ZSS SINNA 11: JERUSALEM AH KIMATNA

SINNA  11: JERUSALEM AH KIMATNA

      September 8 – 14

     

SABBATH NITAK  

Tukal sung sim dingte: Sawl. 21; Rom. 2:28, 29; Gal. 5:6; Sawl. 22; Sawl. 23:1-30; Matt. 22:23-32.

LAI SIANGTHO BULPHUH: “A zingciang zan in Paul kiangah Topa dinga, ‘Kilungkhauhsak in! Jerusalem a ka thu teci na pansa bangin Rome ah zong teci na pan teitei kul ding hi’ a ci hi” (Sawltak 23:11, ZIV).

Paul khualzin masakna khit ciangin upna sungah Gentile te koi bangin sang ding cih thungaihdan kibatlohna aom lam teltak in kimu thei hi(Sawl. 15:1-5).Kithutuahlohna hong khang semsem ciangin pawlpi sung kipumkhatna ding Paul in hong geel hi. Thukikupna ah mizawng te phawk ding kingen ahih manin (Gal. 2:10) Judea gam a om sanggamte panpih ding “Pasian mite a ding kaihkhopna” (1 Cor. 16:1) a pia dingin Gentile pawlpi te kihelsak ding Paul in khensat hi. Tua banga hihna in hih pawlnih te kilemna ding hunpha a hi dingin ngaihsun hi.

Lauhuai mahmah ta leh a khualzin thumveina khit ciangin Jerusalam ah pai ding a lunggulhna hih thu ah kitel hi. Thukhat ah, a mipih Jew te tungah itna siangtho nei hi (Rom. 9:15). Thudang khat ah, pawlpi sungah kilemna a om ding lunggulh hi (Gal. 3:28; 5:6). Sepna hang hilo in upna (Rom. 3:28-30) tungtawn in Jew leh Gentile te a kibangin hotkhiatna ngah ahih manin, ngeina thukham tuamtuam te hangin kituambawlna te in lungdamna thu-puak tawh kilehbulh thu a hi hi (Eph. 2:11-22).

A nuntakna leh nasepna hun thak ah Paul zui in a thu sin dih ni!

SUNDAY                                                      September 9

JERUSALEM MAKAI TE TAWH KIMUHNA

Jerusalem ah Paul a tun ciangin, thu-um mite in lungtaitak in na sang uh a, Manson inn ah zintung sak uh hi(Sawl. 21:16, 17).

Sawltak 21:18-22 sungah James leh Jerusalem a upate in tua lai a om thukham zuih hahkat Jew thu-um te lak ah Paul min neihna hangin a lunghihmawhna uh pulaak uh hi. Hong kikhel Jew te “a tate uh vunat loh ding ahi zongin ngeina zui loin Moses pan akihei khia ding in nang [Paul in] na hilh hi” ci in amaute kiangah kigen na thu pulaak uh hi (Sawl. 21:21).

A taktak in hih thu diklo hi. Paul in vun-atna leh vun-atlohna in hotkhiatna tawh kisai lo ahihna a gen bek hi a, Jew leh Gentile te a kibangin Jesu sunga upna hangin hotkhiatna ngah cih thu ahi hi (Rom. 2:28, 29; Gal. 5:6; Col. 3:11). Hih in Jew te ngeina thukham te nawlkhin ding genna tawh nakpi tak kilamdang hi.A kibang ding bangkeek in a kikhelzat theih hangin thumanna leh thukham ultung sakna kibang hetlo hi.

Sawltak 21:23-26 sim in. A muanhuai Jew khat a hih laina thu Paul in koi bangin laktel hiam?

_________________________________________________________________

Mipi lungkimna dinga Paul a gamtat ding kisawl hi. Ama thu a kigen mawkmawk teng diklo ahihna Jew hihna kiciamna tawh lak ding ahi hi. Tua kiciamna in Pasian tungah amahmah kisiansuah in ki-apna lahna ahi hi.

Paul in mangkha mawk hi. Abraham, Moses, Peter leh Lai Siangtho sunga adang etteh huai tanglai mite in zong thaneemna ciat na nei uh hi.Banghangin kiciamna bawl cih i theihloh hangin a mahmah in tua ma in kiciamna neikhin (Sawl. 18:18), ahih kei leh ama thuguilet ahi Jew te lak ah a om ciangin Jew khat bang a om ding (1 Cor. 9-19-23)cih thute hangin thumang zong hi kha ding hi. Ahi zongin, tu a pen ahih leh thukham ultung sak lua mite tawh kiholem na dingin ngaihsut piakna hang ahi hi. Gentile te in upna tawh hotkhiatna ngah in Jew te in sepna tawh ngah cih lungdamna thu nih lian pen mah sawltapa in a langdo thu ahi hi. “Amaute nget zahzah a thukimpih dingin Pasian in Paul thuneihna pialo hi.” – Ellen G. White, The Acts of the Apostles,laimai, 405.

Thu kituah theihna ding hanciamna ah, tua bang khialhna i bawl khak loh ding koi bangin kidawm thei ding i hiam?

MONDAY                                          September 10

BIAKINNPI SUNGAH SONA/NGONGTATNA

Pawlpi upate ngaihsutpiakna mangin Paul in ni sagih siansuahna ngeina kiciamna a nei ding hi ta hi (Gam. 19:11-13). Jew ngeina ah Gentile gam pan in hong pai mi peuhmah a sianglo hi a, biakinnpi sungah tum theilo ding hi. Tua thu hangin siampite mai ah pai in a kisiansuahna a pulaak theihna dingin Paul mahmah kisiansuah ding ahi hi (Sawl. 21:26).

Sawltak 21:27-36 sim in. Ni sagih kisiansuahna a zawh khit ciangin Paul tungah bang thu piang hiam?

_________________________________________________________________

Jew te biakna ah a siangtho pen in a ngaihsut uh biakinnpi buahsak (ninsak) hi cih tawh mawhmat in Paul langdo mi te in mihonpi te tawsawn in ngongtatna piangsak uh hi. Paul khualzinpih te lak ah Gentile thu-um khat ahi Ephesus khuami Trophimus (Sawl. 21:29)zong kihel a, Jew te bek a lut theihna biakinnpi huangsung ah amah tumpih hi ci- in ngaihsun uh hi.Amawhsakna uh a maan hi leh alian pen thupalsatna tawh Paul a khial suak ding hi. Biakinnpi a pualam inntual leh huangsung kideina kawm tungah Gentile lengla te in hih val pai thei nawnlo ding, a pai teitei uh leh amau sihna ding amau a zong tawm hi ci in Greek pau leh Latin pau in kigelh hi.

“Vun-atlo khat a siangtho innpi ahi biakinnpi huangsungah lutna in Jew thukham bangin sihna ciangdong gawt(daan) piak theih ahi hi.Khuapi sungah Ephesus khuami Trophimus tawh Paul akithuah kimu a, Paul in amah biakinnpi huang sungah lutpih khinzo ding hi ci-in theihsa bang a ngaihsun uh hi. Tua bang hihlo ahih leh, Jew mi khat ahihna tawh, biakinnpi huangsung a lutna in thukham palsatna hilo hi. Ahi zongin, mawhsakna in diklo hi mah ta leh mipi te upmawh sehsa thu khangsak hi.Biakinnpi huangsung khempeuh ah otna awgingte in mihonpi te linglawng gawp sak hi.” – Ellen G. White, The Acts of the Apostles, laimai,407.

Tua ngongtatna thu Rome galkap mangpa kiangah va tung hi. Rome galkap mangpa Claudius Lysias (Sawl. 21:31, 32; 23:26) galkap hon khat tawh hong pai in mihonpi te in athahlup ma un Paul a honkhia hi.

Galkap mangpa in bang thu piang hiam cih a dot theihna dingin Paul kiman in sikkol tawh kihen hi. Mipi te otna buaina hangin thutak a muh theihloh ciangin galkap mangpa in galkap inn ah Paul akipaihpih dingin thupia hi.

Adiklo phuahtawm thu in ngongtat buaina piangsak hi. Koi bang thulengsawn te ngai leh gen ding banghangin kidop huai hiam?

TUESDAY                                         September 11

MI HONPI TE MAI AH

Sawltak 21:37-40 in bang thu hong piang beh cih hong lak hi. Thusit dingin galkap inn ah a kipaipih laitak in, amah a thatnuam a so ngeingai mipi te tungah thugen theihna ding galkap mangpa kiangah Paul in phalna ngen hi.

Galkap mangpa tungah Greek kam in a gen laitak in, galkap mangpa in Paul pen tuama kum thum kiim lai in Egypt panin hong pai Rome te ukna a langdo mipa sa hi.Ahi zongin tua langdona Rome galkap te in dozo uh a, a nungzuite tampi tak kiman leh kithat in Egypt mipa ahih leh suakta hi.

Egypt pan hilo in Tarsus pan ahihna a ki genkhit ciangin, thugen theihna hunpha Paul in ngah hi. A thugenna ah, a kimawhsakna thu ah kihuutna genlo in(Sawl. 21:28), Judaism biakna hahkat mahmah ahihna leh Jesu a umte a bawlsiatna panin a kikhelna thu gen hi. Topa kiang pan in mangmuhna te a tuah khit ciangin tua te zuih ding simloh teel ding neilo hi. Hih thu in a kikhelna leh Gentile te tungah lungdamna thu a hilhna laktel hi. Pasian thu kikuppih lo in ama tuahkhak thute leh bang hangin hih bang in sem cih te Paul in gen zaw hi.

Sawltak 22:22-29 sim in. Gentile te tungah sawltak ahihna Paul in a gen ciangin mipi te in koi bangin thukkik uh hiam?

________________________________________________________________

Paul thugensak ding phalla in lemna tunlo hi. Gentile te tungah a kipumpiakna thu a genna in, amah a kimawhmatna thu a kipsak tawh kibang(Sawl. 21:28) aa, tua thu hangin mipi te nakpi takin so kik uh hi.

Paul gen khempeuh Rome galkap mangpa in telkhin khollo kha ding hi. Tua hangin, satna tawh thudot ding khensat hi. Jew mi taktak ahih ban ah (Phil. 3:5)Paul in Rome gammi hihna nei a, tua thu a gen ciangin galkap mangpa in Paul a sat ding tawpkik pah hi. Rome gammi khat hihna tawh, Paul tua bang a gawt/bawlsiat theih hilo hi.

Sawltak 22:1-21 sunga Paul thugenna sim kik in. Amah le amah kihuutna ban ah, a mipih Jew te tungah Paul in thu ahilhna bangin hong lak hiam? Banghang in a kikhelna thu gen hiam? Vangliatna a nei dingin tua kikhelna tangthu in bang hiam?

WEDNESDAY                                               September 12

SANHEDRIN TE MAI AH

Paul in gam aa dingin bangmah lauhuaina tunlo ding ci Rome galkap mangpa in amuh ciangin, Sanhedrin te in hih thu a khenna ding un galkap mangpa in a ngen hi, ahangin Jew te lak ah kinialna thu hi lel hi (Sawl. 22:20; 23:29).

Sawltak 23:1-5 sim in. Sanhedrin te mai ah kihuut na Paul in koi bangin pan hiam?

________________________________________________________________

Paul thupatna in a kam satthuak sak hi. Ahang in, Pasian a genna ah zahtaklohna gendaina tawh kibang hi kha ding hi. Thakhat thu a a thukpah na in a pianzia tawm hong mutel sak hi. Tulpipa “a kang kizut kawm” a cihna (Sawl. 23:3) in Matt. 23:27 sunga Pharisee te kineih khemna thu Jesu mawhsakna a thawnsak kik tawh kibang hi. Ahi zongin, tulpipa tungah thugen ahih lam a theihlohna in a mit hoihlohna dam siang nailohna hang hi thei ding hi.

Sawltak 23:6-10 sim in. Amah a kiheek thusitna Paul in koi bangin pilvang tak in buaisak/nawngkaisak hiam?

_______________________________________________________________

Sanhedrin in upna thu ah kibanglo ahi Sadducees leh Pharisees te kigawm ahi hi.Sadducess te in Moses at bu masa nga te (Penteteuch) bek Lai Siangtho in saang uh a, misi te thawhkikna tawh kisai umlo uh hi (Matt. 22:23-32).

Paul kammal in Sanhedrin te lungsim heikhiatna ding geelna bek hilo hi (Sawl. 23:6).Damascus paina lampi ah a thokik Jesu tawh akimuhna in a kikhelna leh sawltak nasepna tawphah bulpi hi a, thawhkikna a upna hangin thukhenna thuak ahi hi (Sawl. 24:20, 21; 26:6-8). Sihna pan in Jesu thokik lo hi zenzen leh, a nasepna in kimanna neilo suak ding cih Paul in tel mahmah hi (1 Cor. 15:14-17).

Galkap inn ah tua zan Paul a om laitak in, ama tungah hih thapiakna tawh Topa hong kilang hi, “Kilungkhauhsak in! Jerusalem a ka thu teci na pansa bangin Rome ah zong teci na pan teitei kul ding hi” (Sawl. 23:11) . Tua hun laitak in, hih bang kamciam in Paul a dingin mannei mahmah ding hi. Rome ah thu ahilh nop mahmah na tangtung lai ding ahi hi (Sawl. 19:21, Rom. 1:13-15, 15:22-29).

THURSDAY                                                  September 13

CAESAREA AH A KIPAISAKNA

Thukham tawh kisai in Paul susia theilo uh ahih manun, amah a thah theihna dingun sawmsimna lianpi khat mipawl khat in geel uh hi.

Sawltak 23:12-17 sim in. A geelna uh bang hi a, koi bangin lawhsam hiam? Mi tampi te in a maanlo thu a dingin bangzah takin lunggulhna lian thei cih hih thu in hong bang ci hilh hiam?

_________________________________________________________________

Mi sawmli sang a tamzaw te in Paul langah kikum sim in kiciamna a bawlna in Jerusalem ah bangzah takin Paul kimudah cih hong lak hi. Hih mite kuate cih Luke in hong genlo a, ahi zongin amaute in galte leh lehheek mite kiangpan in Jew upna huutna dingin a nuntakna uh a piangam mite ahi uh hi. Hih banga biakna haipih, kumpi langdo leh minam ultung sak luatna te in A.D 100 kiim Judea gam leh a kiim ah a lamdang thu hilo hi.

Kigin theihna dingin, hih sawmsimna thu Paul tupa in na za kha hi. Paul innkuan tawh kisai in bangmah i theihkhak loh pen lungnoploh huai phial hi. Ahi zongin, Paul leh a sanggamnu Jerusalem panin a khangkhia uh a, tua lai ah a sanggamnu in pasal nei in tapa khat nei hih tuak hi (Sawl. 22:3). Bangbang ahizongin, “a khut pan len in kai” (Sawl. 23:19) ahih manin Paul tupa in kum sawm val deuh hih pan tuak hi. Amah in galkap inn ah va pai thei a, hih thu va hilh thei hi.

Sawltak 23:26-30 sim in. Galkap mangpa Lysias in gam-uk Felix tungah Paul tawh kisai bang thu puak hiam?

________________________________________________________________

Hih laikhak in thupiang te diktak Felix tungah gen hi. Tua ban ah, Rome gammi hihna in bangzah in Paul hamphatna tun cih zong kihel hi. Rome thukham in a gammi te, a kimawhsakna ah diktak in thusitna leh kihuutna nei thei ding (Sawl. 25:16) leh a diklo thusitna a om leh zong kumpilianpa mai ah thusitkikna ding nget theihna (Sawl. 25:10, 11) nei dingin kemcing hi.

Felix in amah min neih mah bangin, thukhun om tawh kizui in Paul a kilawm akituak in bawl hi. Thudotna tomno a neih khit ciangin, amawhmat te a tun ma dong Paul cin dingin thupia hi.

Paul nuntakna ah Pasian vaihawmsakna te ngaih-sun in. Haksatna leh gimna tampi na thuak kawmkal ah nang adingin Pasian hong vaihawmsakna te kiniam-kiatna tawh bang zah vei na phawk hiam?

FRIDAY                                            September 14

NGAIHSUT BEH DING: “Hih hun ah, Paul leh a khualzin-pihte in Jerusalem a om makai te tungah a sanggam uh Jew te lak a mizawng te a dingin Gentile pawlpi te panpihna pia uh hi…“Hih citpiakna in leitungbup Pasian nasepna ah akikhel Gentile te muanhuaina lahna hi a, lungdam takin san ding kilawm hi, ahi zongin, tu in Paul leh a khualzinpih te mai ah a ding mite lak ah sanggam itna pan hong luang letsong te a lungkimpih lo om tawh kibang hi.” – Ellen G. White, The Acts of the Apostles, laimai, 399, 400.

“Pawlpi sunga makai te in sawltakpa a deihloh luatna uh nusia iin Gentile te tungah lungdamna thu gen dingin Pasian saptuam mikhat in sang uh hi leh, Topa in amaute tungah pia kha thei ding hi. Paul nasepna a tawp baih dingin Pasian in sehlo hi, ahi zongin, Jerusalem a pawlpi makaite piansak buaina pan heikhia dingin na lamdang bawllo hi.

“A makaih kha mah in tua gah mah tun hi. Pasian hehpihna phawk ding leh punsak ding awlmawhlohna in pawlpi sungah thupha tampi kangsak hi. Amau nasepna kithupi phawk kha hi leh Topa in Pasian nasem pawlkhat te nasepna bangzah vei a hun a behlap sak zen tam! Pawlpi sungah kha i gal lut ding phalna a om ciangin, tthutheih-telna kisia ahih manin Christ nasem te kammal leh gamtatna te mukhial in khiatna telkhialhna piang ding hi. Amau mahmah nasempa lampi ah dingin a kizattheihna a nawngkaisak a leh, a piaksa thupha te ama tung panin Topa in lakkhiatsak ding hi…

“Akisai nawnlo awm tungah khutte nga in, vauhilh-na leh thapiakna aw te a daih hun ciangin a lungkhauh mite in amau tungpan kilakhia thupha te mu in manpha sa saan ding uh hi. A nuntak lai vua a zawhloh uh mite in a sihna uh zo thei kha ding hi.” – laimai, 417, 418.

KIKUP DING DOTNATE:

1.  Kihoih muaklo ding cih thei napi Jerusalem ah a paina tawh ama aituam hamphatna sangin Pawlpi phattuamna ding Paul in masak hi. Eite in koi bang ciang amah etteh ding i hiam?

2.     Jerusalem ah Paul holemna (mite deih zuihna) pan in bang sin thei ding i hiam?Eite nunpih thugui te sumlo in koi bangin mipi deih zui thei ding i hiam? A kizui thei takpi diam?

3. Pawlpi kipumkhatna in a tawntung in thupi den hi. Muhdan kibanglo kawmkal ah koi bangin kipumkhat ding sepkhop ding sin thei ding i hiam?