Thuciam Thak Biakbuk

 Lesson 11                                              *June 5–11

 

Thuciam Thak Biakbuk

 

 

Sabbath Nitaklam                                                June 5

 

Tukalsung Simding: Pai. 25:8; Isa. 53:4–12; Heb. 10:4; Heb. 9:14; Heb. 8:1–6; 1 Tim. 2:5, 6.

 

Kamngah: “Pasian sapsa mite in a ciamsa tawntung thupha a ngah theih nadingun, Khazih in thuciam thak hong vaihawm ahi hi.” (Hebrew 9:15.)

 

          Khamial zan khat, vanpi vom bekbak, khuamial bikbek sungah, Frank in khuapi lampi dung khatah paipai hi. Tawlkhat khit ciang, a nungah khesuan ging khat za a, mi khatin a nung zui gige ahih lam hong thei hi. Tua mipa’n hong pha in “laikhenpa Frank na hia?” hong cihi.

          “Himah ing. Hong koici theih na hia?”

          “Nang lian hong thei ke’ngin, na sanggampa thei mahmah ing. Khuamial lakah na omdan, na lampai dan, na pumpi omzia cihte kibang lua mahmah ahih manin, a sanggampa hi ngelding cih umin, amah’n zong sanggam a neihlam hong gen ngei ahih man hi e” ci kik hi

          Hih tangthu in, Israel biakbuk nasepna hong telsak mahmah hi. Lai Siangtho in zong alim, a liim leh pumpi kibang aci hi. A lim leh aliimte in zong amau tawh kisai peuhmah kicing takin kawkkhol khin uhhi. A sihna, vantungah siampilian a sepna cihte kicing takin hong lak hi.

 

Tukal Enpak:        Banghangin Pasian in Israelte biakbuk lamsak nuam sese hiam? Khazih in eite aiawhin nasem cih biakbuk in koi bangin hong hilh hiam? Zeisu in eite aiawhin  vantungah bang sem hiam?

 

Sunday                                                          June 6

Kizopnate      

          “Keimah in note lakah omna ka bawl ding a: Keimah in note kong kih kei ding hi. Keimah note lakah omin, note’ Pasian ka hi ding a, note, keima’ mite na hi ding uh hi.” Siam. 26:11, 12.

          Thu kician mahmah khatin: thuciam lui sung ahi a, thuciam thak sung ahi zongin, Topa in, a mite tawh itna sungah kinai takin kizopna adeih ahi hi. Kizopna a neihtheih nadingin ahoihzaw kammal akisam ahi hi. Thuciam in tua kizopna thukhun picingsak hi. Kizopna in thuciam lui leh thuciam thakah thupi hi. Ahi zongin tua kizopna a om theih nadingin khat le khat kiho-tuahna, khat le khat thu kizakna, kikawmna cihte kisam hi; a diakdiakin mawhna tawh a kidim, a khial thei, muanlahna tawh a kidim mihing in Pasian tawh kizopna kisam hi. Tua hangin Amahmah in lampi hong bawl a; Amahmah in mihingin hong kilang ahih manin mihingte in Amah tawh kizopna hoih nei thei ihi hi.

          Pai. 25:8 sim in. Pasian in biakbuk lam dingin Israelte sawl hi. Topa in bang hangin biakbuk lam dingin sawl hiam?

……………………………………………………………………………………………………………………………………………………………………

          Thuciamna sungah ahun amunzui in, kizopna phamawh mahmah hi. Kizopna a om theih nadingin, kisaanna, kihona, thukikupna cihte mawhnei, a puksa mite ading phamawh mahmah hi. Topa’n tua thu thei gige in, Amah   inamaute zong Ama’ mite hiding ci hi (Siampi Laibu 26:11, 12). Hih tengah thubul teng en in. A kizop nadinguh kician mahmah hi.

          Siampi. 26:11, 12 leh Paik. 25:8 sim inla tawlkhat ngaihsun in. A thubulphuh tuamtuamte panin, Topa in amau tawh kizop nading zongzong ahihna thute gualsuk in.

……………………………………………………………………………………………………………………………………………………………………

          Topa in “note kong kih kei ding hi” acih thu ngaihsun in. Tua biakbuk in apuksa leimite Topa’ maiah saantak a cin theih nading bang hi a, thuciam bawlna ah zong bangzahin thupi thei hiam?

 

Monday                                                           June 7

Mawhna, Biakpiakna, leh Saanna (Heb. 9:22) 

          Lai Siangtho Lui hun lai-in mawhneipa in mawhna pan a suahtak na’ngin sagawh biakpiakna kikalh hi. Israel mite sagawh biakpiakzia a kim dildel in Siampi 1 pan 7 sungah om hi. Biakpiakna a tuamtuamte sungah sisan zatdan, paihdan ngeina tuamtuam tampi om hi. Tua biakpiakna zeh sungah sisan panmun in Israel mite khempeuh a kipumkhatsak penpen khat ahi hi.

          Mawhnei mipa in, thuciam sungah kizopna khatpeuh leh a thukham khatpeuh palsat hi a, ama’ aiawh in ganno khatpeuh tawh sagawh biakna a piak ciangin, Pasian tawh a kizomphakik thei ahi hi. Sagawh biakna leh a zehte pen, Pasian in mawhna sawpsiang na’ngin a kalh ahi hi. Tuate in mawhneipa siansuahna hi a, mawhna themcik khat peuh pen, sisan thehna tawh biakbuk sungah paipih a, Pasian tawh mimal kiho in thukimna picing bawlkikin kizompha-kik sak thei hi.

          A tunga thute in, zanni sinna tawpna ah dotnate telphat na’ng koibangin hong huhthei ding hiam? Sagawh biakna sungah kamsang genkholhthu bangpeuh om khinkhian hiam? Isa. 53:4–12, Heb. 10:4. 

          Lai Siangtho Lui sagawh biakpiakna pen mawhna pan suahtak na’ng Pasian kalh ahi hi. Tuate in amawhna hangin sih dingbek amanawh mawhneipa pen, a mawhna kimaisak in, Pasian tawh kizomphakik thei dingin khelsakzo hi. A kigo gan khempeuh in genkholhna khattek tawh kizom hi. Ganhing a om keileh, mihing mawhna phel nadingin, aiawh omlo, picinglo pah hi. Hebrew laibu laikungpu in, “bawngtal sisan leh keelsisan in mawhna siangsakzo ngeilo hi” (Heb. 10:4) ci hi. Tua hi a, gangawh biakna pen Pasian-Mihing ahi Pasian sila khatin leitung mawhna aitangin sihlawh ding cih lametna hong pia hi. Tua bang lampi tawh mawhneite kimaisak in Topa in sang a, thuciam sungah kizopna kikipsak hi.

          Lai Siangtho Lui hun lai-in biakbuk sungah gangawh biakna pia dingin kiseh in. Ganno khawi pen amau hun lai a naseppi, ngeina leh nuntakzia ahihna zong phawk inla, tuate khempeuh in mawhna bangzah mantam cih koibangin hong phawksak hiam? 

 

Tuesday                                                          June 8

Ai-awhna 

          “A siahuai tuhun sung panin eite a hong suahtaksak nadingin, eite’ Pasian’ deihna tawh kizui in, i mawhna hangin tua Zeisu Khazih Amahmah hong kipiatawm hi.” Galati 1:4.

          Lai Siangtho Thak thubulphuhpi pen Zeisu in leitung mawhna adingin kipiakhia in mawhmai na’ng biakna hong piaksak cihthu kician mahmah hi. Tua thumaanin hotkhiatna ngiimna buppi bulphuh ahi hi. Khazih sisan in mawhna phel cih thu a nial mi peuhmah in Christian lungtang leh kha a nial ahi hi. Sisan baanglo singlamteh in hong gumtheilo hi.

          Tuni Lai Siangtho mun panin hih dotnate dawng dih in: Zeisu in a si dingin a kipia hiam? Kua adingin si hiam? Ama’ sihna in bang picingsak hiam?

          Ai-awhna pen hotkhiatna ngiimna bulpi ahi hi. I mawhna hangin sihna tawh i kiphu hi. Khazih in hong itluat manin “hong kipia tawm” (Galati 1:4) hi. Eite kiphut sihna ah Amah si hi. Mawhneite aiawh in hong sihna hangin, thumaan lianpi khat hong luangkhia theita hi. Ei lametna ahi puahphatkikna, suahtakna, mawhmaisakna, paradise ah tawntung nuntakna cihte khempeuh in Zeisu hong kipiakkhiat a hong sepsakna panin i ngahtheih ahi hi. Tualo peuhmah tawh upna in a mawkna ahi hi. I lametna leh muanna khawng ngasa lim tung peuh ahikha diai aw. Hotkhiatna cih limlim sisan hang, Zeisu’ sisan hang vive ahi hi.

          Anuai a mun teng simin: Mate 26:28, Eph. 2:13, Heb. 9:14, 1Pet. 1:19. Sisan tawh kisai bang hong gen hiam? Hotkhiatna sungah sisanin bang panmun nei hiam?

          “Muanlahna tawh, nang pen mawhneipipi santakcinglo Pasian in hongsanglo ding cih khawng patau in na lungsim khalau sakding Pasian’ deihna hi lo hi. Nangin ‘mawhnei ka hihlam ka thei a, hotkhiat na’ng kiphut nading hoihna bangmah neilopi; Pasian maiah leitung mawhna a puakhia Tuuno’ sisan sawpsiang dingin ka ki aap hi. Kei hihtheihtawp ahihi’ cithei hi teh”—Ellen G. White, The Faith I Live By, p. 100.

          Atunga Ellen White kammalte sim in. Nangma teldanin gelhkik in. Nang a hisak in. Launa leh natna khempeuh zong hel inla, bang kamciam om thei hiam cih zong gelhin. Thuciam thak sungah sisan in bang hong lamensak thei hiam?

 

Wednesday                                                      June 9

Thuciam thak Siampi Lian

           Pasian in A mite lakah a om theihna leitung biakbukin gangawh biakna kibulphuh ngiat hi. Tua gante sihna bek tawh bel nasep zo nai samlo hi. Siampite in biakbuk sungah nasem uh a, a kigo ganno tungtang biakpiakna bawlsak hi.

          Tua nasepte pen Khazih sep dingteng i a liim, a limpuate ahi uh hi. Tua a liim leh a limte in ganhing a sihna tawh tawp nailo ahih mahbangin, Khazih nasepna zong singlamteh tungah sihna bek tawh tawp nailo hi.

          Hebrews 8:1–6 thungetna tawh sim pha in. Hih tengin bangteng gencih teltheih nadingin Topa huhna ngen in. Tua khit ciangin, Topa’ thupuak bangteng hiding cih nangma phawk bangin gelhsuk in. Thuciam thak bangzah hong teltuamsak na ci hiam? 

……………………………………………………………………………………………………………………………………………………………………

          Thuciam lui sungah, leitung biakbuk, siampite leh a nasepte a om mah bangin; thuciam thak sungah zong van biakbuk, van siampi leh van siampi nasep cihte om veve hi. Limpua, a lim leh a liim khempeuh (Heb. 8:5) in a thak sungah a taktak hita ding uhhi.         

          Eite hong aiawh lei ganno ahih mahbangin, mawh baanglo Zeisu i nei gige hi; ganhing sisan munah zong Zeisu’ sisan i nei a; mihing khut tawh kibawl biakbuk mun ah, Topa’ bawlsa biakbuk taktak (Heb. 8:2) i nei a, a sungah Zeisu in Siampi Lian hong sepsak gige hi. Hih teng lungsim sung teng sakin “a thupi mahmah hih hotkhiatna thudonlo in i om leh suahtakna omthei ngeilo ding hi” (Heb. 2:3) ci in Paul in gen hi.

          Ngaihsun O: Zeisu in eite ading mawh baanglo in nungta a, si in, tu’n vantungah omin, biakbuk sungah nang ading nasem gige hi. Hihteng khempeuh pen a lipkhaphuai mahmah mawhna thaman pan hong gup na’ng hi. Zing khawng ciangin hih thute gen huai nasak mi kiangah gen ding geelin. Tuni sinnate siksan in kiging khol in.     

 

Thursday                                                      June 10

Vantung Nasep (Heb. 9:24) 

            Hebrews 9:24 sungah Khazih in ama’ pumpi biakpiakna in a piak khit ciang, eite adingin vantung ah a nasepte simpha dih in. A thupi mahmah khat, a tawpna lamah Khazih in eite adingin Pasian’ maiah hong dinsak a cihna mun hiphadiak hi.

            Bang a cihnopna hiam. Eite mawhnei a puk mite; Pasian’ maitang mu le’ng a kangtum lel ding lei mite; Pasian thukham siangtho palsat in mawhna tawh kidimin a kisia eite lellel in; Pasian’ mai ah hong dinsak ding palai khat i nei hi. Eite aiawh in Pa’ maiah ading Palai i nei hi. Khazih in hih leitungah a omlai in bangzahin it thei a, maisakthei, hehpihthei cih zong ngaihsun in. Tua pa mahin eite aiawh in vantungah palai hong sepsak hi.

            Lungdam thu khat mah, Zeisu in eite mawhna thaman hong piaksak banah Amah teekmah in singlamteh tungah hong kisuan (1Pet.2:24) a, tu’n bel Pasian’ maiah dingin vantung leh leitung, mihing leh Pasian kikalah Palaina hong sepsak hi. Zeisu in Pasian leh Mihing hi a, (mawh baanglo Mihing) ahih manin, mawhna hangin hong piang Pasian leh mihing kikal ah kawhawmpi kantan in lei hong dawhsakzo hi. A thupipenpen phawkden ding thu in, mihing tampi lakpan Mihing khat, eite thuak haksatna, natna satna leh mawhzolnate hong theihpih ding (Hebrew 4:14, 15) khatin Pa’ maiah hong thumsak khat inei hi. 

            “Pasian khatbek oma, Pasian leh mite a hong kilemkik sak thei Khazih Zeisu Khatbek a om hi; Mi khempeuh a tankhia dingin tua Zeisu hong kipia tawm a, a hun lian laitakin a hong kipiakna pen Pasian in mi khempeuh a hotkhiat nopna thu a kilatna ahi hi” (1 Tim. 2:5, 6). Hih teng panin Zeisu a piak panmun nih bangteng hi a, tuate in leitung biakbuk koici danin hong musak hiam?

            Thuciam thak hangin thupiang thak pen, Zeisu hangin, a kisik mawhneite in Pasian’ maiah a dinsak ding aiawh khat nei uh a, amau in cikmah in a thalawh zawhloh ding thalawhsak hi. Tua in dikna picing Pasian’ maiah hong dingsakzo dikna, tua dikna bekmah ahi hi. Zeisu in tua Ama’ dikna picingpi tawh, thuaksiatna hong thuak a (Heb. 2:10), Pasian’ maiah dingin, eite’n mawhna leh mawhna tungah gualzawhna hong ngetsak a, tuate lo tawh eite in lametna i neih keileh, tu leh thukhenni in zong i neizo tuankei ding hi.

            Mihing hi a, mawhzolna a thuakngeipa, vantung Pasian’ maiah a dingpa tungah ki-aap in thungen in. Nang mimal ading bang khiatna nei hiam? Bang lametna tawh tha hong pia thei ding hiam?

 

Friday                                                                    June 11

Ngaihsutbeh Ding: “Vantungah a lianpen vanmi in zong kha mangthang tanh zolo hi. Cherubim leh seraphimte in piansaksa ahih mahbangun, Pasian piaksa ciangtanh minthanna ciangbek nei hi. Pasian tawh hong kilemkik sakthei ding pen, Pasian mah tawh a kikim palaipa bekmah in picingsak thei hi. Amah in Pasian min pahtawi a, mihing’ dinmun panin Pasian tawh kimuhtheih na’ng akiphupa hi a, apuksa leitungin Pasian a musakpa zong ahi hi. Mihing aiawh in a dingpa in mihing hihna mah neihkul a, a aiawh mihingte tawh zong kizopna zong nei in, Pasian’ mi muanhuaipa hi a, Pasian dinmun zong nei ahih manin, leitungah Pasian hong pulak in, Pasian leh mihing kikal ah Palai zong hong sempah hi”—Ellen G. White, Selected Messages, book 1, p. 257.

          “Zeisu in: Mite maiah Keimah nong pulak uh leh, Ke’n zong note pen Pasian leh vanmi siangte’ maiah kong pulak ding hi. Note in leitungah Keima tecite na hi ding uhhi. Keimah in zong vantungah note’ palai ka hi ding hi. Pa in note mawh nei omzia uh enlo ding a, Keima kicinhna tawh kituamin hong mu ding hi. Vantung thupha hong luan theih na’ng palai ka hi ding hi. Kei kong kipiakkhiatnate hong pulaksak mite pen, hotkhiat mite’ minthanna leh nopsakna sungah a mapang mite ahi ding uhhi.”—Ellen G. White, the Desire of Ages, p. 357.

         

Kikup Ding Dotnate:

1. Rom. 5:2; Ephet 2:18, leh Ephet 3:12 simin. Zeisu tungtawnin Pa kiang i tun theih na’ng bang lampi hong hilh hiam?
2. EGWhite kammal a nihna pen enin. Palai khat i dinmun koici gen hiam? Pa in eite hong et ciangin, eite mawhna baang nunna mulo zaw in, Khazih picinna hong muhsak zaw hi. Tua thute lawmte tawh kikumun.
3. Tukal sung sinna sungpanin, a nuai a dotnate dawngin. Khazih in van biakbuk sungah omhi. Bang hih hiam?

         

thukhupna:        Thuciam lui biakpiaknate a thak tawh kilaih zo hi; lei biakbuk ah mawhnei siampimah in gan go in biakpiakna a neihna munah, tu in eite in a picing biakpiakna  Zeisu i neita hi. Van biakbuk Pa’ maiah eite hong pulak a, tua in thuciam thak kamciam bulpi ahi hi.