Nial Theihlo Sapna (Khen 2) Agen: Richard

December 03, 2016                                                                                           France

Mission Story - Nipi 10na (4th Qtr, 2016)

 

           Nial Theihlo Sapna  (Khen 2)           Agen: Richard

            Ka pa hong tun ciangin kongkhak mai aa kitam zeekzaak limlangh mu in, “Kua ahia, hih limlangh a kitamsak?” ci-in hong dong hi. “Keimah hi’ng pa aw” ci-in ka dawng pah hi.

            “Na liamkha hiam? Cidam buang teh maw” ci-in ka pa’n hong hopih hi.

            Ka pa’n, “Nang na liam loh a thupipen hi. Limlangh a kitap thupi kei in nang a thupi hi teh” hong ci sawnsawn lai hi. Ka pa heekzia pen ka upmawh hong bang het loin lamdang lua ka saliangh hi. Ka up zawh loh hangin Pasian in ka thungetna hong dawng pahlian hi cih tu’n ka um taktak ta hi.  Tua ni aa kipan Pasian pen 100 ah 100 om takpi mah hi cih siangtakin ka tel hi. Kum (10) ka phak lai-in Pasian om takpi a hihlam tel ka- hih manin Pasian om takpi hiam cih dotna ka dong nawn peuhmah kei hi.

Kikhopna Innpi Behlap

            Ka pa sumzonna lawhcing ahih manin Villejuif cihna mun, khuapi nawl ah inn khat ka leizo uh hi. Tua baan ah zum tungtawnin kikhop nading inn a lianzaw zong ka lambeh uh hi.

            Kum khat hong sawt ciangin kum 12 ka phata a, “Thukham sawm tapa” suak dingin ka kipan hi. Tua lai ah, Talmud Torah a kici thusinna ka nei a, Hebia lai sinin, Jew minamte’ thungetzia, biakpiakna leh ngeinate, pawibawl annekkhopnate, leh Laisiangtho thu ka sin hi.  Ka sang uah ninga ni (Thursdays) leh ni masa ni (Sundays) simin sang kikhak hi. Tua hi a, sangkhak ni nih zingsang simin, Villejuif kicihna mun khuapi nawl ah Jew pasalno khempeuh “Thukham sawm tapa” suah theih nading kigin kholh nadingin kikhopna innpi ah ka pai uh hi.

Jew Minam Ka Hihlam Hong Pulaakna

            Kumpi sangah ka lawm minamdangte tawh ka kah khawm hi. Ka lawmte khat pen Adventist innkuan pan ahi hi. Ama’ min pen Emmanuel hi a, a pa’ min Manuel leh a nu’ min Manuela ahi hi. Amau’ innkuan pen Barcelona gam pan a hong lal Spain minam innkuan ahi uh hi.

            Ni khat ka lawmdangte tawh Emmanuel’ inn ah ka hawh uh hi. Ka tun uh ciangin, Emmanuel in anu leh apate kiangah Jew mi kahihlam hong pulaak a, lamdang lua kasa hi. A hangin,   nidang in tua bangin hong pulaak ngei lo hi. A pa pen kei thu ah lunglut peuhmah hi. Manuel pen Pasian’ nasepna lamah ukna leh khuamuhna nei ahihlam ka khuanung theih hi. Tapidaw a suah theih nading na tampi kipia lo in kuamah ciah khia thei lo uh hi. Adventist a suah ma-in, Manuel pen gammi khempeuh in biakna khat bek neikhawm ding cih ki-ukna a lim let mahmah, mi khempeuh tua biakna a zuih nading a hanciam galkap khat ahi hi.

            “Oh, nang Jew mi maw. Lungdamhuai mahmah hi. Ko zong kha lam Jew mi hi ung” hong ci hi. “Bangcidaan e? Kha lam Jew mi cih za ngeikei veng e. Catholic, a dang Tapidawte, Jehovah Witnesses cihte bel thei veng in” ci’n ka dawngkik hi.

            Manuel in, “Himah. Nang aadingin ko kiangah lungmuan om hi.” Kosher a kici an bek ne ung” hong ci hi.

            Amau sameh ne uh a, Paris khuapi sung kosher veengah sa leh a dangdang lei dingin pai zel uh hi.            “Ka innkuan un Sabbath ni Pasian bia ung” hong cithuah lai hi.

            Kei hong it mahmah uh a, ahi zong tua hun lai-in biakna thu ka kin meel nai kei hi. Ahi zongin, amau’ inn ka hawh sialin, Manuel in Lai Siangtho munte hong sinpih zel hi. “Hih pen nang Laisiangtho hi, kei zat hilo hi. Aman’ zong,  “Na Lai Siangtho tehkaak mah in” hong cikik hi.

            Kei zong Manuel hong sinpih Lai Siangtho mun leh kei zat Lai Siangtho mun ka tehkak ciangin kibang takpi hi. Ahi zongin tua Lai Siangtho kibat vai ngaihsut in ka nei nawn kei hi.

            Kum khat bang hong bei in, Manuel’ tanu Lilliane’ kum bangzah pha ta cih ka tuattuat hi. Manuel bel,  Adventist khat tawh kiteeng sak nuam ahih manin lungkim phameel lo hi. Ahi zong, Lai Siangtho thu hong sin pihpih lai hi.

            Ni khat, “Ka biakinn uah bangci hiam cih a en dingin hong kikhawm lo ding na hiam?” Manuel in hong ci a, kei zong, “Hong kikhawm mah ning ei leh” ka cikik hi.

             Sabbath zingsang khat, kanu kapate’n sangkah hongsa uh a, kei bel, Adventist biakinn ah ka kikhawm hi. Sabbath School hun zatnate lawphuai mahmah sa ing. Siapa pen tuma hun khat lai-in Israel gam  mun khat ah makaaipi (president) a seem ngei  Adventist pastor pa’ tapa ahi hi. Amah Israel gamah teeng a, Hebia lai leh Laisiangtho thu tel mahmah hi. Ama’ hilh thute ngaih nuam kasa hi. Thusinnate hoih ahih manin mailamah zong ka kikhopna thu Manuel tungah ka gen hi. Tua hun aa kipan Sabbath ni simin sang kah loin Adventist biakinn ah ka kikhawm hi. Ka pa in bel, sang a kahkah mah in hong ngaihsun hi.

Lamet Het lohin Thupiang

            Kha Siangtho in Manuel in hong sinpih Thumaante ka telsiam nadingin hong makaih toto hi.  Ahi zongin, a lipkhaphuai thu khat hong piang hi. Lilliane’ pa, Manuel, pen khuaphelep mei lam a siam a tung a nuai ah a kikhiin kahleite a puahphapa ahi hi. Ni khat, Manuel a nasepna ah thakhatthu in a ci nuam lo a, lung am in kahlei siikzawl tungah tuuk hi. Nasia liam ahih manin zato ah thukin takin kibawl pah a, ahi zongin a sawtlo in si hi.

            Hih pen kei aadingin lamet het lohin thupiang ahi hi. Manuel pen kum 47 phapan in khangno lai a, hat mahmah lai hi. Jesu Khrist sungah a upna khauh mahmah hi. Hih bang ka tuahkhakna in nuntakna leh sihna thu a thuukzaw in hong ngaihsun sak hi.

(Mai Sabbath ciangin a zom ngai ni)

#######@@@@@@@@@@@@@@@@@@@#######