ZSS LESSON 5: LAI SIANGTHO LUI SUNG PANIN UPMUANNA

LESSON 5: LAISIANTHO LUI SUNG PAN IN UPMUANNA.           July 22 – 28

NIPI NI (SABBATH) NITAK LAM July 22

SIMDING TE: Gal. 3: 1 – 14; Rom. 1: 2; 4: 3; Gen. 15: 6; 12: 1 – 3; Lev. 17: 11; 2 Cor. 5: 21.
KAMNGAH: “Sing tungah a kikhai mi peuhmah Pasian’ samsiat mi ahi hi,” na ci ahih manin eite-a’ dingin Khris in samsiatna a thuak manin Thukham zuihlahna hangin samsiatna panin eite a hong tankhia ahi hi” (Gal. 3: 13).

Naupang pasal no khatin, limzep na tawh a hoih mahmah in abup a kizem gunkuang no khat hong bawl hi. Ni khat, mikhat in a tembaw guksak ahih manin lungkia mahmah hi.

Nikhat apawng sai mai ah, a pai laitak in a gunkuang mu kha hi. Lungdam takin sai nei pa kiangah “hih gunkuangno kei a hi” ci hi. Sai nei pa in, ka lei a hih man in “kei aa hi” ci hi.

Naupang pa in zong “hi mah in the” ahi zongin “hih gunkuangin kei bawl hi a, kei aa hi” ci teitei hi. Tua ciangin sai nei pa in, “hoih ei”, “sum peknih nong piak leh, nei thei kik ni the” cih san leuleu hi. Sum bangmah a nei lo naupang pa adingin tua zahzah tam man lua hi. Tua ahih manin, naupang pa in neihkik sawm ahih manin, sum angah theih na dingin, inn sung nasep atuamtuam huhna leh, lopa aatna tawh kitha lawh na pan in, sum hong nei thei ta hi.

A manlang thei pen in, sumbuuksai ah hong tai vingveng pah a, “ka gunkuangno deih ta ing” ci in, a sum neih teng pia in, a gunkuang hong ngah thei kik hi. A gunkuang no a khut tungah lamto in, kawicip in nam gawp kawm in “ka gunkuangno aw, hong it mahmah ing,  nang in kei a na hi hi, nih vei kei a nong suah kik na hi. Nang kong bawl a, nang kong lei hi” ci hi.

Ei Leitung mite zong tua bang dinmun I hi hi. Pasian adingin nih vei I suahna hi. A mah in eite hong bawl hangin, Galpa in sumbuk ah I tung hi. To Zeisu hong pai in, kham leh ngun tawh ahi lo, aman pha mahmah ama sisan tawh ei te hong lei kik hi. Piansakna tungtawn in ahi zongin, tatkhiat na tung tawn pan in ahi zongin nihvei Amah’a I suak hi.” William Moses Tidwell: Pointed Illustrations, 1951. P. 97.

NIKHAT NI (SUNDAY) July 23

GALATI MIHAI TE

Gal. 3: 1 – 5 sim in. A mau te tungah Paul in bang gen hiam tomkaih in. Ei te in zong koi ci bangin a lauhuai kha lam dinmun a hi, thukham bek bulphuh luatna ah tuuk thei I hi hiam?

______________________________________________________________________________

Galati a lian khat sunga, Paul kammal ahi “mihai” cihna pen, tu hun Laisiangtho hilhcianna a bawl te in, koi cidan ahi tam ci in, kantel tek uh hi. Paul in azat kammal tawh pen, tu-a sangin khauh pai zaw lai hi. Tua kammal in Greek kammal “anoetio” hi a, (nous) “lungsim” cih pan in ahong piang khia ahi hi. A khiatna in, “Lungsim ngaihsutnna nei lo” a ci nuam ahi hi.

Galati mite in ngaihsut theihna zong nei lo mah uh hi. Hai sa lua mahmah ahi manin, mitphiat siam, te in bummang uh hi dingin umphia hi. “Tua bang mite pen hih leitung pasian gilote in a lungsim mit uh tawsak ahih manin umlo uh a, amaute tungah a taang lungdamna thu khuavak mu theilo uh hi” (2 Cor. 4: 4).

Lungdamna thu tawh kisai, Galati mite’ lampialna tungtawn in Paul in lungsim a buaina thu in, Gupkhiatna thu I cihin, Zeisu singlamteh tungah hong sihna ah, kinga hih cihpen a san siam mahmah uh leh a theih mahmah uh hi bilbel uh hi. Hih thuman tungtawn ah bel khial lo uh hi. Gal. 3: 1 sunga, “teltak in na theihsa” uh a cih kammal pen, “lamdunga mi khempeuh muh dinga kisuang lim” cih tawh akhiatna kibang hi. Paul in zong Galati mite tungah a gen penpen thugil in, Singlamteh thu bek mah hi a, Galati mite in zong a kha (lungsim) mit uh tawh singlamteh tungah Jesuh Khris a sihna thu a muh khitsa uh ahi hi (1 Cor. 1: 23; 2: 2). Thudang pan leuleu in, a maute Singlamteh tungtawn a kalsuan na ding sungah, a lampial na uh in, a gamtat na uh tawh bangmah lakkhia lo uh, ci in Paul in a gennuam ahi hi.

Tua khit ciangin Paul in, Galati mite tu laitak a kha lam dinmun uh leh, Christian ahong suahcil lai dinmun uh na tehkal hi. Tua thu tawh kisai in, kamsiam takin dotna hoih honkhat tawh Paul in thu dong hi. A koi ci bangin Khasiangtho a ngahna uh, cih ciangin Christian koi ci bang pan in suak uh hiam? Bang hangin Pasian in khasiangtho hong pia hiam? Amau lam panin, thupha a bawlna hangin piaktak cing a hih man uh hiam? Hi dek suai lo hi. A hi zongin amau adingin Zeisu in a sepsak te hanga tua Lungdamna thupuak a na Up man uh ahi hi. Hoih pha takin, kha lam dinmu kip tawh hong kipan na pi uh in, bangin amau gamtat hoihte tungah kingak sawmna hong nei thei mawk uh ahi hiam?

Khat veivei ngaihsut n ate sungah, “Kei hoih mahmah le ling e, kei pen a bulkip mahmah Christian khat hi lel ing e, Hih te kasep kul kei….tua te kasep kul kei…cih bangin ahi zongin, Hotkhiatna a ngah thei dingin zong hoih khop lel ing e, cih bangin tua bang ngaihsut na te ah bang khialhna om ding hiam?

NINIH NI (MONDAY) July 24LAISIANGTHO SUNGAH KIPHUNG VUHNA

Galati mite tungah a laikhak na sungah Paul in, “Upmuanna tungtawn panin diktan sakna a kingah theihna” thasan dan pen, Jerusalem a om sawltakte tawh a kibang thupuak ahih zia pulaak (Gal. 2:1 – 10) bek tham lo in, Ama aituam tuahkhakna te tungtawn pan in Galati mite tungah a tua lungdamna thupuak genna hong nei hi(Gal. 3:1 – 5). Tu in bel ama thupuak Lungdamna thu a kip zia, Thuciam Lui sung bulphuh in hong pulaak khia ta hi (Gal. 3:6). A taktak in zong, Gal. 3:6 – 4:31 kikaal bup khempeuh in, Laisiangtho sung thu tawh kisai buaina tuamtuam hilhcian na ahi hi.

“Laisiangtho thubu” tawh kisai Gal. 3:6 – 8 sungah Paul in, bang agen nuam hi

ding hiam? Rom. 1: 2; 4: 3; 9: 17 sungte simkawm in.

______________________________________________________________________________

A phawk huai mahmah thu khatin, Paul in Galati laikhak agelh laitak in, “Laisiangtho Thak Bu”om nai lo hi. Laisiangtho Thak a gelh sung pan in, Paul in a masa pen pawl ahi hi.

Lungdamna Thubu 4 te sung pan in, Mark a kigelh masa penpen ahi hi. Paul (AD 65) kum in si hi. Ahi zongin Paul a sihma siah Mark in gelh tuak nai lo hi. Tua hih man in, Galati laikhak Paul in agelh zawh kum 15 khit nungah, Lungdamna Mark aki gelh phing suak hi. Tua ahih manin, Paul in, Laisiangtho a cih ciangin, Thuciam Lui (Piancil.– Malachi) ciang bek a gennuam ahi hi.

Thuciam Lui sung thu in, Paul thuhilh na dingin, a thupi munah mapang hi. Amah in, a kizang thei nawn lo, a beisa thu lel bangin ngaihsun lo in, thuneihna anei, a nungta Pasian Kammal bangin ngaihsun hi. 2 Tim. 3: 15 sungah Paul in, “Pasian in ama humop na tawh hong piak Laisiangtho” ci hi. “Humop” cih pen, Greek kam in, “theopneustos” hi a, “theo” cih ciangin “Pasian” cih leh, “Pneus” ci kammal in,” Hu”, “huih”I malgawm ciangin, “Pasia Hu kimuam”cihna ahi hi. Zeisun in kamciam na sunga Messiah ahih zia pulaakna (Rom. 1:2), Christian nuntak zia ding thuhilhna in zatna (Rom. 13: 8 – 10), Ama thuhilhna te a manzia tetti lahna dingin (Gal. 3:8, 9) Paul in, Thuciam Lui sung mah siksan in thugen hi. Paul in mun bangzah bang Thuciam Lui sung bulphuh in nei hiam cih bel theihzawh ding hi lo hi. Ahi zongin, a laikhat khempeuh sungah, atom pen tegel ahi, Titus leh Philemon lo siah Bu dang khempeuh ah, siksan dingin lasawn hi.

Gal. 3: 6 – 14 sim in. Paul in Thuciam Lui sung pan Paul in, bang thu te a laksawn na om hiam? Tua te hangin bang zah takin Thuciam Lui thuneihna lian hi ci in gen thei ding na hiam?

______________________________________________________________________________

Khat veivei ciangin, Laisiangtho munkhat khat te in, munkhat khat te sangin, ki “humop” zaw deuh cih khawng na mu kha hiam? Paul’ genna 2 Tim. 3: 16 sung pan in, tua banga ngaihsutna zia in bang ci bangin lauhuai hiam?

NITHUM NI (TUESDAY) July 25DIKKI SAKNA IN KI SANG/TUAT

Ama Lungdamna thupuak a kipsak theih na dingin, Paul in Laisiangtho sung a siksan na ah, bang hangin Abraham bulphuh masak pen in nei ahi hiam? (Gal. 3: 6)

Abraham in Jew Biakna pupi pa aki ngakna uh ahi hi. A minam mahmah in zong Jew te’ pupi pa a hih banah, Paul hun lai mahmah in zong, Jew mi hihna taktak lahkhiat theihna dingin Abraham’ zia mahmah bulphuh pi in, a etteh ngiat uh hi. Mi tampi takte upna ah Abraham thuman na in, ama pianzia a hihna sangsiam bek tham lo in,Tua a thumanna mahmah hangin Pasian in, midik hi ci-in ciamteh hi cih um uh hi. A taktak in zong, Abraham in apianna khua, a innkuan pih te nusia in vun-atna zong na nei a, ama tapa neihsun mahmah zong Biakpiakna dingin na piakhia ngam hi. Tua in Thumanna hi a! Tua ahih man in, Paul a langpangte in, tua vun-atna tawh kisai in, thu-um mi khempeuh zuih dingin a tangsawl uh hi.  A hi zongin Paul in, tu mite sandan a thudangin hei sak a, Thukham zuihna hang hi lo zaw in, a Upna tawh Abraham in Dikna ngah a hih zia, Galati sungah 9 vei vilvel na gen hi.

Paul in Gen 15:6 a bulphuhna ngaihsun in. Abraham in a “Upna hangin Dik kisakna” a ngah zia bang ci bangin khiatna nei hiam? (Rom. 4: 3 – 6; 8- 11; 22 – 24 sung sim in).

______________________________________________________________________________

Dik kisak theihna cih kammal in Leitung thukhen sungah kizang kammal khat hi a, Leitung Sumbawlna vai ah, “tuat” ahi kei leh “kisang” cih in zong kizang hi. Mikhat I Bank laibu sungah sumtang thun sak cihna zong ahi hi. Hih Gal. 3: 6 sunga kammalte Abraham tung bek ah a kizang hi lo in, tanglai pupi te tawh zong 11 vei bang a kizang kammal ahi hi. Laisiangtho bu (version dang) a tuamtuam te sungah, “sim”(counted), “tuat”(reckoned), “bulh”(imputed)cih bangin ki tei hi.

Paul in ama hilhcian na sungah, ei te tang dingin, ahong kiseh na hangin Dik kisak theihna kingah hi. Dotna om thei thu in, Pasian bang tungtawn pan-in eite midik (dik kisak theihna) ngah dingin hong tuat(hong bulh) ahih hiam? Paul langpang te’ sandan bangin, thuman na tungtawn pan ahi ding hiam? Amau te gen mah bangin, Abraham in a thumang mahmah khat a hih teei hangin, midik hi ci in, Pasian in asan(atuat) zawk na in, ama Upmuanna tungtawn pan hi zaw hi.

Laisiangtho sungah kician mahmah in a hong gen thu in: Abraham in a thuman na hangin diktan theihna a ngah hi lo zaw a , dik kitan sakna a ngah manin, a thumang hi zaw hi. Midik hi ci in a kisan theihna dingin ama sepna bangmah kihel kilkel lo a, midik in a kisan khit manin, a thu amang hi zaw hi. Tua ahih manin, Dik kisak theihna in thuman na lam ah makaih hi. (“A thuman na hangin dikna ngah lawh” cih leh, “dikna ngah a hih manin thumang”, thupai zia a tuam tuak hi a, a ki la kawikawi thei thu hi lo hi, thugui khat bek tawh Dik kisak theihna kingah thei bek hi).

Mihing khatin I thalawhna tawh Dik kisakna a kingah thei thu hi lo a, Christ in ei ai dingin a hong sepsakna tungtawn pan in a kingah bek ahi hi. Tua in bang zah takin a lungdam huai thu hi mawk hiam? A beisa hun hi ta leh tuhun laitak in buaina tuamtuam te hangin koi ci bangin na neih thumaan in, upna hong nei kip sak hiam?

NILI NI (WEDNESDAY) July 26
THUCIAM LUI BU SUNG PAN-IN LUNGDAM NA THUPUAK

Laisiangtho sunga a kigelh, Gentile mite in a Upmuanna hangun dik kisak theihna angah na dingun Pasian in amuhkhol na hangin Abraham tungah, “Nangma hangin mi khempeuh te in thupha ngah ding uh hi”(Gal. 3:8) ci hi. Paul in agelh na ah, tua thu in Abraham adingin lungdamna thupuak hi a, Pasian mahmah in tua lungdamna thupuak a hong tangko khiat ahi hi. Tua in Lungdamna Thupuak taktak ki ci thei hi. Ahi zongin, bang hun in Pasian in Abrahamtungah hih Lungdamna Thupuak genkhia hiam? Gen. 12: 3 tungtawn in, Paul in a muhkhiat thu in, ama innkuan sung pan in asap khiat lai takin, Pasian in Abraham tungah a thuciamna te, a lungsim sungah nei khin zo hi, ci hi (Gen. 12: 1 – 3).

Gen. 12: 1 – 3 sim in. Pasian leh Abraham kikaal ki thuciamna tawh kisai a pianzia koi bangin hong gen hiam?

______________________________________________________________________________

Pasian in Abraham tungah a thuciamna’ in, ama’ kamciam na sung tungtawn pan bek in kinga hi. Pasian in Abraham tungah, “kong tua cih ding hi” cih kammal 4 vei na zang hi. Pasian in Abraham tungah a piak kamciam te a lamdang suah mahmah na thu in, Pasian in kamciamna tampi pia a, Abraham in bang kamciam mah pia lo ahih man in, a langbai-mahmah kam kiciamna hi hi. Tua thu in mi tampi te, Pasian tawh kamciam bawlna na tungtawn in, a kizopna uh tawh hong ki lamdang pian hi. Mi tampi tak te in, Pasian tungah kamciam a piak uh ciangin, Topa aw nong tua cih leh, tua bangin nong bawl leh, na thu ka mang ding uh a, kong tua cih ding uh hi, cih bangin Pasian hong bawlna tung tawn pan in, thukkik I sawm phing hi. Tua thu in Thukham zuih sawm tentan na hong tun hi. Pasian in Abraham tungah bangmah ngetna nei se lo in, Upmuanna bek tawh tua thuciamna a san dingin kun zaw hi. Atak takin, hi thu ah, a thubaih hi dek lo hi, bang hang hiam cih leh Abraham in, ama tha, ama theihna suanglo in, Pasian tungah aki pum-aap na a aneih theihna dingin a kisin hong kul hi (Gen. 22). Tua ahih manin, Pasain in Abraham a sapkhiatna tungtang ah, Lungdamna thupuak laigil ahi, Upmuanna bek tawh dik kisak theihna a kingah zia hong mukhia sak thei hi.

Mi tampi tak te in, Laisiangtho in lampi 2 tungtawn in, Gupkhiatna kingah hi ci in, sangkhial uh hi. Amau te in Thuciam Lui hun lai Gupkhiatna in Thukham zuihna tungtawn pan hi a, amau te in tangtun lo uh ahih manin, Thukham pen Pasian in phiatsiang a, Upmuanna tungtawn panin Gupna a piang thei dingin vaihawm hi ci uh hi. Tua in Laisiangtho thumaan tawh kigam la mahmah a, Gal. 1:7 sungah Paul in, lungdamna thupuak, Gupkhiatna thu lampi khat bek a om zia hong hilh hi.

Hih anuai a Laisiangtho mun te sung pan in, Thuciam Lui hun laitak in mite in, Upmuanna bek mah tawh Gupkhiatna a kingah zia uh bang ci bangin hong hilh hiam?  Lev 17:11; Psalm 32:1 – 5; 2 Sam. 12: 1 – 13; Zech. 3: 1- 4.

______________________________________________________________________________

“Aman tawm Hehpihna” cih kammal I zakha zel hi. Zat dingin a kilawm lo kammal ahi hi. A mawkna in aki ngah ahih manin, man nei lo hi kici thei tuan lo hi. Mawh bawl theihna dingin I sankhak ciangin ahi zongin, gamtatna tungtawn pana maipha ngah theihna dingin I hanciam ciangin ahi zongin, Hehpihna’ manphatna a susia I hi hi. Nangma nuntakna sunga na tuahkhak thu te tungtawn pan in, koi ci mun zaw tawh a tunga nam 2 sung pan in, hehpihna sungah lampial kha na hi hiam? Koi ci bangin kidawm thei ding na hi hiam?

NINGA NI (THURSDAY) July 27SAMSIATNA SUNG PAN IN HONG TANKHIA 

Gal. 3: 10 sung thu ah, hangsan taka Paul in agen na tungtawn pan in, a langpangte lungsim am gawp uh hi. A mau te in samsiatna sungah om a hihna uh kingaihsun kha het lo uh hi. A thuman na tungtawn un thukhat peuhpeuh ah, thupha ngah lawh dinguh hi, cih ki lamen zaw uh hi. A hi zongin Paul in, kician takin agen na ah, “Thukham laibu sunga kigelh khempeuh a vekpi-in a zuikhin tawntung lote in Pasian’ samsiatna thuak hi,” bek dom lo in, “Thukham a suangte pen samsiatna a ngah mite ahi uh hi”. ci hi.

Paul in, Upmuan na leh Gupkhiatna ngah theihna leh, Thukham zuihna tawh Gupkhiatna cih thu 2 tawh kisai a kibat lohna kician takin tehkaak hi. Thuhilhkikna a lian 22 leh 28 sungbup ah, Thuciamna thu tawh kisai in, thupha ngah theihna leh samsiat ngahtheihna kician takin hong hilh cian hi. A thumang te in thupha lawh ding uh a, a thumang lo te in samsiatna ngah ding uh hi. A cihnop na ah: Mikhat peuhin Pasian santheih a suah na dingin, Pasian thukhamvkhempeuh thuman na tawh a zuih kul hi. Ei ut thuthu tawh laktuam paihtuam nei lo in, a vekpi a I zuihpah ding ahi hi. Ahi zongin, thukham khempeuh zui se lo in, hua mun tua mun ah I palsat khak hangin Pasian in hong theisiam veve lel in teh I cih khak leh, bangmah a zui lo mah tawh aki bangin Pasian in hong seh lel ding hi.

Hih thu in, Gentile mite a dingin ahi zongin, Paul a langpang Thukham bek mah a ci te a dingin thusia mahmah suak hi. Banghang hiam cih leh, “Mi khempeuh mawh ciat uh a, a hong honkhia Pasian tawh kigamla uh hi” Rom. 3: 23. A hoih thei pen dingin I hanciam hangin Thukham in thukham palsat te mah hong ci ding hi.

Koi ci bangin Christ in, Thukham siamsiatna pan in hong honkhia hiam? Gal. 3:13; 2 Cor. 5: 21 sim in.

______________________________________________________________________________

Pa Pasian eite sungah Zeisu hangin a hong sepsak na tawh kisai in Paul in, hilhcian na khat hong gen kik hi. “Tankhia”(redeem) cih kammal in, “lei kik” cihna ahi hi. Galmat thuak khat in, a suahtak theihna dingin, man tawh tankhia cih leh, sila khat sum tawh tanhkhia cihna zong ahi hi. Bang hang hiam cih leh mawhna thaman in sihna hi a, thukham palsatna hanga samsiatna in sihdan tatna ahi hi. A hi zongin Gupkhiatna I ngah theihna dingin Pasian in a hong piak tatkhiatna in, man tehtheih ahi lo, ama Tapa neihsun nuntakna tawh (John 3: 16), samsiatna tawh mihing te aitang in mawhlawh tawi in (1 Cor. 6: 20; 7: 23) mawhna hangin sih theihna tungtawn pan in, eite mawhna thaman sanding aitangin gimthuakna, samsiatna thuak in ahong kipia ahi hi (2 Cor. 5: 21).

Paul in Thuhilhkikna Deut 21: 23 saikak kawm in, Jew te ngeina sungah mikhat peuhin mawhna khat a bawlna hangin Pasian samsiatna athuak leh amau thukhensat na ah, a pumpi pen singkung tungah a kikhai lum ding ahi hi. Topa Zeisu Singlamteh tungah ahong sihna zong tua samsiatna hang mah ahi hi, ci hi (Acts. 5: 30; 1 Pet. 2: 24).

Tua ahih manin, Messiah a kici pa in Pasian samsiatna thuah hi, cih a sang thei lo Jew mite a dingin Singlamteh in, puukna piang sak hi. A hi zongin tua banga thuakna in Pasian ngimna hi zaw hi. Messiah in samsiatna thuak hi dih pen a hi lua mahmah thu hi a, ahi zongin ama mawhna hangin athuak hi lo a, eite ai dingin a hong thuak hi zaw hi.

NINGA NI (FRIDAY) July 28

SINBEH DING: Eite gitlohna khempeuh aitang ding leh kician taka kisuanna a om loh na dingin, Zeisu tungah vai khempeuh kinga hi. Mawhna thukhen na pan in I suahtak theihna dingin, amah in mihingte’ ai-awh in mawhlawh tawi na a pua hi. Adam khanga kipan mihing khempeuhte’ tatsiatna in ama lungsim nasak mahmah hi. Mawhna ahua Pasian hehna in, a Tapa lungsim sungah lauthawn na dimsak hi. Christ in a nuntak sungin a puuk Leitung mi khempeuh tungah, tawntung a Pa’ hehpihna leh Itna tawh mawhmai sakna thu a pulaak dingin tua Lungdamna thu genkhia hi. A mawh mihing khempeuh tungah Gupkhiatna atun theihna ding cih pen, ama mungtup ahi hi. A hi zongin tu-un ahih leh, agik mahmah leitung mite mawhna khempeuh amah tungah kisuan ta a hih manin, a Pa kiang pan in, kilem maipha mu zo nawnlo hi. Hi ci bangin lipkhap huai mawhna vangik a nencip laitak kek mah in, a Pa maimuh theihna ding lampi om lo cih a theih ciangin a dahna, lungkhamna in a lungtang ki tamzan sak a hihna Leitung mihing te in cihmah hunin I telloh ding haksatna hong thuak hi. A lungtang kitap zanna lian lua mahmah ahih manin ci leh sa tawh athuak natna te phawk zo lo phial hi. Ellen G. White: DA. p. 753

“Luther pen tu in thumaan gen champion dinmun tung ahihna hong kilang semsem ta hi. Pulpit tung pan in kidopna ding agenna awging kiza ta hi. Amah in mite mai ah mawhna huathuai zia leh amau gamtat hoihna tawh mawhna daantatna ding pan in neemsak tuam lo ding ahih zia hilh ziahziah hi. Pasian lamah kihei in mawh kisik kikna leh Christ sungah upmuanna lo ngalin, mawhnei mikhat in hotkhiatna ngah thei ngeilo ding hi ci hi. Christ sunga om hehpihna pen man a leitheih hi lo a, a hong piakkhong hi zaw hi. Amah in, Mawh honna leimat (Indulgences) lei lo zaw in, Upna mit tawh thahna athuak Honpa et zawk dingin hansuah hi” Ellen G. White: GC. p. 129.

KIKUP DINGTE:

1. Tuni ciang dong, I Pawlpi sungah Upmuanma bek tawh Gupna ngah zia atel zo nai lo tampi ki om lai hi. Zeisu hangin hehpihna tawh Upmuan na tungtawn bek panin Gupkhiatna a kingah hi a, gamtatna kihel kilkel lo hi. Hih thumaan pen I san theihna dingin bang thu te in hong lunghiang sak thei hiam?

2. Paul in, gamtatna tawh Gupkhiatna a kingah lo zia khauh tak in hong hilh khin zo hi. Tua ahih man in, Pasian thu (Theology) hoih takin I theih bang ci bangin thupi hiam? Tua ci banga, adik lo thute Pawlpi sungah a hong kihilh khak leh bang hangin tangtak in I dinngam ding kul hiam?