Zo Phualva Thupuak Vol 07, Issue 23: PAWLPI SUNG KIPUAH PHATNA (Khen 2na)

SATAN PIAK KI PUAHPHATNA ZUAU

Kha siangtho in hih bang in gelhsak hi. “Kipuahphatna a om na khempeuh ah, Satan in, mite lungsim sung siangtho tak zolo, kileek kim zawhloh na guang zel hi” “Tanglai akipan in pawlpi, kipuahphatna akineih sial in amai dal zel om lo in kikhah khong ngei lo hi. Paul khanlai in zong tua bang mah ahi hi. Koi mah peuhah sawltak te in pawlpi aphuh uh ciangin, “Thu ka um hi.” ci napi in thu palsat mi pen hong kihel veu zel hi.” GC. 396

Luther khaici vawhte mun citengah pokhia hi, Satan in kipuahphatna dangte, a sukmit zel  geina mah bangin helzau sak zel hi. Thumaan nasepna pen zuau tawh amaute khem in lungkim sak hi. Kum Zalom masa lai in Khris zuau a om mah bang in kum zalom 16 ciangin  zong kamsang zuau a thokhia hi.” GC. 186.

Zuautheite’ pa in hunbeisa a asep mah bang in tu-a ei hun in zong sem lai hi. Tu mahmah in zong Pasian mite buai gawp sak in, tawkgawp ding in hanciam hi. Hih pen ih nasepna hun sawt nai het lo sung mah ah, tu  mazek lai mah in, thumanglo-a kilem lohna bawl mi pawl khat thokhia sak hi. Amau leh amau “Kipuahphate” kici uh hi. Lambeh lo-in susia uh hi. Amau nasep in Lai Siangtho gen bang lo hi. Amaute gah in na thei ding uh hi. Matt. 7:16

KILEM LOHNA LEH KITOTNA LUNGSIM

Kipuahphatna maanlo omzia pen, kilem lohna, kitotna, kilang dona, kigensiatna, tua te pawlpi makaite lakah om hi. Hilh kholhna in a cian hong piakna ah: “Kipuahphatna maantak hong tun’ hun om ding hi. Tua  hun hong tun’ ciang in thu-um mite lungsim in thungetna tawh hong  dim ding a, pawlpi sung panin kilem lohna, kitot nate bei ding hi.” 8T. (Ch S. 42)

Amaan kipuahphatna in, kilem lohna kitotna te hemkhia ding hi. A khial kipuahphatnate ahih leh, “Amah in nasepna a amakai khempeuh Pasian in tangko ding thu pia ciat hi, ci in ngaihsun uh a, tua pen akhial ahi hi” ci hi. 2SM. 64

A GELH LAI NA KHAT AH

Amah in, Pawlpi sunga makai khempeuh kiliansak lua uh a, puk khin ding uh hi. A kiniamkhiat mi honk hat hong thokhia in na lamdang tak in hong sem ding hi,” a ci hi. Amah in Testimonies te um in kigen hi. Tuate mah zang in ka thumaan hi, ci hi. Ama thu a kipsak theih nading in zang ding hi.” 2SM 64,65.

“Pasian kiang pan thu ka ngah hi, hong ci ding hi. Na um kei un. Amah ka sawl kei hi. Ama thupuak pen Pasian kiang pan a hong pai thu hi lo hi. Hong khemna thu hi.” Ci hi. 2SM. 64.

ADANG KHAT THUPUAK KA NEI ACIPA THU AGELHNA AH

“Tua pa in zong thunial nopna nei hi. Tua pen in, Pawlpi khempeuh lampial khin a, Pasian in amaute lak pan hong paikhia un la, na lamdang te kong bawl thei sak ding hi” ci hi. 2SM . 66.

Ki puahphatna thu gen a kinei hi napi, kigensiatna, makaite leh pawlpi kiphuh dante gensiat na, kilem lohna leh kitotna a piangsak leh, tua pen ih theih tel pah nading ciamtehna hi a, thu dang zong kul nawn lo, Satan maiah kipuahna maanlo ahi pah hi. Tua bang mite in pawl angah nading un, Pasian thu um mah hi a,  Pasian nasep a hanciam-gawp hong ki bawl ding uh hi. A hih hangin atawpna ah,amaute hong kitam in hong kikhenthang ding uh hi. Ahih hangin amau omzia tatak a dawk mateng in zung lim taka akha nailo mi hoih pipite, lam pialpih ding in buaina hong piang sak ding uh hi.

SATAN IN THAHATNA & KHEMNA ZANG

“Pasian nasep kipuahphatna a om na peuh ah gilo kumpipa in zong naksep pha zaw kan zel hi. Tu in Khris leh anung zuite langdo in a sep theih tawp in asep san laitak ahi hi.” GC 593.

“Pasian mite a ihmut na pan un phong unla, kisik kikna leh kipuah phatna nakpi in hanciam sak un, Zeisu sunga om thumaan aneih nading un, Lai Siangtho ah zong khia sak un. Amaute a puma tang un Pasian kiangah ki-ap sak un. Satan bilpil mahmah a tha siit hetlo ahihna kimu hi. A khem theihna zah siit lo-in a vang-liatnate zong lak ding a, apuk vantung mi khempeuh amah ahuh dingin akul na bang bang in zang hi.” GC 398.

MOT UPKHIALHNA

Pasian ngimna subuai ding in Satan in tua bang mite kipuahphatna nei sak phot in khut zat in nei hi. Sawltakte hun akipan in Protestant te hong pusuah lai khawng biakna kipuahphat na khat pepeuh a om ciang in tua ngian zang zelzel hi. “Mot upkhialhna eite lak teekteek mah ah hong kimu ding hi. Khemna tawh hong kuan ding a, ahih theih leh akiteelsa mite teekteek mah zong lampial sak ding hi.” 2SM.16.

“Luther zong tua banga amot-upkhialh mite hang in buai ngei hi. Wesley te khawng a kipan puahpha hat upna hoih tawh leitung a puah mi tampi in, tua motupkhialhna a cialcial te tawh Satan hansuah sa in a thanuam lua hong om zel a, nasepna maidal tampi phukha ciat uh hi. William Miller in tua bang mot up khialhna te pen deih lo hi. Amah in Luther gen theih ngeisa mah bang in, Upna te Pasian kammal tawh taih pahpah ding ci hi. Puahphatna hun laite in zong galpa in, nasep a hanciam mi pepeuh tua dan banga mot-upkhialhnate tawh na dal zel hi. Adventist te hun ciangin zong tua banga mot-upkhialhnate tawh na dal zel hi. Adventist te hun ciang in zong tua bang pian mah in langpangpa in hong sul zuih to hi.” GC 396, 397.

Eite zong ih kigalgin’ kholh kei leh, ih ngaihsut loh laitakin tua bang mot-up khialhna in amaan kipuah phatna hong subuai ding hi. Amaan puahphatna pen gen zom lai ni. “Topa in mite zang in van pan a vangliatna tawh mai anawt ciangin, Satan in a sawltakte awng saka, mite kiangah; hih thu pen uanglua hi; ci sak hi. Tua banga aawngte kidop huai na pan in, kipuah phatna ahih nak leh, hih pen dangka zuau ahi phial zongin dangka maan sang in man-neu zaw lo hi. Kipuahphatna-zuau, thugen zuau ahih leh, kipuah phatna thuhoih om khempeuh hong zui kim nuam lo ding a, tua pen tawh ih theithei ding hi. Pharisee te hih ngei: Hih pa in mawhneite tawh akipawl mat ngaw-ngaw ve leh, cih bangte pawl tawh mot dal lo ding hi hang”. GW. 170.

Khamtung ah Carson Nasep Kipan: 

1. Arthur Carson in Dec 18, 1886 ni in Laura Hardin tawh kiteenna pen Bassein (Pathein) khuapi ah nei hi.

2. Kiteenna hong bawl khit uh a sawt lo in, Carson te nupa in Henzada (ဟင်္သာတမြို့)ah kituah uh hi. Tua lai ah Sunday masa pen ni in kha manpha 13 tuiphumna nei hi. Tua te pen ih unau Asho  te ahi uh hi.

3. Tua ma pek 1837 kum in Asho sung pan Christian hong suak masa pen Tavoy (Dawei) ah tui na kiphum khin zo hi.

4. October 1888 ciangin Carson te nupa Thayet khua ah khin uh a, Zomi (Chin) lakah nasep kipan uh hi. Ref: Suanzanang, Kenneth Htang, “Carson Establishes Chin Mission” in Highlights of Chin Hills Mission, 2013, Unpublished, pp. 2,3

A Kikhial Thei English Laimal (4) 

principal principle	A thupi pen, sang siapipa Thukhun, zuih ding a kikhung,
sceptic septic	Thu mann um theilo mi, upna kician neilo mi. Kilawh thei natna, gu lut(natna)
sight site	Khua mu thei. Mun, innmun
stationary stationery	Kikhin lo, kip. Laigelhna ah vanzat tuamtuam
storey story	Inn dawl, inn dei tuamtuam Tangthu, Athu
tortuous torturous	Kipaikaan gawp, buaihuai gawp Bawlsiatna thuak, gawtna thuak
wreath wreathe	Paak kual, khutbuh kual banga kibawl paak. Umcih, kimkot.
yoke yolk	Hakkol, kolhak, van puakna Aktui ciik, aktui laizanga naivaam teng.

Zo Phualva Thupuak - Vol 07, Issue 23 by DavidLian on Scribd