Thuciamna Lim

  Lesson 9                                              *May 22–28

 

Thuciamna Lim

  

Sabbath Nitaklam                                            May 22

 

Tuakalsung Simding: Pian. 2:2, 3; Pai. 20:11; 16; Heb. 4:1–4; Pai. 31:12–17; Thuhilhkik. 5:14.

Kamngah: “A tawntung thuciamna in amau khangin Sabbath tangin, Israel mite in Sabbath kem ding uh hi.” (Paikhiatna 31:16.)

          Ni sagih Sabbathni pen siktukilh khet bangin kip a, tatsatlo in kaal simin i piancilna bulpi hong phawksak tawntung hi. Manlah mahmah in tai kawikawi, sumzuak sumzong, paisuk paito kawikawi khit ciangin Sabbath hong tungkik leuleu in, piansakna bulpi hong phawksak hi. Pasian in na khempeuh bawl a, Amah tawh kipan i hih manin, na khempeuh kipatna hong phawksak tawntung hi.

          Tatsatlo in Sabbath in paipai in hong tungzel a, vannuai bup leh eima nuntakna hong sukha denkeei hi. Tua te khempeuh in eimah hong bawlpa, hiah hong omsakpa “a kipatcil in” van leh lei a bawlpa hong phawksak tawntung a, Christian upna bulpi lakpan Nisagih Sabbathni pen nialtheih ahihlohna hong phawksak hi.    

          Tukalsungin hih ciaptehna limpen Sinai thuciamna tawh kizomin sinding hihang.

          Tukal Enpak:        Sabbath pen koipan hong kipan hiam? Sinai masiahin zong Sabbath omkhin cih bang thupiang in hong lak hiam? Thuciamna lim sungah kihelthei dingin bangin Sabbath kiphusak hiam?

 

Sunday                                                                     May 23

A bulpi

          “Tanglai Jew mite Sabbath” cih bangzah vei i zangei hiam? Jew mite ommapek in tua Sabbath omkhin ahihna Lai Siangtho sungah kician mahmah lel hi. A bulpi pen piansakna kal sung tengmah hipah hi.      

          Piancil 2:2, 3 leh Paikhiatna 20:11 simin. Sabbath’ bulpi kitel sitset kiciansitset in koi ah koih uhhiam?

          Piancil 2:2, 3 in “ni sagih Ni” Sabbath cilianlo a, (Paikhiatna 16:26, 29 in ci masapen) himah taleh, “a ni sagihni in tawlnga hi” (Piancil 2:2) ci veve hi. Tawlnga cih kammal (Hebrew pau shabat) pen ei pau in Sabbath ahi hi (Hebrew pau Shabbat zong ci hi). “Sabbath pen Piancil 2:2, 3 in pulak vetlo ahih hangin, laikungpu in tua Sabbath ni-in Pasian tawlnga, thupha pia, siangthosak cih thu kiciansak mahmah hi”—G. F. Waterman, The Zondervan Pictorial Encyclopedia of the Bible (Grand Rapids, MI: Zondervan Publishing House, 1975), vol. 5, p. 183.

          Piancil 2:2, 3 in a thupaidan limlim tawh Sabbath pen Pasian hong piak leh mihing ading thupha saanni ahihna pulakkhia hi. Maku 2:27 sim lecin, Zeisu in Sabbath pen “mihing” adingin kibawl hi ci hi. Jew mite ading bek cilo hi.

          Pasian in bang hangin ni sagih Ni tawlnga sese hiam?Ama ading kul hiam? Ama’ tawlngakna in bang deihna nei hiam?

          Mi pawlkhat in piansak khitciang Pasian a tawlngak kul hi peuh cimawkmawk uh himahleh, Pasian’ tawlngakna taktak pen mihing ading tawlngak lim hong lak hibek hi. Mihing in bel ni guk nasem ding a, ni sagih Sabbath ni tawlnga ding hi. Theologian Karl Barth in, piansak khit a Pasian a tawlngak pen “hehpihna thuciamna” hi a, mihingte zong “amah tawh tawlngakhawm dingin hong sam hi” ci hi—Church Dogmatics, vol. 3, part 1 (Edinburgh, Scotland: T&T Clark Ltd., 1958), p. 98.

            Pasian in, piansakna a zawhkhit ciangin, mipa leh minu pen, Amah tawh tawlngakhawm dingin itna tawh sam hi. Ama’ meel-lim suunin abawlsa ahih manin, Amah tawh kikholh ding ut hi. Tua kikholhna zong kipsuak saknuam hi. Mi a puk pan kipanin, Honpa tawh, kal khat khatvei ta kikhawlkha bek uh hi.

          Mi khatin, Na Sabbath tanna in Topa tawh kikholhna ah bang phattuamna hong pia hiam ci’n hong dong leh, na bangci dawn ding hiam?

 

Monday                                                          May 24

Sinai Ma-in Sabbath

          Topa hong thupiakin hihbang ahi hi, “Zingciang pen a thupi tawlngak ni, Topa adingin Sabbath siangtho ni ahi hi. Na em dingte uh em in, Na huan dingte uh huan unla, a om laiteng zingsang ciangdong koih un” Paikhiatna 16:23.

          Israel mite Sinai atunma sehnel gam sungah Manna moh a kipiakna Paikhiatna 16 sung a tangthute hoihtakin lungngai in:

1. Nisimin tua ni khamkhop dingbek tawm ding a, a ni gukni in a zahnih tawm ding hi.
2. Sabbath ni-in manna moh kipialo hi.
3. Sabbath ni ading pen ni gukni in tawmkhol leh kisia tuanlo hi napi, a nidangte tawmkhol leh kisia hi.

        Sinai ah thukham a kipiak mapekin, hih thupiang in Sabbath sianthona koibangin honglak hiam? Paikhiatna 16:23–28.

          “Sabbath pen ni sagih ni a hihna, Topa in Israel a piaklai leh, Pasian’ thupiakna mah tawh mite in ni sagih ni a tawlngakna uh pen, piansaklai a Sabbath mah kawk hi cih pen khial hetlo hi.”—G. F. Waterman, the Zondervan Pictorial Encyclopedia of the Bible, vol. 5, p. 184.

          Paikhiatna 16 sungah Sabbath min a lawh masakna sangin a lungluthuai zawlai thudang zong omlai hi. Anuai ate endihni:

1. Sabbath ni ading kiginni pen koipen hiam? 

2. Sabbath ni zong koi ni pen hiam? 

3. Sabbath koipan hong pai hiam?  

4. Sabbath ni pen bangci bangni ding hiam? 

5. Sabbath in antanni ding hiam? 

6. Sabbath in Pasian tungah cihtakna etna ahi hiam?

          Tuni sinna sung a Sabbath ni pen, Paikhiatna 16 sunga Sabbath tawh kituak nasa thei hiam?

 

Tuesday                                                       May 25

Thuciamna Lim

          “Tua ahih ciangin, a tawnutung thuciamna in amau khang tawntungin Sabbath tangin, Israel mite in Sabbath kem ding uhhi. Niguk sungteng Topa in vanleh lei bawl a, a ni sagih ni in tawlnga a, a tha dimkiksak hi. Keimah leh Israelte kikal ah, hih Sabbath ni pen lim khat hi tawntung ding hi.” Paikhiatna 31:16, 17.

            Lai Siangtho in Sabbath pen li vei sitset mah “Lim” hi ci hi (Pai. 31:13, 17; Eze. 20:12, 20). “Lim” cih limlim pen “gentehna” hi lo a, gentehna pen kibatpih a nei, limpua, limla, phawkkiksak cihbang ahi hi (khuttum bang pen thahatna cihna ahi hi). Lai Siangtho in Sabbath pen “lim” a cihna in apualam ciaptehna hi a, a kician thupuak pulakna ahi hi. Tua lim amah ngiat in thuciamna tawh bangmah zong kisai khollo zaw bilbel hi. Sabbath in “Kei leh note kikalah lim hi tawntung ding hi” ci hi (Paikhiatna 31:13); Pasian bekmah in ci thei hi.       

          Bang hangin Topa in Sabbath pen thuciamna limin zang hiding hiam? Pasian in hong hotkhiatna ciaptehna pen bangci bangin Sabbath peuh hithei ding hiam? Sepna tawh hotna ngah kihilo a, thuciamna sungah a thupipen zong hehpihna hangin hotkhiatna hinapi, Sabbath in tua hotkhiatna ciaptehna ahih sese zong bangcidan hiding hiam?(Piancil 2:3, Heb. 4:1–4). 

 ……………………………………………………………………………………………………..……………………………………………………………

          Sabbath tawh kisai a lungluthuai mahmah khatin, Sabbath pen hehpihna hangin hotkhiatna lim kici a, Jew te’n zong, Sabbath pen Messiah hong tatna ciaptehna ci in sang uhhi. Sabbath sungah Messiah hong tatna ciamkhol thei cih mu uhhi. Tatkhiatna in hehpihna hangbek cih zong i theitel a, Sabbath, tatkhiatna leh thuciamna cihte kizopna zong tel mahmah hihang (Paikhiatna 5:13–15). Ngaihsun pak leng zong, Sabbath in Pasian hong hotna lim hi a, sepna tawh hotkhiatna lim hivetlo hi.

          Sabbath ni in “tawlnga” cih pen na koici tel hiam? Sabbath ni-in na koici tawlngak hiam? “Lim” khat ahih nadingin na koici tuamkoih hiam? Nang hong thei mi khatin nang hong muh ciangin Sabbath pen nang adingin ni tumdang cih hong muhsakthei uh diam?

 

Wednesday                                                     May 26

Siansuahna Lim

 

          “Keima Sabbath ni-in note na tawlnga ding uhhi. Keimah in note a hong siangthosak ka hihna na theih nadingun, na khang tawntungun keimah leh note kikalah lim khat hiding hi.” Paikhiatna 31:13.

          Sabbath’ thu Paikhiatna 31:12-17 sungah kicing phadiak a, tua laiah biakbuk lamdingdan leh biakpiak dingdan teng kicing dildel hi (Pai. 25:1-31:11). Sabbath in a pualam’ “lim” - muhtheih a pualam leh atawntungin Pasian leh amite kikal lim hi a, tua bangdan pen hih tengah pulak masakna mun ahi hi. A lungluthuai mahmah thuthak namnih hong piang hi:

1. Sabbath in theihtelna lim
2. Sabbath in siansuahna lim

          Theihtelna lim ahihna ngaihsun in. Hebrewte in theihna a cih uh ciangin, lungpilna, kizopna leh lawpna zong hel uh hi. “Thei” cih ciangin thu khat theipong, mi khat theipong cih hi lo a, tua mi tawh a mimal kizopna mahmah kiptakin nei cihna zong ahi hi. Topa thei cih zong, Amah tawh mimal kizopna kip nei in ama’ na “semin” (1Khang. 28:9), “kihta”(Isa. 11:2) in, “um” (Isa.43:10), “muangin zong”(Late 9:10) leh “a min a sam”(Jer.10:25) cihbang ahi hi.

        A tunga thute hoihtak simpha in. Topa “thei” cih pen koibang dan hiding cih teltheih nadingin hong huhthei diam?

          Sabbath in siansuahna lim hihna ah kician mahmah hi. Topa in A mite “siansuah” cih hong lak a (Siam. 20:8), zong “siangthosak” (Thuhilhkik 7:6) hi.

          Siansuahna pen, Pasian hotkhiatna, itna leh hong tatna nasep zahmah in thupi mahmah hi. Diksakna (thumaansakna) leh siansuahna tegel pen Pasian sepna vive hi: “Keimah Topa in note kong siangthosak hi” (Siam. 20:8) cihi. Tua hi a, Sabbath in Pasian pen hong siangthosakpa ahihna limkhat ahi hi. “Sabbath pen Pasian in Piangsakpa ahih lim ahih banah hong siangthosakpa ahihna lim zong ahi hi”—Ellen G. White, Testimonies for the Church, vol. 6, p. 350.

          Sabbathni leh a siansuahna thu siangthosak a cih pen ngaihsun in. Sabbath tanna in hih tengah bang sepna nei thei hiam? Topa in eite hong sianthosak nadingin koibangin Sabbath zangthei hiam?

 

Thursday                                                       May 27

Sabbath Phawkden

 

          “Sabbath ni na sianthosak ding phawk in” Paikhiatna 20:8.

……………………………………………………………………………………………………………………………………………………………………

          Sabbath pen mite’n a phawkden ding “lim” ahi hi. Phawk cih kammal in zong thu tampi huam leuleu hi. Amasa in nunglam heikik in abeisa hun phawkkikna hi. Sabbath in piansakna hong phawksak a, Nipi kal khat simin hong tung Sabbath ni in Pasian tawh kikhawlhkhopna hong neisak hi.

          Phawk ding thupiakna in tuhun zong huamsuaklai hi.” Phawk” dingbek hi lo (Pai. 20:8) a; “awlmawh” in “kemcing” ding hilai hi (Thuhilhkik 5:12). Sabbath in tuhunin thupi mahmah hi.

          Sabbath in mailam zong hong hilhkhol lai hi. Sabbath kepcing ding a phawkdenpa in, a mailam thute ah kamciam, hauhna leh hamphatnate tawh kidim hi. Thuciamna sungah Topa tawh kizopna kip nei hi. Thuciamna in Pasian leh mihingte kizopna hi cih thei i hihmanin, Sabbath in i kizopna thahatsakin kipsak semsem hi.

          Piansakna leh piangsakpa phawkna ah, Pasian in hehpihna hangin hong piak hotkhiatna zong i phawkzel ding hi (Thuhilhkik 5:14). Tua mun ah, Sabbath zong, Egypt pan suahtakna lim khat mah hi a, Pasian hong suahtaksakna lim mah hi veve hi. Piansakna leh piankiksakna zong tonkhawm hi. A masa in anunung omsak hi. Sabbath in Pasian pen leitung piangsakpa leh eite hong honpa ahihna limkhat ahi hi.

          “Sabbath siangthosakna tawh Ama’mite hihna lak ding hi. A thubu in Sabbath pen thukham a kemcing mite aki khentelna cihi. Thukham a kemcing mite in Satan leh Pasian kidona lianpi sungah, Pasian’ lamah pangding uhhi”—Ellen G. White, Selected Messages, book 2, p. 160. 

          Topa’ nasem khat hihna tawh a tunga pen en in. “Pasian’ thukham a kemcing mite” hihna, thukham dangdangte sang, bangin hong laktel thei hiam?

 ………………………………………………………………………………

 

Friday                                                                 May 28

Ngaihsutbeh Ding: EGWhite, Testimonies for the Church, vol. 6, pp. 968-970, pen The SDA Bible Commentary, vol. 7 sung pan; “The Observance of the Sabbath,” pp. 349–351, leh; Patriarchs and Prophets “From the Red Sea to Sinai,” pp. 295–297, simin. 

          Thukham sawm pen, Pasian-mihing leh, mihing-mihing kizopna bulpiteng ahi hi. Thukham teng alaizang ah Sabbath thukham om hi. Tua in Sabbath’ Topa pen hihzawhna vang  leh a neipa ahihna kawk hi. Muhdan nam nih enni:(1) Pasian ahihna: Yahweh (Topa) Piangsakpa (Pai. 20:11; 31:17) leh munkip a neipa; (2) Neihna leh hihzawhna vang – “vantungte leh leitung, tuipi leh asung omteng khempeuh” (Pai. 20:11; 31:17). Hih muhdan nam nih sungah, Sabbath thukham in gam khempeuh huam seal bangdan hi a, tua lai nisuahna lam gamte thukimna laibawlte bang ahi hi. Tua lai amau thukimna laibawlte a laizang ah (1) pasian ahihna (pagan pasian) (2) ama’ neihna gam mun teng leh hihzawhna (a leitang ngiat ciangtanh).

          “Hong siangthosak Khasiangtho in Pasian’ seal a neite leh tawlngak ni a neite khentel sitset hi. Haihkhiatna hong tun ciangin, sapi ciaptehna kician takin hong lak ding hi. Tua in Sunday kepcingna ahi hi . . . Pasian in ni sagih ni Ama’ Sabbath in kipsak hi (Pai. 31:13, 17, 16 pan lakik). . 

          Hih khentelna in a citak leh a citaklo mite kikal gamgii hi. A taltang tung vuah Pasian’ seal a deih mite in thukham lii na Sabbath kemcing uh hen.”—EGWhite, the SDA Bible Commentary, vol. 7, pp. 980, 981.

 

Kikupding Dotnate:

1. Siampi 19:30 simin. Biakbuk leh Sabbath a kizopna ngaihsunin. Sabbath in limkhat ahihna phawk inla, tua kizopna in bangzah in ngaihsuthuai hiam?
2. Nangleh nang kidong o: Sabbath tanna in Topa tawh kikhawlhna hong thahat saktuam beek hiam? Hong thahatsak keileh bang kikhel ding nei nahiam?

THUKHUPNA: Sabbath in thuciamna lim khat hi a, hotkhiatna a picinsiang dong huamto hi. Piansaklai hun zong, hehpihna thuciamna lim in hong phawkkiksak a, atawpna piankiksakna, Pasian in na khempeuh a thakbawl ding zong hong theisaklai hi.