ZSS LESSON 6: A KIKHEL THUKHAM

LESSON 6                                                                              May 5 – May 11

A KIKHEL THUKHAM

NIPI NITAK

Tukal sung sim dingte: Rom. 8:1; 7:15-25; Rom. 7:1-14; John 20:19-23; Acts 20:6,7; Dan. 7:23-25; Rev. 13:1-17.

LAI SIANGTHO BULPHUH: “Amah in Sang Penpa langdona kam pau dinga a misiangte nengnia min a kisehsa hun le upadite khek ding a hanciam ding hi.  Ama tungah kum khat, kumnihleh kum lang sung misiangte a kipia ding hi” (Daniel 7:25, ZIV).

Hun nunung thupiangte teltheih na ding thupi khat in Pasian thukham tawh kisai thu ahi hi. Akician zaw in, thukham lina ahi ni sagih Sabbath thu ahi hi. Upna bek tawh gupkhiatna kingah hi a, Sabbath tanna zong ahi thukham zuihna in gupkhiatna hong tunlo cih i tel mah bangin, hun nunung ciangin ni sagih Sabbath a kihel Pasian thukham manna in cihtakna taktak kua tungah om cih a pualam lahkhiatna, ciaptehna cih thu zong i tel hi.

Mangmuhna 13 leh 14 ah hong kilah bangin hun nunung biakna khempeuh, kumpi ukna nei khempeuh kipawlkhawm in biakna maanlo zuih ding zawhthawh thu tawh leitung a om khempeuh a kisawl hun ciangin hih kilamdanna kilangh diak ding hi.Tua in bang sawlna in Rev. 14:7 a Pasian mite vantung le leitung leh tuipi leh tuinak te a bawlpa biak ding sapna tawh kilehbulh ahi hi. Kua mah dang hilo Piangsakpa bek biak ding ahi hi.

Tu kal kal sung Pasian thukham, a diak in Sabbath thu, leh khelding aki hanciam tua thukham leh beina hun nai a nungta eite a ding bang khiatna nei cih i sin ding hi.

SUNDAY                                                                                                  May 6

KAMCIAM

Lai Siangtho ah kamciam lianpite lak ah khat Rom. 8:1 ah kimu thei a tua in, “Tua ahi manin ci le sa deihna bangin nungta lo in, kha tawh a nungta Christ Jesu sunga omte a dingin tu in mawhpaihna a om kei hi.” Paul in hih kammal a genma in bang gen cihthu sinna bek tawh hih kamciam leh lametna diktak lenkip thei pan ding hi hang.

Rom. 7:15-25 sim in. Hih lai a Paul kammal laigil bang pen in Rom. 8:1 ah a gen thu kiciansak hiam?

Thu-um mikhat ahihna tawh Paul in hih thu a gen maw hilo cih Christian lak ah kinialna tampi om khinzo a, a kitel mahmah thukhat in, Paul in mawhna pianzia dik a gen ahihna kimu hi. Mi khempeuh in hih lai a Paul gen mawhna zawhna ding buaina neikim ciat kha ding hi.Amau sunga om mawhna i kaihna khauh lua ahih manin ci le sa lunggulhna zui in sep huailo thei napi sem kha veve leh sephuai thei napi semlo cih a tuak khalo a om diam? Paul a dingin, a buaina in thukham hilo a, ci le sa lunggulhna ahi hi.

A maan sem nuam napi a maanlo sem kha zel hilo i hiam? Paul in a piangthak Christian khat nuntakna ah mawhna tawh kipelh theilo hi cih hong genlo ahih hangin, Pasian thu a mang nuam den khat a dingin kibuanna om den ahihna khauhtak hong theisak nuam hi.

Tua hi a, i zak mun mahmah kammal hong gen hi, “Hingim na zen ing e! Hih sihna pumpi pan in kua in kei hong honkhia ding ahi hiam? (Rom. 7:24, ZIV).Jesu sungah dawnna mu a, kamciam hoih ahi hehpihna hangin Kha tawh a nungta Jesu a um te a dingin “mawhpaihna omlo” cih ahi hi. Hi mah hi, thu-umte suahtak ding kipeek uh hi; Ze-etna zong thuak uh hi; Mawhna zong phuahtawm thu hilo a, om takpi hi. Ahi zongin, Jesu upmuanna tawh, a um mite thukham in mawhpaih nawnlo ding a, amaute in zui taktak ding hi. Tua hi a, amaute in “ci le sa deihna bangin” nungta nawnlo in kha sungah kalsuan ding sin ta ding uhhi.

Tuni a i Lai Siangtho mun sim kik in. Tua lai ah Paul kammal in nang nuntakna tawh ki bangci zop hiam? Bang hangin Rom. 8:1 in a kamciam hoih khat hi thei hiam?

MONDAY                                                                                                May 7

THUKHAM LEH MAWHNA

Zanni in Rom. 7:15-25 sungah Christian te zong kihel mi khempeuh a ding mawhna pianzia dik i sin khin hi. Ahi zongin, tua madeuh in, mawhna siathuaizia leh thahatzia honglak ahi thukham thu hong gen hi.

Rom. 7:1-14 sim in. Thukham leh mawhna ki bangci zop hiam? Hih Lai Siangtho mun ah thukham tawh gupna kingah theilo ahihna hong bangci gen hiam?

Hih lai ah a thupi nih Paul in hong gen hi. A khatna ah, thukham pen buaina hilo hi. Thukham in “siangtho, thutang, leh hoih” hi. Sihna hong tun mawhna hi a buai huai. A nihna ah, mawhna leh sihna panin thukham hong honkhia zolo cih thu hi. Thukham in mawhna leh sihna buainate hong lak a, teltak in mawhna leh sihna buainate a lah theih hangin buaina vengsak na ding bangmah piak theih neilo hi.

Hih Lai Siangtho hoihtak kantello aa a tungtham ciangbek a sim mi khat in thukham ahi Thupiak Sawmte kibeisak ta hi ci thei ding hi. Paul gen tawh kilehbulh lian hi. Thukham kibeisak hi zenzen leh hih lai a Paul gente in khiatna neilo ding hi. Thukham in mawhna bang hiam cih honglakcianginlungdamna thu hong kisamsak ahih manin thukham in hong len lai hi cih thu a gen ahi hi. “Tua hieh bang i gen ding hiam? Thukham pen awhna ahi hiam? Hi zenzen lo hi. Thukham tungtawn hi kei leh mawhna bang hiam, cih ka thei kei takpi ding hi. Ahang in, tukham in ‘deigawh kei in’ na cilo hileh deihgawh kici bang cihna hiam cih ka thei kei ding hi” (Rom. 7:7, ZIV).

Rom. 7:13 kidawm takin sim in. Thukham bek gen hilo in banghang in kisam lai cih thu Paul in hong gen bang om hiam?

Thukham in sihna tun lo a, mawhna in tun hi. Thukham in mawhna a lauhuai zia hong lak hi. Thukham mawhna hong theisak ahih manin hoih hi. Mawhna a ding dawnna pia theilo bek ahi hi. Lungdamna thu in dawnna pia thei hi. Christ sungah gupkhiat ngah ahi Christian khat a dingin, kha a nuntakna thak sungah kalsuan ding Paul hong gennop ahi hi (Rom. 7:6).Tua in, Jesu kizom in upmuanna tawh nungta aa, Ama hoihna leh tatkhiatna dingin Jesu dikna muang ding ahi hi.

Na thukham zuih zawhna in Pasian hehpihna na kisap lam hong bangci muhsak hiam?

TUESDAY                                                                                                 May 8

SABBATH PAN SUNDAY?

Seventh-day Adventist khat hihna tawh, sanggam pawlpi dangte in thukham bei ta hi, ahikeileh, thukham nuai hilo in hehpihna nuai ah omte hi hang a cihna i zan mun mahmah hi. Hih thu a genloh uhhangin, amau gen taktak en lehang, thukham lina bek a beisak uh ahi hi.Amau gen na ah, ni sagih Sabbath pen Jesu thawhkikni pahtawina in ni masa ni tawh kilaih zo ci uh hi.

A gen uh maan hi cih alahna ding uh Lai Siangtho mun zong om cih zong um uh hi. Hih a nuai a Lai Siangtho munte in ni sagihni panin ni masani ah akilaihna thu alak munte hi ci uh hi. Eit in i sim kawmin, ni kilaih thu a gen takpi hiam, (ahkl) kilaihna a gen hilo in tua ni a thupiang khat a genna hi lel hiam cih ei le ei kidot ding kisam hi.

John 20:19-23 sim in. Inndei sungah nungzuite akikhopna uh banghang hiam? Pawlkhat te cih bangin Jesu thawhkikni pahtawina in biakpiak kikhopna hi le hilo hong bangci gen hiam?

______________________________________________________

Acts 20:6, 7 sim in. Hih mun ah Sabbath pen ni masani ahi Sunday ah kilaih cih thu genna a nei hiam? Sawltak 2:46 zong sim in.

__________________________________________________________________________

1 Corin. 16:1-4 sim in. Nipi kal ni masa ni in amau inn ciat ah sumpi kaihkhop ding cih simloh, Sabbath pan Sunday kilaihna thu hong hilhna a om hiam?

__________________________________________________________________________

Ni sagihni Sabbath tangin Nipi kal ni masani in biakpiakna kibawl cih upna hih te pan hong pai ahi hi. Thu tuamtuam hang tawh ni masani in thu-umte kikaikhawm uh cih a om hangin, hih kikaikhopna in ni sagih Sabbath laihna biakpiakna ahihna munkhat beek ah genna omlo hi. Hih nialna in kum zalom tampi Christian te in Sunday a tanna uh ngeina hang bek ahi hi. A om ngeilo khat matlap in Lai Siangtho ah bulhtawm thu hi lel hi.

WEDNESDAY                                                                                         May 9

THUKHUN THAK SUNGA NI SAGIHNI

Zanni sinna ah i muhsa bangin, Sabbath pan Sunday laihna Lai Siangtho munte ah amau cih bangin genna omlo cih ithei hi. A taktak in, Thukhun Thak sung a ni sagih Sabbath tawh kisai genna te in Pasian Thupiak Sawm lak ah khat hi a zuih kul lai cih hong tellah hi.

Luke 4:14-16; 23:55, 56 sim in. Hih munte in Jesu sihma leh sihkhit ni sagihni Sabbath thu bang hong gen hiam?

Christ nungzui numei te in “thupiak om bangin Sabbath ni tawlnga” (Luke 23:56) cih thu ngaihsun in. Tua thupiakin Sinaiah suangpeek tawh kipia thupiak lina ahi hi.Sabbath thupiak kihel Pasian Thupiakte zuih ding cih Jesu tawh a om lai un sin uh cih hong lak hi. Diktak in ci le hang, Christ in a nungzuite kiangah, “Kei nong it uh leh kong thupiakte na mang ding uh hi” (John 14:15, ZIV) ci hi. Amah ngiat in a zuih a thupiakte lakah ni sagihni Sabbath zong kihel hi. Sunday in Sabbath laihna hi leh, hih numei te in na thei kha kei si uh e.

Acts 13:14, 42-44; Acts 16:12, 13 sim in. Ni sagihni Sabbath zuihna tawh kisai hih mun ah bang thubelh om hiam? Nipi kal ni masani zuih ding tawh kisai bang thubelh om hiam?

Hih lai ah Sunday pan Sabbath kilaihna matlap ding thubelh i mu kei hi. Tua sangsik in, thu-um masate in ni sagihni Sabbath akepcing na uh kisiangmuh zaw behlap hi.

Acts 16:13 in lungluthuai mahmah hi, ahangin, biakna inn lo mundang ah thupiang ahih man hi. Pawlkhat in thu a nget zelna mun gungei ah thu-umte kikhawm uh hi. Tua ni in ni sagihni Sabbath ni hi a, Jesu sih zawh kum tampi khit hi lai hi. Sunday ah kilaih hi leh, hih mun ah hong gen kei si e.

Thudam leh mawhsakna kihello in bang lampi te tawh Sunday tangte tungah ni sagihni Sabbath thu teci pang thei ding na hiam?

THURSDAY                                                                                           May 10

KHEL DING KIHANCIAM SABBATH

Pasian’ thukham ai Thupiak Sawmte tu dong om lai a (James 2:10-12), tua thukham lak ah ni sagihni Sabbath kihel hi. Tua hi na pi, Christian tampi te in Lai Siangtho diksakna omlo pi in bang hangin Sunday tang uh hiam?

Daniel 7 in gam lianpi li ahi: Babylon, Media-Persia, Greece leh a tawpna gam lianpi ahi Rome te hong khankhiat ding gen hi. Roman gampi ukna nunung lam ah, kineu vangliatna tua kumpi gam pan hong khangkhia ding cih zong hong lak hi. Roman kumpi ukna pan mah hi a, a nunung lam bek ahi hi. Rome pan in hong khangkhia tu dong a om pope ukna (papacy) lo tua bang ukna a dang omlo hi. 1600 kiim lai in Thomas Hobbes in a gelhna ah: “Mi khat peuh in hih pawlpiukna huzaap (ecclesiastical dominon) kipatna ngaihsun taktak leh olno takin mu thei ding hi. Tua in, a han tungah kumpi lukhu khu aa a tu a sisa Roman kumpi gam (Roman Empire) i kha/sikha (ghost) ahi pope ukna (papacy) lo a dang omlo hi.” – Thomas Hobbes, Leviathan, (Oxford: Oxford University Press, 1996), p. 463.

Daniel 7:23-25 sim in. Sunday biakna kipatna tel theihna dingin hih mun in bang hong hilh hiam?

Daniel zat kammal bul ahi Aramic kam ah kineu vangliatna in thukham khel ding “geel/ngim” ci hi. Bang leitung vanliatna in Pasian’ thukham khel zo takpi ding hiam? Khangthu sungah a neng a tawng in a kitelloh hangin, pope makaih Rome khutnuai ah ni sagihni Sabbath tanna pen Sunday tanna ngeina tawh kikheng a, tu dong mah Protestant puahphate na ngawn in tua ngeina zangsuak lai cih i thei hi. Tuni in, Protestant a tamzaw in Lai Siangtho hilhna ni sagihni thupiak manglo in nipi kal ni masani tang zaw uh hi.

Rev. 13:1-17 leh Daniel 7:1-8, 21, 24, 25 etkaak in. Ni nunung thupiangte tel theihna ding a kibang limzat bangte om hiam?

Pope ukna kihel Rome ukna nunung lam thute ahi Daniel sunga a gente lian mah zangin Mangmuhna (kilaakna) thubu in hun nunung ah tua vangliatna in a sawl bang biakna a zui nuamlo te bawlsiat ding thu hong gen hi.

Rev. 14:6-7, a diak in 7 na in thupiak lina bang ci kilangsak a (Ex. 20:11) tua in hun nunung a biakna thu ah Sabbath thu poimawh ahih na hong bang ci lak hiam?

FRIDAY                                                                                                   May 11

NGAIHSUT BEH DING:Vantung ah Pasian tawh gal kido tua gulpi ahi Satan (Rev. 12:7) in leitung ah Pasian mite ahi “Pasian thupiakte a zuite” gal in do hi (Rev. 12:7; 13:2,4). A taktak in, Satan mahmah biak ding hi ding hi (Rev. 13:4). Satan in vantung ah a pat Pasian dona gal leitung ah zom suak hi. A dona bulpi pen in Pasian thukham dona ahi hi.

“Thupiak lina sungah, Pasian pen vantung le leitung Piangsakpa hihna hong lak a, pasian maanlo dangte tawh kilamdangsak hi. Piansakna thu phawkna hi a ni sagihni pen mite khawl ni dingin kisiangtho sak hi. A nungta Pasian in hinna bulpi leh zaktak le biak ding ahihna thu mihingte in a lungsim vuah a koih det ding geelna ahi hi. Mihingte Pasian tungah a cihtakna uh leh Ama thukham zuihna panin Satan heikhia ding hanciam a, Pasian in Piangsakpa ahihna alak thupiak teek mah do in nei hi.” – Ellen G. White, The Great Controversy, laimai 53, 54.

Pasian pen vantung le leitung a Piangsakpa ahih manin eite in i biak hi. Ni sagihni Sabbath in Ama piansakna ciaptehna ahi hi (Gen. 2:1-3). Pasian zaneihna a dona ah ama zaneihna ciaptehna ahi ni sagihni Sabbath a do pen lamdang lo mah hi.

Ni nunung ciangin, Pasian in mi pawlkhat – Ama tungah a citak, a dingkip mi, tua cihtakna Ama thupiakte – Piangsakpa leh biak ding kilawm amah bek ahihna alak thupiak kihel thupiak vekpi in zuihna tawh cihtakna a lak mi nei ding hi.

KIKUP DING DOTNATE:

1.    Mawhna a taktak ahihna gen napi thukham beicihna ah bang buaina om hiam? Tua bang ngaihsutna inthukiplo kikhel themthum ahihna bangci lah ding na hiam?

2.    Sabbath tangin Sunday a cite tawh kinialna nanei hiam? Bang nialna te zang a, bangzah lawhcing hiam? Ni sagihni Sabbath tanna in sepna tawh gupkhiatna ngahsawm cih thu bangci dawn ding na hiam?

3.  Sabbath thu genna leh hun nunung thupiangte ading kiginkholh na dingin “sapi ciaptehna” hong tung nailo ahihna theih ding banghangin thupi hiam?