Tua Phualpi Bekmah (June 10, 2017)

Sim Ding Hi Lo, Geen Ding!

June 10                                                                Nigeria Gam

Tua Phualpi Bekmah (Agen: Chiemela) 

Banghangin kum hih tanvei Adventist Khangnote Pasian’ nasepna ah kihel kahi hiam? Banghanghiam cihleh kei aadingin a hoihzaw mun dang om lo hi!
Ka min pen Ciemela Ogu hi aa, Babcock saangpi huang sungah a om Pioneer Pawlpi ah Pathfinder makaipi kahi hi. Ka pa in ciaptehna laibu a kikoihna zum ah na seem ahih manin hih saangpi huang sungpan ka khangkhia hi.
Hih Babcock saangpi huang sungah ka om sungin, kei hong makaihte in sila makaai dingin hong pantah uh hi. Ka Pathfinder pawl ah hong kihel pawlkhatte pen Tapidaw a suak naailo innkuan hi aa, Topa Pasian in amaute kiangah Amaa’ hong itna thu geenkhiat ding hunphaa hong pia hi. Amaute in Topa Pasian’ mawhmaisakna leh hehpihna thu a sin kawmkawm un hong kikheelna uh ka muh ciangin septaak mahmah kasa hi.
Ka lawm it mahmah khat in Pasian hopih dingin kilawmkisa lo aa, mawhna tampi a bawllam, a thusim hong geen hi. “Thu zong ka ngen thei nawnkei hi. Banghanghiam cihleh Pasian in hong ngaai nawnlo dingin ka ngaihsun hi. Ka kizopna uh kitatsak ta ing,” hong ci hi.
Ka lawm in Topa Pasian in amah a itna a kiam ngei lohna thu geenpih in thaa ka pia hi. “Suakta takin Topa tawh kiho in. Na mawhnate lungsim takpi tawh pulaak inla, mawhmaina ngen in. Tua khit ciangin Amah in nang hong et ciangin mawhna a neilo Topa Jesu’ nuntaakna mu hi cih um in, muang in,” ci-in ka hanthawn hi. A sawt loin amah zong a mawhnate damdam in pulaak aa navaak kisa seemseem hi.
Khangno tampi takin haksatna tuamtuam tuak uh hi.  Ka theih pasalno khat pen pau ngei selo in a mahbek mah om lel hi. Amah tawh kilawmtaa kahih manun, a ngaihsutsut thu hong pulaak hi. “Saang aa ka lawmte in kei pen a kiphasak leh kithuahpih theih ding hi loin hong geen uh hi,” ci-in mai khing ngeungau in hong geen hi.
“Tua ahihleh, na lawmte hong geen maan in na um hiam?” ka dong hi.
“Maan lo hi. Kei pen a zum thei mahmah khat kahi hi. Thu khat peuh ka geenkhialh khaak ding aa, mi khatpeuh’ lungsim ka natsak khaak ding ka laauthawng hi,” ci-in lungnuam het loin hong geen hi.
“Midangte lungsim na natsak nop lohna pen amaute in hong paaktat nading uh ahive lawm,” ka ci hi.
“Lawm aw, tua bang hikei veh aw. Amaute in kei pen a kiphasak in hong ngaihsun ngiat uh hi,” hong ci hi.
“Lawm aw, amaute’n hong paakta kei zongin ke’n hong paakta ing. Midangte inzong na om zia hong paakta ding ai ve,” ci-in ka dawngkik hi.
Hih pasalno inzong mi khempeuh in a mudah ahih lohlam hong tel seemseem hi. Mi pahtaak nadingin bangmah kheel a kisap lohlam hong telsiang hi. Amah leh amah kimuan theihna hong nei theita a, ka lung hong nuamsak hi.
Adventist Khangnote’ Pasian nasepna ah a kihel pawlpimite in midangte zong thaa ka pia kawikawi thei uh hi. Sabbath ni kikhop khit ciangin, “Muutpuak tawh Pasian Thugeenna” cih ka bawl uh hi. Lai Siangtho sungaa kamciamte muutpuak tungah gelhin saangnaupangte ka pia uh hi. Saangnaupang pawlkhatte in, “Thupi lua! Hih Lai Siangtho kamciamte tu laitakaa ka kitaangsap ahi hi,” ci uh hi.
Babcock University (saangpi) pen ki-itna tawh a kidim innkuan khatbang ahi hi. Pasian’ itna a theikha ngeilo ding mite kiangah Amaa’ hong itna ka geenkhiat theih nadingun a hoih theipeen in ka nasep zia uh ka khan uh hi. Ka sep theih dinguh a tamzaw tham om laai hi.
Tu kuata Sabbath sawm leh thumna sumpi pawlkhat tawh khangnote aadingin kikhopna innpi khat, biakinn khat leh naupangte khutsiamna tuamtuam ka hilh theih nadinguh inn khat kilam ding hi.
Ka suunmangh pen Pathfinder pawl sung panin mipi lakah kimuang takin thuhilhsiam khangno khat pattah ding ahi hi.  A kilam thak ding khangnote phualpi tungtawn in khangnote kipantah thei ding ahih manin ka lung kim mahmah hi.
Tu zawh kum (10) ciangin pilna khang mahmah laai ding hi.  Leitung aa nazat tuamtuamte in  ih naupangte lungsim a laakmangh ding ka ngaihsut ciangin ka lung a kham hi. Pasian’ deihna tawh kituakin khangnote a nuntaak theih nadinguh leh mailam hunah a piang ding ze-etna pan-in a kikepsiam theih nadinguh thupi ngaihsun ding ahi hi. Tua ahihmanin khangnote ih hilh theih nading a tuam vilvel mun khat neih ding thupi mahmah in ka um hi.
Tu kuata Sabbath sawm leh thumna sumpi pawlkhat pen Babcock University (saangpi) in ngah  ding ka hih manun ka lungdam zia uh ka geen khia theikei liangh uh hi.  Kuata simin leitung bup Adventist pawlpi sungah a kipholaak khia Adventistte’ Pasian’ nasepna thuthang ka za uh hi.  Pasian’ hong sawlna piicinsak nadingin a hoih theipen in ka sepna uh thuthangte, sanggamte in na za thei ding cih tel kahih manun ka lawp mahmah uh hi. Hong geen phapha ning maw! Lungdam lua ung!

@@@@@@@@@@@@@@++++++++++@@@@@@@@@@@@@@