ZSS Lesson 4: UPNA BEKTAWH DIKTANNA NGAH

LESSON 4: UPNA BEK TAWH DIKTANNA NGAH                            July 15 – 21

NIPI NI (SABBATH) NITAK LAM July 15

SIMDING TE: Gal. 2: 15 – 21; Eph. 2: 12; Filip. 3:9; Rom. 3: 10 – 20; Pian. 15:5, 6; Rom. 3: 8.

KAMNGAH: Tua ahih manin tuhuna ka nuntakna zia pen kei hang hi nawnloin ka sungah a hong om Khris hang ahi hi. Tua hi a, keimah hong itin, keima-a’ dingin a nuntakna a hong pia Pasian’ Tapa ka muan’na tawh tu laitakin a nungta ka hi hi (Gal. 2: 20)

Nung kaal sunga I sinna sungah, a upna leh a gamtatna a kihual lohna tungtawn panin, Antioch khua ah, Paul in Peter maitang sik kawmin taai giap hi. Gentile te tawh an a neek khop nawn loh manin, Peter in, amau te dinmun sang Christian pan in a za a khiamsuk tawh kibang sak hi. A hi zongin Peter gamtat zia in, a mau te in, Pasian innkuan sung kihel theih na ding uh leh, kipawl khopna hanga ngah ding thupha te tawh a nopsak theihna dingin, Vun-atna kisam masa hi cih a lakkhia tawh kibang sak kik hi.

Tua buaina hangin Paul in Peter tungah bang thu gen hiam? Tu kaal lesson sungah tua buaina hangin bang thu hong piang hiam cih kikum to ni. Tua laigual te in Laisiangtho Thak sungah kammal tomcing athupi mahmah kammal te a hi hi. Bang hang hiam cih leh, Tua kammal zat te in, Lungdamna Thubu te sung te leh Galati sunga Paul laikhak dangte a hong telsiam sak ding kammal bulpi te a hi hi. Tua kammal te sungah, Diktan sakna (Justification), Dik kisakna (Righteousness), Thukham zuihna( works of Law), Upna (Beliefs), Upna bek ahi lo, Zeisu Upna cih te kihel hi.

Hih kammal te tungtawn pan in, Paul in bang deihna nei sak hiam? Hih kammal te in Gupkhiatna Vaihawm na thu bang ci bangin hong hilh hiam?

 

NIMASA NI (SUNDAY) July 16

“DIKTAN SAKNA” TUNGTANG DOTNA

Gal. 2: 5 sung sim in. Paul in,”kote pen ka pian’ ka patun Jew mi ka hi uh a, “Mawhnei Gentile mi,” ka hi kei uh hi ci hi. Hih kammal tungtawn in bang thu a pulaak nuam hi ding hiam?

______________________________________________________________________________

Paul kammal te I tel theihna dingin, a thu pianna bulpi I theih kul ding hi. Ama mipih Jew te Christian sungah a kaih theih na dingin, Paul in amau te thukim ahi Jew te leh Gentile te kikaal a kilam danna te tawh bul pat phot hi. Jew mite ahih leh, Pasian teeltuam minam te  hi uh a, zuih ding Thukham a ki aap minam, Thuciam na sungah Pasian tawh kizop hanga  hamphatna a ngahte a hi uh hi. A hi zongin, Gentile mi te ahih leh, mimawh te a hih mah un, Pasian Thukham in amau te sawhkha thei lo uh a, Thuciamna huang pua lama a om, kiciam na angah kha lo mite ahi uh hi (Eph. 2: 12; Rom. 2: 14). Tua Gentile te in, “mawhnei te” taktak a hih laitak mahun, Jew Christian te zong kha lam dinmun ah, Pasian adingin santham cing tuan lo a hi zia Paul in Gal. 2: 17 ah gen hi. Bang hang hiam cih leh, “Thukham zuihna” tawh Kuamah in Diktan sakna ngah thei lo uh hi.

Gal. 2: 16, 17 sungah, Paul in diktan sakna (Justified) cih kammal 4 vei bang hel hi. Tua “diktan sakna in bang hi mawk hiam? Pai. 23: 7 leh Thuhilhkikna 25: 1 sim kawm in.

______________________________________________________________________________

Diktan sakna cih laimal pen, Paul in a zat mahmah kammal ahi hi. Hih kammal Laisiangtho Thak sungah 39 vei kimu thei a, Paul laikhak te sungah 27 vei kihel hi. Galati bu sungah 8 vei kidawk a, Gal. 2: 16, 17 sung bekbek ah 4 vei kihel hi. Diktan sakna cih kammal pen, Thukhen na tawh kisai kammal a hih manin, Thukhen zum ah aki zang hi. Hih kammal in Thukhen pa in, zumkong atung tua pa/nu in, mawhna nei lo hi ci in, a khensat kammal zat  hi hi. Mawhsakna tawh a ki lehbulh kammal zong ahi hi. Tua ban ah, diktan sakna leh dik kisakna cih kammal te in, Greek laimal khat tung tawn pan-in hong piang khia kammal hi a, mi khat tungah “a thumaan hi-sakna” leh diksak na tawh suaktak sakna ahi hi. Tua ahih manin, “Diktan sakna”I cih ciangin a mawhna maisak cih ciang bek hi lo in, a thuhoih tawh diktan sakna pia cihna ahi hi.

Tua mah bangin, Jew thu-ummi khat a dingin, Diktan sakna pen, ki maingap na tawh kizopna lim ahi hi. Tua in, Pa Pasian leh ama Thuciamna sungah ami te kikaal ah kizop na  nei sak hi. Diktan sakna ngah I cih ciangin, Abraham innkuan sunga citak mipawl te tungah Pasian Thuciamna tawh kisai in ciapteh ngahte cih a khiatna zong ahi hi.

Gal. 2: 15 – 17 sim in. Paul in nang tungah bang a gen nuam hi ding hiam? Na Christian nuntakna sungah hih kammal te koi ci bangin zang thei ding na hi hiam?

NINIH NI (MONDAY) July 17

THUKHAM ZUIHNA

Gal. 2: 16 sungah Paul in, thum vei vilvel “Thukham zuihna” hang tawh kuamah in diktan sakna ngah lo hi cih pulaak hi. “Thukham zuihna” I cih in bang dan a gennuam hi ding hiam? Tua akhiatna I theih na dingin, hih anuai a Laisiangtho mun te in hong bang ci huh hiam? (Gal. 2: 16, 17; 3:2, 5, 10; Rom. 3: 20, 28).

______________________________________________________________________________

“Thukham zuihna” cih kammal I tel theih na dingin, Paul in “Thukham” a cih in bang hiam cih I telphot kul ding hi. Thukham cih kammal pen, Greek in nomos hi a, Paul laigelh te sungah 121 vei bang kimu thei hi. Tua te sungah, a mite tungah Pasian lunggulhna cih ahi zongin, Moses in a gelh Laisiangtho bu masa pen 5 te, Laisiangtho Bu bup, atuam tuam thugui let te cih bangin a huampi in kimu thei hi. A hi zongin Paul in a bulphuh phadiak pen, Moses tungtawn panin, amite adingin Pasian in apiak a thukham buppi a huamin agen nuam ahi hi.

Tua ahih manin, “Thukham zuihna” a cih ciangin, Pasian in Moses tungtawna apiak, Thukham Sawm te ahi zongin, Moses thukham phadiak ahi Zehtan thukham sunga kihel khempeuh a huamkim zuihna ahi hi. Paul in agen nop thu in, mikhat peuhin Pasian  Thukham te hamciam taka zuihzawh sawm tentan na a hi zongin, thuman na tawh kalsuan na te in, cikmah hun in Pasian mai ah mihoih asuah theihna dingin midik tangsak thei tuan lo ban ah, dik kisak na zong ngah sak zo tuan lo hi cih thu ahi hi. Bang hang hiam cih leh, Pasian Thukham te in ngaihsutna leh gamtatna khempeuh ah a bukim takin cihtak na tawh a hun ciangtan om lo, a buppi a zuih zawh na dingin hong ngen zaw hi.

“Thukham zuihna” cih kammal Thuciam Lui buppi sungah ahi zongin, Thuciam Thak Bu sungah Paul laikhak te losiah sungah muh dingin om mel lo hi na pi, 1947 kum in, Zeisu hunlai, Jew Biakna khat ahi Essenes te gelh, Si Tuipi sunga laizial khat kimu hi. Tua laizial sunga kiaat Hebrew lai tawh aki at, Laisiangtho Thulu khatin, Miqsat Ma’as Ha-Torah, cih hi a, a khiatna in “Thukham zuihna thupitna” cih ahi hi. Tua laizial sungah thu tuamtuam tampi ki-aat a, a siangtho na te leh a siangtho lo te kisawh khak loh ding thu leh, Jew minam te in namdang Gentile minam te tawh tuam om na ding cih thu te kihel hi. A tawpkhak laigual sungah, Lai-at te in, “Thukham zuihna tawh kituak in a zui khempeuh te’ Pasian mai ah “Dik tanna” ngahzo cih kiseh ding hi, cih ki-at hi.

Nangma nuntakna sungah Pasian’ Thukham te bangzah dongin, a kician takin zui zo na hi hiam? Tua Thukham hoihtak a na zuih zawhna tungtawn pan-in, Pasian mai ah, Diktan sakna ngah dingin na kituat ngei hiam?(Rom. 3: 10 – 20). Tua bang na hih kei leh, Na dawnna in, Paul deihna bang ci bangin hong telsiam sak a hi hiam?

NITHUM NI (TUESDAY) July 18

EI TE’ DIKTAN THEIHNA A BULPI

“Khris tawh kiptakin kipawl khin ka hih manin Thukham zuihna tawh a kingah thei keima hanciamna tawh dik ngahna cihte ka nei nawn kei hi. Tu-in, Jesuh Khris upna hangin Pasian in a hong piak diksakna ka ngah a, tua pen upna siksanin a hong kipia ahi hi” Filip. 3: 9.

Jew Christian te in Zeisu Khris sungah Upna a thupi in ngaihsun lo uh hi, ci kha kei in. Amau te in Zeisu a um mite mah ahi uh hi. Zeisu sungah zong Upmuan na anei te ahi uh hi. A hi zongin a mau te in, Zeisu sungah Upmuanna cih bek kicing lo a, thuman na tawh I behlap kul hi a ci te ahi uh hi. Tua thuman na leh Upna I neih kop nak leh, diktan theihna a ngah takpi te kici uh hi. Tua hi a, Upna leh Sepna pangkhawm hi ci in Paul tawh a kinial uh hi. A hi zongin Paul in, tua Upna leh Sepna mapang khawm cih pen nasia takin do hi. Ei te diktan theihna in Upna bekbek mah a bulpi hi ci in gen hi.

Paul adingin, Upna a neihna limlim pen lungsim ngaihsut na ciang bek hi lo in, Zeisu mahmah tawh khentheih loh in a kizopna uh ahi hi. Gal. 2: 16 sunga, nihvei a kidawk “Zeisu

Khris sunga upna bek” cih kammal in, thudang khempeuh huamkim hi. Greek kammal sungah “Upmuanna” cih leh Zeisu ah”Cihtakna” ci in kikhia thei hi. Ei te in Thukham zuihna tungtawn a hanciamna leh ei tang dingin Zeisu in ama cihtak na tawh a hong sepsak te, a kilamdan zia Paul in a tehkaak na tawh, I khentel theih na dingin a hong hilh ahi hi.

‘ A phawk huai thukhat ah, ei te in Upna anei te tungah diktan theihna a ngah kisa kha thei hi. Upna behlap na tawh Diktan theihna ki thalawh zo ding ahih leh, mihingte septheih mah hong suak ding hi. A hi zongin ei te adingin a hong sepsak Zeisu leh a ma hong kipiakna te

Upna tawh I lenkip thei hi. Ei te in I Upna bulphuh in Diktan theihna angah hi zaw lo in, Upna tawh I san ciangin, ei te ading in a cihtakna leh a hehpihna tawh, a hong sepsak Zeisu tungtawn bekin tua Diktan theihna angah bek I hi hi.

Kuamah in a sepzawh ngeiloh ding dinmun, Topa Zeisu bekmah in hong sem zo a, Pa Pasian tungah a citak, amuanhuai amah bek mah a om hi. Ei te lam-etna te zong eite cihtakna tungah kinga lo in, amah cihtakna tungtawn pan-in a hehpihnna tung bekah I kinga thei hi. Hih thu pen, tuma kum tampi lai Biakna puahphatna a kipat tungin Martin Luther in a genkhiat lai mah bangin tuni ciang dong theih dinga a kilawm thumaan a hi hi. Lampial Pawlpi pan in, Biakna Puahphatna a piangsak a thumaan thugui let zong a hi hi.

Galati 2: 16 sung thu, tanglai Syria lai tawh a kigelh kammal te sungah Paul’ deihna kician takin hong telsak hi. Tua hilhcian na bu sungah, “Tua ahih manin, Thukham zuihna tawh kuamah in diktan theihna ngahzo lo a, a hi zongin Messiah Zeisu neih Upmuanna (Faith) tungtawn bekin, ei te amah Messiah sungah Upna (Believe) I neihna theihna hangin, tua Messiah neih Upmuanna bek tawh Diktan theihna a ngah I hi hi.

Rom. 3:22, 26; Gal. 3:22; Eph. 3: 12; Fil. 3:9 simin. Hih Laisiangtho munte leh atunga laigual te tungtawn panin, ei te adingin Zeisu cihtakna, a Pasian tungah a thumanna hang bek tawh, eite adingin a thumaan Gupkhiatna bulpi a hong luan zia koici bangin tel thei ding I hi hiam?

NILI NI (WEDNESDAY) July 19

UPMUAN THUMAN NA

Upmuanna bekmah Christian nuntakna sungah I bulkip theih na dingin tapphah a hih zia Paul in hong hilhcian hi. Zesu in ahong kamciamna khempeuh tua Upmuanna hang bek mah tawh ki lenkip thei hi. Ahi zongin Upmuanna I cihcih in bang hi mawk hiam? Bang teng kihel hiam?

Anuai a Laisiangtho mun te in, Upmuanna a hong piankhiatna bang ci bangin gen uh hiam? Pian. 15:5, 6; John 3: 14 – 16; 2 Kor. 5: 14, 15; Gal. 5: 6.

______________________________________________________________________________

A mantak Laisiangtho sunga Upmuanna I cihin, Pasian in ahong sapna dawnkikna/ thukkikna ahi hi. Upmuana I cih in, Pasian a hong sawlkhat ni khat teitei ciangin semkhia ning ci-in lungsim ngaihsut geelna leh gamtat sawmna hi lo hi. Upmuanna maan I cihin, Pasian in eite’ ahong hehpihna leh hoihna te khempeuh, lungdamna leh Itna tawh thukkikna ahi hi. Tua ahih manin Laisiangtho in, Upmuanna thu a gen ciangin Pasian in ahong sepsak masakna tungtawn pan in thuhkikna ahi hi. Gentehna in Abraham tungtangah, Pasian in ama tungtawn panin a lamdang kamciamna a ngahna tawh kizui in, a Topa a muanna tungtawn panin Upmuamna tawh Abraham in a thukkik hi (Pian. 15:5, 6). Laisiangtho Thak sungah Paul in agen Upmuanna in, Calvary Singlamteh tungah Zeisu in eite’ adingin ahong sepsakna khempeuh, theihkhiatna tungtawn panin zungkha in a hong luangkhia hi ci hi.

Upmuanna in Pasian tungah thuhkikna ahih leh, tua sungah bang teng kihel ding hiam? A nuai a Laisiangtho munte ah Upmuanna pianzia hong koi ci gen hiam lungngai in. John 8: 32, 36; Sawl. 10: 43; Rom. 1:5, 5; 6: 17; Heb. 11: 6; Jeim. 2: 19.

______________________________________________________________________________

Mi tampi takte in Upmuanna (Faith) pen Upna(Bielieve) hi ci in hilh uh hi. Tua hilhician na ah buaina hong om hi. Bang hang hiam cih leh, Greek kam in “Upmuanna”(Faith) cih pen (noun) hi in, a khiatna in “Um ding”(to believe)(verb)cihna ahi hi. A khiatna in, “Upmuanna in Upna neihna”cih ahi hi. A khiatna nei thei tuan lo hi.

Laisiangtho sung pan in I sintheih thu in, Upmuanna I cih in, khuak pilna tawh Pasian deihna bek hi lo a, tua theihtheihna pan in lungsim sungah santheihna siamna zong ahi hi. Tua Upmuanna I neih theihna dingin kician takin Pasian pianzia I theihtel ding thupi hi. Pasian’ pianzia I theihtel kei leh, Upmuanna I neih theihna dingin hong haksa mahmah ding hi. Pasian’ lungdamna thupuak khuak ciang bek tawh san siamna in kicin na piangsak zo lo hi. Bang hang hiam cih leh, Dawi te nangawn in tua Upna ciangciang nei lua uh hi. A maan Upmuanna a nei mihing khat nuntakna sungah tua Upna in huzap lianpi nei sak hi. Rom. 1: 5 sungah Paul in, “Upmuanna hanga thuman’na (obedience of faith)ci hi”. Paul in agen nopna ah, thumanna in Upmuanna tawh a kibang ahi hi a ci nuam a hi kei hi. A cihnop zawkin, Upmuanna a nei te in, lungsim ngaihsutna ciang bek tawh sanna hi lo in, a nuntakna khempeuh ah huzap neihsak na  ahi hi. Upmuan na sungah zuih dingin thukhun cih te kihel lo in, Zeisu Honpa leh Topa dingin sanna, ama tunga kipum-aapna ahi hi. Upmuanna I cih In I up Pa tungah bangzah a muang, bang ci bangin ama adingin nungta cih kawk zaw hi.

NINGA NI (THURSDAY) July 20

UPMUAN NA IN MAWH KHUAN PIA HIAM?

Paul a kimawhsak na thu khat pen in,ama thupuak ahi Upna bek tawh diktan sakna ngah a cih lungdamna thu in, mite mawhna a bawl dingin tha pia hi cih thu ahi hi (Rom. 3: 6; 6: 1 sung simin). Thukham zuihna tawh Pasian santheih dingin maipha kingah zo tuanlo ahih leh, koi ci bangin a nuntak dinguh bang hangin awlmawh nawn se ding uh a hi hiam? ci uh hi.  Martin Luther zong tua bang mahin mawhsak uh hi. Ut bangbanga phengtat theihna ticket a kingah thei suak hi, ci uh hi. 

Tua bangin Upmuanna tawh diktan sakna ngah thei cih thu tawh kisai, mite in a 

mawh sak uh ciangin, Paul in bang ci bangin thukkik hiam? Gal. 2: 17, 18.

 ______________________________________________________________________________

Agal te in nasia takin a langpan na tungtawn panin, Paul in a khauh mahmah kammal tawh a dawn kik na ah,” Pasian in deih lo hi” (God forbid) ci in dawng hi. Mi khatin Zeisu kiangah a zuat khit nungah mawhna sungah pukkik kha mah ding hi, a hi zongin tua apuuk na hangin Zeisu tungah mawhpuak om thei lo hi. Ei te in Thukham I palsat leh, ei mah mah a khial ki hi pah hi.

Paul in Zeisu tawh aki pawlkhop zia bang ci bangin gen hiam? a langpang te in 

amawhsak na thu hih Laisiangtho mun sungah bangci dawn kik hiam? Gal. 2: 19 – 21.

______________________________________________________________________________

A langpang te mawhsakna Paul a dingin a nuihzak huai thu suak lel hi. Upmuan na tawh Zeisu santheih na pen a thuneu ngaihsut huai lo hi. Vantung gam tun theih na dingin Upna nei ki ci na pi, Sunglam pianthakna a nei lo mihing khat nuntakna ah Pasian in midik in sang thei veve hi cih thu a hai huai mahmah lampial ngaihsutna khat a hi hi. A hi zongin Upmuan na  tawh Zeisu san theihna in a muanhuai thumaan guipi a hi hi. Tua Upmuanna in Zeisu tawh a ma sihna leh a hong thawhkikna te hangin hong kipawl khawmsak a, kha thu ah Paul in a gennop thu in, a zungkha pumpi’ deihna a zui nawn lo dingin Zeisu tawh Singlamteh tungah mawhna lui khempeuh khencip khin cihna ahi hi (Rom. 6: 5 – 14). Ei te in a beisa hun lai a, nuntak na lui tawh kizopna khempeuh sattat khin ta I hih manin, na khempeuh athak hong suak ta hi (2 Kor. 5: 17). Nuntakna thakah Zeisu sungah a thokik ta I hi hi. A thokik Zeisu in eite lungsungah hong teeng thei ta ahih manin, a mah tawh I kibang semsem thei dingin hong bawl ding hi.

Tua ahih manin, Zeisu sungah Upmuanna a neite mawhna bawlkhuan ngah, ci in paulap zawnkhuan a ngah hi zaw lo in, thukham kalhna tunga ki-nga biakna sangin athuk zaw Zeisu tawh kizopna hong nei sak hi. 

Thukham zuihna hang tawh a hi lo, Upmuanna bek tawh Gupna ngah cih ngaisutna 

koi ci bangin mattuah thei ding na hi hiam? Tua in mawhna bawlkhuan pia hi cih hong  

lipkhap sak zaw maw a hih kei leh hong lungkim sak zaw? Na dawnna in koi ci bangin

Gupkhiatna thu hong telsiam sak zaw ahi hiam?

KIGIN NI (FRIDAY) July 21

SINBEH DING: “Upmuanna tungtawn pan-in diktan theihna tawh kisai in,mite in a ngaihsutkhialhna tawh kisai in mite zaknop asuah ding thu tamvei pi tak Topa in hong lak khin hi. Hih thu tawh kisai in mite lungsiam a buai theih na dingin, Satan in thu tuamtuam panin, nasem ahih zia kum tampi laipek pan in Topa in hong lak khin zo hi. Pasian thukham te bulphut luatna leh mipi te tungah a khengval a zuih dingin apiak na hangin Cain biakpiakna bang mahin Zeisu mahmah leh ama Thukham kizopna, ki telsiam thei nawn lo hi. Gupkhiatna tawh kisai in, a buaihuai ngaihsutna tuamtuam te hangin mi tampi te in Upna sungah lampial khin a hih lam hong lak hi. Bang hang hiam cih leh Thugen sia te in zong ngaihsutna lampi maan lo tawh mite lungsim a lak theih na dingun naseem uh hi. Kum tampi sunga kei tungah a hong kigen thu in Zeisu sung beka om Diktan theihna ahi hi…
A puksa Leitung mite in, amau gamtat hoih tawh, bang ci bang ahi zongin thu khat peuhpeuh ah kip takin lenkip ding ahi zongin, gengen ding ahi zongin bawl thei ngei lo ding uh hi. Gupkhiatna I cih in Zeisu sung bekah Upmuanna tungtawn bekin a kingah thei ahi hi.” Ellen G. White: Faith and Works. Pp. 18, 19.
“Thukham in a hong kalh pen Dik kisak theihna I ngah theih na dingin ahi hi. Tua a hih manin mimawh khatin Thukham tungah leiba anei suak hi. A hi zongin lohkik theih ding hi lo hi. Upmuanna tungtawn pan bekin tua dik kisak theihna kingah thei hi. Zeisu hong kipiak na hangin Upmuan na tawh Pasian’ maipha a ngah thei a hi hi. Pasian in mimawh pa dinmun ah a thumang a tapa suan a, a khialhna khempeuh Zeisu hangin dik kisak theihna a ngah thei a hi hi. A tapa a it mah bangin tua mawhnei pa dinmun ah, midik bangin ama ading hong pom in, maisakna, diksakna, kisik theihna hong pia hi.” Ellen G. White: Selected Messages, book 1, p. 367.

KIKUP DINGTE:
1. Atunga Ellen G. White in a gelh laimal te siksan in I et ciangin Upna hangin diktan theihna bek mah bulphuh in gen hi. tu ma kum 100 val lai pek a a gelh thu te, tulai ei khang hun ah a kibulh thei/ a kizang thei lai mah ding hiam?

2. Martin Luther a kipan, Puahphatna a phuan khia Pawlpi makai khempeuh te in, banghangin kum tampi a kihaal khin Paul tangko’ thumaan te pom in, Rome Pawlpi sung khalam saltanna pan in mitampi suakta sak thei uh a hi hiam?