“10+ Sawm Tungsiah Nungta” — Khen 1 Agen: Pastor Daniel

December 17, 2016                                                                               Gam: Romania

Mission Story - Nipi 12na (4th Qtr, 2016)

           “10+ Sawm Tungsiah Nungta” — Khen 1         Agen: Pastor Daniel        

            “Ni khat in nai khat ta Pasian pia” cih hih takpi ding geelna kipan uh hi. Pastor Daniel Chirileanu in hih kiciamna thupi ngaihsut hi. Conference khangno makai (director) a sep sungin, Romanian Union khangno makai (director) in amah leh khangno makaite laidal neu khat tungah tua kum sungin Pasian’ aa ding bang sem ding cih a at dingin to hi.

            Pastor Daniel in, “Pasian tawh nai khat hun zang khawm in, midangte kiang bangci phaak theih ding a, bangci pattah thei ding cih geelna nei ning” ci-in khensat hi.

            “Tua kumpen ka lawhcinpen kum hi”, Pr. Daniel in ci hi. “Topa Pasian tungah ni khat in nai khat ta geelna neih ding ka kiciam hi. Ka teel hun pen nitaak nai 11 pan zankim dong ahi hi. Ahang in buaina dang om nawnlo ding ahih man hi” ci-in genbeh lai hi.

            Tua hunsung tengin, Pastor Daniel in khatveivei khuak am liangin a lungsim aa a suak khangnote kisapnate gual at hi. Ngaihsutna thak a lut loh ciangin thungetna nei ahih kei leh tua vai kigelhna mun sim cih bangin a hun zang hi.

            Tua bangin hong hanciam to a, nitaak khat a lungluuthuai ngaihsutna thak khat nei hi. “Pilna sang nei pawlpimite leh pawlpimi sungah a ciimte tawh kipawl khawm in, leitungthu tawh anungta khangnote zong makaih theih nadingin sang khat hong leeng!  Kumpi sangah a kah sangnaupangte aadingin a gualzo khaw-sakdaan va hilh thei leeng!” cih ngiimna ahi hi.

            Hong ngaihsut kawmkawm in ngiimna nam thum hong bawl thei hi. Sep taktak ding geelnate:

            1. Naupangte leh khangnote a gualzo nuntakzia siamna guan ding

            2. Sangvai ah siate leh nu leh pate kizopna khangtosak ding

            3. Naupangte Pathfinder geelna leh Adventist khangno nasepnate ah a kihel ding uh hanthawn ding.

Kongkhak Hong

            Kumpi sangte ah a ngaihsutna thakte a pulaak ma-in Pastor Daniel in ama’ conference sung aa pawlpimite lamdung ah zateep hoih lohna limh khaikawm in kigual aa paina, cidamnathu tangkona cihte ah a kihel masak dinguh hanthawn hi.

            Pastor Daniel in, “Kumpi sangte’n mipi cidam nading ih lunglutna bek hilo, ih neih thuhoih mahmahte hong muh uh ciangin huhna hong ngen uh hi” ci hi.

            Tuapen ama’n thungen aa a kihong kongkhak ahi hi. Kumpi sangsiapite leh sangsiate tawh a kimuh ciangin, Pastor Daniel in amau’ kisapnate na ngaihsut sak hi. Romania gam in gamke guk nei a, a kilamdang ngeina tuamtuam, sumzonna, mi kizopna cihte om ahih manin gamke khat ciat in amau gamke tawh kituak in a hoih ngeina, sumzonna leh kizopna cihte neikhawm nuam uh hi.  

            Siate panpihna tawh, Pastor Daniel in sangnaupangte thu etcikna a bawlna panin  khuapite ah a kisappi pen a hoihlo zongsatnate pelh ding leh khangnote a hoih a kilawm aa  gamtatzia  hilh ding ahi hi. Tua baan ah cidam takin nuntakzia hilh ding ki naaksap mahmah hi.

            Hih bangin Pastor Daniel in ama’ tenna gamke ah a teeng naupangte leh khangnote aadingin a hoih pilna hilh thei ding hi.

Lungdam takin Kisaang

            Sangsiapite leh sangsiate’n pastorpa makaihna hoihsa in paakta uh hi. Geelna pen “10 tungsiah nungta”  (“Live to a 10+ Level”) cih ahi hi. Khangnote amau’ kum tawh kituakin thusinna kineihpih ding a, cidamna leh cidamhuai an thu sinna, a hoihlo zongsatna pelh nading pattahna leh gamtat luheek kilawm aa omzia cihte sinna om ding hi.

            “Tua bangin thusinna akibawl ciangin biakna hel loh dingin hong kal uh hi” Pastor Daniel in ci hi. Ahi zongin sangnaupangte leh sangsiate Adventist khangno camp ah biakpiakna, thungetna leh lasaknate ah a kihel dingin sam thei uh hi.

Kum sim in kal khat ta camp bawl uh a, sangnaupang 80 pan 130 bang kihel uh hi. Sangnaupangte tawh sangsiate camp ah hong pai dingin kisamh hi. Sangsiapi pawlkhat zong kihel uh hi.

(Mai Sabbath ciang zomto lai ni)

#######@@@@@@@@@@@@@@@@@@@#######