Ka Naupa (June 17, 2017)

Sim Ding Hi Lo, Geen Ding!

June 17                                                                  Nigeria Gam

Ka Naupa (Agen: Goa)

Maainawt (Adventurer) tawh ka kipan a, lianto seemseem in, Lam makaih siampa (Master Guide) ka suak hi.
         Ka min pen Pastor Goa Adeniran hi aa, Babcock Universty ah khangnote khantohna lamah ka seem hi. Tumaa sawtpek laai-in huang sungah Khangnote Pasian nasepna phualpi ah hong huh thei ding mi a tam theithei kisam ahih lam ka phawk hi.
        Kum tampi sung Adventist khangnote nasepna ah ka kihelna tungtawnin theihna siamna tampi ngah kahih mahbangin ka theih thute midangte tungah ka geenkhiakik nuam hi.  Pathfinder lai hilh dingin nasep ka kipan aa, khangote nuntaakna ah Pasian itna tawh a kidim nadinguh ka pantah hi.
        Pathfinder ah hong kihel khat pa min peen Mustapha ahi hi. Amah pen kum (15) phata in Lagos khuapi sungah taihinn lamsang company ah seem hi. Tua mun ah na a seem lawm khat ka nei a, tua mun ah Mustapha tawh kimu in tawmvei sung ka kiho uh hi.
Ni khat, mi khat in ka lawmpa kua hiam cih hong dong hi. “Oh! Tua pa pen ka sanggampa hi,” ci-in ka dawngkik hi. Mustapha pen bangci kalsuan hiam cih ka encik aa, amah pen a vaai tawh lungkim mahmah hi.
         Tuani aa kipan in, Mustapha in kei pen, “Ka sanggampa hi,” ci-in  mikhempeuh tungah geen hi. Amah ka khualna ama’n theisiam ahih manin ka kipaak hi.
         Mustapha in a hoih lo lam huzaapna nei a, a hoih lamin hanciamin ka makaih ahi hi. Ka ki-it seemseem uhaa, ama’n zaa teep in zuu zong dawn aa, zongsang luata hi. Hih laai mun ah mi lakah vaang neih nadingin zuu kidawn in zaa kiteep hi.
         “Mustapha aw, na zongsatna hoihlote in na cidamna sukha ding hi,” ci-in ka hilh hi. “Nangmah bangin nasep ka hanciam aa, ahizongin tuate ka zang kei hi. Ken zang loin om zo ka hihleh nang zong tuate zang loin om theilua hiteh,” ci-in ka hanthawn hi.
          Khat veivei ciangin, Mustapha in ka thugeente hong ngaai mah hiam cih ka telcian kei hi. Ahizongin, ni khat, a tawp nadingin zuu a dawnna leh zaa a teepna hong geen hi. Amah zuu leh zaa sila kol pan suakta ta ahihmanin Topa’ min ka phat hi.
          Mustapha pen Tapidaw hilo hi. Ama’ tungah Topa Jesu’ thu ka geen nuam aa, ahizongin hun hoih khat geel ding kisam hi. Ama’ cidamna, a innkuan leh a nuntaakna a hoih lamin a khantoh ding ka deihsak hi. Ama’ kisapnate itna tawh ka hilh theih nadingin amah tawh ki maaingaapna ka nei masa nuam hi.
          Mustapha in a pa a sih ciangin a innkuanpih a vaak nadingin nai tampi naseem a, thu limtakin ngaihsun zawta hi. Sep ding bawl dingvaai ah lunghimawh theita ahih manin ka lungdampih hi.
          Mustapha aadingin thu ka ngetsak aa, kahih theih tawpin amaa’ etteh theih aa om dingin ka hanciam hi. Amah in, A pa a om nawnloh ciangin sumkholna ah sazian hon ding leh nasep khat a ngah nadingin a panpih ding mi khat kisam hi. Ama’ pa dinmun ah ka dinzawh nadingin ka hanciam hi. Amah ka pantah a, a masuan ah a gualzo mi khat a suah theih nadingin khutsiamna tuamtuam zong ka hilh hi.
         Biakinn ah Mustapha ka kikhoppih thei naaikei hi, ahizongin Topa Jesu’ thu ka geenpih theita hi. Topa Jesu in mi kheempeuh hong it ahih manin nuntaak tawntungna ngah nadingin mimal khat aadingin hong sihna thu ka geenpih hi. “Kuateng kihel hiam, ka nau aw,” ci-in ka dong aa, “Nang zong na kihel hi,” ka ci hi.
         Mustapha pen minit khat bang a daihdiidee khit ciangin hong enin hong nuihsan hi. “Pastor aw, Lai Siangtho bu khat nong vaihawmsak thei ding hiam?” hong ci hi.
        Tu kuata Sabbath sawm leh thumna sumpi tawh a tam simsim Adventist khangno Pasian’ naseemte in a tuamtuam in a zat theih dingun University huang sungah innpi kilam ding hi. Tulaitakin ki muhkhop nading leh biakpiakna bawl nading mun om lo hi.
         Adventist khangnote Pasian nasepna kipawlna peen thupi mahmah aa, a om loh a phamawh ahi hi. Banghanghiam cihleh Topa Jesu in a maute a it lam a thei khalo khua sungah a teengte leh Tapidaw a suak naailo saangnaupangte tungah Lungdamna thu geenkhiat nadingin hong mainawt pih hi.
         Hih khangnote phualpi thak in veeng leh paam a vaphaa dingin pattahna vaai ah hong huh ding hi. Tu kuata Sabbath sawm leh thumnasumpi hehpihna tawh phaltakin a tam theithei hong pia un. Lungdam lua!

@@@@@@@+++++++++@@@@@@