MCS Vol 01, Issue 04: SIATNA HONG KIPATNA

MCS Thupuak Vol 01, Issue 04:SINNA 04 - SIATNA HONG KIPATNA

---

“TOPA hoih hi, ciam unla mu dih un; amah beel mi thupha ngah ahi hi” (Late 34:8)

Thupatna: Pasian in leitung a piansak lai-in ahoih kim dingin bawl hi. Ganhingte khempeuh zong khat-le-khat kilem diamdiam uh hi. Singkungte, paakte le gah-le-teh kung khempeuh zong hoihkim sisek hi. Mihing zong dikin, leitung buppi a uk in om hi. Ahi zongin tu-in i leitung tua bang hi nawn lo hi. Paakte pulhin si uh hi. Lopa le ling-kungte in mihing' nuntakna haksa sak hi. Ganhing le ganhing, ganhing le mihing kido uh hi. Mihing le mihing zong kido-in, kithat uh hi. Bang aci himawk hiam? Na khem-peuh ahoih a piang kimlai siatna hong koici kipat hiam?

1. Kua in siatna hong pan khia hiam? John 8:44

Theih ding: Zuau theite' pa ahih zah khatin siatna khempeuh apan khiapa in dawimangpa ahi hi. Thutak pan a lampialna tawh siat-na hong kipan hi. 1 John 3:8

2. Dawimangpa in mindang bang nei lai hiam? Mangmuhna 12:9

Theih ding: Dawimangpa pen "Satan" kilimcih pen hi. "Satan" a khiatna in "galpa" cihna ahi hi. Satan in Pasian' galpa ahi hi. Dawimangpa in mihing akhem lai-in gulpi va kineih ahih manin, "tanglai gulpi" zong kici hi.

3. Mawhna a neisa-a Satan a kipiangsak ahi hiam? Eze-kiel 28:15

Theih ding: Satan pen Pasian' kamtai (vangtungmi) khat hi ngei hi. Hebrew kamin "helel", Greek kamin "heosphor", Latin kamin "lucifer" kici hi.

4. Bang in Satan tual-kiasak hiam? Ezekiel 28:17

Theih ding: Lucifer in hoihkim taka amah a piangsakpa Pasian pahtawi lo-in, a hoihnateng kiphatsakna-in hong nei zawsop hi.

5. Lucifer' langpanna in amah bang ciang tun hiam? Isaiah 14:12-14

Theih ding: Pasian sanga alian zaw phialin lucifer kingaihsun hi. Tua bangin amah Pasian' gal, le ahoih amaan khempeuhte' gal hong suakin, "Satan" min hong pua ta hi.

6. Satan tawh kipawl a Pasian a do khawm vantung mite bang kicih hiam? Mangmuhna 12:7-9

Theih ding: Pasian in Satan susia nuam leh susia pah thei hi. Ahi zongin vantung mi kimkhatte in Satan bangzah a sia cih tel nailo uh ahih manin, Pasian hong kihta ding uh hi. Pasian in van panin Satan hawl khia-a, ama siatna a kimuh kim ding dong khahkhong phot hi.

7. Eden huan a duhduh nek theih singgahte' lakah Pasian in a khaam pen bang hiam? Piancilna 2:16,17

Theih ding: Hih pen Piangsakpa tungah mihing thu-maan maw, thumaan lo cih ze-etna ding ahi hi. Ama thaman ding deihdeih teel theihna Pasian in mihing pia hi. Amah a

Bawlpa' thu mang ding maw mang lo ding, a utut teel thei hi. Ama teelna tawh kizui-in amah pai ding hi. Nungta ding maw, si ding cih pen ama thuman leh thuman loh tawh hong kisai hi.

8. Gulpi meel pua-in Satan in Eve kiangah bang zuau-thu va gen hiam? Piancialna 3:1-5

Theih ding: Tua singgah tawh kisai-in Satan in Pasian' cihna tawh kilehbulhin thu gen hi. Zuau thu tawh kikhem ding bekbek Satan hanciam hi.

9. Adam le Eve in Pasian' thu a man lon dan koi bang hiam? Piancilna 3:6

Theih ding: Hih thu thuneu i sa kha ding hi. Ahi zong-in thu man lohna khat peuhpeuh pen Pasian langdona hi pah lian hi.

10. Leitung koi bangin kihamsiat hiam? Piancilna 3:17, 18

Theih ding: Mawhna hong lut ciangin pakte hong pulh ta hi. Singtehte zong hong pulh hi. Lo khawh tawh nuntak hong kul ta-a, ling le kiakte in gim pia sawnsawn hi. A nuntakna dingin singgah lo-a neek ziau hong hi nawn lo-in khua-ul kai-in na a sep hong kul hi.

11. Mihing' a ding athuak-hakpen hamsiatna bang hi-am? Piancilna 3:19

Theih ding: Thu man loh ding lam a teel manin tawn-tung nuntakna silpiak taan hi.

12. Pasian in Adam le Eve koici hilh lai hiam? Pi-ancilna 3:23, 24

Thukhupna: Pasian in na khempeuh piangsak ahih hangin, siatna hong pianna pen Ama hang hi lo hi. Pasian in mi hoih bek bawl hi. Kiphatsakna le kihazatna khaici panin mi khat in a deihtel theihna azat khialh manin, Pasian langdona hong piang hi. Tua huna kipanin Satan pen Pasi-an' gal hong suak a, Pasian a do dingin ahih theih zahin mi atam theithei zol hi. Pasian in Satan susia pah thei ahih hangin, lausakna le zawhthawh bawlna lam tawh hi lo-in, itna le lungduaina lam tawh Pasian in Ama dinmun alah khiat kul hi.

CIDAMNA THU

Kal Natna i Lauhuaina le Pelh Theih Nading Lampite:

1. Dailenbuk pai zekailuatna pelh ding: Na zun suak pipi, sauvei pi na ipna pen hoih het lo hi. Zunbu dim keikaina in zunbu susia hi. Zunbu sung zun sawt om lua leh lungnote manlang takin pung hi. Zunte kal sungah lut kik leh kal sukha in, nephritis le uremia natnate piang thei hi.

2. Ci Tam Nek Luatna: Ni khat in ci 5.8 grams sanga-tam zaw ne loding hi.

3. Sa Tam Nek Luatna: Na an sungah protein (sa-dat) tam lua leh na kal ading lauhuai hi. Protein (sa-dat) an gawina ah tam a kihel luat ciang ammonia piangsak a, na kal nakpi in susia hi. Sa tam na nek semsem leh na kal nak siat semsem ding hi.

4. Coffee Tam Dawn Luatna: Coffee pen soda le gas kihel dawntheih tuamtuamte sungah kitam hel mahmah hi. Coffee in sikhang sak in kal sukha mahmah hi. Tua ahih man in nisim na dawn coke, Pepsi, Red Bull, Monster, etc...te khiam in.

5. Tui Dawn Lohna: Ih kal hoih takin na asep theih nadingin tui hoihtak a ngah kul hi. Tui kicing takin na dawn kei leh na si sungah gute hong kikhol in, kal tawn a nawtkhiat nading tui kicing lo ding hi. Nisim in tui maanhai 10 sang atam zaw dawn den ding hi. Tui tam dawn maw /dawn lo i theih nading ih zun mel en lehang ki thei baih hi. Tui tampi dawn lehang ih zun siang a, tua bangte ahoih ahi hi.

6. Kibawl Hak Luatna: Dam lohna naneih ciangin ahun lap in hoihtak kibawl in. Ahun hunin cidamna ki en sak zelzel ding hoih hi.

Hih anuai a zatuite kal natna tawh kihua mahmah ahih manin pelh in: D-Cold, Vicks Action-500, Actified, Coldarin, Cosome, Nice, Nimulid, Cetrizet-D. Hih zatuite sungah Phenyl Propanol-Amide PPA kihel ahih man ahi hi.

Tulai Zomite sungah kal natna athuak kitam hi. Ki kepzia ding i theih loh man, i siam loh man, thei napi in i zuih loh manin i thuak loh dingpi kithuak kha hi. Mipilte’n “I annekte mah in ei hong that hi" ci-in gen uh hi. Tua ahih manin kidop huaite kidop tangtang ding thupi mahmah hi. (Zop Lai Ding) ✍ Sianu Aye Cing

TATE KHANSUAH SIAMNA 

TIME OUT: Naupang neute a gamtatzia ih khel theih nading ahoih khat om hi. Mikangpau in “Time Out” kici hi. Amau sep ding na deihloh khat peuh hong sep ciangin, tua mun panin adang mun muanhuai khat ah amau kia tawlkhat omsakna ahi hi. Gtn in: Tengta kineihna ah naupang khat in alawm dang khat asat leh, tua mun pan amah hemkha in innkiu khat a tutphah tungah amah kia tusak ding hi. Ahun pen amau kum tawh kizui in ciangtan ding hi. (kum1,2,3, minute1,2, 3. etc). 

RESTITUTION: Naupangte agamtatsa tawh kizui in sum (ahk) hun aval a na sepsakna tawh lohkik sak ding hi. Gtn in: naupang khat na gu in a kimat leh, tua agukna pa tungah alak teng loh kik sak ding (ahk) nasep tha tawh lohsak ding hi. Naupangneute a kimawlna vuah, a kisukkhak vua leh, “sorry” ci-in kithum sak kik tangtang ding hi. Source: Parenting Presentation (Zop Lai Ding)

Volume 01 Issue 04 by DavidLian on Scribd