HSS ZIRLAI 12-NA: BABULON LEH HARMAGEDDON

 ZIRLAI 12-NA                  JUNE 16-22, 2018

BABULON LEH HARMAGEDDON

CHÂNGVAWN: “A chalah chuan hê hming: THURÛK, BABULON ROPUI, NAWHCHIZUALTE LEH LEIA THIL TENAWMTE NÛ tih a inziak a” (Thupuan 17:5).

SABBATH CHAWHNÛ                                                              JUNE 16

Chhiar tûrte: 1 Lalte 18:1–40; Isaia 52:9; 1 Korin 15:1, 2; Thupuan 14:8; 16: 12–16, 19; Thupuan 18:1– 10.

KAN hriat tâk ang khân, Thupuan bû-ah hian Thuthlung Hlui bûten an lo sawi hlimthlâ leh tawngkam eng emaw zât hmuh tûr a awm a. Entîr nân, “Babulon” tih hming ringawt pawh hi vawi ruk lâi a lang. Nimahsela, Thupuan bû hi chuan hmânlâia Nebukadnezzara lalram, kum za tam tak ral taa tlu chhe tawh chungchâng thû kha chu a sawi lo tih hria ila. A ziaktu Johana hian Thuthlung Hlui bûten an lo sawi thin khawpui hming chu thutak sawi chhuah nân a hmang mai zâwk a ni. Chutiang chuan, Babulon— ram rorêlna leh sâkhaw thila Pathian mîte lo rap bet tawh thîntu lalram thiltithei tak mai chuan tâwpna huna a tih ang la ti ve lehtu tûr nungchang leh ziarâng chu a sawi fiah a ni tih hria ila.

Thuthlung Hlui lama thumal kan hmuh, Thuthlung thar lamah erawh Thupuan bû-ah chiah kan hmuh chu Harmagedon tih hi a ni a. Hê thumal hi Hebrai tawng atanga chher chhuah niin, a awmzia chu “Megiddo Tlâng” tihna nia rin a ni a, hmânlâi Israel rama hmun pakhat hming a ni. Harmageddon chungchângah hian ngaihdân hrang hrang a awm a, mi tam tak chuan hemi hmun Megiddo-ah hian khawvêl tâwp dâwn hnaiah indona râpthlâk tak a thleng dâwn niin an ring a.

Tûn kârah hian Babulon leh Harmageddon chungchâng kan thlîr ho dâwn a, hêng hming pahnihte hmang hian Bible-in eng thu nge min hrilh tih chu kan zir dâwn a ni.

SUNDAY                                                                                        JUNE 17

“A THINURNA UAIN CHU”

Thupuan bûa Babulon sawina châng paruk, hêng—14:8; 16:19; 17:5; 18:2, 10, 21-te hi chhiar la. Thuthlung Hlui bûten Babulon chanchin an sawi dân kha rilrua hre reng chungin, hêng chângte hian ni hnuhnunga Babulon chêt dân tûr chungchâng eng nge min hrilh sawi rawh.

Bible hi khawpui pahnih, ‘Jerusalem leh Babulon chanchin a ni e,’ tia sawi a ni ve thîn a. Bible hmun hrang hrangah hian Jerusalem chu Pathian leh thû a thlunpui a mîte khawpui sawina anga hman a nih lâiin (Sâm 102:21; Isaia 52:9; 65:19, Thupuan 3:12), Babulon erawh chu inawpbehna, tharum thawhna, sâkhaw dik lo leh uâlau taka Pathian laka helna entîrtu nia ngaih a ni vê thung.

Entîr nân, Babel In Sâng (Genesis 11:9) kha ngaihtuah ta ila. Hebrai tawnga “Babel” tih an sawina thumal tho hi “Babulon” ram sawina atân pawh hman a ni a. 1 Petera 5:13-ah chuan Peteran a lehkhathawn lo chhiartûte chu Babulon khuaa kohhranhoten chibai an bûk thu a hrilh a.  Mahse heta “Babulon” a tih hi chu hmânlâi Babulon khua, tûnlâia Iraq kan tih tâk vêla awm thîn kha ni lovin, nakin lawka kohhran la rap bettu tûr Rome khawpui kha a ni zâwk nia ngaih a ni.

Thupuan 14:8 leh 18:3 chhiar la. Hêng thûte hian a chhe zâwnga Babulon khawpuiin khawvêl leh Pathian mîte a nghawng dân eng tin nge an sawi le?

Thupuan bû-a kan hmuh ang hian, Babulon-in a entîr thuneitu hûhâng dik lo tak mai chuan khawvêl pum pui hi a eng emaw kawng tal chuan a fan chhuak vek a. “A mi ngaih chîn vânga thinurna uain” (Thupuan 14:8) tih tawngkam hi thurin dik lo, zirtîrna dik lo leh thil chîn tha lo bâkah, chûngten an thlen rah tha lo tak takte sawina chu a ni a. Babulon chu “hnam zawng zawngte” tikhaw lo vektu sual a ni a. Chuvâng tak chuan, mi tin hian, an lo khawloh vê lohna tûrin an ngaihven a ngâi rêng a ni.

Tûnlâi khawvêl hi han thlîr kual ila, hlemhlêtna, buaina leh inrahbehna tam tak kan hmû ang. Hei hian Isua-ah leh a Thu-a kan inthlun ngheh tlat a ngaihzia eng nge min hrilh le?

THAWHTANNΠ                                                                          JUNE 18

Babulon chu a tlâwm ta

Babulon hûhâng tha lo tak chuan khawvêl hi fan chhuak hneh tawh viau mah sela, eng tik nî-ah emaw chuan a la tâwp dâwn tho niin Thupuan Bû chuan min hrilh.

Thupuan 18:1–10 chhiar la. Hêng chângte hian “Babulon ropui” chungchâng eng nge min hrilh le?

Vântirhkoh pahnihna thuchahin Babulon tlûk thu a sawi kha (Thupuan 14:8) Thupuan 18:2-ah hian sawi nawn leh a ni a. He tawngkam hian sualna khura Babulon khawpui a luh thûk tawhzia a sawi chiang hlê.

“Bible chuan LALPA lo kal leh hmain Setana chu ‘thiltihtheihna tin rêng te, chhinchhiahna tin rêng te, dâwt thilmak tin rêngte nêna lo kalin’ hnâ a thawk ang a; ‘chhandama an awm theihna tûra thutak hmangaihna pawm lotûte chu’ ‘inbumna chak tak, dâwt thu an âwih theihna tûrin’ kal san an la ni dâwn a ni tih a sawi a. 2 Thesalonika 2:9–11. Hetiang dinhmun hi a thlen a, Kristian ram zawng zawnga kohhran leh khawvêl a inzawm hun a thlen hmâ lo chuan Babulon tlâwmna chu a la famkim rih lo vang. Thil chu a tahtawlin a inthlâk chho zêl dâwn a, chuvângin Thupuan 14:8-a sawi pawh hi nakin deuha lo thleng tûr a la ni rih.”—Ellen G. White, The Great Controversy (Indona Ropui), pp. 389, 390.

Hê hrilhlâwkna hi tûnah hian a thleng famkim tawh em tih chu Pathian chauhin a hria ang a. Nimahsela, hêng chângten an sawi ang hian, thlarau lam Babulon hian eng tik nî-ah emaw chuan a sualna a nasat tawh êm avângin Pathian rorêlna a la hmachhawn dâwn tih chu kan hre tho a ni. “A sualnate chuan vân pawh a tawng ta hial a, Pathianin a thiltih fel lote pawh chu a hre reng sî a” (Thupuan

18:5). Hê tawngkam hian Thuhlung Hlui lama hmânlâi Babulon chungchâng sawina a rawn tilang a (Jeremia 51:9), rorêlna hun chu a lo thleng ngei dâwn tih a sawi bawk.

Hê rorêlna lo thlen tûr thû hian keini hi chu min thâwng ve tûr a ni lo. A enga pawh chu lo ni se, hmânlâi Babulon pawh khân rorêlna chu a lo hmachhawn tawh tho va (Daniela 5 en la). Pathian Lehkha Thu-a hmun eng emaw zâtah hian mi tinin—Babulon pawh telin an thiltihte an sawifiah theuh a la ngaih tûr thû chiang takin a sawi. Mahse keini Kristiante hi chuan chu rorêlnaah chuan kan âiawha ding tûr Sawipuitu kan nei tih kan hria a (1 Johana 2:1; Daniela 7:22). A va han thlamuanthlâk êm! Chuti ni lo se, Babulon chan âia kan chan a that bîkna tûr a awm lo vang.

Hremna tâwk lova kal zêl ni maia lang rorêlna dik lote leh suahsualnate hian eng tik nî-ah emaw chuan Pathian hremna hnuhnung ber chu an la hmachhawn dâwn a ni tih thuthiam hi eng ti nge i lo thlamuanpui ve theih ang?

THAWHLEHNΠ                                                                            JUNE 19

HARMAGEDDON

Mi tam zâwk daihte hian—Kristiante zînga tam tak pawh telin—Thupuan bu chungchâng hi hre tam vak lo mah sela, he bûa hmun hming pakhat lo lang hi chuan an ngaihven tlâng hlawm hlê tho mai, chu chu Harmageddon tih hi a ni (Thupuan 16:16 en la). A sâkhua ang zâwnga la ve lêm lote pawhin hê thumal hi khawvêl hmâkhua hriltu tûr indona hnuhnung ber sawina niin an ngâi deuh fur a ni. Lemchan siam chhuahna hmunpui Hollywood pawhin Harmageddon tia an phuah, kan chênna lei lam pana arsi kawngbo (asteroid) lian tak pakhat rawn thlâwk mêk chanchin chu an siam a. Chutiang chuan sâkhaw mî ni ve lêm lote rilrû-ah pawh khawvêl tâwpna thlen tûr thû hi eng emaw chin chu a lo awm ve tho a ni.

Kristiante zînga tam tak, Thupuan bû chhiar thînte leh a thil sawite ring êm êmtûte chuan Harmageddon indona hi Middle East-ah khuan a tak takin khawvêl tâwp dâwn hnaiah a thleng dâwn niin an ngâi a. Mi thenkhat chuan Asia ram atanga lo kal sipai maktaduai 200 rual chu Israel ram hmâr lamah an rawn lût hum hum mai dâwn niin an ring a. Mi thenkhat dang erawh chuan khawvêl hmun hrang hranga innghirnghona leh indona thleng mêkte hi Meggido hmuna Harmageddon indona-ah chuan chin fel ni dâwniin an sawi vê thung a ni.

Amaherawhchu, Bible hi chuan chutiangin a sawi hiauh lo. Harmageddon tih chu hnam hrang hrangte inbeihna ni lovin, lei leh vân pum huapa inbei reng pahnihte inbeihnain a vâwrtâwp a thlenna a ni zâwk a. Sum leh pâi thil emaw, ram rorêlna lam hawi emaw pawh ni lovin, sâkhaw lama inbeihna a ni zâwk; chutih rual chuan sum leh pâi leh ram rorêlna pawh a tel vêna chen chu a awm tho bawk.

Thupuan 16:12–16 chhiar la. Hêng chângte atang hian Harmageddon chungchâng eng nge kan hriat theih awm le?

Heta a tawngkam hman hi entîr nei a ni hlawm tih lo hria ila. Dragon kâ atang leh sakawlh kâ atang leh zâwlnei der kâ atanga lo chhuak thlarau bawlhhlawh, chungû ang tak lo chhuak tih te a sawi a (hei hian Thupuan 13-a sakawlh pahnihte kha a kâwk a; tin, “zâwlnei der” a tih pawh hi Thupuan 13:11-in a sawi lei atanga lo chhuak sakawlh kha a kâwk bawk). Hetah pawh hian indona ropui chu hmuh theih a ni leh bawk a, “ramhuai thlaraute” chu “Pathian Engkimtitheia ni ropui taka” indonaa mîte hruai khâwm tûrin an lo chhuak niin a sawi (Thupuan 16:14). Harmageddon thlen dân tûr chu eng pawh lo ni se, khawvêl pum huapa Krista mîte leh Setana mîte inbeihna a ni a. Chuvângin heti lâia indona a sawi hi chu tûnlâi Israel ram kil pakhat, Megiddo vêla tual chhûng indona mai mai a ni lo tih a lang.

Thupuan 16:15 chhiar la. Hêng thilte a thlen mêk lâi hian, Isuan chanchin tha thuchah hmangin min fuih phûr a, a lo kal leh ngei tûr thû min hrilh mai bâkah, a felnaa thuam kan ngaihzia min hrilh a ni. Eng tin nge hei hian keini pawh kan tel vê-na indona hi thlarau lam thil a nih dân hrethiam thei tûrin puih le?

NILÂINΠ                                                                                        JUNE 20

HARMAGEDDON LEH KARMEL TLÂNG: Then 1-na

Hê Harmageddon indona ropui tak hi eng nge ni?  A hmasa bera kan hriat tûr chu, he hming awmzia hi “Megiddo Tlâng” tihna niin a lang a. Nimahsela, Megiddo tia an hriat hmunah khu chuan tlâng pakhat mah a awm sî lo; a piah deuh lawkah erawh chuan Karmel Tlâng a awm thung a, chuvângin mithiamte chuan Megiddo Tlâng tih tawngkam hian  Karmel Tlâng a kâwk niin an ngâi. Chu mai chu ni lovin, Karmel Tlânga Elija leh Baala puithiamte an inbeih thu kha Thupuan 13-in inbeihna a sawi entîrtu hi niin an ngâi leh bawk a ni.

Nimin lama kan hmuh tâk ang khân, Thupuan 16:13-in dragon, sakawlh leh zâwlnei der lo chhuak a hmuh thu a sawi hian Thupuan 13-a thil thlengte kha min kawhhmuh lêt leh a.  Thupuan 13-a a sawite hian châng 13 leh châng 14-ah a vâwrtâwp an lo thleng tan a, sakawlh pahnihna chuan thil mak tak tak tiin, “mihringte hmuh theih tûrin vân atangin mei a tlâktîr” hial a ni (Thupuan 13:13). Hêng a thiltihte hian Pathian leh Setana chu a inhmachhawntîr ta a, Pathian dik tak chibai bûktute leh “sakawlh lem” chibai bûktûte chu an inbei tawn ta a ni (Thupuan 13:14).

1 Lalte 18:1–18 chhiar la. Hetah hian Thupuan bûa kan hmuh tâwpna huna thil thleng tûrte tilangtu eng thil nge thleng?

Heta kan thil hmuh hi chiang taka indona ropui târlangtu a ni a. Elija hian an thu inchuh ber chu châng 18-ah hian târlangin, Israel mîte khân Pathian dân an hawisan a, chu mai pawh chu ni lovin, pathian lemte chibai bûkin a zui bawk. Mihringte chanchin kal tawh thlîr kîr ila, a lo lan chhuah dân chu eng pawh lo ni se, hemi tho hi thu inchuh chu a ni zêl tho lo vem ni?  Chibai kan bûka chu “vân te, lei te, tuifinriat te, tuihnâte Siamtu chu” (Thupuan 14:7) nge ni a, mi dang emaw, thil dang emaw zâwk? Thupuan 13-a kan hmuhah hi chuan mîte hian LALPA ni lovin, sakawlh leh a lem chu chibai an bûk zâwk a. Hemi thû-ah hian tuilâi rapa awm a theih loh. Pathian lamah kan tang a nih loh vêk chuan Setana lamah zâwk kan tang tihna a ni. Chumi tak chu an thu inchuh pawimawhna pawh a ni rêng a, a bîk takin Harmageddon indonaah phei chuan, Karmel Tlânga thil thleng kan hmuh ang khân, a inkâwlhkalhzia hi a lang chiang lehzual hlê dâwn a ni.

NINGÂNΠ                                                                          JUNE 21

HARMAGEDDON LEH KARMEL TLÂNG: Then 2-na

1 Lalte 18:18–40 chhiar la. Hemi tum hian eng thil nge thleng a, eng tin nge chu thil thleng chu a tâwp a, eng tin nge chu thil thleng chuan tâwpna huna indona ropuiin a vâwrtâwp a thlen huna thil lo thleng tûr chu a lo entîr le?

Karmel Tlânga inbeihna kha Pathian zâwlnei Elija leh Baala puithiam 450 zette inbeihna a ni a (sualin tha a tam hnehzia hi lo chîk ang che). Hê an inbeihna hi tu nge Pathian dik tak chu ni tih fiahna tûr a ni a—vânte leh leite Siamtu Pathian chu nge ni a, “dragon” nungchang pholangtu leh khawvêl bum a tumna hmanrua Baal zâwk chu (Thupuan 12:9).

Puithiamte chuan an hâlral thil hlan rawn kâng ral vektu mei rawn tîr tûrin Baala chu an ngên chiam a. Zîng kâr atanga chawfâk hun thlengin an âu a. Chutah Elija lah chuan, “Âu ring ta che u le. A lo muhîl reng te hi a ni lo maw?” tiin a lo ti-el vêl a (1 Lalte18:27). Â chhuih khawpin an bei zêl a. Chemtê te-a inzaiin, an taksa atang chuan thisen a chik chhuak zâwih zâwih mai a. Nî a lo thlang her a, tlâi lam inthâwi hun a lo thlen meuh chuan an beidawng ta a ni.

Elija hâlral thil thlan vê thung chu tuiin vawi thum lâi huh hnâp khawpin an leih a, mâichâm vêla tui luanna tûr an laih khuarahte chuan a lî lung bawk. Chutichuan, Elija chu tâwi tê-in Pathian hnênah a tawngtâi ta a. Pathian chuan rawn chhâng nghâlin, a hâlral thilthlan mai pawh ni lovin, thing te, mâichâm siamna lung te, leh vaivut nên lam a kâng ral ta vek a. Pathian dik tak thiltihtheihna chu Baala han khin phâk zia zâng a ni lo tih chu chiang takin a lo lang ta a ni.

Thupuan 16:13; 19:20, 21 chhiar la, chutichuan, hêng chângte hi Baala puithiamte chan nên khân khâikhin ang che.  Hetah hian eng nge kan hmuh?

Tûn dinhmunah chuan Harmageddon chungchâng hi a kip a kâwiin hre fiah kîlh kêlh lo pawh ni mah ila, a rah chhuah erawh chu kan hre tho mai: Pathian hmêlmâte chu tihboral an ni ang a, tin, Pathian leh a mi thianghlimte dikzia pawh pho lan a ni bawk dâwn a ni.

1 Korin 15:1, 2 chhiar la. A boruak leh chheh vêl hi Harmageddon nên chuan thuhmun ni lo mah sela, Paula thil sawi tak hi eng nge ni a, eng vângin nge chu chu keini tân hian, a bîk takin thil lo la thelng tûrte han thlîr hian, hriat reng a tûl le? Harmageddon chungchâng sawina Thupuan 16:15 pawh hi chhiar la. Hêng chângte hian eng nge min hrilh ?

ZIRTÂWPNΠ                                                                                 JUNE 22

NGAIHTUAH TÛR: “Harmageddon indona chungchâng sawina hmun tam takah, ransa leh nungcha râpthlâk pui pui leh thil thleng râp thlâk tak takte târlan niin, chûng chuan an nihphung âwm eng eng emaw chu a târlang thei âwm e. Kan hmuh tâk ang khân, chûng zînga pakhat chu Thupuan 16:15 thû:

‘Ngâi teh, rûkrû angin ka lo kal dâwn e; inringa puan veng chu a eng a thâwl e, chutilochuan saruakin a lêng ang a, a zahmawh chu an hmu dah ang e’ tih hi a ni. Hê thû, Bible-a hmun pakhat lai lâi taka awm, Harmageddon tih hming pawh a lanna ngei mai hian Thuthlung Thara châng tam takten Isua lo kal lehna leh tâwpna huna thil thlengte chungchâng an sawi chu a rawn tuihnih ve leh chiah a ni.

“A dang leh chu Thupuan 17:14 hi a ni vê thung a: ‘Chûngte chuan Berâm No chu an do rawn dâwn a; mahse Berâm No chuan—hotûte Hotu leh lalte Lal a nih avângin— anniho chu a hneh ang a; tin, a hnêna awm ve—koha te, thlana te leh rinawma te pawhin an hneh bawk ang’ (hei hi chu zirlai bu ziaktu lehlin dân a ni). Hê indona râpthlâk tak maiah hian hmanrua nêna mi dang beih vê tum miah lo, Pathianin a kohnaah leh a thlannaah erawh rinawm tum tlatte chu do rawn an ni dâwn a. Hê indona hi chu tûnlâi huna kan hriat than êm êm hnam thenkhatte leh hel pâwlhote pawhin an beih ang nên hi chuan inang lo tak a ni. Ka sawi fo tawh angin, Harmageddon indona hi chu rilru hmin zâwktu nih tum inbeihna a ni a. Thinlung luahtu zâwk nih tuma inbeihna—Berâm No talh tawha laka thinlung taka rinawm tûra kohna a ni (Thupuan 5:9, 10, 12; 13:8).”—Jon Paulien, Harmageddon at the Door (Hagerstown, Md.: Autumn House Publishing, a division of Review and Herald Publishing Association, 2008), p. 193.

SAWI HO TÛRTE:

Thupuan bûa thil thleng tam tak kan hmuhte hi a thlenna hmun a sawiah hian a tak takin a thleng dâwn nia ngaitûte hi eng tin nge i tanpui theih ang?

Chutianga a tak taka thleng tûr nia hrilhfiah chu a dik loh dân eng tin nge kan sawifiahsak theih ang?

Kan hmuh tâk ang khân, Babulon hûhâng chuan khawvêl zawng zawng hi a fan chhuak a. Babulon zirtîrna thenkhat chu engte nge ni a, chûngte chu eng tin nge kan lo hriat hran theih ang a, a lak ata eng tin nge kan inthiar fihlîm theih ang?

Thawhtanni zirlâia Ellen G. White-i thuziak kan târ chhuahah khân, “Kohhran leh khawvêl inzawmna hi Kristian kohhran hrang hranga a thlen famkim hmâ loh chuan Babulon tlûkna hi a famkimin a thleng rih lo vang” tih a sawi a. “Kohhran leh khawvêl inzawmna” tih tawngkam hi ngun takin ngaihtuah la. Hetah hian kan tâna vaulâwkna thu khauh tak eng nge awm le?