A Lungtang Uah A Om Kham

Gen Masak Pen Ding!

Trans-European Division sung ah gam 24 om hi.

            Hih division sungah mi awn 214 val teeng uh a, Adventist pawlpi mi 85,289 om hi. Adventist pawlpi mi khat ciangin mipi 2,401 pha hi.

            Hih division sungaa gamte pen gam khangto khinsa vive ahih manun Pasian’ a um tawm lua mahmah hi. Tua kawmkal ah Pasian in amaute Ama’ pawlpi sungah a tunpihna a lamdangsak huai thupiangte na mu khia ding hi.

            Tu kuata sung aa Sabbath (13) na sumpi tawh Ireland gam Dublin khuapi ah a kisap phat mahmah uh biakinn lam nading, Norway gam Oslo khuapi ah “Lungdamnathu” tangkona phualpi leh khangnote phualpi lam nading, Poland gam Warsaw ah Hope Channel aadingin television studio khat lam nading leh Croatia gamah akiphuan, Adventist ahi lo sangnaupang a tamzaw in pilna a sinna Marusevec (Marusevek) Adventist sang pasal bawldaa khat lam nadingin kizang ding hi.

            Akilam thak ding biakinn, pasal bawda leh adangdang te aadingin nong dinguh Sabbath (13) na Sumpi hangin ih biak Topa Zesu min tawh lungdam kong ko hi.

            Topa Pasian’ kiangpan thupha tampi na ngah nading uh hong deih sak!

Rine Wahlen

Gamdang Tangthu at nu

Nipi 1na (1st Qtr, 2017)

January 7, 2017                                                                                                                 Ireland Gam

“A Lungtang Uah A Om Kham”

Agen: Theda (Teda)

            “Teda in ama’ nu thungetna Pasian in  a dawnzia leh midangte a vaphaa dingin a tawisangna thu hong gen hi.”

            Nupa kikhen innkuan sungpan in ka khangkhia a, ka nu pen Lai Siangtho lam nasem khat ahih hangin sawlpi takmah pawlpi pua lamah ka om hi. Kum (18) ka phaak in inn pan ka paikhia a, hong don peuhpeuh tawh ka kithuah kawikawi hi. Zu dawn loin nikhat nangawn ka om thei nawn kei hi. Ka nu in kum (10) val ka kikheel nadingin nasiatakin veina tak tawh thu hong nget sak hi.

            Kum (30) ka phak ciangin mawtaw tawh kitaih in ka tuahsia a, khukdin kawm in Pasian tungah ka ki-ap hi. Lai sim a thadah khat ka hi a, ka nu in ka sim ding cikmah a, ka sim ngei loh Ellen G White laibu te ka kiangah hong koihsak hi.

            Lungnuam thei hetlo kahih manin ka nu hong koih laibute ka baan et a, “The Truth About Angels” (Vantungmite Thu) laibu simhuai sa in la in ka simpah a, a nuai aa thu in ka lungsim hong sukha mahmah hi.

            “Tomcik vei sung, nai khat sung, nikhat sung in bang piang ding cih thei peuhmah lo ih hih manin vantung Pa Pasian khut sungah ki-apna om lo pi-in bangmah ih hih kei ding hi. Eite hong cing dingin vantungmite kisawl a, amau kep dingin ih ki-ap leh a lauhuai hun khat peuhpeuh ciangin ih taklam ah hong ompih ding hi.” ( Laimai 14)

            Nitak khat ka lungkia lua ahih manin ka lupna pan tho in ka tu hi. Zu dawndawn lai ding hi thei nawn hetlo hi cih ngaihsutna thak ka nei a, bangci ngawl theih peuhmah ding cih pen lamdang ka sa hi. Thakhat thu in upzawh loh dingin a khauhpai ngiimna ka nei a, dingkhia in eekbuuk ah ka zu dawn bangh a om laiteng ka bua hi. A hoih loh zongsatna hong zatpihte ka pawlbawl nawn kei a, khuapi dangah lal in biakinn ah ka kikhawm hi.

            Ahi zongin zu ka dawn khakik zel hi. A sawt loin Topa’n hong kaikik hi. Zu ngawl nuam taktakta kahih manin, “Tu in kangawlh kei leh, ngawl zo nawnkei ning”, ci-in pawlpi kem pastor pa kiangah  ka gen hi.

            Ka nasepna pan zaan sagih khawlhun la in ka innmai kongkhak ka kalh hi. Amasa ni (3) sung naisim phialin khukdin-in Topa Pasian’ huhna ka ngen hi. Singgah ne in tui leh singgah tui ka dawn hi. Mawngphal tang, nipipaak tangte ka ne hi. Tua bangin ahoih lo zuguteng ka siangsak hi. Damdam in ka navaak seemseem hi. US pan ka gam uh Ireland ah thuhilhsia hong pai ciangin thuhilhnate ngai in tui ka kiphum hi.

            Cidamna lam tawh Pasian’ nasepna ka uukna hong khang in Dublin khuapi ii a khanglam aa om Adventist pawlpimite’n a phuat Cuisle (Kuisile) ah na ka seem hi. Tua phualpi ah saang- kah zawh ni nih ni leh ni lii ni simin ki pumpiak in na ka seem hi.

Zingsang khat, tua phualpi ah mehtui tawm ka tawi hi. Ka tut khit ciangin siksakol tuang aa hong pai pasal khat ka mu hi. A samte phiahgawpin a tha zawmtuak mahmah hi.

            “Sia aw, na dam hiam? Bangci hong huh theiding ka hiam?” ci-in ka dot leh “Ka cih nading thei kei mai ing,” ci-in hong dawng hi.

            “Na sisan kigaakzia(blood pressure) kong tehsak ding hiam?”, ci in ka dot leuleu leh, “Neek theihding a om hiam?,” ci-in hong dawng hi. Antui pawlkhat tawi kahih manin ka kipaak mahmah a, ka lumsak kawmkawm in ka hopih hi. Hih pa pen Pasian ka omna ah a hong pai tawh kibang kasa hi. Amah pen migi in kamkhum ahih manin ka lungsim hong sukha hi.

            Amah in mitvun keensa nei a, na zong sa hi. Apuante ka laihsak khit ciangin biakinn ah paipih in thu ka ngetpih hi. Ama’n khukdinzia ding  nangawn thei lo lai hi. “Gending thu tampi ka nei hi. Biakna lam makai khat in hong selpho hi”, ci-in hong gen hi.

            Nisial in biakinn ah thu ka ngen khawm uh hi. Tuazawh kha guk sung, thunget kikhopna leh Sabbathni sim in biakinn ah hong kikhawm hi. Nikhat, a inn ah ka va pai hi. A inn siangtho peuhmah hi. Inn sung ka lut leh a kawm tungah Topa’ Zeisu lim na kisuang hi. “Topa Zeisu ka hopih tawntung hi,” hong ci hi.

            Tua khit ciangin Kuisile phualpi ah a masa ni aa hong paina thu hong gen hi.

            “Biakinn kheng in siksakol tuang in ka paisuak leh kilehkik in la, biakinn ah pai in, ci-in hong sawl om hi. Biakinn ka khen khit ciangin kong kilehkik hi,” ci-in hong gen hi.

            Ama’n zateep khawl nuam ahih manin zatep khawl nading geelna ah ka kihelsak uh hi. Amah zong lungdam peuhmah hi. Ahih hangin zateepkik mawk ahih manin biakinn ah hong kikhawm ngam nawn lo hi. Kei zong vahawh in pawlpimite in ka ngaih ka phawkna uh ka va gen hi. Zateep khawlzawh nadingin hong huh ding hi ung ci-in tha ka va pia hi. Aman’ zong ko hong phawk lam hong gen a, hong kikhawmkik hi.

            Mi pawlkhat  a lungtang uah Pasian in kham koih hi. Kiim leh paam aa omte ka it hi. Hih pawlpi ah ih omkhak pen thupi mahmah hi. Mite’n hong zuan uh hi, banghanghiam cihleh sun thapaai in a vaakvaak na hangin tawl gawp uh hi.

**********