FSS ZIRLAI 12: BABULON LE ARMAGEDDON

ZIRLAI 12                                                        June 16-22

BABULON LE ARMAGEDDON

---

SABAT TLAI LAM:                                                     June 16

TUZARH SIAR DING: Thup. 14:8; Thup. 16:19; Isai. 52:9; Thup. 18:1-10; Thup. 16:12-16; I Siang. 18:1-40; I Kor. 15:1,2.

BIBLE CANG KEN: “A calah hmin pakhat an ngan ih, tican thup a nei. A maksak zetmi Babulon leitlun ih hlawhhlang hmuahhmuah le misual borhhlawh hmuahhmuah ih nu ti a si” (Thup. 17:5).

THUPHUAN bu sungah thlung hlun sungih tongkampawl le mizuk hmuihmelpawl an khat theh ti kha kan theihcia mi a si. Babulon hmin hi Thuphuan cabu sungah voi ruk a lang. Hi thu in hlanlai Nibukhanizar lal ram sim duhmi a si lo. Cui lal ram kha hlan lai leitlun thuanthu ihsin kum za tampi a liam zo mi a si. John in thutak a phuansuah mi ah thlung hlun sungih a tarlang mipawl a hmang. Himi thu ah Babulon ih ram khal mipi thuneihnak le sakhua thuneihnak in Pathian zumtupawl kha an hrem. Atui can netnak khalah cozah uknak thuneihnak le sakhuanak mipi thuneihnak in kha vek hremnak tuah dingin an hawl rero ti ah a ngan.

Armegeddon timi tongkam thawn a bangaw mi tampi kan hmu. Himi ih a tumtah mi cu thuphuan bu sung lawngah hmuh a si. Hebru tong ih (Mount of Megiddo) Megiddo tlangih doawknak sirhsan ih hmanmi a sinak a lang ih hlan lai Israel ram le a hmun a langter. Armageddon a umnak thuruah rero ahcun khatawk hmunah ralkap tampi a um ding tiah an ti. Megiddo kha lei can cem zikah a um leh ding.

Tuzarh cu Babulon le Armageddon thu kan zir ding. Cule himi hmuihmel langdan ziangvek a si ti Bible ihsin ziangtin so kan zir ding timi in sim ding.

THAWHSAL NI                                                          June 17

THINHENGNAK SABIT ZU HRIIM

Thuphuan 14:8; Thuphuan 16:19; Thup. 17:5; Thup. 18:2,10,21 siar aw. Thuphuan bu sungah Babulon thu voi ruk a ngan. Thlung Hlun sungih Babulon thu a rak nganmi ruat sal aw. Ni neta ih thil thleng dingmi thuthawn pehaw in Babulon thuah himi Bible cangpawl in ziangso in zirh?

Khawpi pahnih thuanthu Bible in in sim a si. Babulon le Jerusalem khawpi thuanthu an si. Bible sung hmuahhmuah ah Pathian ih thukam a pekmi miphunpawl hrangah Jerusalem khawpi din a si (Saam 102:21; Isai. 52:9; Isai. 65:19; Thup. 3:12). Babulon khawpi sungah langhngan ih Pathian dodalnak, sakhaw fehsualnak nun rawngih hremnak hmun khawlipi a si.

Thuthimnak ah Babel lungdawl kha ruat aw (Sem. 11:9). Hebru tong cun “Babel” hi ‘Babulon’ khawpi timi thawn a awsuah a bangaw. I Peter 5:13 sungah Babulon ih a ummi kawhhran hnenah kutkaihnak ca a ngan ih, a tlangpi ih a sim mi cu hlanlai khawlipi a siat theh zo mi tuisan Iraq ram thu a sim duhmi a si lo ti kha kan thei ko ding. Kawhhran hremtu ding Rome a sim duhmi a si. Rome-pawl ih hnatuandan Thuphuan cabu sungah mak zetih hmin pekmi a langter a si.

Thuphuan 14:8 le Thuphuan 8:3 siar aw. Pathian zumtupawl le leitlun mipawl parah Babulon that lonak in a zelbuai thu Bible cangin ziangso in sim?

Leitlun hmuahhmuah nasa zetih thatlonak a tuahmi in a suan theh. Thildang a tuahmi hmuahhmuah hi Babulon thiltitheinak ih suan theh mi ti ah Thuphuan ih a simmi hi mangbang ding a um lo. Kha mi thu kha “A taksa hiarnak (hurnak) Sabit zu” tiah Thuphuan 14:8 a ti. Hihi a dik lomi thurin zirhawknak a sim duhmi a si. Zirhnak sual, thil tha lo tuahnak le a netnak ih a tuar dingmi tla a hnen thotho in a ra thleng. Babulon hi thil tha lo tuah dingah mi hnekhrimtu a si ih, miphun hmuahhmuah parah a tuah ringring (Thup. 18:3). Curuangah anmah vekih thatlonak tuahtu si lo dingah mi hmuahhmuah fimkhur kan tul.

Tui san khawvel hi zoh hnik, hrokhrawlnak, buainak le rukawknak in a khat theh. Jesuh le a thunung pawk ringring ih kan um a tulnak ziangthu so in zirh?

TLAWNGKAI NIKHAT                                               June 18

BABULON A TLU ZO

Babulon sualnak hi leitlun hmuntin ah a thleng. Cumi cu lei can cem tiang a um ding tiah Thuphuan bu in a sim.

Thuphuan 18:1-10 siar aw. Babulon khaw ropi thu ziangso a sim?

Vancung mi pahnihnak thucah (Thup. 14:8), Babulon a siat zo timi kha Thuphuan 18:2 ah a simsal. A tuahmi that lonakpawl kha a tuahmi vek cekci in a parah a thleng ding tiah a sim. Bible in kan Bawipa a rat zikah

Setan in a thiltitheinak hmuahhmuah hmangin mangbangza hminsinnak a tuah ding ih, mi a bum ding.

Bum ol mi dik lopawl, thutak ngaina lopawl rundam nan si thotho ding tiah a bumnak aw nem kha thutak ah ruatih kaihngettupawl in an zum ding (2 Thess. 2:9-11). Hi thu hi kawhhran le cozah uknak komaw in Khrih ram an din tikah a famkim in a thleng ding. Cu tik lawngah a taktak in Babulon siatnak a thleng ding. Thuphuan 14:8 hi hi a ralai dingmi thil a si ih, thanso duh ruangah a thleng dingmi a si.

Hi thil hi ziangtik ah a thleng ding ti theitu cu Pathian lawng a si. Babulon in a nasa zetmi sualnak a tuah ruangah Pathian thuthennak nikhat ni ah a tong ding tiah Bible ih a simmi kan thei. “A sualnak cu van a thleng ih, a thatlonak Pathian in a cing ringring” (Thup. 18:5). Hi thu fehdan hi Thlung Hlun ih a um zo mi hlanlai Babulon Pathian thuthennak a tongih a siat theh vekin ni neta ih thil thleng ding mi a langternak a si (Jer. 51:9).

Hi mi thuthennak hi rinlo paralih a ton dingmi a si lo (Dan.). Bible cang tampi ah fiang zetih a simmi cu, mi hmuahhmuah in an tuah mi anmahten Pathian hmai ah an phuang ding (Ezek. 7:8) timi ah Babulon tla a tel. Khrihfapawl hrangah hnangamthlak zetmi thil pakhat cu cui thuthen ni ah kan ai-awh in thu in relsaktu palai kan nei (I John 2:1; Dan. 7:2). Babulon thuzirhnak pomtupawl thu ah amah thawn danglamnak a um lo ding.

Pathian in mi hrokhrawlpawl le sualnak a tuahtupawl kha a tu ah dan tat loin a zuah ih ni neta ah an tuahmi sualnak vekin a rulsal leh ding timi thu in ziangtin so na hnemawk thei?

TLAWNGKAI NIHNIH         June 19 ARMAGEDDON

Thuphuan bu hi Khrihfa mi tampi in an theithiam lo nan, Armageddon timi tongte cu an uar zet (Thup. 16:16).

Leilungpi le leitlun nunphung tla hi ni netabik buainak tong dingmi a si. Hollywood zuknung an tuahmi ah Armageddon hi arsi tumpi asteroid in leilungpawl siatsuahnak a tuah ding mi thu a si. Leitlun mi hmuahhmuah khalin lei can cemnak hi an thinlung ih an pommi a si.

Khrihfa tampi in Thuphuan bu sungih a simmi vekin Armageddon hi lei can cem zik zawngah nisuahnak ram laifang (Middle East) ah doawknak a um ding tiah an zum. Cangan mi pakhat ah Asia ihsin million 200 ralkappawl hi Israel nitlaknak ram hmuahhmuah neh thei dingah a um tiah an ngan. Armageddon ral donak hi netabik doawknak a si dingih, doawknak hmun bualrawn cu Megiddo timi hmun hrawngah a si ding tiah an zum. Himi hi leitlun ih doawknak le hmuntin ih a ummi leitlun ukawknak hrekkhatpawl in hnget zetin an pom.

Bible simdanpawl thawn cun an danglamaw zet a si. Bible simdan ahcun Armageddon hi lei le van doawknak tawpkhawk a si dingih miphun pakhat le pakhat doawk buainak a si lo. Sakhua doawknak a si ih, sumdawnnak le ramkhelnak a si lo. Asinan, sumdawngpawl le ramkhelpawl tla himi ah an tel thotho ding.

Thuphuan 16:12-16 siar aw. Himi cang pakhat lawngin Armageddon thu ziangtin so kan zir thei ding?

(1)Himi hi thuthimnak tongkam ih hmanmi men a si. Butlak bangtuk a simi thlarau borhhlawh kha rulhreng ka sugin Profet deu ka sungin sahrang ka sungin a suak (Profet deu timi kha lei ihsin a suakmi sahrang a sim duhmi a si (Thup. 13:11)). Hitawk ih khawse thlarau timi hi doawknak mak ah (Thup. 16:14). Pathian ih ni sunglawi ni ah do dingin a pok. Leitlun pumhuap in Bawi Khrih le Setan doawknak hi Armageddon timi a si. A tui Iraq ram sehvel kha Thuphuan ih a simmi Babulon a si lo ih, Armageddon tla Megiddo tlang kiangkap hrawngih doawknak a si lo ding.

Thuphuan 16:15 siar aw. Hitawk ih thil thlengmi lakah Jesuh in thuthangtha thucah in thazang in pek ih, ziangtluk ih duhnung mi so a si. A ratsalnak ah a dingfel thianghlimnak ih thuamaw dingih thukam mi kan si. Thlarau lam raldonak ah kan tel ve timi theithiam dingah himi in ziangtin so in bawm?

TLAWNGKAI NITHUM                                              June 20

ARMAGEDDON LE KARMEL TLANG (THEN 1)

Armageddon doawknak timi ziangso a si? A hmin umdan ahcun Megiddo tlang timi a si. Cumi kiangah tlangdang a um lo ih, cutawk ihsin hla lote ah Karmel tlang a um. Curuangah Bible tlawngtapawl in Megiddo tlang hi Karmel tlang a sim duhnak a si an ti.

Bible tlawngtapawl in Elijah le Baal Profet-pawl Karmel tlangih an zuamawknak kha Thuphuan 13 ih phuanmi khihhmuhnak a si an ti.

Mizan ah Thuphuan 16:13 ih thu kan zir mi vekin rulhreng, sahrang le Profet deu a langter mi kha Thuphuan 13 ih thumkom Pathian lem zirlai 9-nak ah kan zirih a ra thleng dingmi khihhmuhnak a si.

Thuphuan 13 ih thu kha Thuphuan 13:13,14 in a cem tiangin a rel. Sahrang pahnihnak in midang hnakih thuneihnak a neih mi in mangbangza “mipi mithmuh ah van ihsin meisa a tlakter ding” (Thup. 13:13). Himi hi Pathian le Setan hmaiton ih doawknak, Pathian dik biaknak le sahrang biaknak ih doawknak a si.

1 Siangpahrang 18:1-18 siar aw. Himi thuanthu ah thil cangmi ziangso a um? Kha mi in Thuphuan cabu sungih can netnak thil thleng dingmi a langter ih, a phuanmi ziangso a si?

Do-awknak mak phun tampi ih kan hmuh theinak dingah fiangfai zetih langternak a si. Elijah ih thusimmi kha a tluangtlam zet (I Siang. 18:18). Mipipawl in Pathian thukhaam le a dikmi Pathian biak kha an dungtun ih a dik lo mi Pathian an biak. Himi thil tuahdan hi a tlaitluan ih tuah ringring dingmi a si lo. Thatlonak hi sankhat hnu sankhat thuanthu sungah a lang ringring ih ngaihsak loih um men ding kan si lo. Lei le van tifinriat le cerhti put le tidai a sersiamtu kan biak maw? (Thup. 14:7). A si lole mi pakhat maw, thil pakhat khat so kan biak? Thuphuan 13 ih thu kha thil a cangmipawl phuannak a si. Mipipawl in Pathian nung hnakin sahrang le a lem an biak sawn. Himi thil ah tanlam neih loih um a theih lo. Pathian lamih kan tan lo le Setan lamah a tangmi kan si. Himi hi a poimawh zet. Karmel tlangih thuanthu ah felfai zetin kan hmuh vekin a tu ih Armageddon khal a si ding.

TLAWNGKAI NILI                                                     June 21

ARMAGEDDON LE KARMEL TLANG (THEN 2)

1 Siangpahrang 18:18-40 siar aw. Thil thlengmi ziangso a um? Thuanthu a cemnetnak ziangvek so a si. Can cemnak ah doawknak mak tahthimnak tha zet kan neih theinak dingah himi thuanthu ih thil thlengmi in ziangso a langter?

Karmel tlangih doawknak kha Pathian Profet Elijah le Baal puithiam 450 rualpawl doawknak a si (thatnak lam hnakin that lonak lamah minung ziangtluk in so an tam timi hminsin aw). Hi hmunah lei le van sersiamtu Pathian dik zo a si timi fiangten a langter. Leitlun hmuahhmuah bum thehtu rulhreng lole Baal kan ti mi (or) Pathian ngai kan ti ding (Thup. 12:9).

Baal puithiampawl cun cawcang thawinak kangfai theh dingah Baal Pathian hnenah meitlakter dingin an aw neih suahin sun hnu tiang ring zetin thla an cam. Ringpi au hrih uh, nan Pathian a itthat si pei maw tiah phirsit in a ti (I Siang. 18:27 NKJV). Puithiam-pawl in an lu zing theh tiangin an au ciamco. Tlai lam raithawinak can a thlen tikah beidong le vansang in dung an sip.

Elijah tuahmi Biaktheng kha ciap theh koin voi thum tiang tidai an toih ih, a kimvel ih khur laihmi khal a khat liam theh tiangin an toih. Elijah in Pathian hnenah tluangtlamten thla a cam. Hmakhat teah Pathian in mei a run thlah ih biaktheng lungdawl mi le leilung sung tiang in a kangfai theh. Baal pathian le Pathian ngaingai thiltitheinak zuamawknak kha palh thei loih a lang fiangmi a si.

Thuphuan 16:13; Thup. 19:20,21 siar aw. Baal Profet pawlih an tonmi thawn zohthim aw. Kan hmuhsuak mi ziangso a si?

Kan theihthiam thei lo mi Armageddon thu ah ruahnak ziangso in pek? A tu khalah Pathian ral hloral ding mipawl kha Pathian ih thiam coter mi mi thianghlimpawl hnakin an tam sawn.

1 Korin 15:1,2 siar aw. A rei hlanah a thleng dingmi Armageddon an danglamawknakpawl in ziangtin so in sim? A r alai dingmi canah tleunak kan ngah mi kilhim theinak dingah kha mi kha ziangah so kan theih ringring a tul. Thuphuan 16:15 khalah Armageddon kha fiangte ih a simmi kan hmu. Himi cangin ziangso an tuah tlang dingmi a si tiah in sim.

TLAWNGKAI NINGA                                                 June 22

123    124

RUAH BET DING: A tawinak in sim sehla, Armageddon a ral hi hmun tampi ah sersiam mi thilpawl ih mawinak, siatnak pawl kha a milai ih sinak ah a takin a lang. Cumi lakih kan hmuhmi pakhat cu Thuphuan 16:15, fifir bangin ka ra ding, mipi hmaiah tak lawng le ningzak ih nan um lonak dingah itthat loten a hnipuan a fingkhawitu cu mi lungawi an si (NIV). Hi mi cang hi Armageddon kan timi a

takih a thlennak hmun pakhat a si. Thlung Thar hmun tampi ah Jesuh ratsalnak dingah le can netnak thil thleng dingmi hrangah pumpak in timtuahawknak dingah a si.

Thuphuan 17:14 hi cang danglam zet pakhat a si ih, himi ah tuufa thawn an doawk dingih tuufa le a kawhmi mi thianghlimpawl in an neh ding (cangantui lehlindan). Ziangahtile amah cu Bawi hmuahhmuah lakih Bawibik siangpahrang hmuahhmuah lakih siangpahrang a si. A nasa zetmi ral doawknak ah meithal hriamnam ih thatawknak a si lo ding. Anmah kotu le hriltu hnenah rinumnak sawnin a si ding. Himi doawknak hi tuilai tapungpawl in cozah an donak thawn a bangaw lo.

Armageddon ral kan simsal ahcun thinlung buainak thu a si. Himi ral donak hi thinlung khuaruahnak thuthen catnak a si ih, thah ih a ummi tuufa lamah thinlung pekih doawknak a si (Thup. 5:9,10,12; Thup. 13:8). (John Paulien, Armageddon at the Door, Hager Stown, Md: Autum House Publishing, Advision of Review and Herald Publishing Association 2008) pp. 193.

RELTLANG DING:

1.     Thuphuan cabu sungih tarlan mi vekih thleng famkim dingah zumtupawl kha ziangtin so na bawm thei ding? Khavek hrilhfiah dan kha a hman lomi a si ti theifiang dingah anmah bawm dingin ziangtin so na pan thei ding?

2.     Babulon ih thuneihnak kha lei killi a luah khat thehti kan thei zo. A thuzirhnak ziangpawl so a si? A thuzirhmi kan hlon dingmi ziangpawl so a si tiah na hmuh?

3.     Tlawngkai ni khat ni ah E.G White ih a nganmi : “Athleng hrih lo mi kawhhran le leitlun uknak komaw ih Khrihfa cozah uknak an din ding: Cutik ah Babulon cu famkimten a siat ding” tiah a simmi kha Kawhhran le cozah uknak an komaw timi thu kha ruat aw. Kan hrangah ziangtluk ih fimkhurnak ding thu so in sim?