FSS ZIRLAI 8: ROM 7 IH MILAI KHA ZOSO A SI?

ZIRLAI 8: ROM 7 IH MILAI KHA ZOSO A SI?
 November 18-24

SABAT TLAILAM: November 18

TUZARH SIAR DING: Rom 7.

BIBLE CANGKEN: A tu ahcun dan ihsin kan luat zo, ziangtintile sal ih in rak tuahtu dan hrangah cun mithi kan si zo. Ca in nganmi daan hlun hnuai ah si loin, Thlarau lamzin thar ah Pathian kan rian a si. (Rom 7:5)

ROM 7 hnakih thu el-awknak a suahpitu Bible ah malte lawng a um. Himi thuah The SDA Bible Commentary in a simmi cu; Rom 7:14-25 sung thuih a sim duhmi cu, cakuat hmuahhmuah lakah thu harsabik a si. Thusuhnak tambik cu a thinlung buai ih amai thuhla a nganmi a si thei. Paul ih pianthar hlan le pianthar hnu tonnun kha himi cangih a nganmi a si thei an ti. Paul ih sualnak thawn amai pumpak nunih a buainak kha tluangtlam zetih a simmi a si thei (Rom 7:7-11). E.G. White, Step to Christ, p. 19. E.G White, Testimonies for the Church Vol. 3. P.475. Himi hi a dik ngaingai ahcun a zate in kan hmaiih kan ton dingmi buainak kan neih cio mi a si dingih Thlarau lamih thangharhnak ruangah Pathian thukham a thianghlimnak phuannak a si ding. The SDA Bible Commentary Vol. 6. P. 553. 

Rom 7 thu hi Paul in pianthar hlan le pianthar hnu tonnun a si timi ah Bible tlawngtapawl an lungkim lo. Mi pakhat nunah himi thil hi a cang thei lo mi a si an ti. A thupibik mi cu Jesui dingfel thianghlimnak ih thuam pumhlum ding kan si ih cuih a dingfelnak cu Pathian hmai ah mi famkim ih kan ding theinak a si. Thianhlimter dingih thukam pekmi kan si. Sual neh theinak tla in pek. Fapa Jesui hmuihmel kha kanmah ah nemkai zomi a si (Rom 8:9). Thuthangtha kha leitlun khua zakip, ramkip, phunkip, tongkip le mikip hnenah thehdarh ding kan si laiah a poimawh zetmi kan tonnun ih kan neih dingmi a si. 

THAWHSAL NI November 19
DAAN AH THIHNAK

Rom 7:1-6 siar aw. Paul in a cangan mi siartupawl kha daan thu le anmah pehzomawknak ziangtin so a simfiang. A simfiangnak ah ziangthu so a lak? Rom 7:1-6 sungih thu hi theih harsa deuh an si. A simmi theithiam dingah fimkhur zet le tha teih zoh cun in bawm theitu a si. 

Cakuat a ngan mipawl an pehzomawkdan zoh cun Sinai tlangih sakhua a rak dinmi tuahdanpawl a simih daan timi tongkam a hman canah himi thu a sim duhmi a si. Kha mi kha Judahpawl in duhham tukin an tuahih an harsat phah. An hnenah Pathian ih a pekdan ahcun Messiah a rat tikah a cem ding mi a si. Zumtu Judah mipawl in himi daan hlon an siang lo ih an nunah a thupibik ih an ret ringring ruangah Paul in an hnenih a phisinnak a si.

A thupitnak theithiam dingah a tanglam vekin Paul in simfiangnak a tuah. Nunau in pasal a neih tikah a pasal damsung cu an neihawknak daan ih temtawn mi a si ruangah pasal dang a nei thei lo. Asinan a pasal a thih ahcun a pasal thawn a rak temtawntu daan ihsin a luat (Rom 7:3).

Paul in daan thu simfiangnak ah Judah sakhua nak ih tuahdaan thitumnak kha ziangvek in so a hman?  (Rom 7:4,5). Nunau kha pasal a thih tikah a pasal thawn temtawntu daan ihsin a luat. Kan tisa duhnak nunhlun kha Jesuh thawngin a thih tikah Messiah a rat tikih a tuah famkim dingmi khihhmuhnak pawl a tuah mipawl daan ihsin an luat zo tinak a si.

Judah-pawl kha pasal dang thawn nei-awsal thei dingah miluat an si. A thosal mi Messiah thawn thi-aw dingah le Pathian lamah rah tha rahsuah thei dingah sawmmi an si. Himi hi Judah pawl pianthar dingih an rak tuahmi daanpawl dungtun in an luatnak kha theithiam dingah hrilhfiahnak ih a hmansal mi a si. 

Thukham (10) thlun dingah Paul le Bible dangpawl khalin in sim. Himi hi Paul in zumtu Judah-pawl hnenah thiam coternak dingah thathnemnak a um loih himi thu hi thukham 10 thawn khal a sengaw lo tiah a ti. Himi Bible cang laktahrat in thukham (10) a tul nawn lo titupawl in thukham (10) a cem taktak an ti ngam cuang lo. Kap khat lam ihsin nisarih sabat ni an duh lo ruangah a cem tiah an simmi men a si. A dangpawl cemter an duh lamlam lo. Rom 7:4,5 ih thuzirhmi an hrilhfiahnak ah sabat a hlo (or) ai-awh hman (or) Sunday ah thleng a si zo timi hi Pathian tongkam thusuak ah khavek lam ih a ngannak a um lo a si.

TLAWNGKAI NIKHAT November 20
SUAL LE DAAN THU

Paul in Sinai tlang dan thu a sim (Rom 7:7). Hitawk ah thukham (10) sungih pakhat a langter ih, cucu ziangthu so a si? (Rom 7:7). Mizan ih kan zirmi ah thukham (10) a hnonnak a um lo. Paul in a rak hnong pang a si pei maw?

A phi cu a hnong lo timi a si. Paul in daan thu a sim tikah Sinai tlangih an tuahdanpawl hmuahhmuah a sim tel ti kan theih a tha. Thukhaam (10) tla a tel, ret thatmi a nei lo. Paul ih a laksin mi thu kha insungsang thil khawsak relbawldan tiangin a telih a dang tla a sim tel theh. Jesui thihnak ruangah an daanpawl a cem theh ih thukhaam (10) cu a cemmi ah a tel ve lo. A san cu Sinai tlang hlanih a um zo mi a si ruangah a si. Cross hnu lam khalah a um ringring dingmi a si. 

Rom 7:8-11 siar aw. Paul in daan thu le sualnak thu an hnamhnoihawknak ziangtin so a sim? Pathian cu Judah-pawl hnenah a langaw ih, a dik le dik lo, mipi ukawknak daan, raithawinak daan le harhdamnak daanpawl kha cipciar zetin a sim theh. Daan thu pakhatkhat pahbal ruangah daan tatnak a um dingmi tla a sim. Sualnak simfiangnak ah daan pahbal mi kha Pathian in a langter.

Paul in a simmi cu daan in daw hlah timi um lo sehla mi thil dawt hi sual a si ti ka thei lo ding. Pathian in a duhmi a phuan mi le kan theih lo a phuanlang mipawl buar hi sual a si. Kan theih lomi sualnak a um lo. Pathian in milaipawl ih theih dingah a duhmi phuanlangnak a tuah tikah misual kan si kha kan theiaw ih thihnak dantatnak tangah kan um ti kan theiawk mi hi milai thihnak a si.

Paul ih thu a relmi umdan hi Khrih in a famkimter mi daan Judah-pawl ih an sunlawih zetmi kha theithiam dingah a tummi a si. Daan hi a tul zet, asinan a hnatuanmi  hi can bikhiah nei mi a sinak a lang. Daan in rundam tul sinak a langter ih rundamnak a pe thei lo. 

Paul in piantharnak a thlenpitu ngaingai kha a

thupi zetmi thutak tonnun thawn a pehzomawk ter. A

simmi cu “daan thu tel loin karak um, daan tatnak tla a

um lo, asinan daan a rung thlen cun Pathian ih daan thu

in thinlung sungah thusimmi a nei ih sualnak cu a hung

nung. Cule keimah cuka thi. Cutikah misual sinak theiaw

in Pathian daan ih mawhsiat mi ah a cang. A thimi kha

Paul a si ih daan a thi lo”. E.G. White Comments The SDA

Bible Commentary Vol. 6. P. 1076.

Daan hnuai ih thih timi ziangvek in so na ruath?

Jesui nunthar pekmi daan thawn pehpar in na theihdan

ziangtin so a si?

TLAWNGKAI NIHNIH November 21

DAAN CU A THIANGHLIM

Rom 7:12 siar aw. Paul ih thu rel mi le himi

Bible an pehawknak ziangtin so kan theih thei ding?

Judah-pawl cun daan an tihzah ruangah Paul

khalin a cang theitawk in upat tihzahnak a tuah. Daan

thu hi a nunpitui hrangah a tha zetmi a si. Asinan kan

sualnak ihsin runsuaktu dingih tumtahmi a si lo.

Thukhaam (10), Judah-pawl daan vekih an tuahmi

raithawinakpawl in danglam zetin mi a tuah hmanah

rundamnak a thlenpi thei cuang lo. Cupawl in Jesuh kan

tulzia an langter sawn. Kan zumnak ruangah a ra thlengmi

Jesuh le a dingfel thianghlimnak lawngin in run thei.

Paul hi zoih mawhsiatnak in so thi ding

dinhmunah a dingih ziangin so thiam a coter. Cumi cu

ziangah so danglam zetin thupitnak a nei (Rom 7:13).

Rom 7:13 sungah a thabik ih thei thei dingah Paul

in daan thu a suahpi. Sualih mawhsiatnak ruangah himi

a hril ih misual dinhmun harnak ih thil tuahmipawl a si

(Rom 7:8). Daan hi Pathian tahfung a si ih mitha misualpawl

kha a hmaiah runsuah tulmi an si.

Paul kha misualih a langnak ah sualnak kha

ziangah so hlawhtling zetin a au (Rom 7:14,15). Harnak hi

tisa sinak in a ra. Curuangah Paul in, Jesuh a tul ringring.

Jesuh lawngin himi daantatnak a lak hlosak thei (Rom

8:1). Sual sal sinak ihsin Jesuh in a suah zalen a si.

Paul in sualah zuarzo mi tiah amai thu a sim. Amah

kha sual ih sal a si. Miluat a si lo, a tuah duhmi kha a

tuah thei lo. Daan ih a simmi thiltha kha tuah ding a zuam

rero. Asinan amah kha sualin a kaibet ringring.

Hivekih a simfiangnak ah Paul in Judah-pawl ih an

tulsammi Messiah kha hmu hai she tiah a zuam rero.

Zangfahnak lawng ihsin nehnak a um a si tiah a sim (Rom

6:14). Himi hmuhdan hi Rom 7 ah a lang sal. Daan hnuai ih

um timi hi nunrawng zetin sualnak salah a tuahaw tinak a si.

Sual sal na sinak na nunah ziangvek so na neih?

Sualnak thawn umtlang ringring dingah taimak suah

tumnak na nei dah maw? Cumi cu suupaw dingah na

ruat theu maw? Zangfahnak nei lo ih mi fialtu sual

thuneihnak tangih um ah na theiaw ringring maw? Jesui

hnenah ap-aw ringring awla a taktak ih lom mi na si ding.

Cuti cun nitinten tisa duhnak a thi ding a si.

TLAWNGKAI NITHUM November 22

ROM 7 IH MILAI PA

Tuah ka duh lomi ka tuah ruangah daan cu a

tha a si tiah ka lungkimpi. Cumi a tuahtu cu keimah