Kumpi Khat In Thupha Bawl

July 22                                            India Gam Nitumnalam

Kumpi Khat In Thupha Bawl

Agen: Manohar Karnad

Kumpi khat ii thudikna leh saangmaang (missionary) khat ii khuamuhna (vision) hangin, India gam nitumnalam ah Seventh-day Adventist  saang khat kihong hi.

Tu-in, Alate [ah-lah-teh] Seventh-day Adventist saang in leitung bup aa om pawlpimite in a huh nadingin thu ngetsaan uh hi. Hih saang in tu kuata Sabbath sawm leh thumna sumpi tawh a kisap mahmah uh saangnaupangte laisin nading inndeite a kilamsak dingin lamen hi.

Alate Seventh-day Adventist saangsiapi Manohar Karnad [Manohal Kalnet] in, “1960 kum aa saangvai tawh ka phuutkhaak uh buaina pen  tu-in zong ka phuukhaa uh hi. Ka saang uh kum 20 sung kikhaakcip hi. Saang innpi zong luui mahmah ta hi” ci-in lungzuanhuai takin gen hi.

Mr. Karnad in, “Saang innpi loin saang kah ding saangnaupangte om theilo hi. Saangnaupang loin saang innpi om theilo hi. Hih thupoi pen a beisiang kul hi” ci-in veina tak tawh gen hi.

Saang pen mihaute neihsa saang pan a kigamla lo ekah (acres) 17 a zai  huang sungah kihong hi. A dang saang khat pen  ekah (acres) 150 a zai singkung leh lopa tawh a niim diadial mualbo tungah kihong hi.

Mr. Karnad in, “Mihaute saang leh a kihong thak saangte tawh kidem ding pen Adventist saangte aadingin haksa hi,” ci-in gen hi.  Ahi zongin, a dang saangte in a neihloh Adventist saang in a neih thu pawlkhat gen hi.  “Adventist saang pan a kisin pilna in saangnaupangte’ nasep ngah nading ciangbek hilo in a nuntak sunguh a kikhuasak nading uh hi zaw hi,” cih genbeh hi.

Saangnaupang 260 a kahna hih Adventist saangpi pen saangsaap a pia zolo saangnaupangte a huh saang ci-in hong kithei hi.

Kilawmtaatna Pan Thupha

Adventist pawlpi in 1920 kum in huang khat na ngah a, tua munah saang kihong hi.  Tua hun lai-in America pan saangmang hong seem Pr. Martin pen gam-uk Kumpi Shahu tawh na kilawmta uh hi.  Ni khat, saangmangpa kiangah, “Kei kiang panin bang deih nahi hiam?,” ci-in Kumpipa in dong hi. Saangmangpa in zong, “Leitang mun khat ka deih hi hi,” ci-in lawptak in na dawng hi. Kumpipa Shahu in zong a khutte zan kawm in, “Na deihna mun la in,” ci-in phal takin pia hi.

Kumpipa in sep dingin a sawl thu: Saangmangpa in leitang tungah zatui tawh kibawlna siikhaan 1 leh saang khat hon ding ahi hi.

Zatui tawh kibawlna siikhaan khat kihong takpi a, 1981 kum dong kizang hi. Saang pen 1943 kum kihong khin ahih hangin 1960 kum in kikhaak kik hi. Saang a kikhaak hangin kiim leh paam ah Pasian’ min than sak nadingin hunpha khat ngah uh hi.

Sang siapipa in, “1981 kum in Pasian huhna tawh sang ka hongkik uh a, tu dongmah a kihong suak ahi hi,” ci hi.

Tuni-in sang huang sungah inn 5 kilam khin hi. Mr. Karnad leh a zi pen saangmangpa inn lui ah teeng uh hi. Tua saangmangpa inn lui khen khat ah kawm tawh daal in, saangnaupang numeite bawda in kizang hi. Pasalte bawda pen numeite bawda a gal khat ah om hi.

Sangnaupang khempeuh in ni khat in nai 2 ta sem uh hi. Pawlkhatte in mehteh mehgah huan ah sem in, adang sannaupangte in anneekna inndei ah an huan leh kuangsawp nasep sem uh hi. Hih nasepna leh laisinna in sangnaupangte khut tawh sem thei pah a, thatang aa nasep a hoihna leh laisinna a hoihna hong tel thei uh hi.

Mr. Karnak in  a saang vuah laisinna inndei 14 a kisap takpina uh gen hi.

Saangnaupang 100 lakah 30 bek Adventist ahi uh hi. Adang 100 lak ah 30 te bel Khristian innkuan pan hi uh a, adang khempeuh pen biakna tuamtuam pan ahi uh hi.

Saangsiapipa a zum ii pualam ah dingin, “Hih huang sungah Pasian’ na a sem nuam mi citakte a ngak, a lamnen ihhi hi,” ci-in gen hi.

Sabbath School sumpi phalna tak tawh hong pia ding nahih manun lungdam hong ko ung,  Hehpihna tawh na thungetna vuah Alate saang leh saangnaupangte aadingin hong phawk pih un.

                           @@@@@@@@@@@@@%%%%%%%%%@@@@@@@@@@@@