Geelna Khat ii Khen Khat (Agen: Kenan)

November 05, 2016                                                                                          Italy      

           

Mission Story - Nipi 6na (4th Qtr, 2016)

Geelna Khat ii Khen Khat  (Agen: Kenan)

           

            Topa Jesu’ pianma kum 200 lai-in,  Syracuse gam mi ahi Archimedes pen Sicily  gam ah a om Mediter-ranean tuikulh ah piang hi. Hih Greek khanglui mi pen nambat lam a siam, zatuizaha lam a siam, set tawh kisai lam a siam, na a bawlthak, leh aksi lam a siam hi a, tu dong mahin nambat lam a siampente lakah khat in a kiciamteh ahi hi.

            Tuazawh kum 100 ciangin adang a khangno lai Sicilia gammi khat ahi Kenan in simna pana kingah theihna leh nambat lam siamnate lunglut a, aksi lam a siam suah ding zong lamen hi.

            “Ka neutung pan kipanin Catania sangpi (university) ah zatuizaha lam a uk sangnaupang khat kahi a, simna pan a kingah theihnate a vekin sin ding ka hanciam hi. Laibu tampi ka sim aa, Lai Siangtho zong ka sim hi.  Ka deih phatdiak Lai Siangtho mun khat pen, Piancilna 15:5 - "Vantung lam enin aksite sim in; na sim thei hiam? cihna mun ahi hi” ci hi.

            “Aksite paakta pen ing, ahang in, na khempeuh a bawl, Pasian in up ngam loh zahdong a neih vang-liatna hong lak hi. Ih neu mahmahna leh leitung, vantung, aksi khempeuh tehkaak lecin, uang khengval liang hi”  ci-in Kenan in gen hi.

            Kenan’ sang kahna Catania pilna-sang sinna mun (university) pen 1434 kum in kihong a, Sicily gam ah a upa pen sangpi ahi hi. A minthang thukan mipilte zong hih sangpi tawh kizomkhawm uh hi.

            Tuni in mi tampitakin sinna pana kingah theihna leh Lai Siangtho kithuhual lo hi ci-in ngaihsun uh hi. Kenan in ni khatni ciangin aksi lam tawh kisai muhna thak ahi piansakna leh Lai Siangtho tawh a ki meematna  mu khia dingin kilamen hi. Ama’n gen a, “Bangteng kigawm leh bang piang cih sinna leh theihna, nambat tuatna, ganhingte leh singkungte’ thu sinnate nei hi hang —tuate thu avekin Lai Siangtho sungah kigelh hi. Pasian’ ciimna Lai Sianghto sungpan leh nakhempeuh pan kimu thei hi” ci hi.

            Ama’upna a gensawn pen Kenan zum hetlo hi. Tan 10 sang a kah lai-in zong Kenan in a khuavak tangsak sawn hi.

            Nambat tuatna lam a kin mahmah sangnaupang khat a hihmah bangin Italy te nambat tuatna Olympic ah tan 10 sangnaupangte kidemna ah a kihel dingin ama’ sangkahna pan Kenan kiteel hi.

            Ama’ sangkahna mun aa kidemna ah mat tampen ngah a, gamke ah zong dem leuleu in Sicily ah zong Kenan in mat tampen ngah leuleu hi. Sabbath ni in Gambup kidemna om ding hi ci-in kumpi lampan tangko uh hi.

            Seventh-day Adventist pawlpi ah a citak mahmah khat ahih manin, Kenan pen Sabbath ni-in kidemna ah kihel lo ding hi. Thu a nget khit ciangin  nambat tuat kidemna Olypiad ukpipa kiang hawh ding khensat hi. Ama’ dinmun telgen a, kidemni a ni kheel ding ahi thei diam cih dong hi.  Nasem siateng in a ngetna  ngaisut-sak ding ahihna gen hi. Hihbang ngetna pen Olympiad kidemna tangthu ah  a khatveina ahi hi.

            A sawt loin Kenan in lamen ngam hetlo ahih hangin gam tuamtuam kidemna ah makaite’n  samkik uh hi. Makaite a tamzaw pen leitung bupah sangpi (university) te ah laihilh siapite ahi uh hi.  Hih siapite in Kenan’ biakna dong uh hi. Kenan in zong Seventh-day Adventist khat ahihna thu pulaak hi.

            “Banghangin Sabbath ni Pasian bia na hi hiam?” ci-in siapite in thei nuam in dong uh hi. Kenan in Sabbath pen Pasian in vantung leh leitung a bawlcil pan na kipsak khin a, Pasian in “tua ni-in tawlnga in siangtho sak ahihna” (Piancil. 2:2, 3) hilhcian hi.

            “Banghangin piansakna um nahi hiam”? ci-in dongbeh uh hi, banghanghiam cihleh tua a navaak khangno pa’n taanglai dawivai aa a ngaihsut uh a up pen tel haksa sa uh hi.

            Kenan in, “Ih theihzawh loh thu tampitak om hi. A piangsa nate ah ciimtak in a geel leh a bawl om hi cih lahtheihna pawlkhat gen thei hi hang. Piangsak Pasian in na khempeuh amau munciat ah koih dimdiam hi. Piandaan kithei lopi in hih leitung ah a piang ih hi kei hi. Pasian piansak nate lakah eite zong a kihel ihi hi” ci-in gen hi.  

            Olympiad kidemna makaite in lamdang salua uh hi. Kidemna ah a kihel khinsate lakpan hih bangdaan za ngei nailo uh hi. Gambup nambattuat kidem ni pen Sabbath pan kigin ni (Friday) ah khel ding kidemna lam makaite’n khensat uh ahih manin Kenan lungkim mahmah hi. Kidemna ah Kenan in mat tampen a gukna ngah a, sangpi (University) ii  sangkah nading panpihna sum (scholarship) zong ngahbeh lai hi.

            Tu-in Catania pilna sang sinna mun (university) ah Kenan in teci panna nei toto lai hi. Tu madeuh in zong laihilh siapite tawh leitung in huupna tha a neihna vai kikum uh hi.  A vom kuavang nih a kitaih khit ciangin khat leh khat kigawmkhawm leh thahaatna piang ahihna kikum uh hi.

            “Hih thu pen ama’ ut thu aa hong piang hi lo a, a lamdang mahmah lungsim ciimna pan hong piang hi. Hih thu in vantung leh leitung pen a bawl khat om hi cih thu kip sak hi” ci-in Kenan in telgen hi.

            Kenan in, “Sangsiapite lakah pawlkhat in a thugen hong sang thei uh a, zong lunglut uh hi. Adang siapite in hong ciamnuihbawl uh a, bangbang ahi zongin hihpen thu kikup theihna a kipatna leh amau tawh kizop theihna khat ahi hi” ci-in genbeh hi.

#######@@@@@@@@@@@@@@@@@@@#######