pa pen Seventh-day Adventist innkuan khat panin khangkhia aa, ahizongin biakinn ah jean bombitual tawh a kikhop manin pawlpimi pawlkhat in a gensiat ciangin pawlpi pan tawpta hi.

Tua hun lai-in, ka pa pen kum 19 phata in, Sunday tang pawlpi sungah a om laai, ka mailam nu ding tawh Sabbath ni khat biakinn ah kikhawm uh hi. Mi pawlkhat in ka nu a kilawm in puan silh lo hi ci-in a gen ciangin ka pa hehlua ahihmanin a Adventist upna nusiata hi. Palik zalian khat inn sungpan ka khangkhia hi. Ka paa pen a tha lian in, thatang hat kisinna ah zalian khat hiaa, mihingte saangin haatna a nei zawtham in kingaihsun hi. Mi tawh kilaaina, zateep leh zudawn cihte ama’ uuk ahi hi. Ka naupa leh kei tungah, “Lampi tungah a thahaatpente bek sawt nungta ding hi. Sawtvei na nuntak theih nadingun na thahaat ding uh kisam ding hi,” ka pa in hong ci hi.

Kumte hong bei totoaa, ka nu leh ka pa kikhen ngiaumawk uh hi. Ka pa kum 45 a phata in, a nasia mahmah natna hangin zato ah kibawl hi. Ka pa in a zudawnna leh a zateepna hangin a gilzangte a muatna thu siavuanpa in hong gen hi. Siavuanpa in ka pa gilzang pi kua (9 feet) tak atkhiatsak hi.

A ki-aatna a dam ciangin a tuap lam hoih lo leuleu in, naak theilo leuleu hi. Setkaan 45 sungin limtaangthei et bangin a mit tawh hunbeisa a mawhnate mu dandan hi. Topa Zeisu in amah zolzol napi in, a nialnate zong mu hi. A mailam nuntak nading hong patau mahmah hi. Tuakhit phetin, tunglam panin a lian khut nih in amah leen ahihlam thei aa, “Lung himawh ken. Ka khut sungah kong keem hi,” cih aw khat za hi. Tuakhit phetin hong naakkik pah hi.

Zatopi pan a tuah khitciangin ka pa in Topa Zeisu tungah a nuntakna aap aa, Adventist pawlpi ah hong ciahkik hi. Ahizongin, a tapa nihte aading lung himawh laai hi. Amah in, “Topa aw, ka nuntakna nong honkhia hi, ahizongin, ka tate bangcih ding?” ci-in lung himawh takin thu ngeen hi.

Tua hun-in, kum 27 ka phaata aa, vanpua mawtaw luui khat hawl in, zateep, zudawn bek hilo, bengh nangawn ka zang laailaai hi. Ka naupa in dawi bia-aa, puanvom silhin, a muuk sansakaa, a khutcinte leh a mit tegeel vomsak hi. Amah in a mai ah mun 32 tak a vom lim neuneu te suai hi. A lupna inndei sung a kawmte leh a tung uumna (ceiling) kawmte a vom zaa zuut in, a lup ciangin tumtheih a ging ziahziahte ngaai kawm in ihmu hi.

Ka pa un, Lai Siangtho thu hong sinpih nuam himah taleh ka unau-un ka lungluut vetkei uh hi. Ka pa in ko unau tungah Topa Zeisu thu gen ding hong hanciam hangin na nial pahpah ka hihmaun, ka pa a lung kham semsem hi. Ka pa in lampi dang khat tawh kote Pasian thu hong genpih aa, “Nang hong dem mite keimah in ka dem dingaa, na tate ka honkhia ding hi,” Topa in ci hi, cih Isaiah 49:25 sung hong simpih hi. 

Ka pa un, a tapa geel Pasian’ khut sungah hong aapta hi.

Pasian ka thei ngeikeiaa, ka pa in kei aadingin thu hong ngetsak lam zong ka theikei laailaai hi. Ahizongin, a sawtlam ciangin a lamdang pha mahmah thu khat hong piang hi. Kiginni (Friday) ni khat, ka lawmte kiangah ka hawhaa, kiginni sim in ka hih zeelzeel uh zu kizuakna laamna pawi ah ka gual nuam uh hi.

Ninihni (Monday) ni, inn ka ciahkik ciangin, ka nuntak zia pen ka hua mhamah ta-aa, a hoihzaw nuntakzia ka lunggulhta hi. 

Zingsang nai (11) pawl in, “Topa aw, ka nuntakna nong kheelsak ding ka lunggulh hi, a hangin, lamdung ah a si ding kahi ta-aa, ka kithuah pih numei kiang panin natna hoihlo zong ka ngah khamai ding hi,” ci-in thu ka ngeen hi.

Topa Zeisu in ka nuntakna ah hong bawl banghiam cih ka thei kei hi, ahizongin, a zingsang ciangin ka heekzia kilamdang hi. Zatep, zu leh bengte ka zang nuam nawnkei hi. Topa Zeisu’ na ka sem nuamta hi. 

Ka zongsat sate ka zang nawnkei hi. Tua zawh kum 10 ciangin Puerto Rico gam ah kum 39 a pha Adventist pastor khat kahi ta hi. Adventist nungak khat tawh ka kiteengaa, tanu tapa (5) ka nei uh hi. Ka naupa zong US gam Boston khuapi aa om Adventist pawlpi khat ah Topa’ naseem in om hi. Tu-ma kum nga laai-in Adventist pawlpi sungah ka nu ka tui phuum thei laailaai hi.

Ka pa in zi-kik neiaa, Puerto Rico gam ah a citak Adventist khat mah hilaai hi.

Sawtpi laaipek in, ka tangvaal ciangin laamna pawi ah pai in zu dawn khawm dingin ka pa tawh ka kiciamnuih thei zel uh hi. Ahizongin tu-in ka pa tawh biakinn ah ka pai khawm uh hi. Halleluijah!

Topa Zesu in ko patate aadingin hih bang nalamdang bawl thei a hihleh, midangte aadingin zong na lamdang bawl thei lua hi. Kermyt Torres Castellano in kum (7) sung pawlpikeem pastor seemaa, tu laitakin Puerto Rico gam, Mayaguez khuapi ah a kiphuan Antillean Adventist University ah Pasian thu kisai MA lukhu neelkai a ngah nadingin lai sin hi.

Tu kuata Sabbath sawmleh thumna sumpi tawh kiim leh paam phaakzawh seemseem nadingin lungdamna thu taangkona phualpi lamna ah hong kihuh ding hi. Topa Pasian in sumpi hong pia mimal khat ciat tungah thupha tampi hong pia behbeh lai ta hen.

##########@@@@@@@@@@#########