FSS ZIRLAI 7: SUAL NEHNAK

ZIRLAI 7: SUAL NEHNAK
November 11-17

SABAT TLAILAM November 11

TUZARH SIAR DING: Rom 6; I John 1:8-21.

BIBLE CANGKEN: “Sualnak cu a lo uktu si nawn hlah seh, ziangahtile daan hnuai ah nan nung nawn lo. Pathian zangfahnak hnuai ah nan nung zo”. (Rom 6:14)

DAAN in in run thei si lo ahcun ziangah so kan buaipit rero? Daan thlun hi ziangah so a tul kan ti thei? 

Rom 6 thu hi a poimawh zetmi thusuhnak a sannak a si. Paul in himi a phisiinnak hi thianhlimter zomi kan si ti thei-awk ih Khrih nun ziaza langternak in sual nehnak nun thansopi vivo dingah a duh a si. Cumi cu Rom 6:19,22 sungah Grik tongin, ‘hagiasmos’ tiih nganmi a si ih, thianhlimter timi sullam a nei. Mirang tongih a langdan cun ‘holiness’ thianghlimnak timi a si. Himi hi Rom sungah voi hnih lawng a lang.

Miih an theihmi thianghlimnak kha Paul ih a simmi a si maw? A si lamlam lo. Bible simdan ahcun ‘thianghlimter mi’ ih a sullam cu Pathian hnenih hlan mi tinak a si. Thianghlimter mi timi hi tuah lai rero mi simnak a si theu ih, tuah zomi khalah hman theih mi a si. Thuthimnak ah an zaten thianghlimter zomi an si (Tirh. 20:32). Thianhlimter zo mi ti tikah a langter duhmi cu Pathian hnenih rak hlan zo mi tinak a si.

Bible ih thianghlimnak a hmandan hi nun ih a lang ringring mi damsung thianghlimnak kha a thupi bik in a sim. Himi hi Bible ih a fehpidan a si ih ngandan le hmandan phundang a um lo. 

Tui zarh cu, zumnak ih rundam kha a khatlam zawng ihsin kan zohsal ding. Jesui in rundamnak voikhat a tuahmi kha kan damsung sual neh theinak thukam a um tinak a si.

THAWHSAL NI November 12

SUAL KARHNAK HMUNAH

Rom 5:20 ah Paul in a mak zetmi thu pakhat a suahpi. Sual karhnak hmunah zangfahnak a karh sinsin. A langter mi cu, sualnak tampi (or) tenum zetmi sualnak khal siseh a cinfelnak dingah Pathian zangfahnak ih a daih thei lomi sualnak a um lo. Kan sualnak ngaidam theih lo ih sualnak tam zetih in theihter ka si tikah pumpak hrangah ruahsannak ziangso in pek? Rom 5:21 sungah Paul in sualnak in thihnak lamah in fehpi hmansehla Jesuh Khrih ruangah Pathian zangfahnak thawngin thihnak a nehih kumkhaw nunnak in pek.

Rom 6:1 kha siar aw. Ruahdan dik zetmi ziangso Paul in a langter? Rom 6:2-11 sungah kha mi ruahdan ziangvek in co hlan dingso a si?

Rom 6 sungah Paul in thu a relmi thei hiar um zetmi cu thiam coter zomi pakhat in ziangah so sualnak a tuah nawn lo ding. Ziangruangah tiah le sual tuah duhnak kha a thi zo. Cuti a sile a simfiang duhmi ziangso a si? 

Tisungah pil thehih hnimphumnak kha sual tuah duhnak phum hlohnak a si. Kan vuiliam mi cu sualih ukmi le thu nun mi sual tuah a duh ringringtu kan minung hlun sinak a si. Cumi umdan cu sual tuah duhnak kanmah ih a um mi kha siatsuah theh tinak a si ruangah sual tuah duhnak a um nawn lo. Rom 6 sungah sualnak hi sal zuattu in a sal parah thuneihnak a nei ih, a uk mi vekin a sim. Kan taksa cu sualnak ih a khatmi a si ko. Cuih kan tuah rero mi sual tuah duhnak kha a tuahmi sualnak thawn a siatsuah theh. Cule sualnak ih in uknak kha a cem. Sual thlankhur sung ihsin thawhter sal a si ih tidai sung ihsin a hung thosal mi cu mithar a si. Sual a tuah nawn lo. Nunthar ih nungmi a si zo.

Khrih cu voikhat ah kumkhua daih in a thi, a tu ah a kumkhua in a nung. Khrihfa pakhat sual thihsan in tidai a hnim ahcun ti sung ihsin a thawhsal tikah a sualnak kha automatic in a lang nawn lo. Sual ih ukmi a sin awn lo, sual thawn thubuai a nei nawn lo, an thenaw fel a si. 

Hitawk ah Tirhthlah ih a sim mi fiangten kan hmu thei. Cu mipawl cu: (1) Sual hrangah cun mithi kan si, (2) Pathian hrangah kan nung tinak a si. Taksa hiarnak sualah kan pekawk nawn lo. Cuti cingin kan sungih a ummi sual cu a um ringring. Kan nunnak a cemtiang sual a um ringring ding. Galati 5:17 ih kan siar mi vekin tisa ih a duhmi kha thlarau in a hua, thlarau ih a duhmi tisa in a hua. Hite pahnih hi an do-aw ringring a si. Curuangah mi thianghlim le Tirhthlahpawl in sual duhnak thinlung hi leilungih kan can hlan sung hmuahhmuah a um ringring ding tiah an pom cio. Thosal nunthar kha sual duh hiarnak tel loin a thosal mi a si. Martin Luther, Coventary on Rome. P. 100.

TLAWNGKAI NIKHAT November 13
SUAL IH UK TIKAH

Rom 6:12 ah ralrin peknak (or) nun simnak ziangso um? Himi uk timi tongfang ih a duhmi cu, mi uktu  siangpahrang vekih uktu sualnak kha a tarlang. Grik tongih uk timi hi lal vekih umnak a sim duh. Sualnak in siangpahrang vekin lalnak a lakih kan taksa le nun ziazapawl a luahkhat ih a duhduh in in hruai. 

Paul in, “Sual ukter aw hlah uh” a timi cu thiamco zomi in a nunah sualih thunun thei mi le kan nunah sual hi lal vekih ret lo dingin duhhrilnak tuah dingmi a si. Himi hi duhhrilnak ihsin a ra suak mi a si. 

A poimawhbik mi cu a dikmi kha hramhram ih hril ding a tul. Himi hi ukawk theinak a huham ih hmual neihnak a si. Kan duhhril a dik ahcun a dikmi tuah duhnak  a um. Himi duhhrilnak hi minung hnenah Pathian ih pekmi an tuah ringring dingmi a si. Na thinlung kha nangmahten na thleng thei lo. Pathian hnenah na pek lo ahcun hlawhtlinnak a um thei lo, asinan Pathian rian dingah duh na hril thei. Na duhhrilnak cu amah pek aw. Amah in na thinlung sungah a duhdan ih um dingin hna a tuan ding (Fil. 2:13). Na sinak hmuahhmuah kha Thlarau uknak tangah ret aw. Na cangvaihnak hmuahhmuah amai hmuitin mi a si ding. Na ruahnak kha amai ruahnak vek a si ding. E.G. White, Step to Christ. P. 27. 

Rom 6:12 sungah “Duhhiarnak” ‘lust’ timi Grik tongin ‘desire’ ‘hiarnak’ timi a si. Himi hiarnak hi a tha tla a si thei, a sia mi tla a si thei. Sualnak ih in uk tikah duhnak tha lo, a sia mi duhnak a tuah. Cuih duhhiarnak cu a nasa tukih rikham theih a si lo. Amah le amah a doawk rero a si. Sual hi a tha lo mi uktu a si. Voikhat lawngah diriam theih a si lo ih, tuah rero duhnak a thlenpi. Nehnak thukam kha zumnak thawngin ka ta a si tiah neh zonak thu kan phuang ahcun zawnruahnak nei lo uktu nunrawng tisa hiarnak kha neh in kan hlon hlo thei ding.

Rom 6:12 ih tongkam vek a si ahcun, a poimawh lutuk. Rom 6:10,11 sungih a simsal mi a si. Tihnim zo mi kha Pathian lamah nun a nei zo. Cui umdan cu, Pathian kha a nunah a thupibik ih Pathian a rian, Pathian duhmi a tuah. Curuangah sual rawng a bawl thei nawn lo. Jesui ruangah Pathian pekmi nun neitu a si.

Tuni zirlai ih E.G White canganmi sungah zoh kir sal sehla, zalen zetih duhhrilnak pomdan ziangvek ih thupi so a si timi hminsin aw. A thi thei mi rannung pakhat in, zalen zetih duh kan hril theinak ah a dik (or) dik lo, a tha (or) tha lo, Bawi Khrih (or) leitlun thil, a thi thei mi thilnung in himi duhhrilnak hi kan tuah thei mi a si. A ralai dingmi nazi 24 sung kha na duhhrilnak ralring zetin kilhim tum awla duhhrilnak ziangvek in so na hmang. Cui na hmannak ih sin na zir thei mi ziangso a si. A thianghlim mi laksawng borhhlawhtertu na si maw?

TLAWNGKAI NIHNIH November 14
DAAN HNUAI AH SI LOIN ZANGFAHNAK TANGAH

Rom 6:14 siar aw: Himi Bible cang kan theihthiamdan ziangvek so a si? Thukham (10) thu a simmi sisehla in temtawntu cu thukham (10) a si fawn lo. A si lo na ti maw? A si thei lonak ziangso a si? 

Rom 6:14 hi Rome cabu sungih a thupi zetmi pakhat a si. Himi cang hi miin Adventist-pawl tong sannak ih an hman theu mi sabat siatsuah theh a si zo tiih an simmi na thei theu ding.

Kha mi kha a sawh duhmi a si lo ti na thei fiang ahcun himi cang ih a sullam ziangso a si ding? Thusuhnak kan tuah zo mi vekin sualnak hi a um ringring lai ih ziangvek in so thukham daan a cem thei? Ziangahtile thukham (10) in sual a langter. Rome cabu sung kan siar tikah Rom 6 sung lawng hmanah kha mi thil umdan ziangtin so a si timi hmuh ding a harsa zet. Himi thu an rel tlangnak ah an thlurbikmi thu kha sualnak hi a um ringring mi a si. Paul in sualnak langtertu thukham (10) hi a siat theh zo tiah manglam vekin a sim mai kem? Kha vek ruahnak a nei dah lo.

Daan hnuai ih um tiah Rom cabu sungih a simmi cu Paul ih a sim duhmi cu daan vekih a thlun ringringtu sual ih ukmi le minung ih an tuah cop mi daan amah sanlai ah Judahpawl in an innsang khawsak relbawldan a thlun mi le an tuah mipawl kha a sim duh mi a si. Thuthimnak ah zangfahnak tangih khawsa mi cu sual a doneh ding. Ziangahtile an thinlung sungah Pathian ih thupek le daan pawl ngansak zomi a si. Pathian Thlarau kha an nun lamhruaitu a si. Jesuh Khrih kha Messiah ah an pom ruangah an zumnak in thiam coter an si. Cule a thi mi an minung hlun kha ti sungah vuiliam a si. Cuih a nun hlun cu a siatsuah theh zo. Nun thar ih nung ding le fehsuak dingah nun hlun uktu sual kha a thuneihnak tohkham ihsin dirhthlak a si. Khami kha Rom 6:14 pumhlum in a langter mi a si ih sual nehnak thukam thawn pehzomawknak a nei.

“Daan hnuai ih um” timi hi “Khap mi rori” ti in simfiangnak tuah a si dah kel lo. Pathian zangfahnak tangah ka um tiah a thei awtu cun Pathian thu thlun lo hi mawh neihnak a si ih, zangfahnak lengih umnak a si tiah an thei ih Pathian thu thlun loin an um thei lo. Zangfahnak hnuai ih um timi cu kan hrial thei lo dingmi sual ruangih dantatnak kha in hlonhlo sak zo. Pathian zangfahnak kha Jesuh hnen ihsin kan ngahih thukham ih a thlenpi mi thihnak dantatnak ihsin kan luat zo. Nunthar in kan nung ih kan nun ziaza ah fiang zetin a lang. Kan nun hlun a thi zo ih, sualnak sal kan sin awn lo.

Khrih ah nunthar tonnun ziangvek in so na neih? Khrih in na hrang a tuahmi kuttham theih le mit hmuh thei ih a langmi ziangso a um? Thlah sian lomi ziangpawl so na neih lai? Ziangah so kha mi na thlah hrimhrim a tul? 

TLAWNGKAI NITHUM November 15
ZAWNLUNGNAK (OR) SUALNAK

Rom 6:16 siar aw. Ziangthu so Paul in a langter. Thu an el-awknak hi a dum le a rang vekin a fiang a si. Pakhat khat ah tannak nei loin a um lo. Tan lam neih a tul. A fiang zetmi zohthimnak in zianglam ah so zirlai in zirter in duh?

Zumnak ih nunthar kha Paul in a vun thlirsal ih zalen zetih sual tuah dingah khuan a pek lo. Zumnak nun in sual neih nun a suahpi. Curuangah kan hnenah thu in kam mi nehnak kha zumnak thawngin kan ta a si.

Uktu bawi in a ukmi parih a lal vekin sual umdan a langter. Bawi in a hnen-um kha thu a pek vekin sualin a thuthu in in umter tiah a langter. Cu tikah Paul in minung hi kan duhmi hril ding kan si tiah a langter. Thihnak thlenpitu sualnak (or) nunnak thlenpitu dingfelnak cu kan kumkhua dinhmun in thlenpitu ding an si. Paul in dinhmun reprai nei lo laklawh zetin in tan ta lo. Kumkhua thihnak (or) kumkhua nunnak pakhat khat kha kan ton ding mi a si.

Rom 6:17 siar aw. Rom 6:16 ih thu kha ziangah so uar zetin a sim? Pathian thu vekih nun neihnak hi a dikmi thurin thawn pehzomaw mi a si timi ziangtluk ih hminsin tlak so a si. Rome Khrihfabupawl in Khrihfa zumnak daan hrampi hi an zirhawknak dan a si ih cumi vekin an nung. Rome Khrihfabupawl hi dingnak sal an si theinak dingah thinlung sung ihsin a suakmi thu thlunnak an neih thei dingin zirhnak dik le rinnak dik ih zirh hi Paul ih fehpidan
a si (Rom 6:18). Duhdawtnak kan langter cun ziangso thurin a tul ti ih an simmi kan thei theu ding? Himi hi thu tluangtlam zet a bang nan a tluangtlam lo zet a si. Zirlai kan zir zo mi vekin thurin dik lo hi Paul ih helhkam bik mi a si ih Galati Khrihfabu pialtertu a si. Zirhawknak dik ih thupitnak thangsiater in mi hrekkhat ih an sim mipawl ah ralrin kan tul zet.

Sualnak sal le dingnak sal an danglamawknak a lang fiang ko. Tihnim hnu ih sual kan tuah ahcun rundam sinak kha a fiangawk lo ruangah a si ko lo ding maw? I John 1:8-2:1 tiang siar aw. Himi cangpawl in Bawi Khrih dungthluntupawl kha tlu sal thei a sinak theithiam dingah ziangtin so in sim? 

TLAWNGKAI NILI November 16
SUAL IHSIN LUATNAK

Rom 6 sungah tampi kan zir zo, timi cing tha aw. Rom 6:19-23 siar aw. Paul ih thu a simmi ah tumtahbik mi kha tawiten ngan aw. A thupibik ah nangmah sutaw aw. Paul ih a langter mi thutak kha nan nunah ziangtin so na fiang ve. A langter mi ah ngah mai thei mi ziangso a si tiah na ruat.

Paul in hitawk ah a langter mi cu a tlusia mi kan sinak kha a theifiang ko. Na taksa a tawntai ih a sualzia kha a sim. Grik tongah ‘tontaih’ timi hi derthawmnak ti in a sim. Tlusia zo hnu milai sinak hi amah le amah ah a thumaw thei mi a si ti a thei. Duhhrilnak thiltitheinak kan neih mi in a tawntai mi kan taksa kha kan Bawi Thar Jesui hnenah pumpekaw dingih duhhrilnak kan tuah hnu ah dingfelnak ah in nunpi theitu a si.

Rom 6:23 kha sualnak daan tatnak langtertu ah an sim theu. Himi hi thukham pahbal sualnak kha thihnak a si. Sual dantatnak cu thihnak a si ti a fiang ko. An betsal mi kan hmuh mi cu, thihnak hi sual dantatnak a si. Rom 6 sungah Paul in sual timi a ngan mi kan hmuh thei mi cu, sal parah a bawipa in depde zetih bumnak le an sualman thihnak tiang pek in a ukmi thawn bangaw in a sim.

Bawi pahnih tahthimnak a hmangih a hrilhfiahmi kha ruat aw. Paul in theihter a duhmi cu, Bawi pakhat timi cu midang rian loih zalennak kha a sim duh. Pakhat khat kha felte ih kan hril dingmi a sinak a fiang. A karlak ah um a theih lo. Kan theih zo vekin sual uknak sungih luat timi hi sualnak nei lo tinak a si lo. Buai lo le tlu lo in a um tinak a si lo. A sim duhmi cu sual ih uknak thawn kan sengaw nawn lo tinak sawn a si. Kan nunah fiang zetih a langmi cu sual neh dingih thukam kan neih mi nitin ih phuan rero ding tinak a si.

Sual rawngbawltupawl kha hmual nei zetih kawhnak Bible cang a si. Sual zetih in uktu sualnak in zianghman in pe lo, ningzakza thil a tuahtupawl in cui thihnak kha a man ih pekmi a si. Lal nun rawng hnen ihsin luat a duhtu cun suanlam hawl thei mi a si. Dingfel thianghlimnak a hawltu cun a dikmi thil an tuah ih  thangthat an hlawh. Cumi cu an rundamnak dingih an tuahmi a si lo. Jesui pekmi nunthar ih a rahsuah mi a si sawn. Rundam ngahnak dingih an tuahmi si sehla, thuthangtha ih tumtahmi an thelh pumhlum ding. Rundamnak tla a thelh ding. Jesuh tulnak tla a thelh pumhlum ding a si.

TLAWNGKAI NINGA November 17

RUAHBET DING: Jesuh in a parah sual ih thuneihnak a thlengter dah lo. Tukforhnak ih luh theinak ruahnak a nei dah lo. Jesui hringnun hmandan kha Pathhian thawn an um ih, Thlarau Thianghlim cencilhnak in sual donak ding thazang famkim a nei. Cumi nun cu kanmah ah um thei ve mi a si. Hi leitlun ih a ratnak kha Pathian thawn tanlak tlangih tuah sak dingah a ra. Zumnak thawngin amah thawn kan tangtlang a si ahcun sual in in uk thei lo ding. Zumnak in Pathian hnen lamih a kut a santu cu amah bawm dingah Khrih Pathian a sinak kha Pathian in a parah a pek lohli ding. Cuti cun ziaza famkim kan neih theinak a si. E.G White, The Desire of Ages. Pages. 123.

Ti kan pil tikah setan le a palai pawl thawn pehzomawknak pawl tuah nawn lo dingah thu kan kam. Kan thinlung, kan thlarau le kan nunnak ih kan ruahmi hmuahhmuah Pathian le a ram hrangah hna tuan dingin kan pek. Cule Pa Pathian, Fapa le Thlarau Thianghlim pawl cu kan thianhlimnak dingih in bawmtu an si. E. G. White Comments. The SDA Bible Commentary vol. 6. P. 1073.

Khrihfa tiaw in an nunah an zumnak a lang lo mi cu, thathnemnak a nei lo. Mi pakhat in Bawi pahnih a rian thei lo. Thil tha lo sualnak a tuahtupawl cu a thu thlun dingah an pekawknak an tisa duhnak ih sal an si. Thil tha lo an tuahmi hmuahhmuah thlah dingin le dung tun theh dingah a phuangawk lo ahcun Pathian sal an si thei lo. Setan ih salpawl thawn lungkimnak nei ih nunnomnak le hlimhlopnak hnakin vancung Pathian kan siangpahrang thawn lungkimnak nei ih nomnak le hlimnak hi tihnung um lobik mi a si. Pathian in a minungpawl hnenah thutak thianghlim a phuansak ih Pathian thei lo mipawl hnen ihsin thenaw dingin le amah vekih thianghlim dingah a duh. Seventh-day Adventist-pawl in an zumnak langter in an nun an hmang ding a si. E.G White, Testimonies for the Church Vol. 1. P. 404.

RELTLANG DING:
(1) Sual neh theinak thu sunglawi kan nei, kan zaten mi piangthar kan tiaw ko. Ziangtin so kan tluk ti tla kan thei. Misual kan si rori ko. Kan thinlung sualzia tla kan thei. Hitawk ah na rel duhmi a um maw? A phi na ngah mi simfiang ve aw?

(2) Nan zirnak hmunah Khrih in na hnenah a tuah mipawl tettikhan aw. Na nun a lo thlengsaknak na tonnun le Amah hnen ihsin nunthar na ngahnakpawl simaw.

(3) Kan rundamnak hi Khrih in kan hrang in tuahsak mi ruangah a si timi theih ringring hi ziangtluk in so a thupi? Khami thutak sunglawi kha uar tukin a luanih kan sim ahcun rundamnak lenglam thlen theinak a si, tihnung zetmi a si thei. Jesuh in amai hmuihmel le sinak nei dingah kan nun in thleng thehnak hi khui mi so a si? Rundamnak uar zetih kan langternak theihthiam hi zinagah so a poimawh.