Lesson 7                                                  May 8 - 14

 

Sinai Thuciamna

 

 

Sabbath Nitaklam                                           May 8

 

Tukalsung Simding: Thuhilhkik. 1:29–31; Hosea. 11:1; Mang. 5:9; Thuhilhkik. 29:10–13;  Pai. 19:5, 6; Rom. 6:1, 2; Mang. 14:12; Rom. 10:3.

 

Kamngah: “Egypt mite tungah ka bawlna leh, muvanlai in a kha tawh note apuak bangin note hong pua in keima kiangah kong paipihna na mukhin uh hi.” Paikhiatna 19:4.

 

            Unau sagih lakpan pasalno khat accident kha in zatopi ah kipaipih hi. A innah bangmah kicing ngei mahmah lo hi. Bawngnawi hai khatpeuh a dawnkhak leh hibek hi. Tua zong hai dim ahihleh naupang nih in hawmkul lai-a, a dawn masa peuhpeuh in tam a dawnluat lohding kidop kul hi. Tua naupang zato ah hoihtakin a kikoih khit ciangin, a siamanu in manhai (glass) golpi khat a dimin bawng nawi hong puak hi. Duh mahmahna tawh tawlkhat a etkhit ciangin, a inn a omzia teng phawkkha a, ‘bangzah dawnding kahi hiam’ ci in dong hi. Siamanu amit vak kuau a, ‘Dawn o, avekpi in dawn o!’ ci hi.”—H. M. S. Richards, “Free Grace,” Voice of Prophecy News, June 1950, p. 4.

            Hih pasalnopa bangin, tanglai Israel teleh, tulai eite zong hotkhiatna tuikhuk pan avekpi in i dawnding ahi hi. Israel in akum zalomphial saltanna pan a suahtakna pen, Pasian hehpihna lianpi hang hibek hi. Tuamah bangin eite zong mawhna sung panin Pasian hehpihna mahin hong suahtak hi.

            Tukal Enpak: Topa in Amah leh Israel kizopna koibang limtawh lak hiam? Paikhiatna leh Sinai tangthu in mimal  hotkhiatna tawh koibangin kizawitawn thei hiam? Sinai ah thukham in bang thubulpi nei hiam?

Sunday                                                                      May 9

Muvanlai’ Kha Tungah

             Israel in minam khatin ding kawmin Egypt dawibiakna sungah kum zatampi kidiah uh a, Pasian leh ama’ deihna ahoihnate thei nawn mello uhhi.

            Topa in ama’ lamah koibangin kaikik zo ding hiam?

            A kipatna in Topa in ama’ itna siangtho Israel tungah lak a, nalamdang lian mahmahte tawh honkhia hi. Zawlhel bangin itna tawh Israel hel masa a, thuciamna dawng dingin sam hi. Pasian in Sinai panin ama’ hehpihna deih takin hilhin phawkkiksak hi.

            Topa in Egypt pan Sinai ciangdong Israel a tonpihzia gentehna nih, bangteng hiam? 

 Pai. 19:4; Thuhilhkik. 32:10–12           ……………………………………

 Thuhilhkik. 1:29-31; Hosea 11:1          ……………………………………

             Hih thugentehnate in Pasian hong lainatna koibangin hong hilh hiam?

            Hih gentehnate in mihingte thanemna ah Pasian in lainat mahmah cih hong lak hi. Late 103: 13, 14. Muvanlai leh NuPa in ata pua cih gentehna tegel pen, Pasian in eite hong don cihnopna ahi hi. Lungnem, panpih, kemcing, thaguan in khangcing dingin hong lamen hi.      

            “Muvanlai pen anote nakkeplua cih minthang liang hi. Mualsang dawnah teng uhhi. A note leen a hilh nadingin a nungzangah pua in mualsangdawn kahtopih in Sinai mual sangin asangzaw mualsang dawnah puato a, tualai panin kuamthuk sungah khiasuk hi. Muvanlai no in ngeeklualai in lengthei nailo ahihleh, muvanlai apa in, tua muno kiat khiangsuk in anungzangah khawlsak in, mualsangdawn a buu omna ah ciahpih kik hi. Tua mah bangin Topa in ‘Egypt panin hong paikhiat pih Keimah ka hi hi’ ci hi.”—George A. F. Knight, Theology of Narration (Grand Rapids, MI: William B. Eerdmans Publishing Company, 1976), p. 128.

            Pasian in eite hong lainatzia leh eite khatleh khat i ki lainatzia enkak dih in.

            Ama’ hong lainatna in midang i lainat theih nading hong huh thei diam?

            Nangma phutkhak nasamah bangin, Pasian in angkhual hetlo in hong lainatna gen ding nanei hiam? Nangma phutkhak sate panin gentehna pia inla, nangeina uh panin zong pilna la in.

Monday                                                       May 10

Hotkhiatzia Ding Pulakna                                

           “Israel mite tungah, ‘Kei pen Topa ka hihi. Egypt mite’n a nasepna uh panin, note kong paikhiatpih ding hi. Amau sal hihna panin note kong khahkhia ding a, a thahat ka khut zanin thukhenna naseplian tawh note kong honkhia ding hi. Keima mi dingin note kong la ding a, kei pen note Pasian ka hi ding hi. Egypt mite’ sila hihna panin, note a hong paikhiatpih pa, Topa na Pasian uh ka hihna, note in na thei ding uh hi.” Paikhiatna 6:6, 7.

          Atunga munte simin: Pasian in mihing tawh a thuciamna bawlna ah bang dinmun ah ding a, keimah cih kammal bangzahvei omkha hiam?

          Egypt’ sal panin Israel a suahtakna leh Noah innkuam tuiciinpan a suahtakna tangthu tegel pen, Moses laibugelhte lakah a thupipente ahi uhhi. Anihtuakun hotkhiatna pilna hong musak hi. Aettehtak penpen in Paikhiatna tangthu hipen hi. Pasian in Moses tungtawnin Israel mite kiangah “Kong gum ding hi” (Pai. 6:6) a cihciangin, Amah in “Keimah in tankhiapa na sanggampa ka hihi” a cihna ahi hi.

          “Tankhia cih kammal pen (Pai. 6:6) innkuan khat sungah leiba leh thudang tuamtuam hang in sila a suakleh tankhiakik cihna ahi hi. Israel in leitungah tankhia ding mi bangmah neilo himah taleh, Pasian in amau sanggam taktak tankhiapa ahi hi.”—Bernard L. Ramm, His Way Out (Glendale, CA: Regal Books Division, G/L Publications, 1974), p. 50.

          Pasian in hong leikik hong tankik cih thu, a mite sal panin tankik cih koibangin natel hiam? Man bangzah hong pia hiam? Eite’n bangzah man hongci hiam?(Maku 10:45, 1Tim. 2:6, Mang. 5:9).

          Paikhiatna 3:8 sungah Pasian in Israel honkhia dingin hong “tuaksuk” ci hi. Hebrew pau sungah Pasian in mihing a hotkhiatna a genna kammal ahi hi. Pasian in vantungah teng a, eite leitung ah; tua ahih manin, Pasian in eite hong tanh dingin “hong tuaksuk” a hong honkhiathei ahi hi. Thu maan thutak in cileng, Zeisu hong tuaksuk, hong nungta, thuaksia, si in thokik ahihman bekmah in hong honkhiazo thei hi. “Tua Thu mihing hong suak in kote lakah teng a” (John 1:14) a cih pen, Pasian hong tuaksuk in hong hotkhiatna pulakna khatmah ahi hi.

Tuesday                                                       May 11

Sinai Thuciamna 

             Paikhiatna laibu in asim mi peuhmah thupiang thum tawh lunglutsak zo hi. Mualpi mahbang in, Paikhiatna, thuciamna bawlna leh mualbulzaang tengah biakbuk lamna cih bangteng ahi hi. Paikhiatna 19 pan 24 sungah, thum teng lak pan Everest mual bangin a sangpen om hi. Paikhiatna 19 pan 24 sung tengin a thupiangteng leh a kizopna teng honglak hi.

            Avekpi na sim zawh kei phial leh zong, anuai a kigualsuk diudeu thupiangteng beek enin:          

1.         Topa in Israel a hotkhiatkhit Sinai mualbul hong tung uh a giahphual sat (Pai. 19:1, 2).

2.         Pasian in Israel tawh thuciamna khat geelna bawl (Pai. 19:3-6).

3.         Israel in zong thuciamna lungkim in sang. (Pai. 19:7, 8).

4.         Thuciamna a saan manin a kipuahphatna teng (Pai. 19:9-25).

5.         Thukham sawm pulakkhiatna. (Pai. 20:1-17).

6.         Moses in thuciamna ah Palaipa (Pai.20:18-21).

7.         Thuciamna a deihna bulpiteng genkhiatna (Pai. 20:22 pan Pai. 23:22 dong).

8.         Thuciamna kipsakna (Pai. 24:1-18).

                 Hih thuciamna in hotkhiatna ngiimna sungah a thupipen mun pan pang hi. Lai Siangtho sung ah thuciamna kibawl a li veina hi a (Adam, Noah, Abraham khitciang a kibawl), a masa thumte sang in a kicianzaw pekin biakbuk sung pan hong kipulak hi. Tua pan kipan biakbukpi in leitungah hotkhiatna thu pulakkhiatna bulpi hong suak hi. Topa in Israel pen Egypt sal pan honkhia khinzo hinapi, pumpi sal hihna pan suahtakna sangin, a lianzaw suahtakna lianpi telsak nuamlai hi. Sal taktak hong hisak ahi mawhna sungpan honkhia nuam a, tua pen Messiah hong kipiakkhiatna hangbek hiding a, biakbuk nasepna in zong alim leh aliimte hong hilhkhinzo hi. Pasian in amaute salpan a hotkhiat khitphetin, thukham piapah a, biakbuk zong lamsakpah hi. Tua biakbuk in hotkhiatna ngiimna teng alahna hi a, thuciamna i a deihna maantaktak pen hipah hi. Apuksa mihing adingin thuciamna in hotkhiatna ahih buang keileh thua thuciamna in a mawkna suak ding hi. Eden ah hong ciam masa a, tuakhit Sinai panin zong hong ciam pha kik lai hi.

             Pasian leh Israel kikalah banghangin thuciamna kisam sese thei hiam? (Pai. 29:10-13).

Wednesday                                                     May 12

Pasian leh Israel

           “Note in ka thu mangin ka thuciamna na zuih uh leh mite khempeuh lakpanin note pen keima’ mi na hi ding uh hi, Leitung khempeuh keima’ aa hi a, note pen keima siampi nasep asem minam leh minam siangtho na hi dinguh hi. Israel mite tungah hi thute nagen ding hi” (Paikhiatna 19:5, 6).

          Hi takah Topa in Israelte tawh Ama’ thuciam ding teng pulak hi. Thu khatah, Topa’n amau sam a, ahih hang amau’ teeltawmna lo peuhmah tawh tangtung saktuanlo hi. Amau un zong mapang khawm ding uhhi. Egypt pan a suahtakna uh zong amau mapankhop hangmah hi a: Topa’n amau’ kongkhak khuam nihte tungah sisan nuh ding asawl bangin nuhkei le uh, suakta tuanlo ding uhhi. Mapang hipah lel hi.

          Topa in, “Note utleh utlohthu hi lo, note pen keima’ ading neihtuam leh siampinam hihloh phamawh” cihetlo hi. Tua bangin Topa’n nasemlo, Lai Siangtho in zong cilo hi.

          Paikhiatna 19:5, 6, atung a pen sim kikin. Topa in upna hangin hotkhiatna agen na koici tel hiam? Topa’ thu man lelna in hehpihna tawh hotkhiatna hi lo sakzo hiam? A nuai a munte in tel theihna’ng hong bangci huh theih diam? Rom. 3:19-24; 6:1, 2; 7:7; Mangmuhna. 14:12. 

………………………………………………………………………………………………………………………………………………………………….

          “Ei thumanna lel inbel hong honkhia zolo hi; hotkhiatna pen Pasian hong piakkhong hi a, upna tawh saan ding ahi hi. Himah taleh hotkhiatna in thuman na’gah ahi hi”—Ellen G. White, Steps to Christ, p. 61.

          Topa’n Israel ading asepsak nopte ngaihsun lecin: Egypt pan a lamdang mahmahin honkhia bek hi lo in, Ama’aituam neihsa, leh siampinam hisak nuamlai hi. A hotkhiatna tungtawn kizopna bulphuh in, (Egypt saldinmun ah tawmvei bek leh zompaisuak ding) Topa in, Khalam, pilna lam leh lungsim lam khangto sakin tanglai leitung ading nalamdang hisak nuam hi. Tuate khempeuh pen minam tuamtuamte kiangah lungdamthu tangko nading geelna vive ahi hi. Amau mapan nadingpen thumang ding hipeuh hi.

          Eite mimalin khatsimin i phutkhak thute lakah tuni sinna tawh a kituak khatpeuh a omkha thei diam?

Thursday                                                     May 13

Kamciamte, Kamciamte . . . . (Paikhiatna. 19:8)

           Etpak in bel, hoihlel e. Topa’n amite honkhia, kamciamte pia, amau zong thukimuh: Topa hong nget khempeuh ka hih ding uhhi. Tua bangin kithalawh ahiam?

          A nuai-a teng simin. Israel in thuciamna azopna uh koibangin hong lak hiam?

 Rom. 9:31, 32        …….……………………………………………..

 Rom. 10:3              .…………………………………………………..

 Hebrew 4:1, 2        ..…………………………………………………..

           Pasian in hong nget peuhpeuh pen, upna tungtawnin i kizopna tungah tuang ding hi. Sepna in upna bulphuh hi. Sepna bilbel pen, bangzah i lawp a, bangzah siangtho a, bangzahin tam taleh, a siangtho Pasian’ maiah saantakcing hizo peuhmahlo hi. Israel hunlai in hitheilo, tulai ei hunah zong hithei tuanlo hi.

          Lai Siangtho in sepna vive gengen hinapi, bang hangin sepnapen Pasian’ maiah saantakcing theilo hiam? (Isa. 53:6; Isa. 64:6; Rom. 3:23).

………………………………………………………………………………..

          Hebrewte leuleu in amau thumanna hangin hotkhiat ngah kisa mikmek uh a, hotkhiatna gah ahih phawkzolo uhhi. Thukham zuihna tawh dikna zong uh a, upna hang a Pasian’ dikna zong zaw khalo uhhi. Sinai thuciamna in thukham’ thute a picing dildel in pia a- tuazong, thuciam masa khempeuh mahbangin hehpihna tawh thuciamna mah ahi hi. A khawnkhong in hongluang hong hehpihna in lungsim hong khelsakzo a, thumanna ah hong lutpih hi. I buaipihzawk penin, thuman nopna hizawlo a, a thumanzia, thumang taktak ahi lo khat in a minambupun gamta uhhi.        

          Rom. 10:3 a nununglam lim sim in. Paul in bang gen nuam hiam? Amau dikna peuh a pibawl nuamte tungah bangthu piang hiam? Tua in koibangin mawhna lam leh langdona lam hong manawhpih thei hiam? Eima nuntakzia ki en ni. Tua mahbang kigamta hi lo hiam?

 

Friday                                                                   May 14

Ngaihsutbeh Ding: Ellen G. White, Patriarchs and Prophets pan “The Exodus,” lai. 281-290; “From the Red Sea to Sinai,” lai. 291-302; “The Law Given to Israel,” lai. 303-314, sim in.

          “Biakna thukham om bangin nuntaknopna hangin eima thahatna tawh thukham zuih kisawm pah ahih manin, khalam saltanna hong piangsak hi. Khazih Zeisu sungah upna hangin hehpihna tawh thuciamna ahi Abraham thuciamna nuai ah omna bekin lametna hong pia hi. Abraham in lametna a nei sak lungdam thu mahin, tulai eite zong lametna hong neisak hi. Abraham in zong eite’ upna hong pia, hong picingsakpa Zeisu mah manawh hi.”—Ellen G. White Comments, The SDA Bible Commentary, Vol. 6, p. 1077.

          “Egypt ah saltanlai in, Israel tampitak mahin, Pasian’ thukham thei nawnlo phial in, lawki dawi biakna ngeina peuh tawh helzau gawpgawp uhhi. Pasian in Sinai ah hong makaih a, Ama’ aw ngiat tawh A thukham genkhia hi”—Ellen G. White, Patriarchs and Prophets, p. 334.

         

Kikupding Dotnate:

1.    Thuciamna sungah kizopna in Israelte khalam leh taksalam suahtakna koibangin pia thei hiam? (Siampi. 26:3-13; leh Thuhilhkikna 28:1-15enkakin).

2.    Paikhiatna 19:5, 6 simkik in. “Leitung khempeuh keima’ aa hi” cih Topa’ kammal lungngai in. Hih mite tawh thuciamna bawl ding khawngpeuh banghangin hihbang kampau hiding hiam? Sabbath nateldan khawng leh hihte akinaihna peuh a omkha diam?

3.    Pasian in hong hehpihna bekmah tawh mawhna hong maisak cih i theihsa ahi hi. Pasian hong hehpihna in thu-um thumang nuntakna koibangin hong pia thei ding hiam?

THUKHUPNA: Pasian in Sinai mualah thuciamna abawlpih pen hehpihna thuciamna ahi hi. A kicing mahmah hehpihna lakin, Egypt sal pan a lamdang suahtakna zong apiak khit teh, amau’ suahtakna a khantoh theih nadingin thuciamna ah lutpih leuleu hi. Israel in tua thuciamna kipsak sam hinapi, itna taktak tawh zuikhalo uhhi. Amau’ tangthu a tawpna lamah, tua thuciamna omzia telcian nawnlo in sepna tungtawn in hotkhiatna thalawh ding lamah hong pial uhhi. Israel mite bangin a lamdang hehpihna awlmawhlohna tawh khialkha peuhmah keini ei.