Thuciamna Thukham

 

Lesson 8                                               May 15 - 21

 

Thuciamna Thukham

 

 

Sabbath Nitaklam                                            May 15

Tukalsung Simding: Pai. 19:6; Isa. 56:7; Heb. 2:9; Thuhilhkikna 4:13; 10:13; Amos 3:3; Pian. 18:19.

Kamngah: “TOPA note Pasian pen Pasian ahih lam thei un; amah a muanhuai Pasian hi-a, amah it-in a thupiak a zuite tungah ama itna thukhun khang tulkhat dongin a kiplet hi.” (Thuhilhkik. 7:9 ZIV).

          Late 23 ah a thupipen kammal in Pasian in hong tunpih nopna mun ahi hi. Aneu 3 ah David in “lampi maan ah kei hong kha hi” ci hi. Pasian’ lungsim siangtho ahih manin, Amahin cikmah hun in hong lampialpihlo ding hi. I nuntak sungteng lampi muanhuaina ah hong tonpih ding hi.

          A muanhuai “thumaan lampi” in bangteng hiam? Laphuak dangkhat in a thungetna sungah “Nangma thupiakna lampi ah kei hong paipih in, tua ah nuam kasa hi” (Late 119:35) ci hi. “Na thupiak khempeuh maan mahmah hi” (Late 119:172). Mihingte hoihloh kawmkalah Pasian thupiak thukham in lungmuanhuai hi. Tukal sinna pen Pasian thukham leh Sinai thuciamna ki bulphuh hi.

          Tukal Enpak: Israel’ teelna in bang khiatna nei hiam? Israel’ teelna leh eite teelna a kizawitawn hiam? Thuciamna sungah thukham in bangzah thupi hiam?Thuciamna in hong mawk tun theih ding hiam? Thumanna in thuciamna sungah banghangin mapang in kihelthei hi ding hiam?

 

Sunday                                                                    May 16

Israelte KITeelna (Thuhilhkikna 7:7)

          Jew ngeina sungah, thuciamna bawl ding pen minam dangte’n nial uh ahih manun Israelte kipia hi ci in hilh uhhi. Tua vai ah Lai Siangtho siksan ding om khollo ahih hang, Topa in Hebrew mi bang thu peuh tawh teel taleh, amau kiphulua, kilawmlua cih hi hetlo a, Topa hoihna mah tawh a teel ahi hi. Pasian hehpihna a saan theih nading leh Ama’ mi a hih nadingun, amau’ hoihna themcikbeek zong omhetlo hi. Amimal inzong tawmcik, saltang minam hilailai, gamvai leh galvai ah thanem lua uhhi. Tua banah ngeina leh biakna lamah, akihelzau, lungsim zawngkhal, leh kuama huzaap zong a nei mello mite ahi uhhi. Israel akiteelna bulpipen bel, alamdang mahmah Pasian’ hehpihna leh itna hang hibek hi.

          Tua bang kawmkal ah, hih kiteelna tawh kisai in, kidophuai thukhat in, upna lamah telkhialhna om nuam mahmah hi. Pasian in banghangin Israel teel hiam? A hotkhiat nopman maw, mi dangte’n nial a mangthang ding cih kawmkal a? Midangte kiangah thupuak dingin a teel maw leh? A nuai a munte in hih dotnateng dawn nadingin hong huhthei diam?

Paikhiatna 19:6          ……………………………………………………..

Isaiah 56:7                 ……………………………………………………..

Hebrew 2:9                ……………………………………………………..        

          Ei Seventh-day Adventist in, tulai hun adingin Israelte mah i kicinuam a, hotkhiat dingbek hi lo in, hotkhiatna thu leh vantungmi thumte thupuak pen leitungah a puaksawn dingte i kici nuam hi. Kuaman a genhetloh thute i nei i umhi ci hihang. Tanglai Israelte zong tuamah bang ahi uhhi. Israel a kiteelna pen, Hebrew minam in pawltuam vilvel in omtuam ding deihna hi hetlo, hotkhiatna thu pen amau aituam kholtuam ding cihna zong hivetlo hi. Mi khempeuh adingin Khazih hong si cih i upleh bel (Heb. 2:9), Topa’n Israel apiak hotkhiatna zong leitungbuppi apiak hi cih i upkul hi. Israel in hotkhiatna tangko ding ahihna hong kilangsak hi. Tua mah bangin i pawlpi in zong ahih kul hi.

          Na pawlpi sungah na mapanna enpha in. Ei hong sapna nasep koibangin tangzaisak thei ding ihi hiam? Pawlpi nasepna khawngah nangma septuak mahmahte nangawn sem mello khawngin omkha na hiam?

 

Monday                                                       May 17

Hong Henkopte

            “Thupiak sawmte ahi, note hih dingin hong thupiak, ama’ thuciamna note tungah hong gen a, amah in suangpek nih tungah tuate a gelh hi.” (Thuhilhkikna 4:13).

            Thuciamna pen hehpihna hang bekmah in Pasian hong ciamsak hi a, eima phatna leh hoihna themcik zong om vetlo, Pasian hong piakkhong ngiat ahih manin, tua hehpihna pen thuman loh theihna license khawng hi mawkmawklo hi. Thukhat pan, thuciamna leh thukham kipawlkhawm a; kikhenkhia theilo hi.

            Atung a thute simpha in. Thuciamna leh thukham kizopna bangzahin kipkho hiam? Thukham in thuciamna sungah bul kiphut cih koibangin hong kilak hiam?

            Thuciamna na ngaihsut ciangin, thukham zong a kihel kha cih thu in ngaihsuthuai hi. Thu dang tampite banglelin ngaihsun hileng, a kizopna ah thukham pawlkhat leh daai pawlkhat kaih kul ngel ding hi. Kiteenna, kilawmtatna, nasep khopna khawngte daaikaih, thukham cihkhawng omse keileh bangtan sawt kipzo ding cih theihsa hilel hi. Pasal in lawmngaihkik ding khentat in, ahih keileh, alawmpa in midang khawng huhgawp cihbang; nasep khopna ah, lawm khat theihloh kal in lawm dangkhat sambeh cihbang hiziazua ding hi. Hih bang gamtatna pen thukham thukhun cihte palsatna vive ahi hi. Thukham neihlohpi khawngin hih kipawlnate bangtan kipkho thei ding hiam? Tua ahih manin daaikaih kul a, giibawl in, thukham bawlkul hi. Tua bang bekin kizopna kipkho theipan ding hi.

            Kammal nam tampi lakpan thukham (Late 78:10), gam ukna (Late 50:16), teci panna (Late 25:10), thupiak (Late 103:18), Topa’ thu (Thuhilhkik 33:9) cihbang kammal tuamtuamte in kinai mahmah uh a, a cihnopna zong thuciamna tawh kinai mahmah tek hi. Thuciamna kammalte (Jer. 11:3, 6, 8) sungah Pasian’ thukham, gam ukna, teci panna leh thupiakte ci hi. Pasian in Israel tawh a thuciamna sungah thu tampi kihel a, tuate in Amah leh Amite kizopna kip a omtheih nading cihna ahi hi. Tuhun zong bang kilamdang tuanse hiam?

            Kinai mahmahin na kizoppih mi khat ngaihsun in. Tua na kizopna uh pen thukham, ciangtanh, thukhun cih om keilel henla, nang zong na hihnop bang hihthei ciphot lecin. Hih pa pen na it mahmah pa hi a, tua itna bekin na thute uh khensat ding cileng, daai, thukham banghangin kisam veve hiam? Kikum dihun.

 

Tuesday                                                       May 18

Thuaciamna Sungah Thukham (Paikhiatna 10:12, 13)

          Thukham na ngaihsut ciang bang na phawk masa pen hiam? Palik uliante, mawtaw license, thukhenmangte leh thong peuh ahi hiam? Ahih keileh, khalna, thukhun, nulehpa hong ukna leh dan piakna cihpeuh na phawkkha hiam? Ahih keileh om dimdiamna, kituak dimdiamna, mun kipna cihte maw? Ahih keileh . . .itna mawle?

            Hebrew laimal torah pen “thukham” in kilet a, “hilhna, makaihna” cihkhawng ahi hi. Pasian hong makaihna ah lungsim, mipi, kizopna leh biakna lamah kizang phadiak hi. Pumpi leh khalamah a picing nuntakna i neihtheih na’ngin, Pasian in a mite tungah ngaihsutna hoihnono hong guan hi. Laphuakpa in “nopsakna pen Topa’ thu sung bekmah hi a, sun leh zanin ama’ thu a ngaihsun mi ahi hi” (Late 1:2) a ci hi.

            Thukham aike’h torah simleng, hong thuhilhna Moses ciaptehnate pen Israelte’ thuciamna sungah mapang pahpah a, a zai mahmah hong thuhilhnate zong hoihsa ciat hihang. Thukham in Israel mite nuntakzia, khaiciinna, gam ukna, mipi kizopna leh biakpiakna ah daupaisak mahmah hi.

            Pasian in Israel ading thuhilhna tampi apiak pen banghang hiding hiam?(Thuhilhkik. 10:13.) Tua thuhilhna tengin banghangin amau ading “hoih” zawthei ding hiam?

            Thuciamna sungah akihel mi khempeuh in nuntakna thak a neihtheih nadingun, “thukham” in a mapanpih hi. A kihel mite tungah thukham in Pasian’ deihna laktel a, upna tawh a thukhamte leh Ama’ deihnate picing takin mangthei dingin panpih hi.

            Thuciamna om bang linlianin mapang peuhleh, minam dangte lampi zuithei ngei hetlo ding cihna ahi hi. Mihingte’ thukham, kisapnate, lunggulhnate, mipivai, gamvai leh sumbawlna cihte bektawh nungta theilo ding uhhi. Pasian ading a siangtho minam, kumpi leh siampinam, paulam zongzonglo a Pasian’ thu manhna hangin Pasian’ neihtuam minam, amau nuntakna sungah Pasian’ thuciamna apulak khiate hi tawntung ding uhhi.

            Tanglai Israel mah bangin, Seventh-day Adventists in zong, genkholhna tungtawnin Christian nunzia thuhilhna tampitakmah ngahkhin hihang. Hih thuhilhna khawngte pen ei adingin supna gawtna khawngin i ngaihsut sangin, Pasian hong piak ngaihsutna hizaw hi i cithei ding hiam? Israel mite mahbangin tua Pasian hong piak ngaihsutna hoihte khawng gam ki ukna khawngin i heikha thei ding hiam?(Rom. 9:32).

 

Wednesday                                                     May 19

Pasian Thukham a kho-na

            Pasian’ thuciamna sungah thukham kihel ahihmanin, Pasian’ omzia taktak bang thumaan hong kihilh hiam? Malachi 3:6, James 1:17.

          Pasian’ thukham pen kamgen leh lai kigelh Ama’ deihna ahi hi (Late 40:8). Ama’ nunzia ciamtehna hi a, thuciamna sungah hong kihel manin, Pasian pen a kipkhopa leh muanhuaipa cihna ahi hi. Ama’ hong vaihawmsakte khempeuh theikhin zolo phialmah leng, Amah muanhuai cih i thei veve hi. Ama’ vannuaibup in uknakhat nuai ah omgai lel hi. Tua in eite khamuanna leh suahtakna  taktak hong guan hizaw hi.

          “Pasian a belhhuaina leh a muanhuaina in, Amah thukham Pasian ahihna hang hizaw hi. Ama’ deihna leh A thukham in kipumkhat hi. Pasian in adik pen adik mah ci in kizopna hoihpen mah piangsak hi. Pasian’ thukham in, ukcip cihbang, kikhel themthum cihbang omlo hi. Vannuai ah a kipkho penpen ahi hi.”—Walter R. Beach, Dimensions in Salvation (Washington, D.C.: Review and Herald Publishing Association, 1963), p. 143.

          Pasian’ thukham in mawhna pan hong honkhia zolo ahihleh, banghangin thuciamna sungah mapang dingin bawl hiam? (Amos 3:3 enin). 

          Kizopna icih in thukimna leh lung kituakna kisam hi. Pasian pen leitung abawlpa bek hi lo a, lungsim ukpa zong hi a, abawlsate lungnop nadingin thukham kisam, amah thei in a nuntak ding uh kisam hi. A thukham in Ama’ deihna pulak a, Ama’ ukna thukham ahi hi. Tua in thuciamna sungah ciangtanh leh mawhpuakte ahi hi. A ngiimna bulpi zong hotkhiat na’ng hi lo a, thukham 1-4 dong pen Pasian tungah eima’ mawhpuakte hi a, 5-10 dong pen mi leh mi mawh kipuakte ahi uhhi. Thukhat pan, Pasian in a thuciam’ tate lungnuam takin a nuntak theih na’ngun, nundan hong hilhna ahi hi. Israel mite in nundan dangdang khawng a neihkhakloh nadingun kidaalna zong ahi hi. Ama’ deihna leh nunzia tawh kituakin hong hehpihna tawh, thu-um mite hong kikhelsak ding ngiimna ahi hi.

          Na kiimkot enin. Thukham neilote na muthei hiam? Nangma nunna ah zong, Pasian’thukham na palsat manin kisiatna pawlkhat tuakkha hi lo na hiam? Hih bang khawngte in Pasian’ thukham a hoihna kipsakzaw a, Pasian tawh kizopna ah zong thukham in mapang mahmah cilo na hiam?

 

Thursday                                                       May 20

Uh leh ….

          Anuai a munte simpha in. A ki thukhatna uh khatin bang hi a, thuciamna tawh kisai bang hong hilh hiam?

Piancil 18:19                ……………………………………………………..

Piancil 26:4, 5  ……...……………………………………………..

Paikhiatna 19:5            ……………………………………………………..

Siampi 26:3                  ……………………………………………………..

            Pasian in, Abraham’ thu mang ahihna kiciantak in “ka sawlna, ka thupiakna, ka ngeina kip leh ka thu zui hi” (Piancil 26:5) ci hi. Tua mahbangin Pasian in a thuciamna ah mapang khempeuh tua nunzia neisaknuam hi. Sinai thuciamna a kicing dildel in Lai Siangtho in a genteng pen, tua a thuciamna in a deih bulpi ahi thumanna leh nunzia ahi hi.

            Paikhiatna 19:5 in, “ka thu na man uhleh. . .ci hi. Thuciamna hong piakzia bel nialhuai lo hi: hehpihna hang bek, thalawh hi lo, piakkhong ahih manin, ngah mawkmawk theilo uhhi. A ut uhleh nial thei, hehpihna zong nial thei, kamciamte zong nungheisan thei uhhi. Hotkhiatna tawh a kizom thuciamna in deihteelna paaikhialo hi. Topa in mite peuhmah zawhthawhthu in honkhia ngeilo a; zawhthawhthu in thuciampihlo hi. Mi kim tungah a khawnkhongin pia a, mikim in sang dingin zol hi. A sangmi peuhmahin zuih kul a, thuciamna thuphate thalawh hizawlo in, thupha a saanna uh pulakna hizaw hi. Israel in thumang ding a, kamciamte thalawhna hi lo in, kamciamte amau tungah apicin theihna’ng hizaw hi. Topa’ thupha piak mite ahih manun, a thumang hizaw hi. Thumanhna in thupha thalawh zolo a, thumanh manin Pasian in thupha pia a; thumanna in, upna hangin thupha saang cih teci panna piangsak hizaw hi.

            “Note nungta in, nuamsa in na luah nadinguh leitangah sawtpi na nuntak nadingun, Topa na Pasian in note hong thupiakna lampi khempeuh na tawnding uh hi.”(Thuhilhkik 5:33). Topa in Israel tungah, ka thu na manh uh leh thupha na thalawh ding uh a, hih thuphate in amau ngah ding kilawm hi acihna hiam? Ahih keileh: Thu na man uhleh, tua thumanna in, thupha Kongpiak theih na’ng lampi hong honsak ding hi acihna hiam? Tua tegel kilamdanna koibang hiam?

 

Friday                                                                         May 21

Ngaihsutbeh Ding: EGWhite, The Desire of Ages pan “Controversy,” pp. 607, 608; leh Patriarchs and Prophets pan “The Law and the Covenants,” pp. 363–373, simin.

            Matthew 22:34–40 in (1) Pasian thuciamna sungah thukham omna munleh akhiatna hong hilh (2) Thuciamna in kizopna namkhatmah ahihna zong honglak hi.

            “Mi khatin Pasian’ thukham azuihtheih nadingin, Khazih’ thahatna leh hehpihna hangin ama lungtang sungah itna om masa phot ding hi (Rom. 8:3, 4). Itna kihello thumanna in mannei vetlo hi. Itna a om nakleh mi khatin, Pasian deihna leh thukham sung a kipulakte tawh kituakin nungta lel ding hi.”—The SDA Bible Commentary, vol. 5, p. 484.

            “A thukham siangtho sungah, nuntakpih ding thukhamte hong pia a; hunbei dongmah hih thukham malneupen zong kip ding a, mihing tungah a nget ngei tengmah ngen gige ding hi. Khazih in thukham picingsak ding leh pahtawi dingin hong pai hi. Pasian itna leh mihingte itna tungah ki phut gige a, mihingte sepding bawlding thupiakte vive ahihna hong lak hi. Ama’ nunzia sung mahah Pasian thukham mang in lim hoih hong lak khin hi. Mualtung thuhilhna ah zong, a puatham gamtat bek hi lo in pilna, theihsiamna leh lunglut takin sepna hong lakzo hi”—Ellen G. White, The Acts of the Apostles, p. 505.

 

Kikupding Dotnate:

1. Itna khau in launa khau sangin Pasian lamah hong kai dingin banghangin hatzaw thei ding hiam?
2. “Na Topa Pasian, na lungsim khempeuh, na kha khempeuh leh na thahatna khempeuh tawh it in” (Mate 22:37) cih thukham in banghangin amasa leh a lianpen hithei hiam?
3. 3. Simone Weil in, “Kithutuakna i kisam masapen hi” ci hi. (Quoted in Russell Kirk, The Roots of American Order [Washington, D.C.: Regnery Gateway, 1992], 3). Tuni i sinna tawh a kituak munte ah, a diakin thukham tawh kisai in, ama’ kammalte nang teldan koibang hiam?

Thukhupna: Pasian’ thukham in thuciamna sungah kihel hi. Hehpihna tawh thuciam taktak ahi hi. Hehpihna in cikmahin thukham paaikhia ngei lo hi. Hehpihna a saangkha mite pen, thukham hangin hong piangkhia thute hang hizaw hi.