Inn Cih Ding Mun Khat (Agen: Yuxin)

October 22, 2016                                                                                  Austria     

    

Mission Story - Nipi 4na (4th Qtr, 2016)

Inn Cih Ding Mun Khat (Agen: Yuxin)

            Yuxin (Ushin) in Austria gam, Vienna khuapi aa om leitungbup aa a minthang Prayner Tumtheih sinna sangah piano sin dingin hong zin khia hi. “Kha Siangtho tawh kidim inn zong in”, ci-in a nu in a thupi mahmah thu vaikhak hi.

            Yuxin leh a nu in Sen gam ah Tuiphum pawlpi biakinn ah kum 10 bang kikhawm uh hi.  Tua zawh ciangin, ni khat Yuxin’ nu in Lai Siangtho a sim laitakin kal khat ah ni sagihni in Pasian’ ni siangtho ni a hihna hong thei thak hi.  Ama’ theih Sabbath thu a tanu kiangah a gensawn ciangin Yuxin zong lamdang sa hi.

            A tanu Yuxin in zong, “Tua bang thu thei kha ngei het sing e!”, ci-in a nu dawngkik hi.  Tua Sabbath ni tawh kisai thunget ding khensat in, Yuxin in, “Topa Pasian aw, hih ni sagih ni Sabbath thu a maan takpi mah hiam? cih hehpihna tawh hong gen in” ci-in thu ngen hi.

            Yuxin in Seventh-day Adventist pawlpi a muhzawh a sawt loin va hawh ding khensat pah hi.  Pastor pa tawh a kimuh ciangin Yuxin in Sabbath thu tawh kisai dotna tampi leh Adventistte upna bulpi tawh kisai dotna te dong hi. Pastor pa zong lungduai takin Yuxin’ dotnate Lai Siangtho sungpan in dawngkik hi.

            Ahi zongin Yuxin in Pastorpa’ dawnnate a maan dingin um zo taktak lo hi. “Maan kha thei ding hi,” ci-in ama’n ngaihsun a, ahi zongin pawlpimi suak dingin ki-ap ngam nai lo hi.  Tuahun laitakin Yuxin in voksa ne lai a, ngawl nuam nai lo hi. Bangbang ahi zongin, Vienna khuapi hong tun khit ciangin Yuxin in gam tuamtuam pan kikhopna Seventh-day Adventist pawlpi thu internet pan hong mukhia a, Pastor Felix tawh hong kiho uh hi.

            Pastor Felix in, “Metro bus khawlna ah  Yuxin ka va dawn a, biakinn ah ka tunpih ciangin hihlai munah om ding lawptuak mahmah hi”, ci hi.

A Tawpna Ah Tawldamna

            Yuxin in, “Hihlai mun ka tun khak kei aadingin hoih mahmah hi. Ahang in Seventh-day Adventist pawlpi’ thu ka tel kei a, a thugente uh ka ngai hi. Kiginni (Friday) nitak leh Sabbathni (Saturday) ni-in ka kikhawm hi”, ci hi.

            Tua zawh kal nihna ciangin Yuxin in gam tuamtuam pan kikhopna Seventh-day Adventist pawlpi ah kikhop nuam hong sata hi. Yuxin in, “Nuam lua hi. A tawpna lam ciangin ka lungnuam a, ka tawldam hi. Tua baanah Sabbath ni aa Pasian’ Kammal ngai thei in tha ka ngah semsem hi” ci-in maitai takin  gen hi.

            Yuxin in kikhop ni sial in hong kikhawm a, Lai Siangtho thumaan hong theihbeh in Adventistte thu zong hong tel semsemta hi.  “Pastorpa’ thugen in ka lungsim hong sukha hi.  Kei aadingin  a lamdang mahmah tuahkhak thu ahi hi” ci-in lungdam takin gen hi.  “Pasian in a hoih lo ka zongsatna tampitakte- voksa neekna, Sabbathni aa vanleinate  ka khawl zawh nading vangliatna hong pia hi. Tu’n theita kahih manin ka zongsatnate ka khawlta hi” ci-in teci pang hi.

            Nung May kha in, Seventh-day Adventist pawlpi sungah Yuxin tui hong kiphumta a, Vienna khuapi aa a Thumaan theih pen a gam ah ciahkik in a gensawn ding lawp mahmah hi.  Yuxin Austria gam a om sungin ama’ innkuanpihte Sengam ah a saklam pan-in a khanglam ah na lal uh hi. Tua mun ah Adventist pawlpi om lo hi. Inn hong ciahkik ciangin, Yuxin in a innkuanpihte leh a vengte kiangah Adventistte kiangpan a sin Lai Siangtho Thumaan hilh sawn dingin geel hi. A sawt loin Adventist innkuan Pasian biakpiakna  kipan thei ding cih zong Yuxin in lamen hi. Veina taktawh, “Banghangin Adventistte hih leitungah om a hi hiam? cih thu leh Vienna khuapi aa ka sin Thumaante amau zong a theih ding kisam hi. Topa Pasian in Thumaan kei hong gen takpi a, tu in ken zong tua Thumaan a maute ka gen thei ding hi” ci-in atupna Yuxin in gen hi.

Gam Tuamtuam Pan Sangnaupangte

            Yuxin pen Vienna khuapi ah a kiphut Gam tuamtuam pan kikhopna Adventist Pawlpi thei aa a kikhawm gam tuamtuam pan pilna sin sangnaupang tampite lak pan khat ahi hi. Abigail pen Vienna khuapi ah a om lasak siamsinna leh Music lam sinna University (sangpi) ah  pilna sin dingin Mexico gampan in hong pai hi.

            “Ka tuncil-aa kipan hoihtakin hong kimuak in a sawt loin midangte tawh ka kimeltheih pah uh hi”  Abigail in ci hi. “Gamdangmi vive ka hi uh a, a kibang haksatna ka nei uh hi. Damna ngah dingin hong pai ka hihmah bangun inntek gammite thusiam mahmah uh a, hong khual mahmah uh hi. Khrist sungah innkuan khat banglian ka hi uh hi” ci-in genbeh lai hi.

            Lorenzo zong Mexico pan hong pai Vienna sangpi (university) ah Ph.D. a sin sangnaupang khat mah ahi hi. Amah zong gam tuamtuam pan a pai mite kikhopna Adventist pawlpi ah kikhop nuamsa hi. Tua banah kal sim aa kikum khawm a, anneekkhopna  ah nuamsa beklo in Thu manpha kha an mahmah in zong a kha tha hong dim sak hi. “Sabbath School thusinna leh hong kigen thuhilhnate in ka kha tha hong khauhsak hi. Atung lamin kei guak kong pai a, tu-in ahihleh kong tonpih ding pawl ka neita hi” ci-in lungdam takin gen hi.

            Yew pen Vienna khuapi ah a om zatui lam sinna sangpi (University) ah siavuan a sin Ghana gam pan a hong pai sangnaupang khat ahi hi.  “Thukan khiapa ka hihmah bangin, na khat peuhpeuh ka tehkaak hi. Tua mahbangin ka deihna tawh a kituak pawlpi khat ka zonsaan laitak hi a, hih pawlpi ah nuam ka sa hi. Ka gam mipih Ghanate pawl khat tawh ka kimu thei a, an neek man loh ciangin zong hihlai ah an ka ne zelzel hi. Innkuan khat bangin om khawm in khat leh khat kinuihsan a, nuam mahmah hi” ci-in maitai takin gen hi.

A Khangto Innkuan

            A kikhalum suah gam tuamtuam pan thu-umte kikhopna pawlpi pen hong khangto mahmahta a hihmah bangin tu-in a lianzaw biakinn thak khat kisamta uh hi. Tu kuata 4na aa ih ngah Sabbath sawm leh thumna sumpi pawlkhat pen hih pawlpi ah kizang ding a, khuapi sung nehzaw in a lianzaw in kilam ding hi.   

            Abigail in a genna ah, “Hih mun pen a mun a neu hangin Thumaan thei nuam mi tamzaw hi. Mi tam zaw in Thumaan tel thei ding uh a, Thumaan kizeel kim baihzaw ding hi. Tua hangin a lianzaw biakinn thak lamzawh nadingin nong huh ciat nadingun huhna kong ngen uh hi. Khuapi sung a laizang lam neh ding kisam   baan ah biakinn lianzaw leh mi a tamzaw hong kikhawm thei ding uh hi. Nong huh dinguh lunggulh mahmah ung” ci hi.

            Sabbath sawm leh thumna sumpi phaltak aa apia note khat ciat tungah lungdam kong ko uh hi. Topa Pasian in note khatciat tungah a zah tampi thupha tawh hong thuh sak ta hen. Amen!

Ciapteh ding:

Austria ah mipi lak panin Catholic 60%, Ni suahna lam Orthodox 6%,  Muslim 6%,  Protestant 4%, leh adangte 24% hi.

#######@@@@@@@@@@@@@@@@@@@#######