ZSS SINNA 8: JERUSALEM AH THUKIKUPNA (COUNCIL)

SINNA 8          August 18 – 24

JERUSALEM AH THUKIKUPNA (COUNCIL)

---

SABBATH NITAK

Tukal sung sim dingte: Sawltak 15; Gal. 2:11-13; Pai. 12:43-49; Rom. 3:30; Siam. 18:30; Mang. 2:14,20.

LAI SIANGTHO BULPHUH: “ ‘Amaute mah bangin eite zong i Topa Jesu hong hehpihna tungtawnin i suakta cih i um hi’ ”(Sawltak 15:11, ZIV).

Kum nih khit ciangin, Paul leh Barnabas Syria gam Antioch ah ciahkik uh hi. Pawlpi bup in missionary in amau te sawlkhia uh ahih mah bangin tua pawlpi ah report apiak kik ding uh ahimah ahi hi. Amau te report in amau gualh-zawhna te bulphuh zawlo in Pasian mahmah in amau tungtawn in bang teng sem cih hi zaw hi.

A report uh ah, Jew te a kikhel pawlkhat a om hangin, Gentile te lak ah nasepna a gualzaw zia hi pipen hi. Cornelius thu khit vun-atlo Gentile te kikhel a hong lutna hangin vaipi khat hong suak ta hi (Sawl. 11:1-18). Ahi zongin, tu in amaute tampi tak pawlpi sungah hong lut uh ahihi manin, thute hong buaihuai zaw kan lai hi. Jerusalem a thu-um mi pawlkhat nuam mello uh hi. Gentile te Pasian mite tawh a kipawl theihna dingun vun a at masak uh kul hi ci uh hi.

Sawltak 15 in Gentile tawh kisai buaina in a sang-pen a tun hun leh pawlpi in buaina venna ding a sepkhopna uh kimu thei hi. Jerusalem Council in sawltak te makaih pawlpi tangthu ah leitung bup nasepna dingin a thupi mahmah thu khat ahi hi.

SUNDAY                                                                                     August 19

VAIBUAI AH A THUBULPI

Antioch khua a pawlpi in a cil panin khat le khat kilemtak aa kipawl khawm Jew leh vun-atlo Gentile te kigawn a kiphut pawlpi ahi hi (Sawl. 11:19-21; Gal. 2:11-13). Ahi zongin Jerusalem pan hong pai thu-um mi pawlkhat te hong tun ciangin tua kipawlkhopna hong kitamkham hi.

Sawl. 15:1-5 sim in. Pawlpi in a tuah buaina bang hiam?

_______________________________________________

Judaism biakna a suaksak te, a neu 5 sunga kigen thu-um Pharisee te khawng hi kha ding hi. Pawlpi sungah Pharisee te a omna lamdang sak ding hilo hi, ahang in a kikhel ma in Paul mahmah zong Pharisee khat ahi hi (Phil. 3:5). Antioch ah hong paina uh zong amau tawm a hong pai hih tuak hi (Sawl. 15:24). Himah leh, tua hun khit Antioch a thupiang khat ah pawlpi sungah vun-atlo Gentile te a omna thu in sawltak te zong a kihel Jew pawlkhat kisuangsak (deihlo) uh hi (Gal. 2:11-13).

Galati te a laikhakna ah hih Judah biakna ultung sak te tawh kisai buaina piangsakte (Gal. 1:7, 5:10) leh “sanggam zuaute” (Gal. 2:4) na ci aa, a lungkim lohna thu Paul in na gen hi. Amaute lungtup in lungdamna thu hanga kha suahtakna susia ding leh thu-um Gentile te thukham nuai ah sila a koih ding ahi hi.

Amau gen bulpi in, Gentile te vun ki-atlo in Jew te biakna thukham te a zuih kei leh hotkhiatna ngahlo ding cih thu ahi hi. Amau upna ah, hotkhiatna pen Thukhun Lui bang a Pasian kamciam ngah kipawlna sung bek ah om a, vun-atna lo tawh Pasian teltuam mite lak ah kipawl theilo cih ahi hi (Pian. 17:9-14, Pai. 12:48). A tom in, Jew biakna ah a lut kei uh leh Gentile te in hotkhiatna ngahlo ding cih ahi hi.

Paul leh Barnabas te in ahih leh, lungdamna thu tawh kilehbulh ahi tua bang hih masak ding thukimpih lo uh hi. Judea pan hong pai te in nakpi tak do ahih manin hih thu ah nakpi kiselna hong piang hi (Sawl. 15:2). Hih thu in Antioch bek ah siansak dingin thulian in thupi lua hi. Pawlpi kipumkhatna a lauhuai dinmun tung ta hi. Tua hih manin Antioch a sanggamte in hih thu siansakna a nei dingin Jerusalem ah Paul leh Barnabas kihel taangmi pawlkhat va paisak uh hi.

Judah biakna thupisak te mun ah om in kingaih-sun in. Na thu (muhna) a panpih ding bang nialna bawl ding na hiam?

MONDAY                                                                                                        August 20

VUN-ATNA

Hih buaina ah a lianpen vaibuai khat in vun-atna thu ahi hi. Hih thu pen mihing phuat hilo hi (Matt. 15: 2, 9 tawh saikaak in). Hih thu pen Abraham le a suan-le-khak te leh Pasian kikal ah ciaptehna lim dingin Pasian sawl ahi hi (Pian. 17:9-14).

Pai. 12:43-49 sim in. Israel innkuan pan a suak te ban ah, kua te zong vun-at ding kisam hiam?

_________________________________________________________________

Hih thuciamna i thupha in Israel innkuan sunga suakte bek hilo in a lunggulh nak leh sila ahi a pemta te ahi zongin vun-at in kihel thei ding hi. Vun a ki-at khit ciangin pemta mipa in Israel a piang mipa mah bangin Pasian mai ah kikim ding a, “gammi khat tawh ding hi” (Pai. 12:48).

Vun-atna pen Pasian kamciam kipawlna ah kihel thiehna dingin pasal khempeuh a ding a kipelh theilo khat ahi hi. Jesu pen Israel te Messiah ahih manin, Gentile te in vun a at masak kei leh hotkhiatna thupha hamphatna te ngah theilo ding a ci uh ahi hi.

Rom. 3:30, 1 Cor. 7:18, leh Gal. 3:28, 5:6 te sim in. Vun-atna tawh kisai Paul i tel zia koi bang hiam?

_________________________________________________________________

Gentile te in Jew biakna ah a lut masak kei leh hotkhiatna ngah theilo ding cih thu ah ngaihsut thupi nih ahi thuciam leh hotkhiatna a gawmkha uh ahi hi. Pasian thuciam kipawlna a omna in hotkhiatna ding khamuanna pia lo hi (Jer. 4:4, 9:25). Tua ban ah, Abraham mahmah a vun-at man hilo in a vun-at ma nangawn in a upna hangin hotkhiatna (diktang) ngah hi (Rom. 4:9-13). Hotkhiatna in upna hang bek hi tawntung a, thuciamna in ahih leh Pasian in amahmah leh ama hotkhiat ding geelna te a hehpihna tawh a theihsakna ding geelkholhna ahi hi. Hih nasep a sem dingin Israel te akiteel ahi hi (Pian. 12:1-3).

Thuciam leh hotkhiatna kizom lua ahih manin hih thu-um mite in vun-atna pen sepna tawh ngah theih (thalawh theih) sa kha uh hi. Pasian hong hehpih hoihkhatna in mihing sepna munah na hong sem lo hi. Thu-um Gentile te hotkhiat ngahna dingin vun-at sak teitei na in lungdamna thutak melhem sakna (Gal. 1:7, 2:3-5), Pasian hehpihna pampaih (Gal. 2:21), leh Christ in kimanna neilo (Gal. 5:2) suak sak hi. Tua ban ah, hotkhiatna in mi khempeuh ading ahihna thu tawh kilehbulh lai hi (Col. 3:11, Titu 2:11). Hih bang ngaihsutna te Paul in lungkimpih ngeilo hi.

Pawlpi maan sungah omna ciang bek tawh hotkhiatna ngah ding cih ngaihsutna banghangin lauhuai hiam?

TUESDAY                                                                                                      August 21

KINIALNA

Sawltak 15:7-11 sim in. Tua kinialna sungah Peter gen thu bang hiam?

________________________________________________________________

Luke in tua thukikupna aa kigen thu te a vekpi in hong genlo hi. Judaism biakna a suaksak nuam pawlte in bang siksan in gen uh a (Sawl. 15:5) Paul leh Barnabas te in koi bangin dawngkik (Sawl. 15:12) cih thu te lunglut huai peuhmah ding hi. Peter leh James te thugenna bek ki-at a, ahi zongin hih thu in sawltak te lak ah a thupi-na leh a kipi ngaihsutna uh hong lak hi.

Sawltakpi te leh upate tungah tuama kum pawlkhat lai Cornelius tawh a kimuhna thute Peter in phawkkik dingin gen hi. A tom in en leng, tuama lai in Jerusalem a om sanggamte kiang a gen thu mah gen kik hi (Sawl. 11:4-17). Pentecost ah sawltakte mah bangin Cornelius leh a innkuanpih te Kha letsong piakna tawh Pasian mahmah in vun-atlo Gentile mi ahi Cornelius kikhelna a sanna lak khin zo hi.

Hotkhiatna tawh kisai Jew te leh Gentile te kikal ah kideina a omlohna Judea gam thu-um mite in a kipsan theihna dingun Pasian ngiat mahmah in Peter a zang ahi hi. Amaute in a siangtho sak Thuciam Lui hamphatna ngah theihna dingin thukhun leh ngeina acitloh uh hangin Pasian mahmah in amaute lungsim sawpsiang khinta ahih manin kua mah in thu-um Gentile te a sianglo in ngaihsun thei nawnlo ding hi. Peter thukhupna kammal in Paul kammal ding tawh kibang hi, “amaute mah bangin eite zong i Topa Jesu hong hehpihna tungtawnin i suakta cih i um hi” (Sawl. 15:11, ZIV).

Sawltak 15:13 -21 sim in. Gentile tawh kisai buaina siansakna ding Jame in bang thu sung hiam?

________________________________________________________________

Jame kammal in thunei mun ah om ahihna hong musak hi (Sawl. 12:7, 21:18, Gal. 2:9, 12 tawh etkaak in). Amos genkholhna ahi (Amos 9:11, 12) David kumpi gui dinkikna ding thu ahi puksa David puanbuk lamkik ding tawh kisai bangci bangin tel hi ta se leh, Jame gennop bulpi pen in, Gentile te hong kipawl theihna dingin Pasian in a sanna thu a kilamkik Pasian mite ahihna uh leh Israel sungah a kihel theihna thu uh ahi hi. Hih thu hangin, Israel gam sungah a hong teng nuam gamdang mite cihloh a hong kikhel Gentile te tungah khantanna bangmah bawl nawnloh ding a khensatna ahi hi.

WEDNESDAY                                                                           August 22

SAWLTAK TE THUSUAH

Sawltak 15:28, 29 sim in. A hong kikhel Gentile te tungah bang thute khaktan/ seploh ding sawl uh hiam?

_______________________________________________________________

Thukikupna a piangsak buainapi lungkim huaitak in kisiangsak zo hi. Hehpihna hangin hotkhiatna kingah ahih manin, thu-um Gentile te in vun-at kisamlo in pawlpi hong zom thei uh ahi hi. Himah leh, hih thu li te panin amau te kikem ding uh hi: (1) pawi ahih kei leh vanzuakna phual a kizuak milimte thoihna ante, (2) sisan nekna, (3) ngawnheklup ganhing sa te, tua in sisan a kiluangkhia saklo sate, leh (4) numei-pasal paktatna te ahi hi.

Christian te a tamzaw in hih nek le dawn tawh kisai khaamna thu thum te (khatna pan thumna) tomkaal sung kimang ding bek in ngaihsun uh hi. Hih thute Jew ngeina tawh kituaklo ahih manin Jew leh Gentile thu-um mite kikal kizopna ding bek in mi tampi te in ngaihsun uh hi. Tua mah bangin, nek le dawn tawh kisai thukham (Siam. 11)  leh Sabbath thukham te (Pai. 20:8-11) ahi Thukhun Lui thukhamte hih lai ah kigen kiklo ahih manin, tua te Christian te aa ding kisam nawnlo hi ci lai uh hi.

Ahi zongin, hih sawltak te thusuah in Thukhun Lui tawh kisai na te nawlkhin in a thak ahih kei leh tomkaal sung kimang ding thukhun a pia hi zenzenlo hi. A taktak in, Kha Siangtho makaihna tawh (Sawl. 15:28) sawltakpite leh upate in Israel te tungah kipia Siampilaibu 17-18 tawh kisai thukhun te agenkik uh a hi hi.

Siampilaibu thu omzia ah, hih khaamna te in dawibiakna tawpsanna/nialna lahna ahi hi. Khualmi khat peuh Israel te lak ah a tennop leh a kihhuai gamtatna dawibiakna ngeina te nusia ding hi (Sawl. 18:30). Tua mah bangin, thu-um Gentile khat peuh in pawlpi ah a kizop nop leh dawibiakna ngeina te langpang in kiptak din ding kisam hi.

Hih in a kal masa pen hi pan hi. Amah pawlpi sungah alut khit ciangin Moses ma hun a mi khempeuh tungah kipia thukham, gentehna in Sabbath (Pian. 2:1-3) zuihna tawh Pasian deihna mang ding leh an siang le an nin te (Pian. 7:2) khen ding ama nunzia hi ding hi.

Tua ahih manin, hih thusuah in tomkal kimang ding bek ahihlohna kimu thei hi. Mangmuhna 2:14, 20 ah zong khamna masa leh a nunung pen kimu thei kik hi. A taktak in, hih thusuah in Thukhun Thak hun khit sawt pitak mah Christian te in zuih dingin na ngaihsun tawntung uh hi.

Buaina khatpeuh a om ciangin khat le khat kizahna lungsim leh kiniamkhiatna tawh tukhawm a buaina vensak ding koi bangin sin thei ding i hiam?

THURSDAY                                                                               August 23

JERUSALEM PAN LAIKHAK

Sawltak 15:22-29 sim in. Thukikupna khensatna tawh kisai in Jerusalem a om pawlpi in bang sepbeh uh hiam?

________________________________________________________________

Amasa pen in bang thu kikhensat hiam cih Gentile te kiangah theihsakna laikhak uh hi. Jerusalem a om sawltakte leh upate min tawh ki at tu laikhak in, Jerusalem a om pawlpi in sawltakte makaih ahih manin Christian kipawlna khempeuh tungah thunei pen ahihna alak zumlai ahi hi. A.D. 49 in a ki-at hih laikhak in Christian laikhak masa pente lakah khat ahi hi.

Jerusalem a om pawlpi in Antioch ah Paul leh Barnabas tonpih dingin taangmi nih ahi Barsbbas leh Silas sawl ding khensat uh hi. Amaute in tua laikhak va puak ding ahi hi.

Sawltak 15:30-33 sim in. Antioch ah om pawlpi te in hih laikhak bangci ngaihsut/ dawng uh hiam?

_________________________________________________________________

Tua laikhak a kisim ciangin, thapiakna kammal te hangin pawlpi mite lungdamna lianpi tawh kidim uh hi. A kikhel Gentile te tung panin vun-atna kikal nawnlo ding hi. Tua laikhak i nget thu li te tungah zong bangmah nial ding nei lo uh hi. Pawlpi sunga kikhenna a piangsak nakpi tak buaina a hong siangta ahi hi, athu bek ahi phial zongin.

Thukikupna tawpna ah, Jerusalem a pawlpi makai te in Paul nasepna a theihpihna uh zong lak beh lai a, sanna leh kimuanna lim in Paul leh Barnabas tungah kilawmtatna khut taklam kilen beh lai uh hi (Gal. 2:9). Ahi zongin, Jew ngeina a paksak Jew Christian te in ngeina bangin siang nailo cih um uh ahih manin Gentile te tawh ankuang umkhop ding lungsim kizo nailo uh hi.

Hih thu pen Gal. 2:11-14 sunga Peter zong a kihel thu ah kimu thei hi. Ellen G. White in, “nungzuipite nangawn in thukikupna khensatna utna tawh sang dingin kiging/kizo nailo uh hi” ci hi. – The Acts of the Apostles, laimai, 197.

Nang le nang kikhem kei in. Minam, ngeina kibanglo mite leh dinmun kibanglo thu-uppih te tawh kikholhkhop ding haksa na sa hiam? Koi bangin lungdamna thu tawh kituaklo hih bang ngaihsut puakzia siansuah thei ding na hiam?

FRIDAY                                                                                                         August 24

NGAIHSUT BEH DING: “Pasian lampi honsakna zah in Jew thu-um mite khang zuahzuah lo hi. Gentile te lak ah sawltakte nasepna in Jew kikhel te sangin Gentile kikhel a tamzawk pek na hong lak hi. Thu-um Gentile te in pawlpi kikholhkhop theihna dingin biakna ngeina thukham te zui dingin sawl kei le uh lungdamna thu a sang mite lak ah minam dang te tawh a kilamdanna uh a bei khak ding Jew te lauthawng uh hi.” – Ellen G. White, The Acts of the Apostles, laimai, 189.

“Biakinnpi tawh kinai a om Jew Christian te in amau ngaihsutna te Jew minam khat i kilamdanna hamphatna te tungah heikik zaw hi. Christian pawlpi in Judaism pawite leh ngeina te panin pialkhia cih mu in, Jew ngeina siangtho te in upna thak sungah a sawtlo in beimang ding cih a telmuh uh ciangin mi tampi te in hih kikhelna in Paul piansak hi ci in musia uh hi. Nungzuipite nangawn zong hih kikhelna lungkimtak in san ding kiging/ kizo nailo uh hi. Pawlkhat te in ngeina pawite thupi sak mahmah uh a, Paul in Jew thukham te thupi simlo hi ci in ngaihsun uh ahih manin Paul maipha pia hetlo uh hi.” – Ellen G. White, The Acts of the Apostles, laimai, 197.

KIKUP DING DOTNATE:

1.            Monday dotna nunung enkik in. Pawlpi maan sungah omna in hotkhiatna ding lungmuanna hong pialo cih thu bangci tel na hiam? Gentehna in, tanglai Israel in “pawlpi maan” bang hi a, ahi zongin Israel mi khempeuh in hotkhiatna ngah khin ding cihna hilo hi. Pawlpi maan sungah omna in hotkhiatna ding kiciatna hilo ahih leh, tua pawlpi sungah omna in bang phattuamna om hiam?

2.                   Koici bangin vun-atlo Gentile te sang ding cih thu in banghangin pawlpi masa te ki-ukna tawh kisai vaibuai thupi masa pen khat hi thei hiam? Tuhun in pawlpi sungah hih tawh kibang vaibuai bang   khawng om thei ding a, tua bang buaina te siansakna ding Sawltak 15 in koi bangin hong hilh hiam?

3.                  Kikupna sungah, Gentile te pawlpi hong zop ma un Jew biakna ah a lut masa uh kul hi aci te lamah a pang ding pawlkhat kiseh un. Amaute nialna in bang hi a, koi bangin dawngkikna pia ding na hiam? Hih bang kinialna te in tu laitak in telnop mahmah tawh kibang i sak thu te tua lai hun lai hun in haksa zaw tham ding ahihna koi bangin hong musak hiam?