Zo Phualva Thupuak Vol 07, Issue 10: Homosexuality leh Christian te

HOMOSEXUALITY LEH CHRISTIAN TE

Adventist numei pastor khat zahmawh kibang kilunggulhna vai in a nasep tawp hi cih nung issue ah ih gelh zo hi. Homosexuality cih pen Greek laimal Homos(kibang) cihleh Sex(zahmawh) kigawm(Webster) khawm hi a, Zopau in Zahmawh kibang kilunggulhna(Numei leh numei hiam, pasal leh pasal hiam kilunggulhna: Tongdot) ci in kizang thei hi. Lai Siangtho sungah zahmawh kibang kilunggulhna thu tang takin ahi in a hemnawl in ahi zongin a genna mun tampi ah kimu hi.

Lai Siangtho in zahmawh zatna pen numei leh pasal kiteenna tawh kisai hi cih gen hi. Pasian in piancil hunlai in tua dingin na kipsak ahihna, “Hih thu hangin pasal in a nu a pa nusia in a zi tawh kigawm dinga, amaute sakhat suak ding uh hi” (Gen 2:24) ci-in kigelh hi. Lai Siangtho genna ah zahmawh kibang lo pen kipsak hi. Zahmawh kibang kilunggulhna le kiteenna pen Lai Siangtho in kham hi.

Lev 18:5-23, 26 sung ih sim ciangin zahmawh tawh kisai in Topa deihloh teng a bangbang in gen suksuk hi. Aneu 22na ah, “Numei luppih bangin pasal luppih kei in; a kihhuai ahi hi”  ci-in na gelh hi. Pasalte in numei a luppih pen a ngeina hi a, pasal in pasal luppih pen Topa mit-ah kihhuai hi. Tua kihhuainate Lev 20:7 21 sungah zong kimu thei hi.

Rom 1:24 27 sungah zong Paul in Rome a thu-umte kiang tua hunlai a buaina ahi, “A numeite nangawn un, pasal tawh lupkhawmna ngeina uh a ngeina lo tawh a kheng uh hi. Tua mah bangin pasalte in zong numei tawh lupkhawmna ngeina nusia in pasal le pasal a kilung gulh mahmah uh hi. Pasalte, pasal dangte tawh a muh thadahhuai-in gamta uh …” cih thu ei kiang hong hilh kik hi. Amaute bawl khialhna tawh kituak thaman ngah uh hi na ci hi.

1 Cor 6:9,10 tungtang ah a kammal pen tuhun tawh kizui in Homosexuality in kizang hi. NASB in “effeminate(numei banga omte), nor homosexuals” cih kammal nih na zang hi. NKJV in amasa zaw ah “homosexuals” ci a, a nihna ah “sodomites (taw-huukte)” ci in na zang hi. NAB in bel “boy prostitutes(pasalno angzuakte)” le a nihna ah “sodomites” na zang hi. NLT in bel “male prostitute(papi angzuakte)” leh “practice homosexuality(zahmawh kibang a gamtate” ci in na zang hi. RSV in “sexual perverts(zahmawh lamah a kisiate)” ci hi. Khanglui laimal pawlkhatte bel tu hun adingin khiatna nei lo kammal ahi zong om a, Lai Siangtho letkhiate in 1 Cor 6:9 pen zahmawh kibang kilunggulhna ci uh hi.

Numei leh pasal ngiat kiteenna akipsakna ah Zeisu in, "‘A kipatcilin Piangsakpa in numei le pasal a bawl hi,’ cih thu leh  ‘Hih thu hangin pasal in a nu a pa nusia in a zi tawh kigawm dinga, amau gel sa khat a suak ding uh hi,’ cih thute sim ngei lo na hi uh hiam?  Tua hi-a amaute nih hi loin khat ahi hi, tua ahi ciangin Pasian in a gawmsate mihing in khen kei ta hen," a ci hi.” Matt 19:4-6. Hih Lai Siangtho munte ih sim ciangin zahmawh kibang kilunggulhna pen ei Pasian thu-um te ading hilo cih hong laktel hi.  Jude 7 ah, “Tua bang zia in Sodom le Gomorrah le a kima khuapite in numei-pasal paktatna le lehtatna ah amau le amau kipia uh hi. Amaute, tawntung meikuang sunga gawtna thuak dingte etsakna a suak uh hi” ci-in na kigelh hi.

Pasian mit ah numei/pasal kibang khin a, gupkhiat lungdam thu leh hehpihna thu in ciangtan omlo in ih vekpi ading ahi hi. Zeisu mahmah in mawhna hanga gawtna a thuak te kiang ah a hehpihna va tungsak hi. Mawhneite kiangah itna tawh thugen a, a mawhna-te uh maisak hi. A natna-te uh damsak hi. Mittaw-te khua musak a, bengngongte khua zasak hi.

Ei thu-um mite in zong Honpa hong lah lampi mah zui in, mi khempeuh tungah itna kibang in hehpihna tawh hopih in itna lak ding hi hang. Eite hong kipia thupiak in lungsim khempeuh, kha khempeuh leh pumpi khempeuh tawh Topa ih Pasian it ding hi a, tua zom ah ei le ei ih ki-it bangin midangte it ding ahi hi. Tua itna in hong sawlkhiat Lungdamna Thu tangko ding pen mikim tungah, pau namkimte (Matt 28:19; Mark 16:15; Rev 14:6) tungah  ih tangko ding ahi hi. Nang le kei mah bangin mawhneite Zeisu in ngai hi.

Ref: Statement on Homosexuality, www.adventist.org; Biblical Research Institute; Zomi International Version

MALAYSIA AH A HOIHPEN MUNTE

Malaysia pen Europe leh Asia gamte ngeina teng kigawm khawm a, mit ong la mahmah gam khat ahi hi.

1. Central Market: Kuala Lumpur khuapi sunga om hi a, minampi(Malay, Chinese, Indian) te ngeina teng lampi neu dungah kigual in sumbuk neuneu te ah kizuak hi. Khutsiamna van tuamtuam, puan nam tuamtuam leh lamgei nektheih tuamtuamte kizuak hi. Annexie ci-in muhtheih ding van tuamtuam lahna zong hi market ah om pah hi.

2. George Town: Tuikulh tunga kilam Chinese tampi teenna Penang State ie khuapi ahi hi. Penang pen British kumpi George III min tamin a kiphuak hi a,  Britsih tawh sumlei sumzuakna lam kizopna dinga thupi khat hi. Tanglai khuapite lakah khat hi a, tangthu tawh kisai innpite tampi om hi.

3. Langkawi: (Lang-ka-vi ci-in kisim) pen tuikulh 99 te lakah a phualpi khat hi a, a etlawm mahmah tuipi kam, a siang sehnel, tui cim sinsen leh tuipi nawl ah ciktui te om a singkung note a po zihziahna hangin Tourist te in Thai leh Singapore sangin lunglut zaw uh hi. Gammangtu lakah singkungte nim dildial kawmah mehteh mehgahte kicing a, fauna kici a kha san muvanlai te on etlawm takin zem hi.

4. A Famosa: Portuguese lai hi a, Famous(minthang) cihna hi in, Malacca khuapi ah aminthang kulhpi ahi hi. 1500 kiim pawl in a kilam hi a kum zalom tampi paita a, tau sangpi 4te ahih leh kisia ta a, lutna kongpi bek omlai hi.  Famosa pen Dutch leh British khut nuaiah a kia Portuguese te lam hi mah leh tua khuapi a colonized Europe te neihsa hong suak hi. Malacca khuapi ah kum zabi 17 laia kilam Dutch kumpi inn Stadthuys zong om hi.

5. Cameron Highland:  Tuipi maitang panin meter 1500 val sang a, 1885 kum in leitang teh a ong pai William Cameron in buan nawi lakah a tukna panin ama min tamsak in a kiphuak ahi hi. Hih mun pen Malaysia ading in niangteh cinna munpi hi a, singgah nam tuamtuam zong kicing hi. A lumna pen 10°C nuai ah kia lo in, 21°C tungah kah ngeilo in khuahun a votpen mun ahi hi.

6. Taman Negara: Square km 4,000 a zai huan pen Malaysia State 3 te kalkak in om a, a lauhuai ganhing tuamtuam ahi Malay sahang, aisa a ne macaque(zang namkhat) leh Asia saipi te omna ahi hi. Zai lua mahmah ahih manin tua ganhingte omna muh ding baih lo hi. Tua lo ganhing tuamtuam, paak nam tuamtuamte, le muh nop tuamtuamte  tampi om hi. Canopy Walkway (Kawllukhu lampi) kici zong meter 530 a sau om a, guahzuk hun ciangin singkung dawn pan in kigal-et thei hi.

Malaysia a om Zomi te zong ih tun nailohna munte phak sawm ni. Gamdang a om sasnggamte zongin Malaysia nong hawh uh ciang in hih munte ah hong vakpih unla, Topa hoihna va mu kawikawi in ciamkhawm ni cih hong zawn nuam ingh. Lungdam.

Ref: https://theculturetrip.com/asia/malaysia/

Homosexuality tawh kisai LST munte:

Gen 2:24: Hih thu hangin pasal in a nu a pa nusia in a zi tawh kigawm dinga, amaute sakhat suak

ding uh hi.

Gen 19:5: Amaute in Lot sam uh a, “Tu nitaka nang kiangah hong tung mite koi-ah om ahi hiam? Amau' taw ka luk theihna dingun ko kiangah amaute hong paikhiatpih in,” a ci uh hi. (TDM)

Lev 18:22: Numei luppih bangin pasal luppih kei in; a kihhuai ahi hi.

Judges 19:22: Amaute in inn nei puteekpa kiangah, “Ama taw ka luk theihna dingun na inn-ah a hong tung mipa hong paikhiatpih in,” a ci uh hi. ( TDM )

I King 14:24: biakna phualte-ah numei-pasal paktat pawlte zong om uh hi.

Matt 15:19: Lungtang pana piangte: ngaihsut khel, tualthahna, angkawmna, numei le pasal paktatna, guktakna, zuau teci panna le gensiatna-te ahi hi.

Act 15:29: Milimte thoihna ante, sisan, ngawngheklup ganhingte sa, le numei-pasal paktatna na tang ding uh hi.

2 Cor 12:21: Note kiangah kong pai kik ciangin … kihuai-gamtatna, numei-pasal mawhna, huk luatna lanluatnate hangin mawh napi a kisik lo mi tampite hangin ka dah khak ding ka lau hi.

Gal 5:19: Mawhdim pianngei gamtatna telnop mahmah hi: numei-pasal paktatna, siantho-lohna le hukna-lanna…

I Tim 1:10,11: angkawmte le a lehtatte, sila zuaka summet bawlte le zuautheite, zuauthu-a a kiciamte le thu-up maantak tawh kilehbulh peuhmahte adinga kibawl hizaw a, tua thu-up maantak pen, amah in kei hong kepsak thupha Pasian aa ahi, a minthang lungdamna-thu tawh kituak ahi hi.

Heb 12:16: Kuamah in numei-pasal paktatna bawl kei hen.

Rev 22:15: A pualam ah ahileh, uite, dawi-ai tawite, numei le pasal paktatte, tualthatte, milim biate, le zuauphuah nuamsa-a, zuauthu gente peuhmah a om ding uh hi. (LST munte Ciaptehna aom kei leh ZIV kizang hi)