SINNA 29 -DAWITE KUATE HIAM?

SINNA 29 – DAWITE KUATE HIAM?

        Thupatna:  Mi a gi leh a gilo a om mah bangin, kha zong a gi leh a gilo om hi. "Vantug mite' thu" ih sinna ah vantung mite in Pasian' kamtaite, ih lawmte a hihna ih sin khin zo hi. A hi zongin amaute ih biak ding hi lo hi. Pasian mah bangin amaute in thumaan gen uh hi. Kha gilote eleh bangci uh hiam? Amaute a lauhuai dan koi bang hi-a, a gi leh a gilo koici khen theih ding ih hiam? Lim taka ih sin ding a kisam thu khat a hihi.

1.        Hun nunungta a om eite' a dingin Pasian' Kha in bang hong hilh  hiam? 1 Timothy 4:1.
            Theih ding:    Thumaan pana a pial dingin mite a khemna ah dawite leh kha gilote hanciam semsem ding uh hi.. Mite a khemna uh a lianpen in, amaute misite' kha a sakna ding uh khemna hipipen hi.

2.        Misite tawh kisai-in Lai Siangtho in bang hong hilh hiam? Thuhilhsia 9:5,6.
            Theih ding:    Misite in bangmah thei lo uh hi. Khua phawk lo uh hi. Leitunga a piang thu khat peuhah kihel kha nawn lo uh hi. Sikha (misisate' kha) a kici peuhmah khemna a hihi.

3        Leitunga a kigen masapen zuauthu bang hi-a, a gen kua hiam? Piancilna 3:2-4.
            Theih ding:    Pasian in Eve leh Adam kiangah,, a kikham singgah na nek uh leh si ding hi uh teh, ci-in gen  hi. Gulpi in Pasian' cihna tawh a kilehbulhin gena, si lo kisa-in na pil semsem zaw ding uha, pasiante tawh na kibang ding uh hi, ci hi. Tu hunin zong Satan in mite a up sak nop zuauthu pen hih mah a hihi. Sihna in sih taktakna hi lo-in, a sang zawa kha vangkhua tunna hi-a, a nuntak lai uha a theih zah uh sanga a pil zawkna mun uh a tung a hihi, ci-in um sak hi. Pasian in a hih leh misite in bangmah thei lo hi, ci hi.

4.        Gulpi kua hi-a, a gitloh gamtatna ah amah kua'n huh hiam? Mangmuhna 12:9.
            Theih ding:    Gupi in a taktakin dawi a hihi. Vantung pan a kihawl khiat lai-in vantung mi tampi mah ama  lamah pang hi. Tu-in amaute, a gilo vantung mite suak uha, dawi' na a sem a hi uh hi.

5.        Dawimangpa leh a nungzuite in vangliatna a nei uh hiam? 2 Thessalonian 2:9,10.
            Dawimangpa Satan vang lian mahmah hi. A hoih a picig vantung mi khat dinga a kipiang sak a hih hangin a piang sak pa Pasian zahin a vang lian lo hi. Pil mahmahin ngian siam mahmah hi. A tei lote a khem a matna dingin na-lamdang bawl siam mahmah hi. Tua a hih manin, na-lamdang a kibawl peuhpeuh Pasian' vangliatna hi pah lo hi.

6.        Dawimangpa leh a nungzuite in bang zah ciang dong khemna bawl thei hiam? 2 Corinthian 11:13-15.
            Theih ding: Dawimangpa, vantung mi hoih khat bangin kibawl thei hi. Mi sisate bangin zong kineih thei-a, mi sisate bek in a theih a hi dinga a kingaihsun thute gen uh hi. Tua bangin a sisa a u a nau uh tawh a kiho thei bang khata mite a ki-upmawh theih dingin khem thei hi. Misite in bangmah thei lo hi, ci-a Lai Siangtho in a gen pen ih mangngilh kei ding hi.

7.        Dawimangpa kua hong kineih pipen ding hiam? Matthew 24:23,24.
            Theih ding:    Satan, Khrist a hong kum kik hong kineih dinga, mi tampi hong khem ding hi. Tua a hih manin Khrist hong kum kik dan ding Lai Siangtho in hong hilha ih tel ding kiphamawh  hi.

8.        Mai lam ding a gen khol theite tawh kisai-in Topa in bang gen  hiam? Thuhilhkikna 18:10-12.
            Theih ding:    Mai lam ding a gen khol theite, a kineihtawm tam zaw  hi. Kimkhatte a hih leh dawi tawh kikopa a gen uh a hihi. Topa' thu a zui peuhmah tua bang mite' lakah kihel kha lo ding hi.

9.        Mai lam ding a thei taktak kua hiam? Isaiah 46:9,10.
            Theih ding:    Pasian bek in mai lamd ing thei hi. A nasem kamsangte' kiangah mai lam thupiang ding a gen kholh ciangin phuahtawm thu kihel kha peuhmah lo hi. Phuahtawm thute Pasian in kih hi.

10.        Thuphuak theite leh bumtawi aitawi theite' thu a hong hilh khit ciangin, khate sittelna ding koi bangin hong hilh hiam? Isaiah 8:19,20.
            Theih ding:    Sihna thu-a kipan, Thupiak Sawmte leh thu dangdangte, Lai Siangtho tawh kituaka a gen lo peuhmah dawimangpa' nasem a hihi.

11.        Satan tawh kisai-in bang thu hong kihilh hiam? 1 Peter 5:8.
            Theih ding:    Satan leh kha gilote tawh kisai thu peuhmah ah ih va kitah khak loh ding a hihi. Ama hihdante na theih (muh) nop manin ama tual sungah va lut kha kei zaw in.

12.        Satan koici zawh theih ding ih hiam? Mangmuhna 12:10,11.
            Theih ding:    Tuuno a hi Jesu Khrist' vangliatna tawh Satan kizo thei hi. Khrist in dawimangpa na zo khina, amah a kisuksiatna ding zong a ngeel khin hi (Hebrews 2:14).

            Thukhupna: Eden Huan ah Eve a khem zawh nungsa Satan in, misite in khua phawk lai hi, cih ama zuauthu pen a tuamtuamin hong zang lai hi. Tua bangin mawhna hanga thupiangte ama'n neuseek hi. Sikha thu upna leh dawi biaknate in, tua khema sung pana a lauhuaipen pawl a hihi. Tua bang nasepna lamsang peuhmah ah ih va kitah khak vet loh ding thupi hi. Pasian bekmah biakin ih nei dinga, Ama Thubu Lai Siangtho bemah thu muhna-in ih zangh ding hi.