ZSS SINNA 8: ROM 7 SUNGA MIHING A CIH IN KUA HIAM?

SINNA 8: ROM 7 SUNGA MIHING A CIH IN KUA HIAM?

 November 18 - 24

NIPINI (SABBATH) NITAAK LAM November 18

SIM DINGTE: Rom. 7 sung.

KAMNGAH: “Ahi zongin nidangin a hong lencip thukham panin Pasian in eite hong suaktasak khin ahih manin tua thukham tawh kisai-ah eite a sikhin ihi hi. Lai sungah a kigelh thukham lui sungah nungta nawnloin, Kha Siangtho’ hong piak nuntakna thakah a nungta ihi hi.” (Rom. 7: 6).

Rom. 7 sunga kinialna a piangsak thu te tawh kisai in Laisiangtho mundang te ah muh dingin om lo kha ngel ding hi. SDA Bible Commentary na ngawn in zong, Rom.7: 14 - 15) kikaal sung tawh kisai in, Laikhak sung khempeuh lak ah buaina a piangsak pen mun hi ding hi ci in, gen hi. Rom 7 sunga a buaihuai a ki gentelna thu te tawh kisai Laisiangtho siamte sungah zong Paul nuntak zia a man taktak a hi thei diam cih zong hi a , a hih khak leh zong ama’ kikheel ma a tuahkhak thu te maw ahi kei leh a

kikheel khit a a tuahkhak thupiang te hi ding hiam cih a ngaihsut dan uh kibang kim lo lai hi. Hih sungah Paul in a mawhna tawh kisai in nakpi takin a do na te, a kammal sung tungtawn pan in, a ol mahmah in i tel theihna dingin ahong genkhia ahi hi. Hih buaina tawh kisai in, mi atam atawm in cih bek ding hi a, mikim in a thuakkhak thu te hi a, Pasian’ Thukham siangtho tungtawn pan in kha lam thu ah a hong kalh thu te tungtawn pan in a hong phong khiat theihna ding ahi hi.

Rom. 7 tawh kisai in Paul a pianthak ma hi ta leh a pianthak khit hi ta leh, a koi zawzaw ahi phial zongin Zeisu dikna in a hong tuam khit ciangin Ama hangin i ngah dikki saktheihna tungtawn pan Pasian mai ah a bukim in hoihna tawh ding tang thei ki hi ta a, Amah in hong siangtho sak in, mawhna tungah gualzawhna hong pia a hih manin, “a Tapa tawh a kibang dingin” (Rom. 8: 29) hong seh ta hi. Hih thu in, leitungah a teng mi namkim, pau namkim a zang mite tungah a kigen ding a tawntung Lungdamna thu (Mang. 14: 6)i puak na mun khempeuh ah i theih nading leh a taka i nuntak pih ding thu te ahi hi. 

NIMASANI (SUNDAY) November 19
THUKHAM THU AH SIHNA

Rom. 7: 1 - 6 sim in. A laikhak a simte tungah thukham tawh a kizop zia uh a telgen na dingin, a gentehna in bang thu te ahi hiam? tua gentehna tawh bang thu te hong hilh hiam? 

____________________________________________________________________________________ 

Paul in Rom. 7: 1 - 6 sunga a thu genteh te tawh kisai in tel theih dingin a haksa a bat hangin kidawm takin sittel na tawh tua laigual te i sim ciangin a gennopna ki theisiam thei lel ding hi.

Hih laikhak in, Sinai mual tung pan in a kiphut Biakpiakna paizia tawh kisai tawh thu a hong gen hi a, tua thu tawh kisai a tam zaw in a kawk thu in Thukham a cih pen hi pah hi. Jew mite in tua Thukham tawh kisai Pasian in a piak tua biakpiakna ngeina te khempeuh, Messiah a hong kilat ni a kipan a beisiang pah ding ahih na thu theisiam thei vet lo uh hi. A nuntakna uh ah, vai thupi lian khat pen a zang nawnlo ding in kiging zo mahmah lo uh hi. Tua tawh kisai pen Paul in a buaipih pen hi pah hi. 

A thupiang, Paul in a gentehna tawh kisai in hi dan ahi hi. Numei khat in Pasal hong nei hi. Amah a dingin a pasal a dam sung khempeuh thukham in a mah hencip a hih man in, Pasal dang nei thei lo ding hi. Ahi zongin a pasal a sih ciangin tua a pasal tawh a hencip thukham panin a suakta ahi hi (Rom. 7: 3). 

Bang ci bangin Paul in kiteenna tawh kisai thukhun tawh, Jew mite’ biakna kalsuan zia hong genteh hiam? Rom. 7: 4, 5.  

_____________________________________________________________________________________ 

A pasal a sihna hangin numei in, a pasal hanga akikhih thukham pan in a suahtak theih mah bangin si leh sa tawh a kidiah mihing nuntakna lui in zong, Jew mite in Messiah a lam-etna tungtawn pan un a sep uh, a na zuih uh biakpiakna thukham khempeuhte, Zeisu Khris in a hong suakta sak ta ahi hi. 

Tu in ah bel Jew mite in, “Pasal dang “hong nei thei kik ta uh hi. Amau te in a thokik Messiah a teenpih kik na ding uh leh, Pasian a dingin a gahpha te a gahkhia dingin sapkhiatna a ngah ta uh hi. Hih gentehna in, Jew mite a dingin a biakpiak dan, a biakpiakna lui te uh a taisan dingin suahtakna a nei a hih lam uh a theihtheihna dingun Paul in hih nupa thu tawh a genteh ahi hi. 

Paul bek ahi lo, Laisiangtho a gelh khempeuhte in zong thuman na tawh Thukham Sawmte zuih ding a kul lai zia a kigen te ngaihsun kawm in, hi tungtanga Paul thugen na in, Jew thu-um mite a dingin Thukham Sawm zuih dingin kul sak nawnlo/hencip nawnlo hi cih banga i ngaihsut khak ding a piang theilo thu ahi hi. Hih Laisiangtho mun pan in, Thukham Sawmte zuih kul nawnlo hi a ci te in zong Thukham Sawm a vekin a kinawl khin hi ci ngam sam lo uh hi. A nawlkhin sawm uh Thukham in, Ni sagih tawh kisai Sabbath bek mah hi a, a dangte bel bangmah cihngam tuan sam lo uh hi. Tua hi a, Rom. 7: 4, 5 tawh kisai in Thukham Sawm sung pan in a lina kiphiat ta a, Sunday ni ah kilaih ta hi cih bangin a khiatna lak sawm na in, laigelhpa deih leh ka ngiimna hi ding hi ki ci thei ngeilo ding hi. 

NINIHNI (MONDAY) November 20
MAWHNA LEH THUKHAM 

Paul in Thukham a cih ciangin Sinai mual tung pan in a kipia khempeuh a huampi in na genkhawm den ahih manin, Rom. 7: 7 sungah a tuamdiak in Thukham Sawm tawh kisai in a deihna bang hi ding hiam? Tua in zanni a i gen Thukham Sawm bei khin a hih loh zia a agenna pen, a manlo a ci kik nuam ahi diam? 

I dawnna dingin “hi lo hi” cih ding ahi hi. I lungsim sungah i ngaihsut dingin ah Paul in “Thukham”a cih tak ciangin Thukham Sawm(moral Law) bek ahi lo, Sinai mual tung panin a kipia thukham ngeina khempeuh te huam kim zel mah hi. Tua mah bangin Thukham sawm tawh kisai in gamtat hoihna thu a gen nop ciangin na pulaak thei zel a, Jew mite biakpiakna tawh kisai thukham sunga pan in zong a kul na tawh kizui in lak laak thei zel hi. Tua biakpiakna tawh kisai Thukham te ahih leh Khris hong sihna tungtawn pan in a beikhin hong suak a, tua sungah Thukham Sawm(moral Law) a kihel kei hi. Hih Thukham 103 104 Sawm ahih leh Sinai mual ah a dangte a kipiak mapek in a na om khin hi a, Kalvary muala Zeisu sih khit nangawn ah a om paisuak ahi hi. 

Rom. 7: 8 - 11 sim in. Hih Laisiangtho in, mawhna leh thukham a kizop dan Paul in bang ci gen hiam? 
_____________________________________________________________________________________ 

Pasian pen amah leh amah Jew mite kiangah a hong ki pulaak khiat ahi hi. Gamtatna sungah a sia leh a pha khentel theihna ding, gamsung ki-uk zia ding, gan biakpiakna tawh zehtan thukham te leh, cidamna tawh kisai kalsuan dan ding khempeuh ah teltak leh kiciantak in genkhia hi. Tua khit teh, tua thukham a tuamtuam ngeina te a palsatna tawh a suksiat khak uh leh, nasia takin gimna a piak ding thu zong gen hi. Tua bangin Pasian in a deihna khempeuh a gente a palsat kha a om leh, tua pen “Mawhna” hi pah hi, na ci hi. 

Tua ahih manin Paul in, “deihgawhna” tawh kisai in thukham in mawhna in na gen lo bang hi leh, tua deihgawhna in mawhna hi lo pah ding ci in gen hi. Mawhna i cih pen, Pasian in a deihdan in a genkhiat/ a lahkhiat te palsatna hi a, tua mah bangin Pasian in a deihdan in a genkhiat te a ki theihloh na mun ah bel mawh cih theihna dingin piang thei lo pah hi. A hi zongin tua Pasian’ deihna te pen mikhat tungah a theih dingin a kigenkhiat khit ciangin, a kipalsat leh bel amah pen mimawh hi pah ding ahih manin, mawhsakna leh sihna a thuak ding mah ahi hi. Tua ahih manin, i mawhna te hangin misi a kici thei te ihi hi. 

Hih i sinna sungah Paul in a buaipih mahmah thu in, ‘thukham” a deih mahmah Jew mite tungah, tua thukham khempeuh picinna ahi, Khris kiangah a vekpi un a tun theihna dingun leidawh kawm in a hanciam mahmah ahi hi. Ama genna ah, Thukham pen nuntakna sungah kisam mahmah a, a hi zongin tua thukham’ sepkhiat theihna in ciangtan nei a hih zia lakkhia hi. Thukham pen Gupkhiatna ngah theihna lampi hi zenzen lo a, zong hi ngeilo hi. A hi zongin Gupkhiat dingin kisam i hih zia (thukham palsat te, mimawh te, a si dingte cih bangin) a hong theitel sak thei ciangbek mah ahi hi. 

Sawltak Paul in ama tuahkhakte tungtawn pan in, kikheelna a om khit tak ciangin a hong piang ding thu phamawh mahmah te a genna ah: “ Kei pen thukham lo in nidangin a nungta ngei pa ka hi a, tua bang nuntakna hangin mawhsakna a ngah dingin kisuan na kanei kei hi. A hi zongin “thukham” a hong tuntak ciangin, Pasian kiang pan in asia leh apha theihtelna hong nei thei ta ka hih manin, “mawhna” hong kilang khia a, kei pen a si ta ka hi hi, ci hi.” Tua ahih manin Pasian’ thukham in ama tungah mawhsakna khinta ahih man in mimawh a hih lam hong kithei ta hi. Tua hi a, a sih ding pen tua Thukham pen hi zaw lo in, Paul zaw hong hi ta hi.” - Ellen G. White Comments, The SDA Commentary, Vol. 6. p. 1076. 

Bang ci bangin Thukham mai ah “si” ngei khin na hi hiam? Zeisu in nang adingin a hong sepsakna hangin nunthak na thak a hong piakna tungtawn pan in, Ama tungah bang ci bangin theisiam ding na hi hiam? 

NITHUM NI (TUESDAY) November 21
THUKHAM IN SIANGTHO HI 

Rom. 7: 12 sim in. Hih Laisiangtho mun tungtang ah, Paul in agennop thu bang ci bangin tel thei ding i hi hiam? 

_________________________________________________________________________________________________________________  

Tua hunlai a om Jew mite in Thukham pen zahtak bawl mahmah uh ahih manin, Paul in zong ahih theih zahin thukham pen tawisang hi. Thukham pen a septheihna munte ah ahoih mahmah hi a, a hi zongin a sep dingin a kiseh lohna mun ah bangmah ahih thei tuan kei hi. A diakdiak in mawhna pan in hong honkhia thei lo cihna ahi hi. Jew mite biakna sunga a kizang Thukham ngeina khempeuh hi ta leh, a tuam in Thukham Sawm hi ta leh, tua te in Gupkhiatna hong pia thei lo ahih manin Zeisu a kisam i hi hi. Zeisu leh Amah i Upmuanna tungtawn pan in i ngah Ama dikna hang bek tawh Gupna a kingah thei bek ahi hi. 

Sihna a hong om theihna ahang’ bang hi ci in Paul in mawhsak hiam? tua mawhsak na a peengsak in bang hi leuleu hiam? tua thu in bang zahtak in thupi sak hiam? (Rom. 7: 13)

 ________________________________________________________________________________________________________________ 

Rom. 7: 13 sungah Paul in a hoih thei pen dingin “thukham” sepna tawh kisai hong gen hi. Mimawh ahih na zong thukham ngawh lo in, mawhna mah mawhsiat hi. Tua a lauhuai mawhna hangi mah in, “hazatna/huaihamna/ lunggulhna a tuamtuam hong piangsak hi(Rom. 7: 8) ci hi. Thukham i cih pen, Pasian zia leh tong tehna a hih manin, hoih a, a hi zongin Paul pen mimawh ahih man in “Thukham” mai ah mawhsak in om ahih zia hong gen hi. 

Paul in mimawh a hihna alak khia dingin leh, bang hangin hi zahtak in mawhna limlim in gualzawhna ngah hiam? (Rom. 7: 14, 15) 

“A si thei pumpi“cih pen “si leh sa kidiah leitung mi”cihna zong ahi hi. Paul in Zeisu Khris a kisap lam kithei hi. Tua Khris Zeisu bek Paul tunga om mawhsakna khempeuh tawh kipelhsak thei bek hi. Zeisu Khris bek mah in mawhna sila hihna sung pan in a hong honkhia thei bek ding hi. 

Paul in amah leh amah “mawhna sungah a kizuak khin” bangin kigen hi. Mawhna sungah sila suak khin a hih manin, amah in suahtakna nei thei lo hi. A hih nop a om hangin hih thei mahmah lo hi. Thukham in hih dingin a sawlte hoih sa mahmah in zui nuam mahmah hi. A hi zongin mawhna in tuate a sem dingin a phal kei hi. 

Hih gentehna zangin Paul in Jew mite tungah, Messiah a kisap zia uh a theihna dingun hamciam hi. Gualzawh theihna pen Hehpihna sung bekah om a hih na zong a genkhin zo hi (Rom. 6: 14). Hih thu mah tawh kisai in Rom. 7 sungah nasia takin bulphuh kawm in hong genkik a, “thukham” nuai ah om cih te pen hehpihna a nei lo To’ khutnuai a om, mawhna sila te ahi uh hi, ci hi. 

Mawhna sila kol sungah bang ci bangin awk ngei na hih zia na tuahkhak te tungtawn pan in gen sin ve? Mawhna bawl cih pen ei ut thuthu hi lel e, ci in ki mawlpih khak na hangin tua mawhna nuai ahi na awk kha ngei hiam? A hi thei thu hi ci in pom in la, Zeisu sungah ki-aap na tawh nisim in tua mawh pan in sih ding a thupi hi mawk lo hiam? 

NILINI (WEDNESDAY) November 22
ROM 7 SUNGA MIHING

 “Ka hih noplohteng ka hih veve ciangin Thukham a deihhuai khat hi, ci-in ka ngaihsutna hong langsak hi. Tua ahih manin tua bangin a gamta taktak pen kei hiloin ka sunga om mawhna hizaw hi.” (Rom. 7: 16, 17). Hih lai mun ah a kido/a kilangpan in bang hiam? 

 ____________________________________________________________________________________ 

Thukham in limlangh bang hi a, a hi zongin thukham deihna te cinzo lo i hih manin Pasian lung a kim loh zia, theihsakna tawh Khasiangtho in hong mawhsak hi. Tua Thukham deihna khempeuh lawhcin theih sawmna tawh a hanciam mikhat a dingin, Thukham in hoih hi cih thukim takin a langkhia sakna ahi hi. 

Paul in a thugen khitsa khat, uang gen nuam lua ahih man in, a gen kikkik thu te in bang ahi hiam? (Rom. 7: 18 - 20).

 _____________________________________________________________________________________ 

Zeisu kisam mahmah i hih zia i phawk theih zel na dingin Khasiangtho in khat veivei ciangin “Thuciam Lui”sunga a om lai bangin hong ki ngaihsun sak zel thei hi. Isreal mite tuahkhak thu tawh kisai in Ellen G.White genna ah, “ Isreal mite in a lungsim sunguh a gitloh zia uh leh, Khris kihel lo in Pasian Thukham te a zui zo dingin piang theilo a hih zia uh ki thei loh a hih manun, Pasian tawh thuciamna olno takin a bawl uh hi. Amau te in dikkisakna a nei ziau thei dingin kisa uh a hih manun, “Topa’ gensa khempeuh kote in ka hih ding uh a, kote ka thumang ding uh hi,” a ci uh hi (Pai. 24: 7). A hi zongin a kaal tam zong cing nailo in Pasian tawh a thuciamna uh hong palsat pah uh a, a maute bawltawm milimte mai ah kun uh in hong bia ta mai uh hi. Amau te palsat thuciamna hangin, Pasian mai pan in maipha ngah theih ding in lam-et theih hong hi nawnlo hi. A mawhna te hong kimu khia ta uh a, maisak na a kisap zia uh hong phawk ta uh hi. Abraham tungtawn pan in thuciamna a hi, a hong kilaak Gumpa a kisap na uh hong theihsak hong hi ta hi.” - Ellen G. White: Patriachs and Prophets, pp. 371. 

Kamsiatna lianpi tawh, Christian tampi tak te in Zeisu Khris kiangah nisim in ki-aap thakna nei zo lo ahih man un, mawhna a huat mahmah uh hangin, tua mawhna sung mahah awk cip uh hi. Siantho nuntakna sungah zong a ngeina bangmah in a khangto ding kisa kha uh a, lam saupi mah a tawntawn lai dingin kituat kha uh hi. Tua a hih manin, Khris kiangah a mawhna te uh tun lo in, tua mawhna te tungah gualzawhna a ngah theihna ding uh kun khollo zaw in, Rom. alian 7 sunga thu paulap atuam tuam zongin, a hoih na khat peuhpeuh a sem thei dingin kilawm kingaihsun nawn mahmah lo uh hi. A taktak in, hih Laisiangtho mun in a gennop zawk thu in, mawhna sila sunga a om mikhat in a pha bangmah bawl thei lo uh a, a hi zongin Zeisu Khris sungah bel gualzawhna kingah thei hi cih thu hi zaw hi. 

Khris in a hong kamciam sa mah bangin nang leh mawhna kikaal ah gualzawhna na ngah ngei hiam? A ngah nai lo na hih leh bang hangin ngah lo? Na deihteel na sungah bang a diklo om hi ding? 

NINGA NI (THURSDAY) November 23
SIHNA SUNG PAN-IN HOTKHIATNA 

Rom. 7: 21 - 23 sim in. Christian khat na hih hangin, bang ci bangin hih buaina tawh kisai in nangma nuntakna sung ngiatah a hong tun zia gen sin aw. 

________________________________________________________________________________________________________________ 

Hih mun ah bel Paul in, thukham i cih pen pumpi sung mahah (si leh sa bang mahin)a om, mawhna mah tawh a kibangin hong gen hi. Pumpi ahi “si leh sa” mahmah in mawhna a piangsak thu zui nuam zaw ahih zia hong gen hi (Rom. 7: 25). A hi zongin mawhna nasep’ leh, thukham zuihna’ in sihna hong tun’ ahi hi (Rom. 7: 10, 11, 13). Tua ahih manin, pumpi ngiat in mawhna’ thumang, a hih manin, “ahong sisak thei pumpi” a ki ci thei lua hong hi ta hi. 

Rom. 7: 23 sunga, “Lungsim sunga thukham” i cih ciangin Pasian Thukham’ hi pah a, Pasian in Ama lunggulhna a genkhiatna ahi hi. Khasiangtho in makaih ngiat a hih manin Paul in hih Thukham tawh kisai a zui dingin a lunglawp thei mahmah hi. A lungsim tawng pan in zong zuih dingin lunggulh mahmah a, zuih dingin a kipat sim in a pumpi in mawhna lam mah lunglut zaw ahih man in a zui zo kei hi. Tua bang buaina a tuakkha ngei lo i om hiam? Na lungsim tawng panin, na sepnop mahmah hi na pi, na pumpi in thudang ah na lunggulh zaw thei hi. 

Hi ci bangin a haksa dinmun ah i awkna pan in bang ci bangin suakta thei ding ihi hiam? 

________________________________________________________________________________________________________________ 

A lunggulhna mun asang pen tung khin a hihna tawh Paul in a tangko khiat, “I Topa Zeisu Khris hangin Pa Pasian tungah ka lung a dam hi” a cih theih nungsang bang hangin, tua suahtakna nungah kha thu ah buaina a piang kik thei dingin gen kik mawk hiam cih pen, mi tampi tak te in lamdang sa thei mahmah uh hi. Khat khat te in bel, tua banga lungdam koh a tangko khiatna pen, kammal behlap na khawng hi lel ding hi ci in, a tuat ziau zong ki om hi. Tua bangin kammal behlap mawkmawk na nungah “kua in hong honkhia ding?”cih kammal in zui hamtang hi a cihna zong om hi, ci uh hi. Hotkhiatna lianpi a ngahna (Rom. 8)thu a gen ma in, tu ma lam a, a nidang lai a genngei, a tuahkhak sa thu te kamkhawm kik in, mawhna mahmah tawh nasia taka a kido na te a genkik nuam hi dinghi ci in a um zong ki om hi. 

Mi khatkhat te in bel Paul in, “kei mahmah” (I myself) a cih ciangin “Zesu a kihel lo keimah bek” a ci nuam hi ding hi ci uh hi. Hih mun Rom. 7: 24, 25 sung tungtawn pan in i tel ding khatin, Zeisu a kihel lo eima bek nuntakna in mawhna do theihna dingin bangmah i hih zo kei ding hi, cih thu ahi hi. Khris bekmah tawh Ama sungah a thak nuntakna kinei thei bek a, eima lunggulhna te a hong dawk kha thei mah ding hi ta mah leh, Amah i teel limlim na hangin, Ama’ sunga om a hong kamciam ahi gualzawhna te i ngah ve ve ding hi. Mi kuamah in nang a dingin huih hong diksak thei lo uh a, nangtang dingin hong khuh sak thei lo ban ah, nang tang dingin hong hatchiau sak theih loh mah bangin, kuamah in nangtang dingin Zeisu kiangah a ki-aap dingin hong kuansak thei lo hi. Nangma bek mahin deihteel theihna na bawl kul hi. Zeisu in a hong kamciam gualzawhna pen, nangmah ngiat sim loh lampi dang a om thei kei hi. 

KIGINNI (FRIDAY) November 24 

SINBEH DING: Thukham palsatna sungah galmuan theihna ahi kei leh, tawldamna ahih kei leh, diktan sak theihna a om kei hi. Mawhna bawl tohtoh na tawh Pasian mai ah mawhnei lo banga din theihna leh Khris hoihna in a hong sepsakna hangin Ama kilemna a piang thei dingin ki lam-et ngam ding hi lo hi. -Ellen G. White: Selected Messages, book 1, p. 213. 

Paul in bel a sanggam pihte tungah, a vanglian mawhna a maisak thei Gumpa’ in Jew mite khempeuh te a dingin bang zah takin thupi hiam cih a theih ding uh lunggulh mahmah hi. Tua Khris in Leitungah hong kumsuk, mihing te a dingin tuuno bangin ahong sihna in, a limciin na khempeuh a bei theihna ding hi cih, amau te musak nuam mahmah hi. 

Mawhna a mai theihna dingin Khris in singlamteh tungah a hong sih khit ciangin, zehtan Thukham ahi, gangawh biakpiakna te in kiman na hong nei nawn lo uh hi. Thukham Sawm tawh zong tua thukhamte kizopna nei ahih man in, pahtawi huai veve hi. A vekpi mah un Pasian ciaptehna pua tek uh a, Pasian sianthona, Pasian thu-maan na leh, Pasian dikna a hong lahkhiatna ahi hi. A bei dingin a kikoih tua kimakaihna thukham masa hi mah ta leh, hih zah in thupi a hih leh, Khris a hong kipulaakna leh Ama a um mite tungah nuntakna a piakna ding ahi zongin, a sianthona a pia ding Khasiangtho a kipiak sawm na te genzawh lohin vangnei zaw kan lo ding maw!” Ellen G. White Comments, The SDA Bible Commentary, Vol. 6, p. 1095. 

KIKUP DINGTE: 

1. Rom. 7: 25 sungah “Kei’ omzia taktak ahih leh: Ka lungsim tawh Pasian’ thu ka zui a, ka pumpi in mawhna a piangsak thu a zui hi” a cihna pen, “keimahmah in mawhna ka bawl hi” a cihnop na ahi hi. A khiatna in mihingte in hih nasepna tawh kisai in to nih na a kisem den suak hi. Pasian deihna a zuihna hangin lungdam a koh mah bangin, mawhna a bawl khakna hangin zong hehpihna a ngen hi. Tua hia, i theih dingah misiangtho a kici dikna angah te nangawn in mimawh te mah kihi lai veve hi. Khris a um man un midik ah kisang bek hi a, Khris dikna in amau te atuam bek ahi hi. A hi zongin Thukham in a kalh thu te nial in, a gamtat kei uh leh, ci leh sa tawh zong mawhna aneih lai manun, mimawh mah kici veve thei hi. Zato ah Doctor te in a kep uh cina bang ki hi a, a cina kihi mah hi. A hi zongin cidam ding a lam-en te leh, damna a ngahto, a cidam toto ding te ihi hi. Tua bangin a damkang khat in a cidam bangin a kingaihsut khak leh a sia zaw dinmun a tung kik thei lua ahi hi.”-Martin Luther, Commentary on Romans, pp. 114, 115. 

A tunga Martin Luther thugen pen thukim maw, thukim lo? kikum un.