Zomi Sabbath School Lesson 9: NA HI BANGIN OM IN

LESSON 9: NA HI BANGIN OM IN                         MAY 20 - 26

NIPI NI (SABBATH) NITAK LAM May 21

SIMDING TE: 2 Pet. 1:1-15; Eph. 2:8; Rom. 5:3-5; Heb. 10:38; Rom. 6:11; 1 Kor. 15:12-57

KAMNGAH: Hih thu hangin na upna ban uhah gamtat hoihna na behlap un la, na gamtat hoihna uh thutheihna tawh na behlap un; Na thutheihna uh pumpi ki-ukzawhna tawh na behlap un la, na pumpi ki-ukzawhna uh thuakzawhna tawh na behlap un; na thuakzawhna uh Pasian’ deih bangin gamtatna tawh na behlap un la Pasian’ deih bangin na gamtatna uh sanggam ki-itna tawh na behlap un; na sanggam ki-itna uh itna thukpi tawh na behlapzawhna dingun na hanciam un. (2 Pet. 1:5-7)

Laisiangthok thak sungah, a lamdang mahmah thukhat in, thuman a ki cih khat pen, mun kawcik no khat sungah kiseel kiau thei hi, cih thu a hi hi. Tu kaal sungin, 2 Pet. 1:1-14 sung thu I sing ding hi. Upna hangin Ditanna a hi zongin, Zeisu sunga aki-aap te tungah Pasian

vangliatna te ahi zongin,’ Pasian pianzia’neih theih na ding (2 Pet. 1:4) a hi zongin, Leitung lunggulhna te sung panin suahtak theihna ding te cih a hi zongin I sin to ding hi.

Peter kammal te tungtawn in, Christian nuntak sungah I lungsim gamtat hoih zia ding te a lomin kigelhkhawm bek tham lo in, a gualgual in, I kalsuan tohtoh na tungtawn a, a khungpen dong I tun theihna dingin hong hilh hi.

Zeisu sungah ataktak nuntak theih na dingin, mawhna sung panin, “sianthona” (2 Pet. 1:9), Gupna kician neihtheihna, “Tawntung Ukna” (2 Pet. 1:11) sungah khamuan theihna, Sihnung thu cih bangin a huampi in Christian te upna te ki mu thei hi.

NIMASA NI (SUNDAY) May. 21
A MANPHA UPNA

1 Pet. 1:1-4 sim in. Zesu Chris’ I neihna hangin, i hamphat na te bang teng hiam? Tua thu te hangin Hehpihna a om zia koi ci bangin mu thei ding i hi hiam?

________________________________________________________________________

Peter’ kammal masa te, sungah, Ko te bangin “upna manpha a nei mite”(2 Pet.1:1) cih tawh thu mai satna na nei hi. “manpha” cih kammal in “kibang” a hih kei leh, “hamphatna ngahkhawm” cihna zong a hi hi. Tua angah uh Upna pen a thalawh zawh thu hang hi lo in, Pasian piakkhong a hi hi. Paul in zong, “Note’ thalawhna hangin a ngah hiloin Pasian’ hong piakkhong ahi hi” ci hi. (Eph. 2:8). Upna a manphat na in, “Upna lo tawh, kuamah in Pasian lungkim sak zawh loh man” a hi hi. (Heb. 11:6). Tua Upna hang mahin alamdang kamciam na tampi a ngah thei dingin khamuan na hong nei sak hi.

Peter in neih dinga kiIlawm asak leh ahong  deihsak, a thu bulphuh khatin, “Ama (Zeisu’) vangliatna” tungtawn panin, Pasian’ deih bangin hoihtak mantak in nuntak theihna (1 Pet. 1:3) ding a hi hi. 

Pasian a it dingin hong sap te I hi a, a hi zongin tua Pasian thei lo pi in, koi ci it theih ding I hi hiam? Pasian I theihtheih na dingin: Zeisu tungtawn in, a Kammal  (Laisiangtho) te tungtawn in, piansak nate tungtawnin, Upna tawh thuman na lahkhiatna tungtawn in, I nuntakna ah a hong sepsak nate tungtawn in, a hong kikheel sak thei pilna te tungtawn panin, a hong piakkhiat hehpihna te tungtawn pan a hi zongin, ki mukhia thei hi. 

Atawpna ah piakdingin a hong ciam a manpha mahmah Pasian’ pianziate I neih theihna dingin Peter in lunggulh hi. Mihing te pen, a tungin Pasian lim leh mel sun in ahong kibawl hi a, Mawhna hangin siatna I manawh khin hi. A hi zongin khat vei suahthakna (Pianthakna)

Zeisu sung panin I ngah khit tak ciangin Leitung siatna leh lunggulhna te nusia in, Pasian mel asun kik dingin sapna a ngah te I hi hi.

Up theihna a nei lo mikhat hi le cin, na nuntakna koi ci bangin a om zen tam? A khawga I ngah Upna thupit na koi ci bangin tel semsem thei ding I hi hiam? 

NINIHNI (MONDAY) May 22
KI-ITNA: CHRISTIAN TE’ MUNGTUP

2 Pet. 1:5-7; Rom. 5:3-5; Jame 1:3,4: Gal. 5:22, 23, simin. Hih munte in, a kibangun a bulphuh uh kammal in bang hiam?

_____________________________________________________

Tanglai in, Mite in “zia leh tong ahoih” ci in agual agualin, na kan khia uh a, Laisiangtho thak sungah honkhat kimu thei hi. Atunga Peter gualhsuk ze hoih te leh, mipil te’ gualh te zong kibang kim lo kha ding hi. Peter gualh “Gamtat hoih” I cih te a nuai abangin ki mu thei hi.

Upmuana (Faith): Upmuanna nei I cih in, Zeisu sung bekah hotkhiatna om cih upna a hi hi. (Gal. 3:11l; Heb. 10:38).

Ze hoih (Virtue): Bangbang dinmun ah a hoih gamtat theihna a hi hi. Upna neih ding thupi pen mah hi, Ze’ hoihin a zuih kul hi.

Thutheihna (Knowledge): Thukan hatna hangin, theitheihna khempeuh a gennuam cih na hi lo hi. Zeisu tawh a kizopna hangin Kha lam thutheihna a gen nuam zaw a hi hi.

Pumpi ki-uk zawhna (Temperance, Self Control): A khangcing Christian khat a dingin, a uang lua lunggulh na khempeuh kidal zawh ding a hi hi. Lunggulhna a tam zaw in, uangtat sak hi.

Thuakzawhna (Patience/ Steadfastness): Haksat, bawlsiatna a hong tun ciangin, Kho bikbek a do zawhna kawk hi.

Pasian biakna ah nopsakna (Godliness): Biakna sungah gamtat hoih cih na leh, biakna lungsim nei-in a kilawm takin i nuntak theihna (I Tim 2:2) a hi hi.

Sanggam ki-itna (Brotherly Love): Christian I cih te in innkuan khat sungah ki sanggam it-in, a om khawm te I hi hi. Biakna lungsim a nei mikhat in, a kim apaam a om te mite a dingin thukhual in, migi ding hi.

Itna thukpi (Love): Peter in a mongkhakna dingin Itna tawh khum hi. Paul in zong, “Tu laitakin a omlai thu thumte pen upna, lametna, leh itna hi a, tua thumte sung panin itna mah a thu lianpen ahi hi, ci hi. (I Cor. 13:13).

Peter in Biakna sungah, I letkip ding kisam nate a hong gualh sukna tungtawn in, mihing lam panin koi ci bangin I kalsuanna, I hanciam na tungtawn in, a citak khami suak thei ding I hi hiam?

NITHUM NI (TUESDAY) May 23
NA HI BANGIN IN

Christian nuntakna sungah I letkip ding thu paipi te a gualgual in a hong gen khit ciangin, Peter in, a gamta te thununga piang ding thu tawh hong zom to lai hi. 

2 Pet. 1:8-11 sim in. Pasian in a hong duankholh sak thu te tungtawn in I kalsuan na dingah , ei Christian te in koi ci bangin nungta ding I hi hiam?

Peter in a laikhak na sungah hi ci bangin I gamtat zia ding akicingin (2Pet. 1:8) hong gen mah ta leh, a poi mahmah thu in, Chritian te in agamta nuam kei uh hi. Tua ahih manin Zeisu atheihna uhki khangcing thei mahmah lo in, a mawhna panin a siangkhin ahihlam na

ngawn zong kithei thei mahmah lo uh hi. (2 Pet. 1:9).

Tua ahih manin Christian te in, Zeisu sungah Nuntakna thak tawh a kalsuan nak uh leh, Topa’n, Maisakna leh Siansuahna pia takpi dinga, Pasian zia leh tong tawh hong kisun thei pan ding uh hi. Tua a hih manin, Pasian in ahong sapna leh a hong teelna-ah a kip zia (1Pet. 1:10), I telcian na tungtawn pan-in, a nungta kik dingin hong koih ding hi. A beisa hun in, a gah thei lo, a nangh Christian na hi ta zongin, maisakna hong pia veve ding hi.

“Ei te in Upna, leh Upmuan na thu I tam zak mahmah hi. A hi zongin, Upna tawh Sepna (kalsuan zia) I tam zak ding hi zaw hi. Mi tampi te in, upna sungah, ol no tak-a kalsuan nopna, mawkom hithiatna, leh Singlamteh phungah a kinga lo Biakna tawh, a kha uh kheem ni loh uh hi.”-EGWhite: Faith and Works, p; 50.

Rom. 6:11 sim in, Tu ni a I sin, Peter gen dan tawh kituak in Paul in bang thu hong kuppih hiam? 

Peter leh Paul te’ gennop uh thu in, eite pen Zeisu sungah Pasian in a hong teel, a misiangtho, mithak I suah theihna tungtawn pan in, “I hihna bangbang a om” ding hong deih uh hi. “ Christian” cih a khiatna in, “Zeisu bang’ nuntakna” a hi hi.

NILI NI (WEDNESDAY) May 24
BUUKNO SIANSUAH NA

Zeisu Khrih in teltakin hong genkhin ahih manin hih leitung pumpi (buukno) ka nusiat baihna ding thu ka thei hi. (2 Pet. 1:13, 14).

_______________________________________________________________

1956 kum in, Oscar Cullman a ki ci pa in, Laisiangtho thak hilhcianna abawl, “A si thei lo kha a hih kei leh, Misi te Thawhkikna”cih thulu sungah, Thawhkikna cih thu leh, A si thei lo Kha cih pen, a ki tukalh kammal a hi hi, ci hi. Laisiangtho thak sungah, Misi te thawhkik na thu tawh kisai in, ngaihsut na tuamtuam om ahih manin, Upna thu ah, mi te a dingin, a thalawp huai thu hi ta leh buaina a pia thei thu te ka phuang nawn kei ding hi, ci in at hi.

1 Cor. 15:12-57 sim in. Paul in sihna tawh kisai in koi ci muh hiam?

____________________________________________________________________________________

Laisiantho thak lam atel misiam tampi te in, Buukno nusia cih kammal tungtawn pan-in, “Sihna leh Thawhkikna” tawh kisai in, Oscar Cullman ii ngaihsut na pen sang siam uh hi. I sih khit ciangin, sih nung ah a sithei lo khat (kha) nusiat nei ci in sang uh hi. Laisiangtho in bel, Thawhkikna thu telgenmahmah a, a sithei lo kha om cih thu a gen ngei kei hi. Gentehna in: 1 The. 4:16-18, sungah Paul in, A sis a te in, thawhkikna ciangin Topa in a thawhsak ding thu gen hi. 1 Cor. 15:12-57 sungah zong, Thawhkikna thu tawh kisai in a gen na ah: Christian te upna zong Zeisu sihna pan thawhkikna tawh akinga hi a, Zeisu tho kei leh Zeisu sunga misi te zong thawhkikna om ding cih lam-etna om thei lo ding hi, ci hi.

Paul a gen nop a Thokik Pumpi in, I pumpi lui mah hi dinga, a hi zongin, tu laitak a I pumpi pen a si thei pumpi hi mah ta leh, Thawhkik ni ciangin, tua a thokik pumpi in, a sithei nawnlo a muatthei nawnlo, pumpi tawh hong tho to ding uh hi ci hi. Tua ahih manin, Sihna thu Laisiangtho thakin a gen nop thu in, Sihna in Ihmut pakna, hi a, a si thei lo kha om hi cih pen hong hilh lo hi. Tua thu kician taka tel na tawh (2 Pet. 1:12-14)thu I sim kul hi.

NINGA NI (THURSDAY) May 25
SIHNA SUNGAH UPMUAN NA

2 Pet. 1:12-15 sim in. Peter in, Hih a leitung pumpi (Buukno) kanusiat baihna ding thu ka thei a cih pen a bang a gen nuam hiam?

__________________________________________________________________________________

Hih Laikhak a aat laitak in, Peter in a sih ding thei khin a hih man in, a thu nunung pen vaikhak lai a aat a hi hi. Kei “Si baih ta ding” ci ziau lo in,leitung pumpi ka nusiat baih na ding thu ka thei hi ci se hi.Kammal a hoih zaw in”Lakam”a zang ahi hi. Tu lai khangthak Laisisangtho Hilhcianna bu sungah, “Hih pumpi tawh ka om sungteng …asawt lo in sihna in hong pha ding cih ka thei hi” na ci hi, ci hi. Peter a sih khit ciangin a buukno nusia in, tua a

nusiat, (buukno=a kha)in a pumpi tawh atuam in, kikhen tawntung ta ding hi cihna hi zenzen lo hi.

2 Pet. 1:12-15 sim kik in. Asih ding lam athei sitset Peter in, sihna tawh kisai koi ci manawh sawm hiam? Tua bang lungsim puakzia in, I Upna hong koi ci khan sak hiam?

________________________________________________________________________________

I Topa Zeisu Khrih in teltakin genkhin ahih manin, a nuntakna tawplam anaih zia a theithei a hi hi. A sihna ding tawh kisai in, launa, lungkhamna, kiphal lohna te nei kilkel lo hi. A ma lungkham zawkin a nusiat ding, a nungta lai te hi zaw hi. A thuman muh uh kip tak a din ding uh a lunggulh pen hi a, a nuntak sung teng zong cihtakna thu a han thawnthawn a hi hi. A sawt lo in si ta ding hi. A hi zongin a sih dan ding pen, a lungnop huai sihna hi lo ding hi. A hi zongin a ma lungsim puak in, mi dangte hamphat na ding bek mah lungpuak in nei hi. Peter Upna nungta tawh a nungta pa a hi hi. E G White: AA. P.537,538).

Ih Upna te in, I haksat thuak te hong koi ci huh hiam? Ei a dingin lam hong sialsak Zeisu mitsuan in, sihna ding dinmun I tun ciangin, I lamet na in, tha hong koi ci piak theih ding hiam?

KIGIN NI (FRIDAY) May 26

SIMBEH DING: I theihsa mah bangin, a sawtlo in si ding ahih lam Peter in thei hi. Nidang pekin zong, Koi ci sih ding cih Topa Zeisu tung pan in thei hi. Zeisu gen na ah: “A mantakin ci lehang, na khangno lai-in na kawnggak gakin na utna peuhah na pai zialzial thei hi. Ahi zongin na khangham ciangin na khutte na zan ding a, midangte in na khutte hong henin na utlohnapi-ah hong paipih ding uh hi,” na ci hi. (John 21:18).

Hun tawpna koi ci dan hiam?

Namdang te a hi Jew minam Peter, nasia taka mawhsak saat dan leh Singlamteh tungah khailup ding hong hi ta hi. A mulkim huai sihna dinmun a tun laitakin, Nungzui Peter in, nidang lai- in a theihcian loh man leh a kigin loh manin, thusitna ah a Topa a nialkhak thu te hong phawk kik hi. Tu in bel, a Topa na’ asep na hangin, a Topa sih dan mahin khailup ding hong hi ta a, lungnop na leh kipaakna tawh a Topa adingin a ki aap thei hi ta hi. A nidang lai mawhna te, kimaisak a hih zia “Ka tuu te na vaakin” ci a, sawlkhiat na za lianpi seem dingin, a kiaap na tungtawn pan in thei khin hi. A hih zongin a mah leh amah a kimaisak thei mahmah lo hi. Hih ama thuak gimna lianpi tung tawn panin, a mawhna lui hangin, a dahna leh a lunggimna hong zang tuam thei pan hi. A that ding te kiangah a tawpna thuumna khat hong nei thei a, Singlamteh tungah nong khai uh ciangin, ka lu pen, anuai lamah hong koih ta peuhun cih thu a hi hi. Ama ngetna kisang hi. Sawltak Peter sihna pen tua bang dan a hi hi. EG.White.Acts of Apostles, pp. 537, 538.

KIKUP DINGTE:

1. Laisiangtho at khempeuh te in, a hong hanthot khat ahi, Christian te pen nuntakna siangtho neih kul hi ci na pi, ahi zongin kuamah in Zeisu sungah a hi zah khop a kilawm sianthona nei thei lo I hi hiam?

2. Nidang lai in a puuk ngei khat, siksan pha tawh Pasian in a lapsan Peter tungtawn pan-in koi ci bangin lametna leh lungmuanna la thei ding I hi hiam?

3. 1 Pet. 2:12 (English Version) sim in. Peter te hun lai in, “Tulai Thumaan” a cih uh bang hi dinga, Tukhang ei a dingin “Tulai Thumaan” I cih in bang hi ding hiam?