Sahamte Tawh Lumkhawm (Agen: Ferdinand)

October 29, 2016                                                                                      Austria            

Mission Story - Nipi 5na (4th Qtr, 2016)

Sahamte Tawh Lumkhawm (Agen: Ferdinand)

                                                                                                                 

            Ferdinand pen sahamte tawh lumkhawm tawntung sam lo hi.  Ama’ nuntak sungin a minthang khuapi  Vienna ah a hoihkhom nuntakna tawh nungta ngei hi.  Ahi zongin a sumzon nasepna hoih nawn lo in a sum lut zong nakkiam lua mahmah hi. Tua ahih manin mi’ tenna ah teeng nawnlo a, lamdung ah teen ding Ferdinand in khensat hi.

            Lupna puanlom ip pua in a inn pan hong pai khia a, Vienna khuapi sung tawn-in a luang Danube gun ii a khanglam aa om Donau tuilakna ah lup theih nading mun khat mu hi. Tualai ah sahamte tawh lum khawm hi.

            Ferdinand in, “Ka omna singkung pen a nuai panin sahamte’n   hong pet sak ziahziah uh hi” ci-in lau kawm in gen hi. Sahamte’n tua singkung petpet mawk ahih manin Ferdinand  zong, “Hih singkung khatbek ka neihsun hi ta hi. Hehpihna tawh a dang singkung na pet un” ci-in a gen ciang sahamte’n a thu mang bilbel uh hi.

            Tua zawh kal 3 khawng hong sawt ciangin kumpi leitang sazian kem nasemten tua saham matsawm uh a, Ferdinand in zong tua saham huhna a thuhna in, “Na zon uh saham pen mundang ah om hi ding hi. Sabengte hong pai zel hangin man zo ngei lo uh hi” ci-in nui hiauhuau kawm in gen hi.

            Ferdinand in a omna gei-ah a luang luitui tawh hong kisil saisai khit ciangin nidangaa laibu  a sim zelna laibusaal ah pai dingin Vienna khuapi sung hong zuan hi. Nitaak ciangin inn khat ah an ne a, tua khit ciangin a lupna mun Donau tuilakna zawi hong zuankik hi. Tua bangin a zingciang zong hong gamta hi.

            Inn leh lo a neilote’n  midang tawh kithuahkhawm thei mahmah uh hi cih Ferdinand in gen hi. Inn leh lo neilote aadingin a khawnkhongin an leh puansilh kingah theita hi cih thu manlang takin hong kizel hi. Tua bangin Ferdinand in Seventh-day Adventist-te tawh kimeeltheihna hong nei hi. Puan hoihpente  Vienna khuapi sungah a kiphuan ADRA (Adventist Development and Relief Agency) ah a khawnkhong in kingah thei hi cih thuthang lamdung aa tengte in hong za uh hi.

            ADRA zum ah Ferdinand va hawh a, puansilh bek ngah loin sunan a lum hithit zong va ne kha lai hi. Adventist pastor Evald zong tawh hong kimu thei uh hi. 

            Ferdinand kiangah, “Huhna na kisap leh hong huh ning. Ahi zongin nang khensat in” Evald in ci hi. Ferdinand in zong pastorpa’ deihsakna diksa in ADRA phualpi ah va hawh zel a, a nih un hong kimeltheih mahmah ta uh hi.

            Tua zawh kum (6) sung Ferdinand leh Evald nuntak khuasak vai, biakna vai leh Pasian’ Thu kikumkhawm thei uh a, nuamsa uh hi. Damdam in Ferdinand’ ngaihsutna hong kikhel aa a nuntakzia zong hong kikhel hi. Amah in lawm leh gual hong neita a, a nuntakna ah Pasian a kisap lam hong phawkta hi.

2014 kum ni khat,  Pastor Evald in, “Ferdinand aw, inn leh lo a neilote aadingin bang vaihawmsak thei ding ih hiam? ci-in dong hi.  Pastorpa in tuabang thu a dot ciangin  Ferdinand lungdam mahmah a, inn leh lo neilote aadingin bang dang kivaihawmsak thei lai ding hiam ci-in thupi ngaihsut mahmah hi. “Sep taktak dingin geelna bawlna kha (3) bang hong sawt a, September kha in nasep ka kipan thei uh hi” Ferdinand in ci hi.

            Tuahun sungin, pastor pa’n ADRA makaihpa (director) Marcel Wagner kiangah Ferdinand pen a nuntak zia kikheel in makai sem thei ding hita ahihna genpih hi. Ferdinand tawh Marcel a kimuh uh ciangin  hong lung lut hi.  ADRA makaipa Marcel in a genna ah, “Ka kiho uh ciangin, Ferdinand in ADRA nasepna ah huzaap a nei zo ding khawmuhna a neih lam ka tel hi. Ama’ geelna bangin nasep a kipat ding ka hanthawn uha, a nasep nading mun zong ka vaihawmsak uh hi. Tu-in amah pen khasum a sang ADRA geelna makai (project manager) hita hi” ci hi.

            Ferdinand’ geelna ah Pasian’ nasepna nam nih om hi.  “Inn leh lo neilote Sunday ni-in zingan ka vak uha, amaute sam in Sabbath ni nitak lam in Lai Siangtho sinpihna ka kipan pah uh hi” ci-in  ama’n  hilhcian hi.              Ferdinand’ makaihna tawh, ADRA nasepna huzaap pen nasiatakin khangto hi.  Kha thum bang hong sawt ciangin ADRA nasepna pen inn leh lo neilote, galtai leh dongtuak gambelte leh huh ding a kisamte na ngawn huhna ki khanto hi.  Sunday zing anvakna leh Sabbath nitaklam Lai Siangtho sinna baan ah Nilai ni (Tuesday) leh Ninga ni (Thursday)  simin sunan kivak hi. Puansilh pen Nilai ni sialin pasalte leh Nili ni sialin numei leh naupangte kipia hi.

            “Ferdinand in nuntak khawsakna haksa a sate huh hi. Amahmah zong lamdung ah teeng ngei ahih manin a kisapna uh tel hi” Marcel in ci hi.  “Khualna tawh mi a limbawlna hangin amau zong hong it uh a, buaina bangmah om lo hi. Kitotna kiselnate om lo a, mundang tawh kilamdang hi” ci-in genbeh hi.

            Ferdinand in Vienna khuapi sungah a om Adventist biakinn khat ah hunmaan takin kikhawm hi. Thaman ngen loin ADRA ah a hong huh mi 65 zong hoihtakin  makaih hi.

Ferdinand in genbeh a,“Adang ka nasep uh pen, pawlpimite tonpih a, thaman ngen lo aa sepkhopna ahi hi.  Pawlpimite’n zong Adventist a hilo a lawmte uh hong tonpih in na semkhawm uh hi” ci hi.

            “Ferdinand in hong sepma in pawlpi tuamtuam pan-in a pawlte tawh hong pai in nasepna tawh kisai geelna nei uh hi. Ahi zongin tu-in kua pawl kua pawl cih om loin midangte tawh kipawlkhawm in na sem uh hi” Marcel in ci hi.  Amah in genbeh lai a, “Pawlpi kem siate zong a pawplpimite tawh bek hi loin midang zong tawh na a sepkhop nadingun Ferdinand in thuum hi” ci hi.

#######@@@@@@@@@@@@@@@@@@@#######