ZSS SINNA 9: NASEP KHUALZIN A NIHVEINA

SINNA 9: NASEP KHUALZIN A NIHVEINA

August 25–31 

---

SABBATH NITAK

Tukal sung sim dingte: Sawltak 16; Rom. 3:28; Gal. 2:16; Sawltak 17; 1 Cor. 1:23; Sawltak 18:1-10.

LAI SIANGTHO BULPHUH: “Kihta kei in, na gen ban zom in, dai tuan kei in. Nang tawh omkhawm ka hih manin kuamah in nang hong do in hong liamsuah lo ding hi. Banghang hiam cih leh hih huapi sungah mi tampi ka nei hi.” (Sawltak 18:9,10, ZIV).

Paul leh Barnabas in Antioch pawlpi te hoihtak in zuun iin lungdamna thu tangko nasepna ah kihel uh hi. Kithutuahlohna nakpi hong om ahih manin hih in amau nasep khop tawpna hi leh kilawm hi. Paul leh Barnabas te kikhenna in Barnabas sanggam Mark hang ahi hi (Col. 4:10). A pai na munte ah va hawh kik dingin Paul in Barnabas a zot ciangin, Barnabas in a sanggampa tonpih nuam a, ahi zongin Mark lungkiatna hangin Paul in kizuisak nuamlo hi (Sawl. 13:13).

Ahi zongin, Paul leh Barnabas te kikhenna in thupha hong suak a, kikhen in na sem uh ahih manun a geelna sa uh sangin nasepna in mun tam huamzo zaw hi. Barnabas in Mark tonpih in Barnabas pianna khua ahi Cyprus lam zuan hi (Sawl. 4:36). Paul in Silas zawn in Syria leh Cilicia lam tawn in tua lai a om pawlpite thapia dingin pai uh hi. Antioch ah a pai masak hun ma lai in Paul in Tarsus ah tawlkhat om hi (Sawl. 9:30, 11:25,26). Tua lai ah ama phuhsa pawlpi mite va veh dingin hunpha khat hong ngah hi. Himah leh, Paul ngaihsut masak na zah sangin ama aa ding Pasian geelna lianzaw tham hi.

SUNDAY                                                                                                         August 26

LYSTRA TUNGKIK

Luke in Derbe leh Lystra ah Paul a tunna thu hong gen pah hi. Pawlpi thakhauhsak in Syria leh Cilicia tawnin a paina thu hong gen hi (Sawl. 15:41).

Sawltak 16:1-13 sim in. Paul sep thute in midangte a zawhna dingin a kidawmtak-a a sepna hong bangci lah hiam?

_________________________________________________________________

Timothy pa in Gentile ahih hangin, anu Eunice pen Jew Christian khat ahi hi. Vun-atlo khat ahih hangin a neutung a kipan Lai Siangtho a thei mahmah khat hi a, biakna kin mahmah mi ahihna kimu thei hi (2 Tim. 3:15). Christian khat hihna tawh, tua kiim a om thu-um mite pahtaak leh zahtakna a ngahsa khat ahi hi.

Jew ahilo a pa lam sangin a nu lampan in Jew ahihna lim ngaihsut zaw uh ahih manin Timothy pen Jew mi khat ahi hi. A pa Greek mi hi a vun-atna pen namneu vai hiamgamna khat in mu hi kha ding hi ven, a suah khit ni giat ni in vun ki-at lo hi.

Timothy tawh nasem khawm nuam ahih manin Timothy vun-at sak hi. Ahang in, vunki-at kei leh biakna thusim saklohna lampialna cih thu tawh mawhmat ding uh a, Jew te kikhopna inn ah va lut in thu gen theilo ding hi. Tua bang a Paul sepna in a gen lungdamna thu tawh kitukalh hilo a, nasep muibun zawkna ding ahi hi.

A khualzin masak lai aa a paina teng a hawh khit ciangin nitumna khanglam Asia gam Ephesus lam ah zin dingin Paul in khensat hi. Ahi zongin Kha Siangtho in phallo hi. Tua ahih manin, leilu lam Bithynia lam zuan ding hanciam aa, ahi zongin Kha Siangtho in daltan veve hi. Mysia khengin pai khin ta ahih manin mun tuamtuam pai theihna ding in tembaw khawlna mun ahi Troas lam zuat ding bek hong hi ta hi.

Zan in a mang sungah Pasian in Aegean Tuipi kantan in Macedonia lam a pai ding lak hi. A tonpih te in a mangmuhna thu a theih uh ciangin, Macedonia mite kiangah lungdamna thu va puak ding Pasian in deihtakpi hi cih a tel uh hi.

Banghangin Paul in Timothy vun-at sak hiam cih thu ngaihsun in. Hih thu in khat veivei kisam i sakloh leh i thukimpih loh thu pawlkhat i sepna in a lianzaw hamphatna leh huzaap piangsak thei cih koi bangin hong hilh hiam?

MONDAY                                                                                    August 27

PHILIPPI

Macedonia a tun uh ciangin, Paul leh a tonpih te Philippi khua ah zin uh a Europe gam ah pawlpi masa pen tua lai ah hong phut uh hi.

Sawltak 16:11-24 sim in. Sabbath ni in missionary te koi ah pai uh aa banghang hiam? Tua lai ah amaute tungah bang thu piang hiam?

________________________________________________________________

Khua khat peuh ah Paul a tun ciangin, Jew te tungah teci pang dingin Sabbath ni in kikhopna inn ah va pai pen ama ngeina ahi hi (Sawl. 13:14, 42, 44; 17:1, 2; 18:4). Philippi ah amah leh a lawmte gungei ah thungen dingina omsa numei te kiangah pai uh hi. Tua lai ah Pasian bia Jew leh Gentile te tawh kikhawm uh hi. Tua khua ah kikhopna inn omlo hi kha ding hi. Paul in Jew te kikhopna inn ah Sabbath ni aa a vapai na in Pasian thu tangko ding bek hilo in, tua ni pen ama biakpiak ni hi cih hih lai ah kimu thei hi.

Sawltak 16:25-34 sim in. Thong cingpa kikhelna thu ngaihsun in. Hotkhiatna a ngah theihna dingin bang asep kisam hiam?

_________________________________________________________________

Hotkhiatna ngahna ding tawh kisai thong cingpa dotna Paul leh Silas te’ dawnna in lungdam thupuak bulpi hi a, tatkhiatna in Jesu sungah upna hang bek ahi hi (Rom. 3:28, Gal. 2:16). Ahi zongin hih lai ah om thu khat in, a dik upna thugui te theihna leh a kician hilhtelna kihello in Jesu upna bek mah tawh tuikiphum hiam cih thu ahi hi.

Thong cingpa tawh kisai bang teng i thei hiam? Jew khat ahia Jew biakna sungah hong kikhelsa khat hiam? Bangbang ahi zongin, a kisep bel thu in Jesu pen Topa leh Honpa a upsanna ahi hi. Cornelius leh Lydia (Sawl. 16:14) te bangin Pasian thu a thei khin in Pasian a bia Gentile mi khat hi khin zenzen leh ee? Khua sunga Paul thugenna a na ngai ngei khat na hi leh ee? Bangbang hi ta se leh, ama thu tomno cik bek a ki atna in nawhtak a kituiphum pah (upna thusinna neilo pi a) cih paulap a zat ding hilo hi.

Sawltak 16:31-34 sim in. Christ thoihdamna sihna in eite aa dingin bangzah in kicing cih hong bangci lah hiam? Christ dikna in nang hong tuam a, tua bek in hotkhiatna dingin lametna hong pia ahihna thu nisim in koi bangin sin in lungmuanna hong pia thei ding hiam?

TUESDAY                                                                                  August 28

THESSALONICA LEH BEREA

Paul leh Silas te thong sungpan a suahtak khit uh ciangin, Philippi pan in paikhia uh hi (Sawl. 16:35-40). Philippi pan in Paul leh a tonpihte Macedonia te khuapi ahi Thessalonica khua ah paisuak pah uh hi.

Sawltak 17:1-9 sim in. Gentile te lak ah lungdamna thu Paul tangkona a gualzawhna ciangin Jew te in bang cih uh hiam?

________________________________________________________________

Lungdamna thu a tangko theihna dingin Paul in kikhopna inn a zonna thu i mu leuleu hi. Pasian kihta Greek te leh a kipi-et numei tampi (a tawmlo) in Paul thugen za thei mahmah uh hi. Amau te in Paul leh Silas a pawl uh hi (Sawl. 17:4). Amau te kipawl in pawlkhat in om uh a, kikhopna inn ahilo mun dang, Jason inn, ah biakpiakna bawl hi kha ding hi.

Hazatna lungsim tawh amaute a langpang te in ngongtatna hong pan uh hi. Paul leh Silas – Timothy min kigenlo – man in khuapi vaihawm ulian te mai ah tunpih in mawhsak ding sawm uh hi. Paul leh Silas amuh loh uh ciangin, Jason leh thu-um mi pawlkhat kaigawp in gamvai langpang te hi ci in khuapi vaihawm ulian te mai ah tun uh hi.

Sawltak 17:10- 15 sim in. Thessalonica khua a Jews te leh Berea khua a Jew te gamtat kilamdanna bang hiam?

_________________________________________________________________

Hih lai ah “eugenes” cih kammal in “mihoih” ahi keileh “mipi lungsim” cih hi aa “nampi lungsim nei” cihna ahi hi. Berea khua a Jew in Paul leh Silas te thukimpih ahih manun aki mawkphat hilo a, sawltak te gen thute Lai Siangtho tawh kituak takpi mah hiam cih nisim in sittel ding a lunggulhna uh hang hizaw hi. Theihtelna tawh upsanna hilo in lungsim thuakna bek tawh lungdamna thu sanna in upkhialhna piangsak thei a, tomvei sungbek kimang hi.

Ahi zongin, a sawtlo in a gualzo mahmah Berea ah Paul nasepna hong kinawngkaisak a, khanglam pen ahi Athens dongah paikhiat hong kul ta hi.

Thupiang khat peuhpeuh dikmah hiam cih na theihna dingin Lai Siangtho ciantak in na kantel nunungpen bang hun hiam?

WEDNESDAY                                                                                             August 29

ATHEN KHUA AH PAUL

Tanglai Greece te pilna phualpi ahi Athens pen milim bekbek tawh kidim khuapi khat hi. Suang tawh kibawl milim leh pasianlim te mun khempeuh a kimu thei a, a diak in mipi kikhopna lutna te ah tam pha diak hi. Tua bang milim tawh khuapi kidimna in Paul dahsak mahmah a, nidang bangin kikhopna inn (synagogue) ah pai ding cih ngaihsutna khel in, namnih tawh sep ding hong khensat hi. Kalsim in kikhopna inn ah Jew te leh Pasian kihta Gentile te tawh thu kinial a, nisim in mipi omna mun ah Greek te tawh thu kinial in om hi (Sawl. 17:15-22 en in).

Athens khua mite in a thakthak za nuam uh ahih manin, thuthuk-ngaihsun (philosopher) te pawlkhat in Areopagus, khuapi thukikupna mun, ah thugen dingin Paul zawn uh hi. A thugen na ah, Jew thungai te kiang a gen ngei dan ahi Lai Siangtho kammal te leh Israel te tawh kisai Pasian nasepna te Paul in genlo hi (Sawl. 13:16-41 tawh etkaak in). Hih bangin gen leh mipi te in lungsim la lo ding cih thei hi. Tua sangin, Lai Siangtho thutak te hih lungsim picing dawibia te teltheih ding lam tawh gen zaw hi.

Sawltak 17:22-31 sim in. Areopagus ah a thugenna ah, mite tungah Pasian, tatkhiatna, khangthu leh mihing te omzia tawh kisai bang thutak te gen hiam?

_______________________________________________

Leitung vai ngaihsutna tawh kidim Pasian leh biakna ngaihsutna a neilo dawibia te lak ah Paul kammal te in zahpih huai phial leh kilawm hi. Paul in a thugen bangci khup ding cih theilo hi hang. Ahang in, Pasian in leitung thukhen ding cih tawh kisai a gen laitak in a thugen kinawngkai sak in a khawl tawh kibang hi (Sawl. 17:31). Tua upna in Greek te ngaihsut zia nih tawh kitukalh hi:

(1)  Pasian pen hoih lua picing lua in mihing te sepna tawh kizomlo leh leitung tawh kisai na neilo cih thu leh, (2) mi khat a sih khit ciangin thawhkikna om peuhmah lo hi cih thu ahi hi. Greek te a dingin lungdamna thu in haina hi a cih thu in hong telsak hi (1 Cor. 1:23), tua hangin Athens khua ah a kikhel mi tawmcik bek om hi.

Ahi zongin, Athens khua a huzaap nei Areopagus thukikupna ah pawlmi khat ahi Dionysius leh thukikupna ah pawlmi ahih loh hangin mi thupi numei khat ahi Dimaris kici numei khat leh mi pawlkhat hong kikhel uh hi (Sawl. 17:34).

Areopagus mai ah a thugen zia a laihna in ngeina leh omzia kilamdanna te Paul in thupi ngaihsut ahihna kimu thei hi. A gennop a tut theihna dingin dawibia lapau gelh khat zong bulphuh lai hi (Sawl. 17:28). Mi tuamtuamte tungah lampi tuamtuam tawh koi bangin sem thei ding cih hih thu in bang hong hilh hiam?

THURSDAY                                                                                                  August 30

CORINTH KHUA AH PAUL

Sawltak 18:1-11 ah kum khat le a lang sung a taamna ahi Corinth khua ah Paul nasepna thu kimu thei hi. Aquila leh Priscilla te in Paul a ding khantawn lawmhoih te hong suak hi (Rom. 6:3, 2 Tim. 4:19). Paul te Corinth ah hong tun un amaute in Christian hi khinzo ahihna kimu thei hi. Rome kumpipa Claudius in Rome khuapi pan in Jew te paikhia dingin a sawlkhiatna hang zong hi thei hi. Jew mipi te lak ah “Christ” cih mintawh buaina tam lua ahih manin hih banga Rome khuapi panin a kisawlkhia ahi hi ci in Rome khangthu ciamteh Suetonius in na ciamteh hi (Claudius 25.4). Rome khua a om Christian te in lungdamna thu a genna pan un tua bang buaina piang hi thei ding hi. Aquila leh Priscilla te in hih bangin a omna vuah lungdamna thu tangko nasep ah a kihel khin ngeisa te hi kha ding hi. Jew mi ahihna uh leh upna kibat pih ahih banah hih mite tawh a nasep uh ki bang hi.

Sawltak 18:4-17 sim in. Corinth a Paul nasepna in bang gah nei hiam?

__________________________________________________________________

Macedonia pan in Timothy leh Silas te hong tun uh ciangin, tua lai a pawlpi te kiang panin sum tawh panpihna hong keng uh hi (2 Cor. 11:8, 9). Tua in Paul mahmah thuhilhna bekah a kipumpiakna ding panpih hi. “Lungdamna thuhilh te in lungdamna thu panin kivakna a ngah ding uh hi” (1 Cor. 9:14) cih ahilh hangin a nasep hun tawntung amahmah kiguai in sep ding Paul sehna ahi hi.

Jew te in nakpi tak in Paul thuhilhna a langpan uh hangin Gentile te mah bangin Jew te pawlkhat in a um uh hi. Tua bang a kikhel te lak ah kikhopna inn makai Crispus leh a innkuanpih te zong kihel hi. Corinth khuami te tampi tak zong kikhel in tui kiphum uh hi. Jews te tawh buaina hong lian semsem ahih manin Paul in Corinth khua pan paikhiat baih ding geel a, ahi zongin zan in amang sungah Corinth khua ah a omsuak na ding Pasian thapiakna ngah hi (Sawl. 18:9-17).

Antioch ah a kilehkikna lampi ah, Aquila leh Priscilla te tawh Ephesus lam zuan in pai uh a, a khualzin a zop kik ma in tua lai ah tawmvei sung tam hi. Tua lai ah Jew te kikhopna inn ah thuhilhna ding hunpha ngah a, tua lai a mite in a deihna hang un a khoh uh ciangin, “Pasian deihna ahih leh kong pai kik ding hi” ci in kamciam pia hi (Sawl. 18:18-21). A khualzin kik ciang paikik takpi hi.

A thugen a kisanlohna hangin lungneu in a om laitak, tua lai a kha manpha te hotkhiatna dingin Topa kiang pan thapiakna Paul kisam pha hi. Paul thuak bangin i thuak hun ciangin Paul tunga Topa kammal in ei te tungah bang hong gen hiam? (Sawl. 18:10)

FRIDAY                                                                                       August 31

NGAIHSUT BEH DING: “A minthanglo mipi deih ahilo thumaan a tangko te in, Christian a kici te ngawn in hong kisanloh hangin, lungkiat ding hilo hi. Paul leh a seppih te mahmah zong a sepsak mite in na sang khin lo uh hi. Singlamteh thupuak te in amau le amau pilvangtak leh thungetna tawh kithuam (galvan bangin kibulh) tawntung in upna leh hangsanna tawh Jesu min suangin mainawt tawntung ding hi.” – Ellen G. White, The Acts of the Apostles, laimai, 230.

   “Leitung hun hong bei kuan ciangin, amaute tungah a kipuak thu te dik mah hiam ci in Berean khua mite bangin nisim in Lai Siangtho kan aa a zong mi, tu laitak in a tawm hangin, Pasian thukham tungah a citak mi hong tam zaw ding hi…

“Mi khempeuh amau tunga kipia khuavak tawh kizui in thu kikhen ding hi. Topa in Ama kamtai te hotkhiatna thupuak gen dingin sawl khia a, tua thu a za mite in Ama nasem te tungah a bawlzia uh mawhpuak la ding uh hi. Lungsim siangtho tak tawh thutak a kan tiltel te in amau tunga kigen thu te Pasian kammal khuavak tawh kidawmtak in sittel ding uh hi.” – Laimai, 232.

KIKUP DING DOTNATE:

1.               Monday dotna gual nunung pen hih kammal ngaihsun in kikum kik in: “A kituiphum ding te lam pan in limtak in kipuah sitset ding kisam hi… Thutak a sangcil te tungah Christian nunzia thugil te siangtak in hilh ding kisam hi” – Ellen G. White, Testimonies for the Church, vol. 6, laimai, 91, 92.

2.    Wednesday dotna nunung pen ngaihsun pha kik in. Pawlpi khat hihna tawh Paul bangin ngeina kibatlohna te telsiamna leh lungdamna thumaan leh biakna deihna khiamlo in amau omna mun ah amau zia bangbang tawh koi bangin vaban thei ding i hiam?

3.                                    Sawltak 17:32-34 sim in. Athens khua a Paul thugenna ah mite dawnna thum te panin bang sin thei ding i hiam? “(1) Pawl khat in zahpih uh hi. Hih khualmi Jew thugen pa i lawp mahmah na zahpih in muhnop sa lel uh hi. Ciamnuihna bangin sang lel kha ding uh a, ahi zongin ciamnuih tawh a kipan khat lungkiat thuaksiatna tawh tawp thei hi. (2) Pawlkhat in khensat pah lo uh hi. A lauhuai pen thu in zingciang a ding baihno tak a sot to aa i geel pahpah na ahi hi. (3) Pawlkhat in um uh hi. Pasian piak khat peuh mihai te bek in nial ding cih mipil te in thei uh hi.” – William Barclay, The Acts of the Apostles, rev. ed. (Philadelphia: Westminster, 1976), laimai, 133.

4.    Paul in Athens mite teltheihna dingin dawibia laigelh khat thugen bulphuh hi (Sawl. 17:28). Khat veivei hih bang thu te zatna in man nei thei ahih na hih thu in bang hong hilh hiam? Bang lauhuaina te zong om veve hiam?