ZSS SINNA 3: PASIAN MAW HAUHNA?

SINNA 3: PASIAN MAW HAUHNA? January 13 - 19

NIPI (SABBATH) NITAAK

Tukal sinna ah simding: Ps 33:6-9; Matt. 19:16-22; 1 Pet. 1:18; Heb. 2:14,15; Exo 9:14; Ps 50:10.

Lai Siangtho Bulphuh: “Tua ahihmanin Pasian in amah a sangpen munah tawisangaa, min khempeuh sanga min tungnung zaw pia-in, tua Jesu mai ah vantung, leitung leh leinuai-a om khempeuh khukdin in, leii peuhmah in, ‘Jesu Christ, Topa hi,’ ci in pulak ding a, Pa Pasian’ minthanna ahi ding hi.” (Filippi 2:9-11, ZIV)

Sum leh neihsa tampi khol venvanna thu ah Pasian in a deihna teltak in hong gen hi. Topa Jesu in neihsa a khol venvan a huaiham mihaupa thu hong genna tungtawn in Pasian i zahtak ding kilawm hi: “Ahi zongin Pasian in ama kiangah, ‘Mihaipa aw, tuzan mahmahin na si ding hi. Hih na koihkholhsa teng kua in zang nawn ding ahi hiam?’ Tua mah bangin amau aading bekin a kholcipte pen Pasian’ muhna panin mihau hilo uh hi, a ci hi.” (Luke 12:20,21).

Pasian’ aading sep leh sum’ aading sep pen aki pawlkhawm thei hetlo gamtatna hi tuak hi. Khat ahih kei leh a dang khat hipah lelaa, Pasian maw sum hiziau hi. A nih tuakaa neihkhop ding utnapen ataksuak hetlo ngaihsutna hilel hi. Mi kikhemzo kha thei, ei le ei zong ee, ahi zongin ni khat ni ciang i sep bang i pulaak nading ahi Pasian bel kikhem zolo mawk ding hi. 

Teel ding khat i nei hi. Sauvei ngaihsun semsem, paulap tam semsem, sum leh sum itna in hong kiplet semsem ding hi mawk hi. Upna ah khensatna kisam hi. Pasian kua hi aa, eite aading bang hong sepsak hiam cih leh Ama tungah bang leiba nei i hiam cih mitsuan ngaihsutpi in nei lehang khensatna baih tuam mahmah hi.

* Tukal sinna na simna tawh January 20 Nipi aading kigingkhol in. 

NIKHATNI January 14PIANGSAKPA CHRIST

Gen. 1:1; Ps 33:6-9; Isaiah 45:11,12; Jer. 51:15; leh John 1:3 sim in. Hih munte ah leitung hoihna thu bang teng hong gen hiam?

________________________________________________________

“Vanpi a zal Christ hiaa, leitung mungpi a phut Amah ahi hi. Van awng munah leitung a khai Ama’ khut hiaa, zangkuamte paak tawh Amah in zem hi. Ama’ thahatna tawh mualliante bawl aa, a bawlsa tuipite Amah in uk hi. (Ps 65:6; 95:5. Leitung, huihlak leh vankum hoihna tawh a kidimsak Amah hiaa, Pa’ itna Amah in tua teng tungah gelh hi.” – Ellen G. White, Khangcin Lungdeih, p.20.

Vante amau le amau in a sia hi peuhmah lo hi. Biakna dangte hilhna ahi leitung vante leh nate mahmah siahuai in hoihlo aa, biakna tawh kisai vante bek hoih hi cihbang hilo in Lai Siangtho in leitung vante thupisak tham hi.

Tuate Jesu ngiatmah in a bawl hi. Tua leh koici bangin siahuai suak thei ding hiam? Dahhuaitakin, Pasian’ silpiakte khempeuh siat nading leh a diklo in a kizat ciangin siasuak hi. Ahizongin, tua in silpiak pen a sia sak hilo hi. Leitung aading Pasian’ bawlsa nate zatkhialh ding leh uangzat khak ding Lai Siangtho in hong vauhilh bekaa, tua nate hoihlohna hong genlo hi. A langkhat ah, Pasian in leitung nate bawlaa, Ama’ mite zong leitung ii hamphatna leh gahvuite ah lungdam ding deih hi. “Tuateh Topa note Pasian in nang le na innkuanpihte hong piaksa na hoih khempeuh, Levi te le no kala om pemtate tawh nuam nasa khawm ding uh hi” (Deut 26:11; 14:26).

Jesu pen Piangsakpa hi (John 1:1-3) aa, leitung pen a bawlsate a limla khat hilel hi. Vante ii manphatna Amah in theiaa, eimau nopsak nading leh hamphat nadingin hong piak zong Amah in thei hi. Leitungmite in tua letsongte zangkhial in, Pasian’ minthan nadingaa zat ding kipia kimlai amau angsung bek aading a zat uh ciangin bang piang cihte zong Amah in thei hi. 

Pasian bawl leitung ah a lamdang letsongte en dih in. Mawhna suksiat gawp khit nangawn ah ahoihna tampi mu thei lai hi hang. Akibawl leitung ii hoihna in a Bawlpa’ hoihna hong bangci gen hiam? 

NINIHNI January 15PASIAN’ TAPA / MIHING’ TAPA

Ei Christiante in Jesu pen Pasian bit leh mihing bit in i um hi. Pasian leh mihing kigawmkhawm hihna in leitung aading leh tawntung aadingin a thupi muhna tuam neisak hi. Bangcibangin pasian hihna leh mihing hihna neikhawm cih i tellohna in thumaan phiat tuanlo hi. 

“Khat tawh kisai in thuthuk telhak nih omaa, tua in – khat ahi Pasian mimal thum ahihna leh Jesu in Pasian leh mihing hihna neihna thu ahi hi. Jesu mihing a hong pianna thumaan zahin uphuailo zahaa thu hoih phuahtawm tangthu ah zong omlo hi.” – J. I. Packer, Knowing God (Downers Grove, Illinois: InterVarsity Press, 1973), p. 53.

Hih leitungah Jesu hong paina a hang khat in Pasian pen a ithuai hong kin Pasian hiaa, mimal khat sim bangzah in hong kin cih hong lak ding ahi hi. Pawl khatte’ up bang in a gamlapi ah omin, hong kin selo pasian hilo in, Jesu in vantung aa i Pa’ pianzia dik hong lak hi.

Satan in ahihleh Pasian kiangpan mite khen ding hanciam hi. Eite hong kinlo hong awlmawhlo bangin i muh nading Satan in hanciam hi. A diktak Pasian hoihna leh hehpihna i theih i thuak khakloh nadingin ahi thei bangbang lampi zangin Satan in hanciam hi. Akisam zah sangin vante lunggulhna tawh Satan in tua bangin hong zo thei hi.

Matt. 19:16-22 sim in. Topa tawh i kigamlatna dingin Satan in vante itluatna koici bangin zang hiam?

________________________________________________________ 

Mihing a hong piang Jesu mahmah kua cih a tel tangvalpa tungah a thugen ngaihsun in.  Bang piang hiam? Hauhna, neihsate a itluatna in Pasian mahmah tawh a kigamlatsak ding tangvalpa in phal mawk hi. A dah phial zongin tua dahna in a dik aa gamtat nading a dalzo zah dongin leitung itna leh vante deihluatna in mittaw sak hi. A neihsate a sup ding a dah hilo hi. Tua nate tungah anuntakna a supna hangin adah hizaw hi.

I zawng aa i hau zongin koici bangin leitung tawh kizopna dik kemcing thei ding i hiam?

NITHUMNI January 16TANPA CHRIST

Leiba cihpen vantung thupai dan hilo hi. Ahizongin, Adam leh Eve hong mawh ciangin thukham palsatna in sihna hi. Tua hiaa, mihingte in Pasian’ thutanna leiba neite hong suak hi. I loh zawh ngeiloh ding leiba tawh a cimawhte ihi hi.

Pasian’ hong itna in tatkhiat ding geelna hong tawsawn hi. Jesu pen eite’ aading “akipsakpa” (Heb. 7:22) hong suak hi. Jesu kipiaktawm nuntakna bekmah in Pasian thutanna leiba lohzo bekaa, tua kidontuahna ah Jesu a thupi pen hong suak hi. Singlamteh tungah Jesu in mawhna thaman ii leiba hong piaksak zoaa, hehpihna tawh hong pom hi. Tua zahaa manpha mihingte tat nadingaa kizangh manh vankumpi in cikmahin mu ngeilo hi (Eph. 5:2).

“Jesu hong piakna ahi vantung’ neihsa khempeuh leitungah hong buaksukna tawh Pasian in mihing khatsim ii utna, itna, ngaihsutna, leh kha khempeuh hong lei khin hi.” – Ellen G. White, Christ’s Object Lessons, p. 326.

Anuai a munte sim inla Christ in eite bang pan hong honkhia hiam? Col. 1:13; 1 Thess. 1:10; 1 Pet. 1:18; Heb. 2:14, 15; Gal. 3:13; Rev. 1:5. 

_______________________________________________________________________________________________________________________________________________________________________________

John 19:30 aa Greek kammal tetelestai in a kigen kammal lakah a thupipen kici hi, a khiatna “Kizo zo hi” cih singlamteh tungah Jesu gen ahi hi. Anunungpen a tangkokhiat kammal in a nasep kizo ta-in “i leiba cingtak in kipia khinta” cihna ahi hi. Lametna omlo kammal tawh agen hilo aa, a mangthangsa leitung tatkhiat zawhna kammal tawh a gen ahi hi. Tatkhiatna singlamteh i muh ciangin a piangsa sepna in tulai nuntak a huzaapna leh mailam lametna hongpiakna kilangsak hi. Mawhna, sihna, leh gilopa nasepna a tawntung a susiacip dingin Jesu in a  nuntakna pia hi. Tua in kilawm lopi eite tatkhiatsa hita

cihna ahi hi (Eph. 1:7). A lamdang tatkhiatna i muhna in mun siangtho ah paina ahi hi.

Tanpa ahi Christ in a etlawmpen Pasian’ mel ahi hi. Ama’ lunggulhpen in eite tatkhiat ding ahi hi. Pasian in mite bangzahtak manphasa in hong bangci muh cih hih thu-in hong lak hi. Thutang cinsak khitciang, Ama’ kipumpiakna ah eite in bangci gamtatthuk ding cih Christ ii ngaihsutna hi. 

Christ in na bawlsa siatna leiba khempeuh aading bittak leh cingtakin hong lohsak khin cih ngaihsun in. Na thuhkikna bang ahi diam? (Job 42:5, 6 en in).

NILINI January 17A AAM PASIAN

Pharaoh tawh a kimaituahna ah, Pasian in, “... leitung khempeuh ah Kei tawh a kibang khat beek omlo hi, ci-in na theih nadingin hih hunin na inn sungtawng dong leh na nasemte leh na mite’ tungah ka gimnate khempeuh kong tungsak ding hi.” ci hi (Ex. 9:14).

Pasian in “leitung khempeuh ah Kei tawh kibang khat beek omlo” a cih bang a deihna hiam?

“Ciangtannei mite’ lungsim in Ciangtanneilo Pa’ nasepna leh zia leh tongte telsiang ding piangthei ngeilo hi. Thu telsiangpen, a vanglianpen leh pilna sangpente nangawn aading Siangthopa’ thu ahih leh akituamcip thusim in omden ding hi.” – Ellen G. White, Testimonies for the Church, Vol. 5, pp. 698, 699.

Pasian tawh kikim kuamah omlo (1 Kings 8:60). Ama’ ngaihsut, phawk, leh gamtatdan eite in tel theilo hi hang. Eite bangin hanciam in i ngaihsut hangin Pasian pen Pasian mah hi veve hi. Amah in mihingte’ khuak, maitang leh khat le khat a kilamdang dingaa a Bawlpa hiaa, Amah bang adang omlo hi (1 Kum. 8:60). Amah in Piangsakpa hiaa, Piangsakpa  hihna tawh kizui-in a piansakte tawh ki lamdang ngiat hi.

A bawlsa nate tawh Pasian akilamdanzia hih munte in hong koci gen hiam? 1 Sam. 2:2; Ps 86:8; Isa. 55:8,9; Jer. 10:10; Titus 1:2. 

Pasian hihna khempeuh, a neihsateng, leh a sep teng i et ciangin kidempih neikha mai cih phawk-huai hi. Neimawk mah hi. Mihingte’ itna leh deihna tawh a kidempih kul hi. Tua hangin “a aam” Pasian a ci hikha ding hi (Pai. 34:14). Pasian in mihingte deihteel thei dingin

hong bawlaa, tua in Ama’ na sem ding maw ahihkeileh nadang’ na sem ding cih hi. Tua in mihingte buaipih penpen hiaa, vannuai khempeuh a bawl a nei Pa’ na bek sepsak ding kilawm kimlai tua sangin bang mel tawh hong pai ta seleh pasian dangte’ nasep ding kiteel khaden hi. Tua ahih manin Amah in a aam Pasian ahi hi.

Na lungdeihna Pasian tawh kituh ding na nuntakna ah a om bang hiam?

NINGANI January 18NEIHNA ADIKTAK

Piansakna leh tatkhiatna tawh eite Pasian’ aa hi hang. Eite bek hilo in, i neih leh lam khempeuh zong Pasian’ aa hi. Eimau deihteelna simloh neih dang i neikei hi. 

Akilehbulh in, i neih leh lamte eimau neihsa hi cih pen leitungvai ngaihsut saandan hi. Tua in khemna hi. Amau’ neih leh lamte amau’ neihsa aa a ngaihsun Christiante Pasian kammal hilhna tawh kilehbulh in a ngaihsunte hi. 

Na khempeuh ei’ aa hilo Pasian’ aa hi (Job 38:4-11). Ciamsa gamaa Israel mite bangin eite peemta leh khawhlawhte ihi hi (Lev 25:23). Eimau nuntakna huu ding nangawn ama tungah i kinga hi (Acts 17:25). Eimau’ neihsabi sakte Ama’ aa vive hi. Eite Ama’ neihsakem-zeektute i hi aa, muhtheih ahiaa, muhtheihloh ahizongin, neihsa khempeuh Pasian’ minthan nadingin kepzeek ding ahi hi.

Anuaiaa Lai Siangtho munte panin Pasian’ neihsa te gual in: Deut. 10:14; Ps 50:10; 104:16; Ezek. 18:4; Hag. 2:8; 1 Cor. 6:19,20. Hih munte in eimau kep neihsa vante bangci muh ding kilawm ci hiam?

_____________________________________________________________________

“Na khempeuh Pasian’ aa hi. Mite in hihthu nial kha mah inteh. Amaute tungah cinghtakin thupha tampi a piakte amau angsungkhual lungkim nadingin zang kha thei mah ding uh hi, ahizongin, a kipia neihsakep-zeekna pulaak dingin amaute kisam ding hi.” – Ellen G. White, Testimonies for the Church, vol. 9, p. 246.

Pasian’ neihna leh eimau kepzeekna in kizopna piangsakaa, tuate tungtawn in Amah in vantung aading kiginkholhna leh midangte tungah phattuamna leh thupha ahi dingin eite hong zang thei hi. Ahihhangin, a citaklo neihsakem-zeektu in a Neipa’ septheihna khaktan hi. Zanni i sin mahbangin, Pasian in Ama’ deihna hong thagum sawl lo hi. Eite hong bawl in Ama’ hong paikik dong kepzeek ding neihsa hong pia hi. Tuate i kepzeekna in Amah tawh kibangci zopna nei cih hong lak hi.

Na neihsate nang’ aa hilo Pasian’ aa hi cih thu ngaihsun pha in. Tuain na neihsate tawh ki koici zop ding cih hong hilh hiam?

KIGINNI January 19

NGAIHSUT BEH DING: Neihsakep-zeekna pen a kem leh a zuun dingin a etlawm mahmah Eden huan ah Adam leh Eve akoihna pan kipan ci-in i thei hi (Pian. 2:15). Tua a picing kiim le paam ah tentheih dingin huan a zuun ding uh haksa lua hetlo ding hi. Pasian in panlaak thak pia in a vaipuak uh zong hilhpah hi. Eden huan kepcingna in tua innkuan thakte tungah thupiina leh lungnopna tun hi. 

Hebrew kam in “ukna” (Gen. 1:26,28) in “ vaanna leh kepna nuaiah koih” cihna hi. Hih in thagum hat thu tawh ukna hiloaa, Pasian’ bawlsa nate itna leh thuneem tawh kemcing cihna hi. Hih vaipuak bei nailo hi. Pasian in aneipa hi aa, amaute a zuun-ukte leh a kemzeekte ahihna uh Adam leh Eve te in a sin ding uh ahi hi. Acil panin Pasian in Adam leh Eve te aneite in koihlo aa muanna tawh vaipuak a pia bek ahi hi. Asepna vuah a muanhuai-cihtakna uh Pasian mai ah a lah ding uh ahi hi. 

“Adam leh Eve tungah a kepcing dingun Eden huan kipia hi. Amaute in ‘zeem in kem’ ding uh hi. Asepna uh ah lungdam uh hi. Lungtang, ngaihsutna, leh deihnate in kihualtakin semkhawm uh hi. A nasepna uah gimluatna leh tawlna omlo hi. A hunte uh zatcing nasep leh kiho-limna tawh kidim hi. A nasep uh nuamsa uh hi. Pasian leh Christ amau kiang hawh in kiho den uh hi. Suahtakna bucing amaute kipia hi... Pasian pen Eden huan neipa hiaa, amaute akemte ahi uh hi.” – Ellen G. White, Manuscript Releases, vol. 10, p. 327.

KIKUPDING DOTNATE:

1. Pasian in leitung neipa cih i telna in kiim le paam tungah vaipuak i neihna hong bangci hilh hiam? Kiim le paam puah ding bangci ngaihsut huai hiam?

2. Pasian in a aam Pasian cih ngaihsun in. Leitung ngaihsutna ah aam cih in pelh ding kilawm a sia lungsimpuak hiaa, a sia lam a hilo in Pasian’ zia koi cibangin i tel thei ding hiam?

3. Pasian bawlsa van leh nate lungnop nading leh diktak aa zatna leh tua nate zatkhialhna i koici khensiam thei diam? Tua bangaa tuamsehna banghangin thupi se hiam?

oOo