A Khua Vuah Adventistte A Saan Daan

August 26                                                                                                 India Gam Saklam leh Nisuahnalam

“A Khua Vuah Adventistte A Saan Daan”

Agen:Amunang Gonmei, 77

            Nung Sabbath ni-in, India gam saklam leh nisuahnalam ah khuaneuno khat in Seventh-day Adventist innkuan 6 te a khua panun paikhiasak teeiteei na thu ih za khin hi.  Khuamite in thah sawm uh a, Adventist biakinn zong suksiatsak gawp uh hi. Adventistte Palikte sam in man sak lailai uh hi. Thong sung pan Adventist paapii thumte a suahtaak kit uh ciangin, khuasung thuneite in Adventistte a nawngkaaisak nawnloh nadingin khaumite tungah thu pia hi. Hihten baanah a piang thute ngai zom ni. 

            Adventist paapii thumte a kimat zawh tawlkhat sung khuamite tawh kitelkhialhna om toto laai hi. Khuasung mi a zahtaakhuai tham khat Adventist pawlpi sungah hong luutna hangin Adventist pawlpi ki tawisaang hi. Tua a zahtaakhuai pa Adventist pawlpi ah tui kiphuum leh a dang khuasungmi kheempeuh Adventist pawlpi sung a luut khaak dinguh a dang khuasungmite patau simsim uh hi.  Adventist pawlpi a khantoh ding haza uh ahih manin, Adventistte in mitphial siamna zang uh hi cih tawh a mawh nadinguh zong leuleu uh hi.

            Khangno tampitakte tua Adventist hong suak thak pa innkhum ah kahto uh hi. Amaute awng lualua in, Adventist pawlpi leh a upna uh zahpih gawp uh hi.  Tua inn leh a gei aa buhsaal suzan dikdek uh hi. Tuabek hi loin, tua pa’ buh lo ah a buh kheempeuh laaksak in a paiteng in hawm in a inn vuah ciahpih uh hi.

Sihna in Tua Khuata Tuamcip

            Thu lamdang mahmah khat hong piang hi. Adventist hong suakthak pa lo ah simmawhna tawh a kuante pawlkhat a baanbaan in hong si uh hi. Khat pa pen, khual a zinna ah a naak pan sii luangin inn lam zuan in a ciahna lamkaal ah si hiaumawk hi. 

            Pawlpi khat ah upaneu (deacon) a sem Amunang in a piang thulamdang a genna ah, “Adventist pawlpi leh a suak thak pa ko gawp in a inn a susia khempeuh hun tomno sungin a vekpi un sikhin uh hi,” ci hi.

Gaalkaapte Thupiak

            A piang ngei nailo thulamdang khat tua kum sungin hong piang leuleu hi. Gaalkaapte in a van uh khuamite in a puakpih nadingin khua makaite tungah thu pia uh hi.  Tu tungin, gaalkaapte in Sabbath ni (Saturday) ni-in a van uh a puakpih dingin thu pia hi.

            Adventist pawlpimite’n zong thakhat thuin khuasung hausate tungah Sanini (Saturday) pen Lai Siangtho sungah a kigelh Sabbath ni ahih manin van pua theilo ding ahihna uh telgen hi. Khuasung hausate’n bel hehpih vetlo uh hi. Tua tengleh, bangmah genkholhna om lo pi-in galkapte in nasepni Saturday pen Sunday ni ah kisotto hi cih thu taangko khia uh hi.

            Van puak ni ding a kilaih pen khuamite in lamdangsa lua uh hi. Khuami tampi mah hong kiho litlit ta uh a, “Pasian in Adventistte thungetna dawng hikha ding hi,” kici ta uh hi.  Sunday ni vanpuakna ah tuahsia uh hi. Khuamite in gaalkaapte van pua in lei tungah a pai laitakun lei kicim a, mi tampi takmah liam uh hi. Ahih hangin Adventistte khat zong liam lo uh hi.

            Adventistte vai khuamite kikum leuleu uh hi. "Adventistte a Sabbath ni uh a palsat nadingin ih hanciam hangin Sunday ni mahin na hong seemthei veve mawk uh e hong ci ta uh hi. Tua thuthang pen gam sungkhempeuh ah hong kizeel a, kuamah in  Adventistte buai sak nawnlo uh hi.

            Pawlpi makaite in, “Pasian a um lo te tungah gentheihna leh sihna tung a, Pasian a umte pen Pasian in keem in thupha pia hi,” ci-in  lungdam takin gen uh hi.

A Khangto Pawlpi

            Tuni in mimal 1,500 a teenna khua ah mimal 100 lakah 30 te pen Adventist pawlpimi ahi hi. Pawlpi upa khat in, “Pasian a um a muang tinten te pen Pasian in thupha pia taktak hi,” ci hi.  “Pawlpi in min hoih ngah ta a, khuamite in zong hong zahtaak a hihna zong gen hi. “Topan hong piak lungnopna tungtawnin veeng leh paamte tungah thumaan ki tangko thei ta ding in ka lamen hi,” ci-in lawptakin gen beh hi.

            Nagaland Adventist Saang leh khuapi sung kikaal pen nai nih sung bang mawtaw tawh kipai hi. Tu kuata Sabbath sawm leh thumna sumpi pawlkhat pen Adventist saang ah numei bawdaa lam nadingin ki zang ding hi. Tua hi leh a gamla khuaneute panin sangnaupangte in Adventist sang ah hong kah thei ding uh a, Pasian it in Ama’ thupiak sawmte a zuite tungah Pasian’ sawlna in a mangte Pasian in thupha pia hi.

@@@@@@@@@@@@@%%%%%%%%%@@@@@@@@@@@@