I SIH CIANGIN BANG PIANG HIAM?

 

I SIH CIANGIN BANG PIANG HIAM?

1).  Eite hong koici kibawl cih Laisiangtho in bang hong hilh hiam?

"Tuateh TOPA Pasian in leitang vui panin mi bawla a nak vang sungah nuntakna huu muamin mi pen a nungta mihing a suak hi." (Piancil 2:7, ZIV).

Leitang vui + nuntakna hu = a nungta mihing. 

2).  Kha a si thei mah hiam?

"Mawhna a bawlpa a si ding hi." (Ezekiel 18:20, ZIV). "Pumpi bek that thei a kha a that theilote kihta kei un.

Ahi zongin kha le pumpi a nih in hell sungah a khia theipa kihta un." (Matt 10:28, ZSV). 

3).  Kua bek in sih theihlohna nei hiam?

"Tua Pasian in thupha a ngah amah bek a lianbel Ukpa, kumpite Kumpipa le tote Topa ahi hi. Amah bek a si theilo hi a, a kineh theilo khuavak sungah a teengpa ahi hi. Kuamah in a muhngeiloh, kuamah in a muhtheihloh, tua Topa tungah pahtawina le a tawntung vangliatna om tahen. Amen." (1 Timothy 6:15-16, ZSV).

Laisiangtho in "a nungta kha-te" ahih keh, "a si kha-te" cih hong hilh a, "a si theilo kha" cih bang hong hilh ngeilo hi.

4).   Laisiangtho in sih theihlohna hong kamciam hiam? Bang hun ciang eite in sih theihlohna ih ngah diam?

"Ngai un, thusim khat kong gen ding hi. Eite khempeuh a ihmucip ding i hi kei a, i vekpi in i kikhel ding hi. A nunung pengkul hong gin ciangin, mitphiat kal tomkha sungin i kikhel ding hi. Banghang hiam cihleh pengkul hong ging dinga, misite a muatthei nawnlo in kithosak ding uh a, eite zong i kikhel ding hi. Banghang hiam cihleh hih a muatthei pumpi in muattheihlohna silhin hih a sithei pumpi in sihtheihlohna a silh ding hi. Tua bangin hih a muatthei pumpi in muattheihlohna silh a, hih a sithei pumpi in sihtheihlohna a silh ciangin, "Zawhna sungah sihna a ki- valhtum zo hi." (1 Corint 15:51-54, ZSV). 

5).  Tua khit teh, sihna ah bang hong piang ding hiam?

"I pumpi (leivui), lei suak kik ding a, i nuntakna a hong pia Pasian kiangah, i kha (nuntakna hu) ciah kik ta ding  hi." (Thuhilh-sia 12:7, RSV). 

6).   I sih ciangin ih ngaihsutna / phawktheihnate koici om ding hiam?

"A hing laite in a si ding ahih lam thei thei uh a, a sisate in bangmah thei nawn lo hi. A sisate in thaman bangmah nei nawn lo uh a, amaute kiphawk kha nawn lo hi. Amau ading itna, muhdahna, hanciamna cihte om nawn lo a, lei- tunga om nate, khat beek thei kha kik nawn  lo  ding uh  hi." (Thuhilh-sia 9:5-6, RSV).

"A husan'na a bei ciangin amah lei-ah ciahkik a, tua ni mahin ama ngaihsutnate bei ta hi." (Late 146:4, RSV).

7). Thu-um mite asih uh teh vantung paisuak pah hiam? "Misite ahi a, gamdaihna sunga a pai peuhpeuhte in ahi zongin Topa phat lo uh hi." (Late 115:17, RSV).

"Banghang hiam cihleh sihna ah nangmah phawk theihna om lo ahih manin, Leinuai panin kua in nang hong phat thei ding ahi hiam?" (Late 6:5, RSV).

 

8).   Sihna omzia tawh kisai Laisiangtho in bang hong gen hiam?

"Amah in hih thute a gen khit ciangin, 'I lawmpa Laza- rus ihmu ahih manin a phong dingin ka pai ding hi,' aci hi. Tua ciangin a nungzuite in, 'Topa aw, ihmu ahih leh a dam- ta hi ding hi,' a ci uh hi. Zeisu in Lazarus sihna thu a gen hi napi amaute in Lazarus ihmu in tawlnga hi a cihna sa uh hi. Tua ciangin Zeisu in, 'Lazarus sizo hi,' ci in siangtak in a gen hi." (John 11:11-14, ZSV).

"Ahang in, leivui lakah ka lum baih ta ding hi; kei nong zong dinga, ahi hangin ka om nawn kei ding hi." (Job 7:21b, ZIV). 

9).   Sihna pen "ihmu" cih ban-ah, Laisiangtho in bang kammal dang zang lai hiam?

"Tua ciangin vantung panin awging khatin ka kiangah, 'Tu-a kipan, Topa sunga a si mite mihampha ahi uh hi,' ci in gelh in, a hong ci hi. Kha in zong, "Hi mah hi, tua mite in a nasep gimna panin tawlnga ta ding uh a, amau nasepte in amaute a zui ding hi,' a ci hi." (Kilaakna 14:13, ZSV).

"Thumaante mangthang napi, a lungsima ngaihsun kuamah a om kei hi; a thutak mite kilamang napi, siatna panin a kihemkhia ahilam kuamah in a tel kei hi. Thutanga kalsuante lemna ah lut uh a; a sih uh ciangin khawlna a mu uh hi." (Isaiah 57:1-2, ZIV).

===== xxx =====