ZSS Lesson 4: UPMUANNA TAWH DIKTANTHEIH NA

SINNA 4 October 21 - 27

UPMUANNA TAWH DIKTANTHEIHNA
(Justificatiion by Faith)

NIPINI (SABBATH) NITAK LAM October 21

SIM DING TE: Rom. 3: 19 - 28.

KAMNGAH: “Tua ahih ciangin mikhat in Thukham bangin gamta lo in, upna tawh dikkisakna a ngah hi ci in i ciamteh hi. (Rom. 3: 28 RSV).

Tukaal i lesson sungah, Rom laikhak sunga a thugil penpen i sin to ding hi. Tua thu in, Protestant kipuah phatna a hong piankhiat theihna thu laigil ahi: “Upna tawh diktan theihna kingah hi” cih thu ahi hi. Hih thu tawh kisai Martin Luther in a muhkhiatna leh a thuhilhna te

Pope Leo makai in mawhsak thukhen na a neih uh 1520 kum a kipan tuni ciang dongin, hih Upna tawh kisai in Papal te in laih nai lo uh hi. Tua mawhsakna lai (Papal bull) a kipiak hangin, Martin Luther in Upna tawh diktan theihna ngah cih pen, thudang tawh laih theih ding hi vet lo hi cih thei ahih man in tua mawhsak na laikhak (bull) pen na haltum ziau hi.

Hih Upna tawh diktan theihna ngah cih kammal mahmah in, thukham tungah a kinga ahi hi. Thukham a palsat mikhat in thukhen zum hong kipuak dinga a palsatna tungtawn pan in sihdaan a kipia ding ahi hi. A hi zongin a aiawh ding mikhat hong om thei vat a hih manin, tua thukham palsat pa mawhna khempeuh ama tungah a kisuan tak ciangin tua a khialpa hong kimap ta hi. Ama dinmun ah a aiawh (zalaih) ding pa hong om thei a hih manin, tua mimawh pa in tu in thukhen zum mai ah hong din kik ciangin, a mawhna teng a siangkhin hong suak ding hi. Thukhen zum a tunsak na ahi a mawhna khempeuh pan in zong a mawh ngeilo bangin ciaptehna hong ngah ta ding hi. Tua bangin a piantheihna thu in, mawhna a bawl ngeilo a aiawh(zalaih) pa in thukham tunga ama’ cihtakna khempeuh mimawh pa tungah a aap khit man ahi hi.

Gupkhiatna kigeelna sung ah, mihing khempeuh te dinmun in amawh vive kihi khin hi. Eite aiawh ahi Zeisu in, ama picinna tawh, eite tang dingin thukhen zum ah hong dinsak a, eite dikloh na khempeuh aitang dingin ama dikna in hong santham cingsak hi. Tua ahih manin,

eite in eima gamtat hoihna hang’ ahi lo, upna hang bek tawh i san theih Zeisu diktan sakna hangin, Pasian mai ah, midik hi ci in ciapteh na (diktan theihna) a ngah thei bek ihi hi. Hih Lungdamna thu mah tangko ni! A taktak in zong hih sangin a hoihzaw lungdamna thu a om nawn kei hi.

NIMASANI (SUNDAY) October 22
THUKHAM’ ZUIHNA

Rom. 3: 19, 20 sim in. Paul in thukham thu tawh kisai a genna ah, a sep bang hi a, a sep loh (ahih kei leh) a septheih loh bang hi ci hiam? Bang hangin hih thu tawh kisai in, Christian khempeuhte in theihtel dingin thupi hiam? 

__________________________________________________________________________ ___________________________

Paul in ama’ hun lai a Jew mite a tel mahmah ahi, “thukham” cih kammal na limzat mahmah hi. “Torah” i cih (Hebrew in thukham) kammal in tuhun Jew mite khempeuhin a theih Pasian’ thuhilhna ahi, Moses in agelh a diakdiak in, Thuciam Lui bu sung pan in a masa pen bu 5 te ah dingin a ngaihsun uh hi. Tua te sungah, Thukham sawmte leh thukhenna tawh kisai a behlap uh thukham te a hi zongin, zehtan thukhamte khempeuh a kihel hi. Tua a hih man in, thukham i cih khempeuhte in Jew biakna leh kalsuan zia limlim ahi hi. 

Thukham nuai ah om cih a khiatna in, tua thukham thuneihna huamsungah om cihna hipah hi. A hi zongin thukham in, Pasian mai ah, mihing te’thaneem na leh mawhna te kilang sak hi. Tua mawhna te thukham in hemkhia thei tuan lo a, a hi zongin ama sepkhiat theihin mimawh khat amawhna pan in a damna lam a zuan dingin leh a zongkhia dingin lamlak thei hi. 

Hih Rom laikhak tawh kisai, tukhang hun a dingin i bulh ding ciangin, Jewish te thukham te kizang thei nawnlo a hih manin, thukham cih mun ah thukham sawm mah a kawkna hipah hi. Jew ngeina thukhamte zuihna in Jew mite a hotkhiat theihloh mah bangin, Thukham Sawm zuihna in zong eite a hong honkhia zo kei hi. Mi mawhte a gumkhia dingin thukham sawm nasep zong ahi kei hi. A hi zongin ama nasep in, Pasian’ zia leh tong a hong pulaak dingin leh, tua zia leh tong tungtawn pan in, mite in koi mun ah puuk hiam cih lahkhiatna ding ahi hi. 

Thukham i cihna sungah, Thukham Sawmte ahi zongin, Zehtan Thukhamte ahi zongin, Gam-ukna Thukham te leh a vekin a hi phial zongin i zuihkim na tawh Pasian mitmuh na ah, kuamah in diktansak theihna angah zo tuan kei uh hi. A taktak in zong, Thukham in tua bang a sem dingin ngimna tawh a kipia ahi kei hi. A lehlam pan in, Thukham nasep in, eite’ thanemna te hong theikhia sak dinga, eite khephung ah a hong zuansak ding ahi hi.

A hong kilang khia natna, amel in tua natna te a damsak theihloh mah bangin, mawhna kilat khiatna ahi  thukham in eite a hong honkhia zo kei hi. Natna kilat khiatna in damna pia zo lo a, damna ding bawl kul hi cih hong lak khia hi. Tua mah bangin thukham in a ma sepna in mawhmai sakpa kiang hong zuan sak hi.

Thukham zuihna tawh kisai na hanciamna bang zah takin gualzawhna ngahkhin kisa nahi hiam? Tua tungtawn pan in, Thukham zuihna tawh Gupkhiatna hanciam ngahsawmna in amawkna a hih zia hong bang ci theihsak hiam?

NINIHNI (MONDAY) October 23
PASIAN’ DIKNA

“Tu in Thukham leh kamsangte in teci a pan’uh mah bangin, thukham lo in Zeisu Khris sungah thu-um mite khempeuh tungah upna hangin hong tung Pasian dikna kilang hi” (Rom. 3: 21). Hih Laisiangtho mun in a deihna bang ci tel theih ding ihi hiam?

______________________________________________________________________________________________________

Hih sunga a thak dikkisak theihna (new righteouness) i cih pen, Jew te in a meltheih sa uh dikkisakna ahi thukham tungtawn pan in dikkisak theihna tawh ki lamdang mahmah hi. Tu in athak diktan theihna pen, “Pasian’ sunga dikkisak theihna” ki ci  hi. Tua pen, Pasian kiang pana ahong pai, Pasian in a hong geel sak, Pasian’ a santheih om sun amaan dikkisak theihna ahi hi. 

Tua mahmah zong leitungah mihing bangin a hong pian laitak in, Topa Zeisu in a nuntakna sungah ahong lahkhiat dikkisak theihna, upna tawh a sang mi khempeuh tunga kipia dikkisak theihna, a kilawm kituak man uh hi lo in, a kisapna uh tawh kizui in a maute a dingin Topa in a vaihawm sak dikkisak theihna ahi hi. 

“Dikkisak theihna i cih pen thukham zui dingin thuman na ahi hi. Thukham in dikna ngen a hih man in, mawhnei mi khatin thukham tungah leibat a nei kisuak hi. A hi zongin amah in tua leibat te a loh zo kei hi. Tua ahih manin tua leibat panin dikkisak theihna a ngah na dingin a om thei sun pen in, upmuanna tungtawn bek pan mah ahi hi. Upmuanna bek mah kalsuan na hangin Khirs hoihna in, ama’ adingin Pasian kiang atun’sak thei bek hi. Tua dinmun pan in Pa Pasian in Ama’ Tapa thumanna pen mimawhte dinmun ah hong guansak hi. Tua a kipan in, mihing te’ tangtun lohna mun ah Khris Zeisu dikna in hong tuamta ahih man in, kisikna tawh a zuan thu-um mi khat Pasian in hong pomkik in, maisak in diksakna pia a, a midik takpi bangin hong sang kik banah, a Tapa a it mah bangin tua mimawhpa zong a it hi”. - Ellen G. White: Selected Messages, Book 1, p. 367. Hih a lamdang thuman thutak pen, nang a dingin bang ci bangin kisin thei ding na hi hiam? (Rom. 3: 22 simkawm in). 

Hihmuna, Zeisu Khris Upmuanma i cih in, Zeisu Khris sungah Upmuanna i neihna a hih zia kitel thei hi. Hih upna’ Christian nuntakna sungah a hong kidawk ciangin, Upmuanna kalsuan zia in lungtang pilna khengval in nasem a, Topa Zeisu’ a nuntakna leh a sihna thu laigil te a thu in theih mawkmawkna hong hi nawn lo hi. Tua sangin, Zeisung sungah upmuanna a hong neihna tungtawn pan in, Zeisu pen Honpa Gumpa in hong sang thei ta a, Aiawh pa leh, ama’ To dingin hong pom thei ta hi. Tua dinmun in Ama (Zeisu) neih nuntak tawntungna lampi a teelna hong hi ta hi. A Topa hong muang mahmah ahih manin, Topa Thukham khempeuh tawh kizui in a nuntak theihna dingin Upmuanna tawh a hong hanciam

ta ahi hi. 

NITHUM NI (TUESDAY) October 24
AMA’ HEHPIHNA TAWH

Eite in i sin khit a hi, thukham thu tawh kisai a hi zongin, thukham in ahih theihloh thu tawh a hi zongin lungsim sungah ngaihsun kawm in, Rom. 3: 24 sim in. Hih Laisiangtho munah Paul in bang thu gen ahi hiam? To Zeisu’ sungah tatkhiatna om a cihna in bang a khiatna nei hiam?

_____________________________________________________________________________________________________

Hih laisiangtho mun sungah “diktansak theihna” tawh kisai bang ci bangin kimu thei hiam? Greek kammal “dikaioo”cih a khiatna in, “dikna ngah” cih leh, “a dik dingin bawl”, “a dik hi ci in pulaakna”, “a dik banga ngaihsutna” cih bangin in ki phen hi. Hih kammal mah tawh a kibang “dikaiosune” cih tawh a bullakna kibanga, “dikkisakna”, cih leh “dikaioma” cih kammal in “midik suahtheihna” cih bangin kiphen hi.

Tua ahih manin, “Justification” (diktansak theihna) cih leh, “Righteousness” (dikkisak theihna) cih kammal nih te in kizopna a nei uh hi. Khat veivei ciangin a khiatna atuam in zong ki khia tuan lo hi. Tua a hih manin, Pasian in “diksakna hong pulaak khia” ahih manin diktanna angah kihi pah hi. Tua ahih manin, Diktan sakna i ngah ma in, mihing khatin diksakna ngah lo ahih manin Pasian mai ah pom theih ding’ dinmun ki hi lo hi. A hi zongin, diktansakna angah khit ciangin,dik kisakna ngah ci in ki ngaihsun ta ahih manin, Pasian mai ah pom theih hong hi ta hi. 

Hih khempeuh te in, Pasian’ hong hehpihna hang bekbek ahi hi. Hehpihna i cih ciangin deihsak(tuam)na hi pah hi. Mimawh khat in Gupkhiatna a ngah theihna dingin Pasian kiangah a hong zuat ciangin, tua nu/tua pa in midik hi ci in a kiciapteh theihna (ahih kei leh) a hong pulaak khia sak pen, “hehpihna” nasep ahi hi. Tua in kilawm lo pipi mah tawh ki deihsakna hi a, tua mimawh in ama’ gamtat hoihna te hang hi lo in, Pasian maipha ngah theihna dingin amah leh a mah ah, lam-et na bangmah a ki neihloh ziak mah hang ahi hi. Tua ahih manin, mikhat in Zeisu sungah tatkhiatna angah theihna dingin, ama mawhna khempeuh aitangin aiawh a ading Zeisu hang’ bek mah tawh, diktantheihna a ngah thei bek ahi hi.

Diktansakna tawh kisai in Rom laikhak sungah a tuam vilvel a sepna khat in ki ciamteh a tua in, thakhat thu in a hong piang khawmvat danin gen hi. Nidang lai in amawh mikhat in, a pua lam mi hi a, a diklo mi ahih ban ah pom theih ding hi vet lo hi. A hi zongin thakhat in a

mah in, a sunga om Pa hangin, a sunglam mi suakin, diktansakna ngah thei a, a midik dingin pom theih ding a hong suak thei pah hi.

Zeisu sungah a om mikhat in, amah leh amah Zeisu sungah a ki pum-aap khit ciangin, a beisa thupiang khin bangin diktansakna hong ngah thei hi. Rom. 5: 1 sunga “diktanna ah” cih a khiatna in “diktansak in om khin hi” cihna hong hi pah hi. 

Ataktak in, dikna angah khin mimawh khatin, lampial in a pukkhak hangin Khris Zeisu kiangah a hong zuatkik nak leh, diktansakna ngah veve lai ding hi. A  zenzen in, nisim in a nuntakna sungahkikhelna aneih kikkik khak leh zong, diktansakna ngah kikkik theihna dingin hunpha om to to hi, cihna zong hi pah hi. 

Lungdamna thupuak ahi Gupkhiatna in, a hoih mahmah hi na pi in, bang hangin mite in tua Gupkhiatna a sang dingin bangin khaktan thei zel hiam? Topa in nang tungah kamciamna tawh hong piaksawm thu te tungtawn ah bangin nang hong khaktan lai hiam? 

NILI NI (WEDNESDAY) October 25
KHRIS’ DIKNA

Rom. 3: 25 sungah Paul in, Gupkhiatna tawh kisai lungdamna thupuak a zaizaw khat in hong gen hi. Amah in, “propitiation”(thoihdamna/lungkim sakna) cih kammal hong zang hi. Greek laimal in “hilasterion” hi a, a khiatna in Heb. 9:5 sungah “hehpihna-tokhom” ci in kiphen hi. Tua ahih manin, Rom. 3: 25 sunga a hong gennop thu in, Khris hong tatkhiatna hangin diktansakna i ngah theihna in, Laisiangtho Lui sunga Biakbuk nasepna ah a kizang “hehpihna tokhom pan in thoihdamna” tungtawn pan in, mimawh te tungah Paisian in a hong lungduaina tawh thu leh vai khempeuh vaisiangtak in a hong sepkhiatna thu kimu khia thei hi. Tua bek tham lo in, a ma luangkham hong kipiak khiatna hangin, Zeisu in Gupkhiat theihna lampi hong lak bek tham lo in, Amah mah in a hong kithoihdam na hangin Pasian lungkimna kingah ahih zia ahong lahkhiatna zong ahi hi. A tom in gen ding ci leng’, eite a hong gukhiat theihna dingin a ki tangsam khempeuh Pasian in a hong vaihawm sak hi, cih ding hi mai hi.

Hih a tunga Laisiangtho mun sungah “remission of sins” (mawhna kimaisak theihna)cih thu  zong hong gen hi. Pasian in a hong san’ theihloh na a hang khat in, i mawhna te hang ahi hi. Eite in i mawhna te a phialsiang dingin hihtheih bangmah i nei kei hi. Ahi zongin tatkhiat theihna lampi ngiimna ah, Khris Zeisu’ sisan’ sungah upmuanna i neihna tungtawn panin, imawhna khempeuh kimaisak theihna lampi Pasian in a hong vaihawm sak khin zo ahih zia kimu thei hi. 

Hih mawhmaisak theihna(remission) cih kammal Greek laimal in “paresis” cihna hi a, a khiatna in, “kheng val” a hih kei leh “kantan/ki theihmawh bawl” cih bangin in kiphen thei hi. “Kantan” i cih ciangin mawhna kitheihmawh bawl cihna zong hipah hi. Pasian in a beisa hun lai a i mawhna te ki theihmawh bawl thei hi. bang hang hiam cih leh, Zeisu in ahong sihna hang tawh mikhempeuh’ mawhna thaman a hong lohsak na hang’ ahi hi. Tua ahih manin, “Zeisi Khris’sisan a um”akua mapeuh in, a mawhna te kimaisak/ki theihmawh bawl theihna a ngah ta uh hi. A hangin amah a dingin Khris in sihna a thuak zo hi (1 Cor. 15: 3).

Rom. 3: 26, 27 sim in. Paul in a thupi mahmah bang thu gen hiam?

_____________________________________________________

A za nuam khempeuhte tungah Paul in a hong gennop lungdamna thupuak in, “Pasian dikna” mi khempeuh in kingah thei cih thu hi a, gamtatna tungtawn pan in ahi zongin, thupha bawlna tawh a hi zongin a kingah thei ahi kei hi. Satan in Pasian tungah Ama piaktheih sangin mihing te tungah ngen/phuu hi, ci in mawhsak ngei hi. Tua mawhsakna khempeuh Singlamteh in a manloh zia kalkhia/pholak khia hi. 

Mawhna hangin apuuk hih leitung Pasian in a susia dingin Satan in lam-en kha hi. A hi zongin a Tapa tungtawn pan in honkhia zaw hi. Tua thu hangin Pasian zia leh tong in a bang ci bang hiam cih hong gensak thei hiam? Pasian zia leh tong theihna tawh eite in i nuntakna ah bang ci bangin huzapna neisak ding ihi hiam? Pasian in a bangci bang Pasian hiam cih i theihkhit ciangin, a hong tung ding nai 24 sungin ki lamdanna nei thei ding nahi hiam?

NINGANI (THURSDAY) October 26
THUKHAM ZUIHNA HANG’ A HILO

“Bang hang hiam cih leh mi khatpeuh Pasian tawh a kipawl theihna pen Thukham zuihzawhna hang hiloin upna hang hi, ci-in i genzo hi” (Rom. 3: 28). Hih Laisiangtho mun tungtawn pan in, Thukham in eite hong gumkhia zo lo ahih manin, thukham zuih/man dingin kul nawnlo hi a cih na ahi thei ding hiam? Ki hilhcian un.

____________________________________________________________________________________

Hih laikhak a gelhna tawh kizui in, a tangthu pianzia anung amai i etkaak tak ciangin, Rom. 3: 28 sunga thukham thu tawh kisai Paul in a genna ah, Jew mite ngeina/biakna tawh kisai, a huamkim in genkhia a hihna kimu thei hi. Jew mikhat in, tua thukham thute tawh kisai lungsim theihtawp in hanciamna tawh citak mahmah in a zuih theih hangin, amah in Zeisu pen Messiah dingin a san theih tuan kei leh, amah in diktan sakna a ngah thei tuan kei ding hi.

Rom. 3: 28 sungah, Paul in a gentheih zel ahi, Upna sungah ki hihsak /kiphatsak theihna om lo hi’ a cihna thu a tawpkhak kuppihna zong ahi hi. Ama gamtatna te suangin mikhat in diktanna ngah thei ding ahih leh, amah in tua gamtatna kisakpih thei mah ding hi. A hi zongin ama upna in Zeisu sung bek ah kinga ahih leh, tua mimawh tungah diktanna a pia Pasian bekmah hi dinga, Pasian tung bekah kipaakna/ pahtawina a om ding bek ahih kul hi.

“Upna hang tawh diktan sakna kingah theihna thu” dotna tawh kisai, Kamtainu Ellen G. White in lawphuai takin hong gelhkhia hi. “Tua thu in Pasian nasep hi a, Leivui pan in Ama’ vangliatna tawh mite lamto a, tua vangliatna ama sungah om lo ahih manin, Pasian’ sepsak ngiat ahi hi.- Ellen G. White: Gospel Workers, p. 456.

Thukham banga gamtat na in, a beisa hun a mawhna te gumkhia thei lo hi. Diktansakna zong thukham zuihna tawh a ki thalawh theih hi lo hi. Zeisu Khris in a hong kipiakna leh sihna tungtawn in, Up theihna bek tawh a kingah ahi hi. Tua ahih manin, thukham zuihna tawh kuamah in diktansakna ngah thei lo ahih zia hih lai mun pan in kilang hi. Gamtatna tawh diksakna kingah lo cih a khiatna in, diktansakna ngah theihna dingin eite sunga gamtatna limlim tawh bang ci bang mahin, ki lungkim sak zo lo hi cih kilang hi. 

A hi zongin Christian tampi tak te in, hih Laisiangtho mun tawh kisai in, a khiatna nasia takin telkhial in, a deihna bulh khial uh hi. A maute in, thukham tawh kisai in, zuih dingin ahi zongin, man dingin ahi zongin nawlkhin uh a, septheih a om sunsun pen up ding bek ahi hi ci uh hi. Tua bang a cih man un, amau te in Paul deihna pan in, a khiatna la khial uh hi. Rom laikhak sung hi ta leh, mundang tuamtuam te ah, Paul in Thukham zuihna tawh kisai in a thupitna mun tampi ah gen hi. Topa Zeisu ahi zongin, Jame te leh John te in zong pulaak uh hi (Mat. 19: 17; Rom. 2: 12; James 2: 10, 11; Rev. 14: 12). Paul in a cihnop thu in, Thukham zuihna tawh diktansakna a kingah theihloh hangin, Upna tungtawn in diktansakna angah mikhat in Pasian Thukham zui ding a hihna thu leh, a taktak in zong Thukham a zui te bek mahin diktansakna ngahte ahih na uh hong gennuam ahi hi. Diktansakna angah lo, a kikhello mi khatin Thukham kalhna tawh kisai in a ngetna thu, cikmah hun in tangtun zo ngeilo ding hi.

Thukham in eite hong honkhia zolo a hih manin, Thukham khawng zuih dingin kisam lo hi, eite in lungkham kullo hi cih ngaihsutna thang’ sungah a awk dingin bang hangin baih mahmah mawk hiam? Upna hang tawh dikna kingah khin zo ahih manin, mawhna abawl dingin paulap na zong ngei hiam? Tua bang dinmun in bangzah takin lauhuai hiam? Tua bang kek mah in, mawhna i bawlkhak laitak in, Gupkhiatna tawh kisai kamciamna a om lo bang hi leh, bang ci bang dinmun i tung tam? 

KIGINNI (FRIDAY) October 27

SINBEH DING: “Thukham in mawhna thaman hong lohsak zawhloh hangin, Ama hehpihna hangin amawhna te uh a kisik, Amah a um mawhnei mi khempeuh tungah Khris in a maisak kiuhkeuh dingin kamciamna a hong pia hi. Pasian’ itna in a kisiik, Amah a um mite a dingin a kicingin om hi. Mihingte tungah a om den mawhna ciaptehna pen, Pa Pasian tawh a kiza kim ahi Ama’ (Zeisu) hong sihna sisan bekin phiatmai thei bek hi. Zeisu’ hong sepsak ahi, a ki niamkhiatna, a hong sihna leh a gammang mite a dingin palai hong sepna te in, thukham thupitna liansak a, zahtak kaisak mahmah hi. - Ellen G. White: Selected Message, book 1, p. 371.

Nangma’ zia leh tong taangin Khris’ zia leh tong hong kikhaam ahih manin, mawhna a bawl ngei hetlo bangin Pasian’ mai-ah nang hong kisaang ding hi. -Ellen G. White: Step to Christ, p. 62. 

“Sawltak pa (Paul) genna ah, eite in thukham zuihna hang’ hi lo in diktansakna i ngah a cih ciangin, amah in Upmuanna thu leh Hehpihna thu tawh kisai in a sepna uh agen nuam ahi kei hi. Bang hang hiam cih leh, tua bangin sepna khat peuhpeuh tawh diktansakna kingah thei ahih zia a um kei hi. Tua upna thu tawh kisai in a gamta khat in, tua upna tawh diktansakna a zong hi ding hi. Thukham zuihna tawh kisai in Paul in agenna ah, tua a zuih uh thukham hangun amau leh amau diktansakna a ngah bangin a ki ngaihsut tawmna uh agen nuam ahi hi. Kammal dangin gen le’ng, gamtat hoih a gamtat lai takun, amaute in diktansakna zonglo uh a, amau ii sepkhiat gamtatna tungtawn pan in diktansakna a ngah khin bangin kipaak/ kisialh nopna lungsim anei uh hi, a ci nuam ahi hi.” - Martin Luther: Commentary on Romans, p. 80.

KIKUP DINGTE:

1. A tunga Martin Luther kammal te ngaihsun kik in. Hih bangin a gen theihna dingin bangin huzapna nei sak hiam? Tu khanghun nangawn a dingin bangzah tak in leh, bang hangin thupi suah thei lai hiam?

2. SDA te in, Pawlpi puahphatna hangin Laisiangtho thugui pi ahi, Hehpihna hangin Upna tawh Dikkisak theihna ngah theihna cih tawh kisai Upna a luahsuk te ihi hi. Tua thu tawh kisai in eite in, bang ciangciang bang sangsiam ihi hiam?