ZSS SINNA 2:KA MU, KA DEIH, KA LA

SINNA 2:KA MU, KA DEIH, KA LA

 January 6-12

NIPI (SABBATH) NITAAK Jan 6

Tukal sinna ah simding: 2 Cor. 8:1-7; Matt. 13:3-7,22; Gen. 3:1-6; Isa. 56:11; Matt. 26:14-16; 2 Pet. 1:5-9.

Lai Siangtho Bulphuh: “Ling laka tute ahihleh thu za napi hih leitung nuntak nading lunghimawhna le hauhna’ khemna in depgawpin a gah lote ahi hi.” (Matt. 13:22, ZIV)

Sum itluatna leh vante neihnopna in mun tuamtuam panin hong pai thei hi. Neihgulhluatna tawh gilopa’ hong zolna te Ellen G. White a genna ah, “ ‘Pai inla, leitang leh sum neite leitung nuntak zon kinna tawh amsak in. Amaute mai ah leitung in a ngaihbang dingin lak inla, a gou-te uh khol in a lunggulhnate uh leitung nate ah kipsak in. Pasian’ nasemte hauhnate ngah aa ei langkhat ah a zat loh nading dal in i hanciam mahmah kul hi. Ei sung mite bek ah sum keem un. Tam ngah semsem leuh, i mite lakkhiatna tawh i gam nakpitak susia ding uh hi. Chris kumpi gam lamtoh ding leh i huat thumaan a tangko ding uh sangin sum a lunggulh nadinguh bawl un, tua hileh angsung khual, a haza theite eima ukna nuai ah om ding uhaa Pasian’ mite tawh kigamla ding ahih manun i launa kul nawnlo ding cih i thei hi.!” - Counsels on Stewardship, Laimai 154,155.

Adahhuai thu in, hih khemzolna pen lawhcing pha mahmah se hi. A lauhuai ziate i en ding a, Pasian’ kammal in hih thangzaak bangci pelh theih ding cih hong hilhnate i sin ding hi.

* Tukal sinna na simna tawh January 13 Nipi aading in kigingkhol in.

NIKHATNI January 7A LAWHCING LUNGDAMNATHU

Television thuhilhsia khat in, “Pasian in nang thupha hong pia nuam hi. Neih le lam tampi hong piakna tawh thupha hong piakna hong kitel sak hi,” ci-in a gen ngei hi. Thudang khat in genleng, na cihtak nakleh, Pasian in hong hausak ding hi.

Hih dan ngaihsutna pen a lawhcing lungdamna thu kici hi – Pasian nung zui in, tua hileh leitung hauhnate hong pia ding hi. Hih bang ngaihsutna pen neihgulhluatna ding mawhpen nadingaa diksak tawm ki tawsawnna thuhilh maanlo ahi hi.

Lungdamnathu pen hauh ding kamciam a zatna in lam hong pialsak thei thu neuno khat hi.  Hihbang upna in Lai Siangtho hilhna tawh ki tukalh in Lai Siangtho kammal bulphuh a dikkhinlo angsungkhual biakna ahi hi. Hih zuau thu in mawhna khempeuh zungpi ahi na dang khempeuh sangin ei le ei, ei lunggulhna ding bek khualna hong tun hi. 

Hih a lawhcing lungdamnathu in Pasian i piak ciangin Ama’ tung panin neih le lam hauhnate ngahkik ding kiciatna nei cih hong hilh hi. Hih bang hileh, Pasian pen vanlei-zuakna set hong suak ding aa, Amah tawh i kizopna in summetbawlna bangbek hilel ding hi. Ken hong pia kahih ciangin nang zong nong piakkik ding hong kamciam in cih tawh kibang hi. Akilawm leh a hoih ahih manin pia hilo in ngahkik nading tawh a pia kihi ding hi. Tua in a lawhcing lungdamnathu ahi hi.

2 Cor. 8:1-7 sim in. Bang thu om hiam? Hih laiah a lawhcing lungdamnathu tawh kilehbulh bang thute i mu hiam? Paul in “piakna tawh kisai hehpihna” a cih bang a deihna hiam?  (2 Cor. 8:7, ZIV).

_________________________________________________________

Hih mite, “a zawnluat mahmah” (2 Cor. 8:2, ZIV) hangun, nakpi takin cingh-in a piaktheihzah val nangawn uh a pia uh hi. Hih bang laite in a lawhcing lungdamnathu hilhna ahi Pasian’ deih bang na nuntak leh neih le lam tampi lah ding nei ding cih a dikloh zia hong laktel hi. 

Pasian tungah a citakte lawhcing mello in a citak lopi peuh a lawhcing na theih a om hiam? Hauhna pen Pasian’ thupha ngahna lakna in i zat theih zel, hih thu in hong bangci gen hiam? 

NINIHNI January 8AMANG MILMIAL KHA MITMUHNA

Hih leitung hauhna leh kikhualnate maimangpak ding thutak Lai Siangtho hong hilh ding kisam lo hi hang. Atawntung kimang ding bangmah omlo hi. Paul in, “... a kimu theite mitsuan loin a kimu thei lote ka mitsuanzaw... a kimu theite tomkha kal sungbek om a, a kimu theilo pen ahileh a om tawntung ahi hi”ci hi (2 Cor. 4:18, ZIV). Vantung nate sangin leitung nate bek ngaihsut ciangin Christiante in a gamla ciantak in mu theilo uh hi. Hauhna zolkhemna sangin mit hong bumsiamzaw tam hetlo hi. Mitkhuamulo khat ahi Helen Keller in, “Muhna om napi khua a mulote sangin leitung ah a hehpihhuai penpente hi” ci hi. Mu thei napi khalam mit a taw mi tampitak Lai Siangtho in hong gen om hi.

“Mi pawlkhatte in hih leitung a itluat manun a leitung itna un thumaan itna valhtum gai hi. A leitung neihsa uh a khangsemsem ciangin vantung neihsa khol ding lunggulhna kiam semsem hi. A hauhna uh khang semsem leh midangte in a laksak ding lau bang keek in ahauhna uh itpom semsem uh hi. Nei semsem, piakkhiat ding haksa semsem in deihna khang semsem ahih manin a zawng semsem bangin kingaihsun mai uh hi...Pasian’ nasep nading akisap zia mulo in phawk nawnlo uh hi.” – Ellen G. White, Spiritual Gifts, Vol. 2, Laimai 267.

Kha mitmangna in i tawntung tatkhiatna a lauhuai lianpi mun hong tun hi. Jesu i muh bek kicinglo a, mitsuan in et laigil hihsak kul hi. 

Matt. 13:3-7 leh 22 sim in. Eite aading alauhuai thu Jesu in bang hong vauhilh hiam? Mikhatpeuh aading, zawng taleng hau taleng, puuk theihna thaang banghang suak thei hiam?

_________________________________________________________

“Leitung nate lunghimawhna” in Jesu’ hong vauhilh nop pen ahi hi. A zawngte in akicing neiloh manin lunghimawh uhaa, ahaute in deihbeh manin lunghimawh uh hi. Ahi zongin tua lunghimawhnate in i nuntakna i deepgawp sakloh ding kisam hi.

Hauhna ii khemna na nuntakna sungah na muh a om hiam? Tua khemna panin bangci bangin na kikem thei ding hiam?

NITHUMNI January 9DEIHGAWHHAZAATNA’ KALSUANTE

Deihgawhhazaatna zong mawhna dangte bangin lungtang pan hong phulkhia hi. Eden huan sung a piang thu in hih hipah hi.

Piancil 3:1-6 sim in. Eve amawhzolna ah Satan in bangci hiam? Khang tawntung azat khemna eite khemna in bangci zat hiam?

____________________________________________________

“Tua ahih ciangin singkung a hoihna, mi a pilsak dingin tua a gah a deihhuaina a muh ciangin, a singgah loin a ne hi. Amah in singgah kimkhat a pasal pia a, a pasal in zong a ne hi.” (Gen. 3:6). 

Vante mideih theih dingaa zolzuakna nasep pen Eden huan sungpan hong kipan hileh kilawm phialmawk hi. Kisamlo taktak lopi kisam bangaa ngaihsutsakna leh neihzah sangin deihbeh zawkna lungsim neih nadingin Dawimangpa in huan laizang aa singkung tawh Eve mawhzol hi. Deihgawhhazatna tawh ei mimal ciat i pukna thu thum te ahi – ka mu, ka deih, ka la – cih Eve’ pukna in hong hilh hi.

Numei pasal kilunggulhna mah bangin deihgawhhazatna zong i sungtawng aa kisel a kilanglo mawhna khat hi. Hong gamtat khiat takciangin nakpi in siahuai thei hi. Khat le khat kizopna susia banah it leh ngaihte tawh kikhasiatna leh a nung ciangin kitotna leh kimuhdahna dong hong tun thei hi.

Deihgawhhazatna hong lian leh nunhoih gamtatna khempeuh sumai mang hi. Kumpi Ahab in Naboth lengguilo a deihgawh ciangin a maimialna hangin kumpinu in Naboth that liang hi (1 Kumpi 21). Achan in zong van hoih te leh sumte amuh ciangin kideek zolo in iplah in la hi

(Joshua 7:20-22). Deihgawhhazatna in angsungkhualna namkhat ahi hi.

“Angsungkhualna in mawhna kipatna ahih leh, deihgawhhazatna in angsungkhualna bul kici thei hi. Sawltak Paul in hun nunung aa alauhuai lampialna a genna ah angsungkhualna in siatna gitlohna dang khempeuh zungpi hi-in, deihgawhluatna in agah masa ahihna hong hilh hi. ‘mite in amau angsung dingbek ngaihsunin, huaihamin,...’ (2 Tim 3:2).” – John Harris, Mammon, (New York: Lane & Scott, 1849) p. 52. 

Banghang in deihgawhna i neih khak lam kitel ding thupise hiam?

NILINI January 10HUAIHAMNA – NANGMA’ DEIHBANG NEIHNOPNA

Isaiah 56:11 sim in. Bang mawhna thu hong hilh om hiam?

______________________________________________________

Amawh eite aading huaihamna pen huihdikzah in ol hi. Ahizongin, mihingte nundan ah huaihamna zah in Christ’ nunzia latsak ding a hong daltanzaw a omlohna kiphawk khalo hi. “Ahang in, i Topa Jesu Christ hehpihna na thei uh hi; ama zawnna tungtawnin na hauh theih na dingun amah ahau hi napi note hangin a zawng hi” (2 Cor. 8:9, ZIV).

Tangtawng aa kipan huaihamna a suksiathuaizia Topa bek in thei hi. Huaihamna in gal piangsak hi. Huaihamna hangin mite in amau tung mahmah leh a innkuan tung vuah siatna tampi a tun gitlohna bawl uh hi. Huaihamna in natnalungno bangin hong netum in huaiham semsem ding simloh bangmah nundan om thei nawnlo hi. Huaihamna in deihluatna, thuneihna, leh hauhnate hong lunggulhsak natna khat hi. Tua in, ka mu, ka deih, ka la. 

Matt. 26:14-16 sim in. Hih a dahhuai thu pan in huaihamna ii thahatzia i bangci muh thei hiam?

_________________________________________________________

Judas kammal, “Amah note khutah hong pia leng, kei bang nong pia ding uh hiam?” (Matt. 26:15, ZIV) ngaihsun in. Leitung pian panin mi tawmcikte bekin Judas’ hamphatna ahi – Jesu tawh nungta khawm, na lamdang bawlte mu, nuntakna thu a gen za kha ngiat – ngah kha bek hi. Ahizongin, huaihamna leh duh-aamna in koi ciang tunpih mawk hiam!

“Amah a lehheek dingpa Tanpa in bangzah takin nunnem tawh bawlphat ding hanciam hiam! A thu hilhnate ah, citna leh itna tawh huaihamnate zawh nading hilh hi. Huaihamna a deihhetloh zia Judas mai ah lak in, Judas in zong ama’ nun hoihlote tampi vei kiphawk in, amawhnate kimu mah taleh, mawhthum nuamlo in a diklohna nusia nuam hetlo hi.” – Ellen G. White, Khangcin Lungdeih, p. 295.

Kidawmlo hileng, huaihamna lim a kilangsaklo kua i om hiam? Pasian’ hehpihna tawh, i huaihamnate bangci uk zo ding i hiam?

NINGANI January 11PUMPI KI-UKZAWHNA

Hih anuai a Lai Siangtho munte sim in. I hau a i zawng zongin huaihamna, duh-aamna, leh sum le vante itluatna panin Christiante ki koici kep ding cih hong gen hiam?

Acts 24:24-26 _____________________________________________________________

Gal. 5:22-25 ______________________________________________________________

2 Pet. 1:5-9 ______________________________________________________________

Hih a tunga thute in eite koici nuntak ding cih biakna vai tampi hong hilh hi. Hih teng a gen kibang khat in pumpi ki-ukzawhna thu hi. Huaihamna, duh-aamna, leh neihsa lunggulhnate a om ciangin hih pumpi kiukzawhna haksa phadeuh hi. Pumpi ki-ukzawhna bek tawh i gen alauhuai thute panin i ngaihsutna leh gamtatnate kidal thei hi hang.

Topa’ vangliatna ah i ki-ap ciang bekin ki-ukzawhna nei thei pan ding hi hang. A kiphungvuhsa hih mawhna khaicite ei mau tha tawh kuamah in zozo ngeilo ding hi hang. Hih a thahat khemna zawhtheih nadingin a vanglian Kha Siangtho in i nuntakna ah na hong  sep ding kisampha mahmah hi hang. “Note in mihingte tuah ngei ze-etna longal na tuak kei uh hi. Pasian a muanhuai hi; na thuak zawh loh ding zahval ze-etna hong tungsak kei ding hi. Ahi hangin note hong kize-et ciangin na thuakzawh nadingun suahtakna lampi hong bawlsak ding hi” (1 Cor. 10:13, ZIV) 

2 Peter 1:5-9 simpha kik in. Hih lai ah Peter in a kawk lampi in koi lai hong tun hiam? Huaihamna leh deihgawhhazatna zawh nading i hanciam laitak in i kalsuan ding bangte hi aa, koici bangin zuih ding kisin thei ding i hiam?

______________________________________________________________________________________________________________

KIGINNI January 12

NGAIHSUT BEH DING: Mihingte tuplianpi in lungnopna leh lungkimna hi. Ahizongin neihsate tawh lungkimna zonna in hih tuplian hong ngahsak zolo hi. Mite in a lungsim tawng vuah hih thumaan thei napi, ka mu, ka deih, ka la cihteng ahi neih le lam zonna tawh hun bei uh hi. Seventhday Adventistte zong midangte mah bangin neihgulhluatna ii ze-etna i tuak kha tek hi. Neihsa zonbehnate in lungnopna, lungkimna leh khamuanna hong pia hetlo hi. Tua sangsik in, a deih a zakloh leh a ngahloh manin, maigum aa Jesu kiangpan a taikhia mihau tangvalpa bangin buaina piangsakzaw hi. “Neih le lam thupiisak luatna in mihingte nunhoih khantohna thamneemsak mahmah hi. Tualniam nun ah lungkimna leh lungnopna panin lunghimawhna leh lungzinna, taksa natna ahi lungtang natna, mihing hihna hong buaisak ahi ei le ei kipimuhna, leh kilawmtatna suksiatna dong hong tun hi.”- Tim Kasser, The High Price of Materialism (Cambridge, Mass: The MIT Press, 2002), p. 22. Neihgulhlua Christiante in thupi kisa takin hauhna tuikhuk panin dawn mah taleh kha lam keucipte hi. Ahizongin, Christ piak tui a dawn peuhmah a dangtaakkik nawnlo ding hi (John 4:14).

KIKUPDING DOTNATE:

1. Alawhcing lungdamnathu ngaihsun in. Bang Lai Siangtho munte siksan in tua upna omaa, hih a khial thuhilhna telsiang nading a citak mite nuntakna bang Lai Siangtho sungah na mu thei hiam?

2. Mawhnei mi-in i suakaa, a huaihamsa in i suak hi cih thu lungngai in. Naupangte nangawn huaiham thei ahihna in i huaiham nunzia hong koici lah aa tua in Pasian hehpihna i kisap lam hong bangci theihsak hiam?

3. Buaina bulpi i theihnop leh, ‘guihtheih khamtheih sit se kul kei. Haina, awlmawhlohna,  huaihamna leh zaa deihluatnate sitzaw ni’ ci-in mi khat in gen ngei hi. Huaihamna in a huaihamtu bek hilo akiim apaam a mite zong bangci suksiat hiam? Akihelkhate khempeuh bang buaina piangsak thei cih na theih ngei thupiang a om hiam?

0O0