Kumkikna Lamen Innkuan - Khen 13 (Azom3)

TATE SUM THALAWH LEH ZATDAN DING HILHNA

Nisim Nuntaknaah Zongsatna Hilh.—Tate in azongsatna uhah kikhalna leh kei-nialna aneidingin nu leh pa in ahilhding ahi hi. Pasian’ kammal zuihding leh Jesu’ na asemding tavuan aneihlam lakden ding hi. Nisim nuntaknaah zongsatna aneiding, tampipi aman puan, an, inn leh innvanzatte apeldingin pilna piakding ahi hi.1

Aneulai panun, lai asim, lai-at, gentehnate atel theiding, amau sum saziante abawl theidingin tate hilh ding ahi hi. Hih theihnaah akalsuan toto ding uh ahi hi. Tua khempeuh lakah Pasian kihtakna in pilna kipatna hi, cih hilh masa ding hi.2

Khangnote in Innkuan Sum Theihpihding.— Sum zatna tawh kisaiin ngaihsut khialhna tampite hangin khangnotein lauhuaina tampi phukha uh hi. Amaute deihna khempeuh leei nadingin abei theilo sumnak aom bangin khangnote sumpiak ding hilo hi. Sumin Pasian’ nasep nading, agam tangzaisak nadinga ahong kikawm ahihlam amaute hilhding hia, khangnote in adeihna uh akhiamding uh ahi hi.3

Adiakdiakin innkuan adingin sumlut atawm ciangin nadeih tamsak kei in. Nanu leh napate sumlut tawh kituakin deih in. Na angsungkhuatlohna Topa in hong muhsak dinga hong pahtawiding hi. Atawm nate ah thumaan in. Tua hileh alian thu zong nanelhsiah keiding hi. “Thu neu ah athumaante in thu lian ah zong thumaan hi,” Topa in ci hi.4

Sum Manphatna Hilhin.—Tate adingin olno taka akingah sumin man nei lualo hi. Pawlkhattein haksa tangpi in na asep ciang bekin sum ngah thei uh hi. Azat sumte koi panin hong pai hiam, cih atheite, apuansilh uhleh an man leh inn leei nadingin sum bangzah kisam cih atheite adingin lauhuaina tawm zaw hi.

Tate in amau tawmin sum athalawh theih nading lampi tampi om hi. Ama’ nuntakna ahong pia Jesu tungah lungdamna sumpite pia tawm thei uh hi. Angah sumte in autut un azatding hiloin, Pasian’ nasep nadingin zong khenkhiatding ahi hi. Nu leh pa kiang panin sumla in sumpi piak pen amaute thalawh hilo ahihmanin ahoihpen hilo hi. “Kei adingin manneitaka kangah ahilo sumpi piading kahi hiam?” ci in kidong uh hen.5

Tuabangin pilna akihello tate huhna om hi. College kah nadingin sum thalawh tawma sang akahte in apilna uh mannei sa uha, mite piak tawh sang akahte tawh kibang lo uh hi. Kimanna aneilo vangik asuah dongun tate na vaihawmsak keiding uh hi.6

Atha angal zangin sum athalawh theih ma-in khangnote sang kahsakin sum piakkhiatna in nu leh pate tavuan khialhna ahi hi.7

Sum azongtawm dingin Tate Hanthawn.— Khuapi puaah aom khangnote in leitang nei in huan bawldan sin masa leuh hoih hi. Pasian’ nasep nadingin sum thalawh nadingin kizang thei hi. Numei pasal in sem thei uh hi. Tua hileh sumcildan, leh sum manphatna kihilh theiding hi. Mission nasep nadingin nasepna banah amau puanding zong tawm thei leuh hoih zaw lai hi.8

Sum Mawkzatna Hanthawnkei un.—Innsunga akizangmeello vante adingin sum tampi kizang hi. Puan akhelkhel, muamkhum, leh adang akisamlopi kilei hi. Nu leh pate aw, Pasian’ sum tuabanga lunggulh thoih nadingin zatding hilo ahihna tate gen un. Ahih theih laiteng, a pyatang nangawnin kholsak un. Kei-nialna tawh pilna ngahding uha, kidek kikhalna aomlo zongsatna zong ngahlo tuamding uh hi.9

Akitangsamlo nate leina ding anialna, khut panin sumte amawkna in akizek khiatnate anialna panin naupangte in Jesu Christ a itna uh lak theiding uh hi. Innkuan sialah hih nasep kisem ding hi. Siamna leh teina akisam ahiphial zongin hihbangin hilhna in amau adingin ahoihpen ahi hi. Ta neute in asumte uh Topa kiangah hong ap uh hileh amaute piakkhiatna in luitui luang kigawm bang dinga, gunpi suak ding hi.10

Akimuhtheih nadingmun ah sum kemcing unla, Topa ading sumpi hi hen. Tuabangin amaute kipantah ding hi.11

Sawma Khat leh Sumpi piading Tate Pantah.—Topa in sawma khat Amah piakding angen bek hiloa, Ama adingin sehkhiatding hi, cilai hi. “Naneihsate tawh Topa zahtakin, napunna gah masate zong tawh zahtakun” naci hi. Nadeihna engah sum nazatkhit ciangin acianlaite tawh Topa kiang hong zuan in, cilo hi. Sawma khat piakhia masa pen ding, ci hi. Khasiangtho in Sawltakpite kiangah agennaah, “Nipikal nimasa ni in Pasianin note ahong punsakna tawh kituakin kaikhawmun” acih pen eite ading zonga agen ahi hi. Nu leh pa leh tate zong kihel hi.12

Mihau Pate in Abawl uh Khialhna.—Naupangte akhankhiatna mun in nu leh pa huzaapna sangin khauhzaw thei hi. Mihaute in akhangno lai bangun atate uh piang leh deih uh hi. Amaute khangno lai huna aomna munah tate akoihkik theiding uh ahihkeileh tuabang deihna in apiangtheilo thu ahi hi. Apate pen amaute’ tenna mual leh guamte in tu-a apianzia uh piang sak hi. Aneu lai un zawng uha, hahkatna, thuakzawhna tawh nakpiin na sem uh ahihmanin hong hau uh hi. Amaute zia leh tong zong zawnkhalna leh haksatna sang panin kilamto hi. Adeihte uh zong khiam thei uha, nasepna ah tangzangin, adeihna uh zong mawl uh hi.An leh puansilh angah nadingin pumpi thatang asan kul uh hi. Sumcilna zong zang hi.

Pate in atate uh amaute khangno hun in koihloin, ahauhna sungah koih uh hi. Tua in mi khempeuh khialhna ahi hi. Apate sinna sangah tate in asin uh hileh amaute bangmahin tate zong kimanna nei ding uh hi. Apate un atate adingin abaihzaw nuntakna nasiam sak uh hi. Apa topa pen zawnkhalna ahi hi. Tate pen kisapna aomlo munah koih hi. Adeih khempeuh kipia hi. Apa zia leh tong pen zawnkhalna sungah kikhalna tawh hong kilamto a, anthem zong iplah thei hi. Tate zia leh tong pen apa hun bang hinawnlo, nopsakna leh awllenna tawh kilamto hi. Nopsakna in ahong kim-um ciangin kua in nial ding hiam?13

Tate adinga Nu leh Pa Gaam.—Nu leh pa in tate apiaktheih ahoihpen gaam in kimanna anei nasep theihna leh piakkhiatna anei limlahna ahi hi. Tuabang tawh sum ie man kisehsiam pen hi. Amaute deihna maimaite nialin midangte kitangsapna huhna bek tawh Pasian’ nasepna kitangzai sak thei bek hi.14