ZSS Lesson 7: MAWHNA GUALZO ZO

SINNA 7: MAWHNA GUALZO ZO
 November 11 - 17

NIPINI (SABBATH) NITAAK LAM November 11

SIMDING TE: Rom. 6, 1 John 1: 8 - 2: 1.

KAMNGAH: “Bang hang hiam na cih uh leh, thukham nuai ah om lo in, hehpihna nuai ah na om uh ahih ciangin na mawhna un note hong uk lo ding hi.” (Rom. 6: 14).

Gamtatna in eite a hong honkhia thei lo ahih leh, bang hangin gamtatna suangsuang ding ihi hiam? Mawhna bang hangin bawlbawl lel lo ding ihi hiam? A ci kha zong ki om thei hi. 

Rom. alian 6 sungah hih a thupi dotna te Paul in a hong dawn kikna ahi hi. Hih Laisiangtho mun sungah Paul in, mawhna tungah gualzawh theihna leh Zeisu’ zia leh tong tawh kibat theihna ahi “Sianthona” (Sanctification) sungah i kalsuan zia ding a hong gen hi. Rom Laikhak sungah Sianthona tawh kisai kammal mun nih bek ahi Rom. 6: 19, 22 sunga bek ah a kidawk hi. Greek kammal in “hagiasmos” cih hi a Manglai in “holiness” cih kammal mun nih mahah kidawk in, “lungsim leh gamgtat sianthona” ahi hi. 

Tua bangin muntawm bek ah kigelh ahihna tawh kizui in, mite in a theih Sianthona tawh kisai in Paul in gen ding a tam theih loh man ahi tam maw? Hi tuan lo hi.

Laisiangtho sungah “siangtho sak” cih kammal in, Pasian tungah “pia khia, koihtuam, aap” cihna hi hi. Tua ahih manin siangthosak a cih ciangin a beisa hun lai in a kiman khin sepkhiatna tungtangah kizang hi. Gentehna in: Sawtak. 20: 32 sungah “a misiangtho te khempeuh” cih kammal na zang hi (Ei Zokam in a om kei hi-Translator). Tua ahih man in ami siangtho te cih a khiatna in Pasian a dingin a ki-aap khia ngiatte a cih nopna ahi hi.

A hi zongin Laisiangtho sunga “siangtho sak hi” cih kammal in, a thupi mahmah sianthona tawh kisai upna zungpi te ahih kei leh, sianthona i cih pen, nuntak sung tawntung huam hi cih kuamah in nial thei lo ding hi. Laisiangtho in zong hih kihilhna nasia takin a thukim pih hi. A hi zongin a tamzaw munte ah hih thu a gennuam ahih hangin kammal dangte zang thei zaw hi. 

Tu kaal sungin ah, olno taka a kitelkhial pahpah ahi, Upmuan na tungtawn pan in Gupkhiatna tawh kisai in a thupai zia a tuamdang khat tawh i sinkhawm ding hi. Tua in Zeisu hangin Gupna a sang khin mikhat nuntakna sungah mawhna tunga gualzawh theihna kamciam te i sin ding hi. 

NIMASANI (SUNDAY) November 12
MAWHNA/KHIALHNA A TAMNA MUN

Rom. 5: 20 sungah Paul in, a vangnei mahmah kammal khat hong pulaak khia hi. Tua in “khialhna a tamna munah Pasian’ hehpihna hong lianzaw zel hi” cih kammal ahi hi. Ama’ deihna taktak in, mawhna khialhna bangzah ta in a tam hangin (ahih kei leh), mawhna thaman bangzah takin a suuk hangin, tua te a lenkim thei dingin Pasian hehpihna in kicing mahmah hi a ci nuam ahi hi. Khat veivei ciangin i mawhna a tamluatna hangin maisak dingin piangthei nawn ken teh ci in a ngaihsun kha te a dingin, mimal kim tungah lam-etna a hong nei sak thei hi. Rom. 5: 21 sungah, mawhna thahatna in sihna hong guan hi ci in Paul in a gen hangin Zeisu hangin Pasian hehpihna in sihna tungah gualzawhna ngah khin a hih manin, eite tungah nuntak tawntungna hong pia thei veve hi. 

Rom. 6: 1 sim in. Paul in bang thu a kilawm kituak dingin kantel in pulak khiatna hong nei hiam? Tua bang ngaihsutna te tawh kisai in Rom. 6: 2 - 11 sungah bang ci bangin hong dawng kik hiam?

________________________________________________________________________________________________________________

A midik khatin bang hangin mawhna bawl thei mawk ding hiam cih Rom. alian 6 sungah Paul in a zaknop huai mahmah kinialna a piangsak thei laigual te tawh hong gelh khia hi. Mawhna thu-ah a si eite in bangci-in mawhna bawl thei nawn ding ihi hiam? cih thu tawh bul hong pankhia a, a zom ah a deihna teng hong hilhcian suksuk hi.

Tuiphumna tawh kisai in tui sungah phumsuk cih a khiatna in lei sungah a kiphum dan mah tawh a kibangin genteh hi. I phum ding’ bang hi mawk hiam? Mawhna in a ukcip i pumpi, mawhna a hong bawlsak den “mi-lui hih i pumpi-lui” mahmah ahi hi. Tua ciangin “mawhna tawh a kidim pumpi” in suksiatna hong ngah thei pan dinga, mawhna khutnuai pan in kisuak ta thei ta ding hi. Rom. a lian 6 sungah mawhna i cih pen, sila te tungah aana tawh ukna anei To’te tawh ki genteh hi. Mawhna a bawlsak den “mawhna pumpi” in khatvei suksiatin a om theihnak leh, ama tunga a uk’ mawhna in a beisiang ta ahi hi. Tui hansung pan in a hong pusuak khia pa tungah mawhna in uk thei nawnlo dinga, mithak/nuntakna thak tawh a hong thokhia ta ahi hi. Tu in amah in nuntakna athak tawh hong kalsuan thei ta hi.

Khris in khat vei bek, mi khempeuh a dingin a hong sih hangin, tu in Amah in a tawntungin hong nungta suak hi. Tua ahih manin, tui a kiphum Christian khat a dingin, khat vei mawhna sungah a sih khit tak ciangin amah a ukngei nuntakna a lui sungah lutkik huai nawn het lo hi. Tui a kiphum ngei Christian khatin, tui sung pan in a pusuah khit tak ciangin, a nuntakna sungah mawhna in ama thu in beisiang ziau ta hi, a ci ding mi kuamah ki om lo ding hi. Mawhna in ukkha nawn lo i cih ciangin mawhna tawh buai nawnlo/kido nawn lo cihna a hi tuan kei hi. 

Sawltak Paul in bang a deihna tawh hih kammal te genkhia cih hih a genna te tung tawn pan in ki tel thei mahmah hi. Tua te in: (1) Eite in mawhna ah a si te kihi a, (2) Pasian a dingin a nungta te ihi hi. Hih kammal te tungtawn pan in, eite sungah mawhna a om lai hangin eite in tua mawhna sungah kalsuan na tawh ahi zongin lunglut luatna tawh a hi zongin tua mawhna te piang khia sak lo ding cih a hong theisak nuam ahi hi. A hi zongin, tua mawhna in i sih dong mawh i sungah a om lai ding ahi hi. Gal. 5: 17 sungah “Bang hang hiam cih leh ei’ pumpi ut bangin gamta lehang Kha Siangtho’ deihna tawh na kituaklo a, Kha Siangtho’ deihna bangin gamta lehang ei’ pumpi deihna tawh na kituaklo zel ahih manin hih nihte gel a kilangpang niloh nahi a, note’ ut bangin a gamta theilo nahi uh hi” ci hi. Tua ahih manin, Sawltakpi te leh nidang lai a Misiangtho te in, mihing nuntaksung teng leivui i suah kik dong mah mawhna leh mawhnop lunggulhna te in i pumpi sungah teeng den ding ahih zia tel mahmah uh a, mithak in i thawhkik ni (minthanna zingsang)ciang in i pumpi thokik dinga, tua hun ciang bekin mawhna leh mawhnop lunggulhna khempeuh bei pan ding hi ci in pulak uh hi.” - Martin Luther, Commentary on Romans, p. 100.

NINIHNI (MONDAY) November 13
A HONG UK MAWHNA

Eite a dingin Sawltak pa in thudam tawh bang thu tawh kisai in hong taihilh hia?

____________________________________________________________________________________

“Uk” cih kammal in “mawhna” in Kumpi bangin a hong uk cihna a hi hi. Greek lai pan in “uk” cih kammal in “kumpi khat a hi ding” ahih kei leh “kumpi khat bangin nasem” cih bangin direct in a khiatna kikhia thei hi. Mawhna in a si thei pumpi tungah kumpi zalet na len kawm in leh a thuthu in a gamtang sak dingin nakpi takin lunggulh hi.

Paul in “mawhna ki uksak kei un” a cih ciangin diktan sakna a ngahkhin sa te a dingin, a mau nuntakna sungah kumpi bangin uknopna anei mawhna tungah kidaal zawhna anei ding hi a ci nuam ahi hi. Hih lai mun ah lungsim lunggulhna mahmah tawh zong kipat khiattheih thu ahi hi.

“Nangmahin na tel dingleh na theih ding a kisam mahmah thukhat in, na sung panin a hong piangkhia utna/amaan lunggulhna hi a,tua in a hong thahat sak thei khat ahi hi. Tua in mihing hihna pianzia sunga i neih khensat zawhna a hi kei leh, teel-theih ngamna (power of decision and power of choice) ahi hi. Na khempeuh pen utna tungtawn in gamtat khiatna pan’ a hong piang vive ahi hi. Pasian in Mihingte tungah suakta takin deih teeltheihna hong piak pen zat khiat ding ahi hi. Na lungsim pen na kheel thei kei dinga, nangmah mah leh na it theihna te Pasian na kipia thei kei ding hi. A hi zongin nangmah in Ama na’ sem dingin na teel thei ding hi. Na ut/ na lunggulhte Amah na pia thei ding hi. Tua hi leh, Amah in Ama deih bangbang a sem dingin na sungah hong sem khia thei pan ding hi. Tua bangin na pianzia a bupin Khris neih Kha’ ukna nuai ah a hong tun ciangin, Ama thuneihna nuai ah itna, lawpna te Ama sung bek mah hong hi pah dinga, na ngaihsutna khempeuhte zong Amah tawh hong kituak ta ding hi.” Ellen G. White: Step to Christ, p. 47.

Rom. 6: 12 sunga om “pumpi lunggulhna (lusts)cih pen, “utna deihna (desires) cih kammal tawh kilet khia hi. Tua ahih manin, tua utna deihna i cih in zong a hoih lam a deihna leh a hoihlo lam a deihna om thei veve hi. Mawhna in a hong ukcip nak leh tua i lunggulh pen in a sia lam tung thei hi. Tua Lunggulhna pen ei leh ei in a do dingin i kipat khak leh khauh mahmah ahih man in nanzawh theih ding thu hi lo hi. Mawhna i cih pen a gamhtat mahmah

hong ukcip thei khat hi a, a lungkim thei mahmah lo a hong kileh kik nuam den khat ahi hi. Tua mawhna i nan zawhna dingin Upmuan tungtawn bek hi a, tua Upmuan na tungtawn bek in a gilo tua i galpa tungah gualzawh theihna ding kamciamte muan-ngam na bekin hong nang zo sak thei bek ding hi.

Tua ahih manin, Rom. 6: 12 sunga “Tua ahih ciangin”cih kammal in thupi mahmah hi. Tua in a masa lama agen thu te hong phawk kik sak thei a, A diakdiak in Rom. 6: 10, 11 sunga thu te a gennuam hi pha deuh hi. Tuiphumna a ngah khin mikhat in Pasian a dingin hong nungta ta dinga, tua in Pasian bek mah ama nuntakna thak sunga dingin a thupi pen hong suak ta ding hi. Amah in Pasian na’ bek hong sem dinga, bangin Pasian lungkim sak thei hiam cih bek hong kan ding hi. Tua ahih man in, Amah pen, mawhna thu-ah si-ta ahih man  in, tu in “Khrih Jesuh tawh kipawlin Pasian’ thu-ah a nungta”-in kingaihsun ta ding ahi hi. 

Tuni i Lesson sunga Ellen G. White thugen na lungngai kik dih ni. Deihteel theihna tawh kisai in eite in, Suakta takin Sia leh pha, a khial leh a maan, Khris leh Leitung cih te tungah deihteel theihna power nei i hih leh tu zawh nai 24 sungin tua na neih deihteel theihna hangin na nuntakzia te in bang ci bangin zang na hi hiam cih kisit tel in. Hih deihteel theihna power a hong kipiak pen, na zatna tungtangah a hoihin maw a sia lam in zat khialh khak theihna pan in bang ci kisin thei ding nahi hiam?

NITHUMNI (TUESDAY) November 14
THUKHAM NUAI AH HI LO, HEHPIHNA NUAI AH 

Rom. 6: 14 sim in. Hih Laisiangtho mun tawh kisai in bang ci bangin telthei ding ihi hiam? Thukham Sawm te in eite a dingin hong hen kha nawnlo hi a cih nopna hiam? Tua bangin ahih kei leh, bang hangin hong hen lo hiam?

____________________________________________________________________________________

Rom. 6: 14 sung thu in, Rom Laikhak sungah a thupi pen thupuak khat ahi hi. Ni sagihni Sabbath pen kiphiat  ta hi ci in, ei SDA te a hong hilh nop uh ciangin a bulphuh uh Laisiangtho mun khat ahi hi. 

Ahi zongin tua thu tawh kisai pen, Hih Laisiangtho mun in a hong gennop a deihna bulpi hi lo hi. Abeisa sungah i sin khit mah bangin Thukham aki beisak khin bang ahih leh bang ci bangin mawhna om thei lai mawk hiam? A taktak in, mawhna i cih in bang hiam cih Thukham in a hong hilh hi zaw hi. Rom Bu sung khempeuh i sim ma in, hih Rom alian 6 sung bekah zong mawhna om takpi ahih zia ki lang thei hi. Mawhna thu tawh kisai a kibuai mahmah laitak in, Paul in thakhat thu in “Mawhna a kilat khiatna Thukham sawm kizang nawn lo, ki beisak ta hi” hong civat mawk leh a ngaihsut hak mahmah ding thukhat hong suak ding hi. A khiatna zong hong nei khol lo ding hi. 

Paul in Rome gama thu-um mite tungah agen nop thu in, mikhat in “thukham nuai ah om” acih ciangin, tua hun Jew te ki-ukna sunga a om mite in, mihingte bawl tawm ahi thukhun, thukhun a zui khempeuhte in mawhna khutnuai ah a om te ahi uh hi ci hi. A thudang leuleu in, hehpihna khutnuai a a nungta mikhat in mawhna tungah gualzawhna ngah ding hi. Bang hang hiam cih leh, ama lungtang sungah Thukham deihna kigelh khin a hih manin, ama kalsuanna khempeuh Khasiangtho in makaih ta ding hi. Zeisu Khris pen Honpa Gumpa in a sanna, Topa’ hangin diktansakna angah na, Topa sungah sihna sungna ki tuiphum khitna, “a mi-lui” hihna teng a sihsak khitna, nuntakna thak sungah kalsuan theihna- cih khempeuh

te i kalsuan nak leh, i nuntakna ah mawhna a paikhia thei taktak te ihi thei pan ding hi. I phawk ding thukhat in: Rom. 6: 14 sung tungtawn pan in a deihna in, Mawhna sungah gualzawh theihna ding kamciam na tawh kisai i tel mahmah na ding’ a hong theisak nuam ahi hi. 

Eite in “thukham nuai a om na” cih tawh kisai, i gentel tak ciangin muhna toi tawh i ciangtan vanvan ding hi tuan lo hi. “Hehpihna khutnuai” ah om ing a kici mikhat in, Pasian’ Thukham a thusim nop tuan kei leh, hehpihna a ngah gen loh mawhsak thukhenna thuak zaw lai ding hi. “Hehpihna khutnuai ah om” icih ciangin Zeisu sunga om Pasian’ hehpihna hang bek tawh, thukham in a mawhsakna hangin mimawh asuak pa mawhna khempeuh ki hepkhiatsak khin ta hi, cihna ahi hi. Tua ahih manin, Thukham in ahong ken mawhsakna hangin sihna ding dinmun pan in tu-in, suahtak theihna a hong ngah thei ta hi. Mawhna sung pan in si khin ta ahih manin, mawhna sila hi nawn lo a, “nuntakna athak” tawh anungta te ihi ta hi.

Khris’ hangin nuntakna thak taktak, na nuntakna sungah na ciam kha ngei hiam? Muh theih dingin Khris’ in a hong sepsak na khat peuhpeuh, bang ci bangin lakkhia thei ding nahi hiam? A bang’ dinmun te ah nangmah in na hepkhiat theihna ding na nial theihna leh, bang hangin tua te na hepkhiat kul limlim hiam?

NILINI ( WEDNESDAY) November 15
MAWHNA MAW THUMAN NA?

Rom. 6: 16 sim in. Paul in a gennop bang hiam? Bang hangin kiselna tungtawn pan in, a thugen in kician mahmah hiam? khat lam ahih kei leh khat lam ah i pan kul hi. Kaingawi cih bang kizang thei lo hi. Hih tehkaakna thu tungtawn pan in bang sin theih ding nei ihi hiam?

_________________________________________________________________________________________________________________

Upna hangin nuntakna thak kalsuan na ah Paul in, suakta takin mawh bawl theih kikna kiphal lo ahih zia a hong gen kikna ahi hi. Upmuanna tawh nuntak kalsuanna in mawhna tungah gualzawh theihna piangsak hi. A taktak  in zong, Upmuanna bekmah tawh a hong kikamciam khempeuh te tungah gualzawh theihna inei thei hi. 

Mawhna icih pen, a nautangte tungah nasia taka a ukcip kumpipa bangin a genteh khit tak ciangin tu in, Paul in mawhna icih pen a sila te in a thu aman ding a lunggulh mahmah To’ khat dan in hong genteh kik leuleuh hi. Tua ban ah, mikhat in a To’ dingin a deihdeih a teel theih thu hong gen hi. Amah in sihna lampi ah a manawh pih thei mawhna sila dingin a ut leh teel thei a ahih kei leh, nuntak tawntungna sungah a tunpih thei ding’ dikki-sak theihna sungah sila suak thei hi. Paul in bel a kaingawi dingin leh, a kikaal ah a om dingin phalna hong pia lo hi. Khat ahih kei leh khat zaw sang i teel hong kul ding hi. Bang hang hiam cih leh, a tawpna ah nuntak tawntung theihna leh, sih tawntung theihna a hong tun pelmawh tuak ding uh ahih man ahi hi.

Rom. 6:17 sim in. Hih sungah Paul in Rom. 6:16 tawh kisai in bang thu te behlap hiam?

_______________________________________________________

Thuman na in amaan Upna thu guipi (correct doctrine) tawh kizom a hih zia lunglut takin ngaihsun dih in. Greek kammal in “doctrine” i cih pen hih mun ah, “thuhilhna” ahi hi. Rom gama om Christian khempeuhte tungah Christian Upna tawh kisai in thu guipi a beisa hun in kihilh khin ta a, tu in bel thumang takin a zuih ding bek uh hi ta hi. Tua ahih manin, Paul a dingin Rom gama om thu-um mite tungah a maan Upna thuguipi te theihna, amaan kihilhna, cih te a lungtang sung pan un thuman na tawh a san theihnak uh leh “dikkisakna sila” (Rom. 6: 18) a suak sak nuam ahi hi. Khat veivei tak ciangin izak theih zel thu in Itna i cih pen, gamtatna tawh i lahkhiat theih zawh lai teng doctrine (Upna zungpi/Upna thugui let)cih te thupi masa lo hi ci thei uh hi. Tua in a ol khollo(thu mawkmawk lo khat) khat a ol mahmah khatdan in genkhiatna ahi hi. Lesson masa lam ah i sinsa mah bangin, Galati gama om pawlpi mite in upna maanlo tawh kisai a nan zawhloh uh mah bangin tu in zong Rom gam a om thu-um mite tungah Paul in a lungkham pih mahmah hi. Tua ahih manin amaan thuhilhna bang zah takin thupi mah ta leh, lam khat teitei pan in min siatsak nopna hanga thugenna te ah, nak pitak in kidop huai hi.

Mawhna sila leh dikna sila tegeel i tehkaak tak ciangin nakpi takin ki lamdan na nei hi. Tui i kiphum nungah mawhna i bawl khak zenzen leh, tua in eite hotkhiatna ngah takpi lo hi i ci thei diam? 1 John 1:8 - 2: 1 sim in. Zesu nungzui i hih khit hangin ki puuk kik kha thei veve hi, cih tawh kisai in hih Laisiangtho mun in hong telsak ding hiam?

NINGANI (THURSDAY) November 16
MAWHNA PAN IN SUAHTAK NA

Rom alian 6 sung i sinsa ciangciang ilungsim ah ciamteh kawm in, Rom. 6: 19 - 23 simbeh kik ni. A nuai ah Paul in ahong gennop thuguipi te gelhsuk in. A thupi pen in, Paul in phamawh a sak a thugil te nangma nuntakna ah bang ci zatkhiat ding cih thu hi zaw hi. Nang leh nang kidongin.

________________________________________________________________________________________________________________

Hih kammal te tungtawn pan in mihingte in mawhna sunga mihingte dinmun, i puuk khiat zia tel mahmah hi cih kilang hi. “Na lungsim uh neemlai” cih kammal hong zatna ah Greek kammal “neem” cih a khiatna in “zawnkhal thaneemna” ahi hi. A puuk khin mihingte dinmun pan in, amah leh amah a ki nusiat phot leh, hih theihna a neih thu Paul in thei hi. Tua ahih man in i deihteel theihna zatkhiatna tungtawn panin, ei ma ci leh sa thaneem na khempeuh tawh diktheihna nuntakna sungah hong panpih thei ahi, To’ Zeisu kiangah i kipumpiak ding hi ziau hi.

Rom 6 sung thu pen, mawhna i cih in thukham palsatna ahihna leh, a thaman in sihna a hih zia genna hong nei hi. Hi mah hi, Mawhna thaman sihna ahi hi. Tua bek tham lo in, Rom. 6 sungah, mawhna limlim in sila i suah theihna dingin a hong ukcip ahih ban ah, mawhna thaman leibat na tawh sihdan a hong thuak sak ahih zia i tel ding thupi ding hi.

A hong ukcip thei To nih gentehna tungtawn pan in ah, Paul in To khat teitei tungah na i sepsak nak leh, a dang To’ khat tungtawn pan in suahtak na a ngah kihi ziau hi. Hi lai mun ah zong i tel dingin, To’ nih sung pan in, khat zawzaw teel kul hi cih i theih ding thupi hi. A kaingawi kingah lo hi. Tua tungtawn in i theihsa mah bangin hong ukcip mawhna nuai pan in suahtakna i cih ciangin mawhna bangmah nei nawn lo cihna hi tuan lo a, tua gen loh mawhna mah tawh i kibuan hong kul zelzel ding ahih man in i puukkhak hun zong hong om ding hi. A cih nopna in mawhna in ahong ukna sungpan in suakta khin cihna bek hi a, mawhna in i nuntakna ah a om lai phial zongin, nisim gualzawh theihna kamciam na te a taktak in nuntak pihna tawh i gualzawh sawm ding hi.

Tua ahih manin, hih thupuak in mawhna tawh a kibuanbuan lai te a dingin a vanglian sapkhiatna pi khat ahi hi. Hih eite tunga hong tatsia, a hong ukcip mawhna in eite a dingin a zumhuai na leh sihna cih loh thudang ah bangmah a hong piaksawm kei hi. Tua ahih manin ama kiang pan in taikhiat theihna ding in lunggulh huai hi. A dang khat zaw leuleu in, dikna tungtawn a kalsuan nuamte ahih leh, a thuman sungah tangtak in dingsak bek tham lo in, phat takcing te hong suak sak ding hi. Amau sepna khempeuh in Gupkhiatna thu tawh kisai in a thalawh un zong kituat lo uh a, a thak nuntak nopna tungtawn pan in a hong piang gah phatna a hi zaw hi. Amau gamtatna khempeuh in Gupkhiatna ngah theihna dingin a thalawh uh a hih khak leh bel, Lungdamna thupuak, Gupkhiat theihna thu laigil, Zeisu a kitangsap na khempeuh pan in a lampial, tup mun tunglo suak mang ding uh hi.

KIGINNI (FRIDAY) November 17

SINBEH DING: “Zeisu in mawhna bawl sawm ngei lo hi. Ze-etna sungah a lut dingin zong a ngaihsun ngei kei hi. Tua mah bangin eite in i gamtat ding ahi hi. Khris in ama’ Mihing hihna leh Pasian a hihna ki pumkhat ahih manin, Khasiangtho in a ompih theihna hangin buaina tampi a thuakkhak hangin nawk zo den lel hi. Ama’ Pasian hihna nuntakzia te eite in i ngah theihna dingin a hong kumsuk ahi hi. Upmuanna hangin Amah tawh i kizop/pumkhat theih nak leh, mawhna in eite tungah thu hong nei thei lo ding hi. Pasian ahi Khris Zeisu tungah upmuanna tawh kiptak in i let nak leh, nuntakna picing i neih theihna dingin, tua i muanma khut pen Pasian in hong letsak den ding ahi hi.” - Ellen G. White: The Desire Ages, p. 123.

“Tuiphum ding ciangin, i kamciamna te sungah Satan leh ama nasepna tawh kisawh khak nawnloh na ding tawh kisai in sukmit siang na ding leh, Pasian gam a zai semsem na dingin i lungsim, ngaihsutna te leh i kha te tawh mapan theihna dingin i kiciam a....Pa, Tapa leh Khasiangtho te in, a kisiansuah khin mihingte tawh na a semkhawm dingin kiciamna i nei hi.” - Ellen G. White Comments, The SDA Bible Commentary, Vol. 6. p. 1075.

KIKUP DINGTE:

1. Mawhna tungah gualzawh theihna dingin a lamdang kamciamna te ngahna tungtawn pan in -Mi piangthak te zong ki hi ta mah leh. mawhna ah a puuk khin, mimawh te leh, lungsim a nin mahmah a paai te i hih veve zia i theihsa hi a, hi lai thu ah kituak lo thu a om thei diam? A hang na gencian thei diam?

2. Na nuntakna a kikheel zia, Khris in nangtungah bang hong sem, bang ci bangin na nuntakna te a thak in a hong om theihna na kikupna vuah gen sin ve.

3. Khris in a hong sepsak khit sa te bek hangin Gupkhiatna a kingah a hihna thu leh a lauhuai mahmah thu in, tua bek mah bulphuh luatna hangin a dang Gupkhiatna tawh kisai thudang te i nusiat khak ding a lauhuai na om a, Zeisu in ahong sepna tungtawn pan in, mithak i suah theihna, Ama meelsun i suahna te zong a thupi mahmah khat leh, gen dingin a kilawm thu te ahi hi. Hih thu nihte bang ci bangin telsiam in gupna thu ah gawm khawm thei ding ihi hiam?