MONU’ PA IN MOPA MAI AH ATANU THU A VAIKHAK 10 TE

Ka tanu aw, na suah na khankhiatna innlum unsia in na nuntak sung a na kithuah pih ding lawmhoih a bel na hi hi. Tua a hih manin kei, na pa in,  thu 10 kong vaikhak ding a, na moken bang in na lungsim sung ah koih den in aw, ka tanu..
1. Keima thu sang in na pasal’ thu thupi ngaihsut in na mang zaw in..( Ama kiang ah na nuntak sung om ta ding na hih manin..)

2. Na innkuan a dingin na lungsim khempeuh pia inla, nong nusiat na nu leh napa’ inn nop na sak zia gen gen peuh mah kei in. ( tua bangin gen gen le teh, na it na pasal tawh na dinkhiat pih na innkuan nuam a sa lo bang na hi ding a, na pasal a lungnuam ngei lo ding hi)

3. Na pasal zahtak mah mah inla, it mah mah in. ( Pasal a zahtak leh a itte nuntakna nuamsa uh hi.)

4. Na pasal phalna omlo in, na nunglam na nu napate sum pek khat zong ong pia kei in. ( Tua bangin nong piak a hih leh ko na nu leh napate guta a hong bawl na suak ding hi.)

5. Na pasal leh a lawmte a tutkhop a thupoimawh a holim uh ciangin amaute gei ah va tut sawm se kei in.  ( Amaute pasal kikhawl a hih uh manin numei theih ding kilawmlo zong om kha ding hi. ) Tua a hi manin anhuan buk lam ah om in, a ki sap bang bang uh pia zaw in.

6. Na pasal aw khauh tawh kawk ma sa kei in. ( Na pasal a heh zongin awnem tawh ho sawm hamtang in, tua in a hehna hong dai sak ding hi.)

7. Na pasal’ lawmte sawtpi pi ho sawm ken la, amaute amit ah en in ho sawm se kei in la , tam kisawh lua kei in. ( Hih pen nupa tampite ki muanmawhna kipatna hi a, tampi kikhen lawh uh hi)

8. Na pasal tung a na lungkim lohna pen na pianpih na sanggamte tung ah a hi zong in, ko na nu leh na pa tung ah a hi zongin hong tun peuh mah kei in. Hong tung hi leh cin, ko na unauleh na nupa te in kong lungkim loh pih ding uh a, na it mah mah na pasal hong muhkhialh sak ding hi ung. Nng zong a khial thei na hih lam phawk in aw.

9. Na pasal tung a na lungkim lohna leh hehsuakna na neih leh a innkuanpih a unaute leh na teknu na tekpa tung ah gen zaw in,. bang hang hiam cih leh na pasal neu lai akipan amau a omkhawm uh a hih manin a mizia nang sang in thei zaw ding uh hi. (Tua pen na nupa uh kilemna ding hi zaw ding hi.)

10. Na pianna na nu leh na pa, na sanggamte sangin, na pasal, a u leh naute leh na teknu leh tekpa te it zaw in. (Kokiang pan  paikhia in amaute na belhna a hangbulpi a hi hi.) Na lungkim lohna a om ciangin zong thunget ding mangngilh ngei kei in. Kote muh batlohna ah a om ding na hi a, a hih hangin a hong muden Pasian na mangngilh kei in aw.

Pasian thupha a sang tak nupa leh Pasian a zahtak  nupa kop na hih na dinguh leh Pasian deihsakna thupha namkim a ngah dingin note thupha kong pia hi".