Mission Story: Bawlung Kimawlna Tungtawnin Khangnote Vaphaakna, Agen: Bakhriddin Sanginov

November 25                                                                                   Tajikistan Gam

Nipi 8na: Bawlung Kimawlna Tungtawnin Khangnote Vaphaakna

Agen:    Bakhriddin Sanginov (simzia- Ba khari San gii nop)

Tajikistan gam, Seventh-day Adventist pawl ii bawlung kimawlna ah a kihel veeng pasalnote in  ankampaakmeel leh a san meel daanpiakna laaikhauhte ngah khaak ding patau uh hi. A tuamdiak vaandummeel laaikhauh ngah khak lo ding zong hanciam uh hi. Bawlung kimawlzia ahilh siapa Bakhriddin [ba kha-RIH-din] in bawling kimawl khat in zaakdahhuai a kampauna a zaak leh vandummeel laaikhauh pen thakhat in lakpah hi. Bawlung kimawl khat in tua vandummeel laaikhauh nih a ngah leh kiawlna panin a pusuah loh a phamawh hita hi.  

Siapa Bakharidin in a bawling kimawlte a makaihna thukhun pen a nu leh a pate in hoihsa uh hi. A tate un bawlung a kimawlna panun a sin uh a hoih thukhunte hangin inn nasepte zong a huhna uh hong thei uh hi.  A tate uh pheengphee lozaw in, computer kimawlnate zong tam mawl nawnlo uh hi.

Vaphaakna Thak Khat

Bawlung kimawlte kipawlna pen Adventistte aadingin Tajikistan gam sung aa veenglehpaamte a vaphaak nadingun Pasian’ nasepna beelpawlkhat ahi hi. Banghanghiam cih leh tua gam pen Muslimte ukna, biakna vai ah  tawh a kikalhcip, Asia Laaizang ah a om gam khat ahi hi. Adventiste 204 bek teeng uh hi. Pawlpimi 1,000 sangin a tamzaw in Tajikistan gam gaalvaai in tumaa kum 10 sung a buaina haangin a gam uh nusia uh hi. Mipi tawh Pasian thugenna bawl ding khaamcip uh a hihmanin, Topa Zeisu’ thu geenkhiat nading a haksatna thu pawlpi makaite in gen uh hi.

Ahizongin, 2016 kum-in thungetna leh a pualam vaphaakna nasepna hangin kha thak 18 tui hong kiphuum khituh ciangin pawlpi makaite in lametna hong nei zawdeuh uh hi. Pawlpi makaite in a pualam vaphaakna nasepnate ahi, bawlung kimawl pawl, cih bangin hanciamin seem uh hi. Mangkam tawh lai sinna saang zong hong uha, cidamna thu sinna, innkuan thu geenna leh siksakol kipawlna cih bangin a tuamtuam phuan uh hi. Tua bang sepnate in veenglehpaam tawh kimeeltheihna piangsak in, kipawlkhop theihna zong piangsak hi.  

Tu kuata Sabbath sawmlehthumna sumpi pawlkhat pen Tajikistan gam ah bawlung kimawl pawl cih bangin a pualam phaakna nasepna ah kizang ding hi.

Lamet Ngamloh Pasian Nasepna

Tajikistan ii zumpite omna khuapi Dushanbe ah bawlung tualpi khatbek nei uh hi. Tua tualpi pen  Adventist biakinn gei ah oma, bawlung kimawl pawlte tua laai ah bawlung kimawl uh hi.  2015 kum-in tua bawlung kimawl pawl kiphuanin, Aventist pawlpimi khat bawlung akimawl pen a veeng naupangte in a muh ciangun a sia dingun sam uh hi. Bakhriddin in zong naupangte tawh kithuahna tungtawnin a nu leh pate ta kimeel theih nadingin manlaangtakin ngaihsutna thak khat hong nei hi. Ama’ geelna pen sum tam bei lo hi. Bawlung thum, phiit khat, leh kimawlna ah a kizang nai khat kisamziau hi. Tua khit ciangin, Kumpi vaihawmna Asian Football Confederation kipawlna panin naupangte bawlung kimawlna a makaipa ci-in pahtawina laipi khat ngah hi.

Tua hun sung tengin kaal khat in kidemna nih a hihkeileh thum ah makaih in hilh hi. Minute 90 sung bawlung kimawlzia a hilh ciangin gamtat hoihna a hilh nadingin minute 15 ta hun zang hi. Pasalnote kum 11 pan 13 gual in bawlung kimawl pawl ah hong kihel ciangin guihtheih khamtheihte leh pumpi cidamna a susia zongsatnate zang nawnlo uh hi.

Tua ni bawlung kidemna ah a zaakthadahhuai kampau tawh kisai-in vandummeel laikhauh kuamah kilak lo hi. Guah phiinseuhseuh kawmin a kimawlna uah pasalnote in tuukpeng (bawlung) bekmah suui uh hi. A siapa un, a min a sap ciangin lungdamtakin nuui uh hi. Khuasung panin pasalno sawmvaal in tuukpen (bawlung) kidemna hong en uha, amau zong bawlung kimawl dingin a kisap ding lunggulh uh hi. “Bawlung kimawlna  hong en peuhpeuh, bawlung kimawlna pawl sungah hong kihel thei hi,” ci-in bawlung kimawlzia a hilh siapa in maitai takin taangko khia hi.

Bawlung kidemna a man khit ciangin, bawlung kimawl pasalnote’ nu leh pate in niangtui hawp ding leh kihokhawm dingin a inn uah, siapa sam uh hi

 Siapa in, “Naupangte kimawlna uuk uh ahihmain a nu leh a pate lungdam mahmah uh hi,” ci hi.   “Ka kiangah hong pai uha, ‘Ka tate uh mi hoih a suah nadingin hih bawlung kimawl pawl nong phuat pen lungdam mahmah ung,’ hong ci uh hi,” ci-in maitai takin gen hi.

Hehpihna tawh bawlung kidemna ah a zawh nading bekuh hi loin, a lungtang uh zong zawh nadingin thu hong ngetsak un. Na Sabbath School sumpi uh tawh Tajikistan gam ah mite kiang Pasian thu tawh ka phaakzawh nadingun zong hong huh un.

##########@@@@@@@@@@##########